NUSƆSRƆ̃NYATI 34
‘Yi Edzi Nàzɔ Le Nyateƒea Me’
“Yi edzi [nàzɔ] le nyateƒe la me.”—3 YOH. 4.
HADZIDZI 111 Nu Si Ta Míekpɔa Dzidzɔ Ðo
NYA VEVIAWO *
1. Ne míeɖoa dze tso nu si ʋã mí míeva xɔ nyateƒea ŋua, aleke wòɖea vi na mí?
“ALEKE nèwɔ xɔ nyateƒea?” Ànya ɖo biabia sia ŋu zi geɖe, elabe ne míedo go nɔviwo zi gbãtɔa, wobiaa nya ma tɔgbi mí. Míedina be míase nu si ʋã mía nɔviwo wova xɔ nyateƒea, eye edzɔa dzi na míawo hã be míagblɔ nu si tae míelɔ̃ nyateƒea ɖo na wo. (Rom. 1:11) Dzeɖoɖo siawo tɔgbi nana míeɖoa ŋku ale si gbegbe wòdzɔa dzi na mí be míenye Yehowa Ðasefowo la dzi na mí. Wonana míegaɖonɛ kplikpaa be ‘míayi edzi anɔ nyateƒea me,’ si fia be míanɔ agbe wòadze Yehowa ŋu eye wòayra mí.—3 Yoh. 4.
2. Nu kawo mee míadzro le nyati sia me?
2 Le nyati sia mea, míaƒo nu tso susu siwo tae míelɔ̃ nyateƒea la dometɔ aɖewo ŋu. Eyome míakpɔ ale si míate ŋu aɖee afia be míelɔ̃ nyateƒea. Numedzodzro sia ana míagada akpe na Yehowa geɖe be ehe mí va nyateƒea me. (Yoh. 6:44) Ana hã be míagadi vevie be míagblɔ nyateƒea na amewo.
NU SI TAE MÍELƆ̃ NYATEƑEA
3. Nu kae nye susu vevitɔ si ta míelɔ̃ nyateƒea?
3 Míelɔ̃ nyateƒea le susu vovovowo ta. Gake susu vevitɔe nye be míelɔ̃ Yehowa Mawu, Ame si gbɔ nyateƒea tso. Eƒe Nya, Biblia, fia mí be Yehowa nye Mawu Ŋusẽkatãtɔ si wɔ dziƒo kple anyigba. Gake efia mí hã be enye mía Fofo si le dziƒo si lɔ̃ mí eye wòléa be na mí vevie. (1 Pet. 5:7) Míenyae be mía Mawu la nye “nublanuikpɔla kple veveseɖeamenula, ame si medoa dziku kabakaba o, eye eƒe lɔlɔ̃ si nu metsina o kple eƒe nuteƒewɔwɔ sɔ gbɔ.” (2 Mose 34:6) Yehowa lɔ̃a nya dzɔdzɔe. (Yes. 61:8) Etena ɖe edzi ne míele fu kpem. Ele klalo eye wòdi vevie be yeaɖe fukpekpe ɖa keŋkeŋ le ɣeyiɣi nyuitɔ dzi. (Yer. 29:11) Esia ana míakpɔ dzidzɔ ŋutɔ! Míelɔ̃ Yehowa vevie ɖe esia ta!
Biblia Tsɔ Nyateƒea Sɔ Kple . . . Seke
Ale si ko seke léa tɔdziʋu ɖe tea, nenema kee míaƒe mɔkpɔkpɔa léa mí ɖe te le nɔnɔme sesẽwo me. Biblia me nyateƒea ʋãa mí be míaƒo nu tso míaƒe mɔkpɔkpɔa ŋu na amewo (Kpɔ memama 4-7 lia)
4-5. Nu ka tae apostolo Paulo tsɔ míaƒe mɔkpɔkpɔa sɔ kple seke?
4 Susu bubu si ta míelɔ̃ nyateƒea ɖoe nye be eɖea vi na mí. Bu Biblia me nyateƒe siwo ku ɖe míaƒe etsɔmemɔkpɔkpɔa ŋua ŋu kpɔ. Apostolo Paulo ƒo nu tso ale si gbegbe mɔkpɔkpɔ ma le vevie ŋu. Egblɔ be: “Mɔkpɔkpɔ sia le mía si abe seke ene na míaƒe luʋɔwo, kakaɖedzi le eŋu, eye wòli ke.” (Heb. 6:19) Ale si ko seke léa tɔdziʋu ɖe tea, nenema kee míaƒe Biblia me mɔkpɔkpɔa léa mí ɖe te le nɔnɔme sesẽwo me.
5 Paulo nɔ nu ƒom tso dziƒoyiyi ƒe mɔkpɔkpɔ si ŋu Kristotɔ amesiaminawo dea asixɔxɔe la ŋu. Gake eƒe nyawo ku ɖe Kristotɔ siwo le mɔ kpɔm be yewoava nɔ agbe tegbee le paradiso me le anyigba dzi hã ŋu. (Yoh. 3:16) Ɛ̃, esi míeva srɔ̃ nu tso mɔkpɔkpɔ si le Biblia me be míava nɔ agbe tegbee ŋu taa, tameɖoɖo vavã va le míaƒe agbe ŋu.
6-7. Esi Yvonne va srɔ̃ nu si Biblia fia ku ɖe etsɔme ŋua, aleke wòɖe vi nɛ?
6 Bu nɔvinyɔnu Yvonne ŋu kpɔ. Edzilawo menye Yehowa Ðasefowo o, eya ta le eƒe ɖevimea, evɔ̃na na ku. Exlẽe le agbalẽ aɖe me be: “Gbe ɖeka la, etsɔ aɖeke maganɔ anyi o.” Nya mawo tsi eƒe susu me ɖikaa. Egblɔ be: “Metsia zãdomadɔlɔ̃e ɖe nya mawo ta henɔa etsɔme ŋu bum. Nye susu wɔna nam be, ‘Nane ta kokokoe míele agbe ɖo. Nu ka tae mele agbe ɖo?’ Nyemedi be maku o!”
7 Emegbe esi Yvonne nɔ eƒe ƒewuiwo mea, edo go Yehowa Ðasefowo. Egblɔ be: “Meva nɔ edzi xɔm se be mate ŋu ava nɔ Paradiso me le anyigba dzi tegbee.” Aleke nyateƒea sɔsrɔ̃ ɖe vi na mía nɔvinyɔnuae? Egblɔ be: “Nyemegatsia zãdomadɔlɔ̃e le vɔvɔ̃ na etsɔme alo na ku ta o.” Edze ƒãa be Yvonne dea asixɔxɔ nyateƒea ŋu eye edzɔa dzi nɛ be yeaƒo nu tso mɔkpɔkpɔ si va su ye si ŋu na amewo.—1 Tim. 4:16.
Biblia Tsɔ Nyateƒea Sɔ Kple . . . Kesinɔnu
Mɔnukpɔkpɔ si su mía si be míasubɔ Yehowa fifia kple mɔkpɔkpɔ si le mía si be míava subɔe tegbee le etsɔme le Fiaɖuƒea tea nye kesinɔnu vavã. Nu sia nu si míatsɔ asa vɔe ɖe esia ta mave mí akpɔ o (Kpɔ memama 8-11 lia)
8-9. (a) Aleke ŋutsu aɖe si ŋu Yesu ƒo nu tsoe le eƒe kpɔɖeŋu aɖe mea de asixɔxɔ kesinɔnu si ŋu wòke ɖo ŋu? (b) Aleke gbegbee nèdea asixɔxɔ nyateƒea ŋu?
8 Biblia me nyateƒea ƒe akpa aɖe ku ɖe Mawu Fiaɖuƒe ŋuti nya nyuia ŋu. Yesu tsɔe sɔ kple kesinɔnu ɣaɣlɛ. Egblɔ le Mateo 13:44 be: “Dziƒofiaɖuƒe la le abe kesinɔnu aɖe si woɣla ɖe anyigba aɖe me ene, eye ame aɖe va ke ɖe eŋu hetsɔe ɣla; eye le dzidzɔ si wòkpɔ ta la, eyi ɖadzra eƒe nuwo katã eye wòƒle anyigba ma.” De dzesii be menye ɖe amea nɔ kesinɔnua dim hafi o, gake esi wòke ɖe eŋua, etsɔ nu geɖe sa vɔe be yeaƒlee. Le nyateƒe mea, edzra eƒe nuwo katã. Nu ka tae? Elabe enya asixɔxɔ si gbegbe le eŋu. Exɔ asi wu nu sia nu si wòtsɔ na ɖe eta la sãsãsã!
9 Nenemae nèbua nyateƒeaea? Ðikeke mele eme o be, wò hã èdea asixɔxɔ nyateƒea ŋu. Míenya be xexea mate ŋu ana míakpɔ dzidzɔ wòade esi gbegbe míekpɔna le Yehowa subɔsubɔ me fifia nu o eye mate ŋu ana mɔkpɔkpɔ mí be míava nɔ agbe tegbee hã o. Nu sia nu si míatsɔ asa vɔe be mía kple Yehowa dome nanɔ kplikplikpli la mave mí akpɔ o. Míaƒe dzidzɔe nye be ‘míadze eŋu bliboe.’—Kol. 1:10.
10-11. Nu kae ʋã Michael wòwɔ tɔtrɔwo?
10 Hafi míava xɔ nyateƒea, mía dometɔ geɖe ɖe asi le nu geɖe ŋu be míaƒe nu nadze Yehowa ŋu. Ame aɖewo ɖe asi le dɔ gã dɔ gãwo ŋu. Ame aɖewo hã dzudzɔ kesinɔnuwo yome titi. Ame bubuwo hã trɔ woƒe agbenɔnɔ kura. Esia tututue Michael wɔ. Menye nyateƒea mee wohee le o. Esi wònye ɖekakpuia, esrɔ̃ karat (karaté) dada. Egblɔ be: “Medea kame edziedzi be manɔ lãmesẽ me, eye esia nyea dada nam. Ɣeaɖewoɣi la, mesusunɛ be ame aɖeke mate ŋu akpe dzinye o.” Gake esi wova te Biblia sɔsrɔ̃ kple Michael la, eva srɔ̃e be Yehowa lé fu ŋutasesẽ. (Ps. 11:5) Michael gblɔ be: “Ðasefo atsu kple asi siwo srɔ̃ Biblia kplim la [megblɔ] nam kpɔ be madzudzɔ karatdada o; ɖeko woyi edzi nɔ Biblia me nyateƒewo fiamem.”
11 Zi ale si Michael srɔ̃ nu tso Yehowa ŋua, zi nenemae wògava lɔ̃e ɖe edzi. Ale si Yehowa sea veve ɖe esubɔlawo nu la wɔ dɔ ɖe edzi ŋutɔ. Ɣeyiɣi aɖe megbea, Michael va kpɔe be ehiã be yeawɔ nyametsotso vevi aɖe. Egblɔ be: “Menyae be nu si wɔwɔ asesẽ nam wue nye be madzudzɔ karatdada. Gake menyae hã be adze Yehowa ŋu, eye meka ɖe edzi be nu sia nu si matsɔ asa vɔe ɖe esubɔsubɔ ta la manye dzodzro o.” Michael de asixɔxɔ nyateƒe si ŋu wòke ɖoa ŋu, eye esia ʋãe wòwɔ tɔtrɔ gãwo le eƒe agbe me.—Yak. 1:25.
Biblia Tsɔ Nyateƒea Sɔ Kple . . . Akaɖi
Akaɖi si le keklẽm nyuie nana míekpɔa nu nyuie ne míele zɔzɔm le viviti me. Nenema kee Mawu ƒe Nyaa fiaa mɔ mí le Satana ƒe xexe do blukɔ tsiɖitsiɖi sia me (Kpɔ memama 12-13 lia)
12-13. Aleke Biblia me nyateƒea ɖe vi na Mayli?
12 Biblia tsɔ nyateƒea sɔ kple akaɖi si le keklẽm le viviti me; esia ɖe asixɔxɔ si le nyateƒea ŋu kple ale si wòfiaa mɔ mí le agbe mea fia. (Ps. 119:105; Ef. 5:8) Mayli si tso Azerbaijan la de dzesi nya ma ƒe nyateƒenyenye eye wòva de asixɔxɔ Mawu ƒe Nyaa ŋu. Edzilawo menɔ subɔsubɔha ɖeka me o. Tɔa nye Moslemtɔ eye nɔa nye Yudatɔ. Egblɔ be: “Togbɔ be nyemeke ɖi Mawu ƒe anyinɔnɔ kpɔ o hã, nanewo li siwo gɔme nyemesena o. Mebiaa ɖokuinye be, ‘Nu ka tae Mawu wɔ amegbetɔwo ɖo, eye susu ka tae wòle be ame aɖe nakpe fu le eƒe agbe me katã eye mlɔeba woava wɔ fui le dzo mavɔ me tegbee?’ Esi amewo gblɔna be nu sia nu si dzɔna la nye Mawu ƒe lɔlɔ̃nu la, mebiana be, ‘Ðe amegbetɔwo le na Mawu abe fefenu ene wònɔa ka hem na wo hekpɔa dzidzɔ ne wole fu kpema?’”
13 Mayli yi edzi di ŋuɖoɖo na eƒe biabiawo. Ɣeyiɣi aɖe megbea, eva lɔ̃ be Ðasefowo nasrɔ̃ Biblia kpli ye eye wòva xɔ nyateƒea. Egblɔ be: “Biblia ƒe nufiafia siwo me kɔ nyuie la na mele agbe ƒe vivi sem. Numeɖeɖe siwo ŋu kakaɖedzi le, siwo mekpɔ le Mawu ƒe Nyaa me la na nye dzi dze eme ale gbegbe.” Abe Mayli enea, míekpɔa dzidzɔ be Yehowa yɔ mí “tso viviti me va eƒe kekeli wɔnukua me” eye míekafunɛ ɖe eta.—1 Pet. 2:9.
14. Nu kae míawɔ be míagalɔ̃ nyateƒea ɖe edzi? (Kpɔ aɖaka si nye “ Nu Bubu Siwo Míate Ŋu Atsɔ Nyateƒea Asɔ Kple” hã.)
14 Va se ɖe fifiaa, míedzro susu siwo ta míedea asixɔxɔ nyateƒea ŋu la dometɔ aɖewo me. Ðe susu aɖewo le wò hã asiwò siwo ta nèlɔ̃ nyateƒea? Ðewohĩ àte ŋu ade ŋugble le susu bubu siwo tae wòle be míalɔ̃ nyateƒea ɖoa ŋu le wò ɖokuisinusɔsrɔ̃ me? Nya lae nye be, ne míelɔ̃ nyateƒea, míawɔ nu wòaɖee afia be míedea asixɔxɔ eŋu.
ALE SI MÍAÐEE AFIA BE MÍELƆ̃ NYATEƑEA
15. Aleke míate ŋu aɖee afia be míelɔ̃ nyateƒea?
15 Míate ŋu aɖee afia be míelɔ̃ nyateƒea ne míesrɔ̃a Biblia kple Biblia-srɔ̃gbalẽwo edziedzi. Ɣeyiɣi didi ka kee míeɖale nyateƒea me o, nu geɖe gali wòle be míasrɔ̃. Gbetakpɔxɔ ƒe tata gbãtɔ gblɔ be: “Nyateƒe la le abe seƒoƒo sue aɖe si le gbedadaƒo, si aʋatsonufiafia ƒe gbe vɔ̃ɖiwo ƒo xlã hevu tsyɔ kloe, la ene. Hafi nàke ɖe eŋu la, ele be nànɔ edidi dzi. . . . Hafi wòasu asiwò la, ke ele be nàbɔbɔ agbee. Mègana nyateƒea ƒe seƒoƒo ɖeka pɛ nadze ŋuwò o. . . . Ƒo geɖe nu ƒu, di bubuwo kpee.” Nyateƒee, nusɔsrɔ̃ bia kutrikuku, gake eɖea vi geɖe.
16. Mɔnu kae nèzãna ne èle Biblia srɔ̃m? (Lododowo 2:4-6)
16 Nuxexlẽ kple nusɔsrɔ̃ mevivia mía dometɔ aɖewo nu o. Gake Yehowa di be míaku kutri vevie ase nyateƒea gɔme nyuie. (Xlẽ Lododowo 2:4-6.) Agbagba siwo míedzena be míasrɔ̃ Biblia ɖea vi na mí ɣesiaɣi. Bu Nɔviŋutsu Corey ŋu kpɔ. Ne ele nu srɔ̃maa, egbɔa dzi ɖi xlẽa mawunyakpukpuiwo ɖekaɖeka eye wòdea ŋugble le wo ŋu. Egblɔ be: “Mexlẽa etenuŋɔŋlɔ ɖe sia ɖe kple kpukpui bubu siwo wofia asii, eye megawɔa numekuku bubu kpee. . . . To nuxexlẽ ƒe mɔnu sia zazã dzi la, meva kena ɖe nu gbogbo aɖewo ŋutɔ ŋu!” Mɔnu ka kee míezãna o, ne míedia ɣeyiɣi srɔ̃a Biblia veviedodotɔea, esia ɖenɛ fiana be míedea asixɔxɔ nyateƒea ŋu.—Ps. 1:1-3.
17. Nu kae wòfia be míanɔ agbe ɖe nyateƒea nu? (Yakobo 1:25)
17 Be nyateƒea naɖe vi na mí bliboea, ele be míawɔ nu bubu kpe ɖe Biblia sɔsrɔ̃ ŋu. Eyae nye be míanɔ agbe ɖe nyateƒea nu, si fia be míawɔ ɖe nu siwo míesrɔ̃ dzi. Ema ko hafi míakpɔ dzidzɔ vavã. (Xlẽ Yakobo 1:25.) Nu kae akpe ɖe mía ŋu be míayi edzi anɔ agbe ɖe nyateƒea nu? Nɔviŋutsu aɖe gblɔ be míate ŋu adzro mía ɖokui me ade dzesi akpa siwo míele agbagba dzem le kple akpa siwo wòhiã be míagadze agbagba geɖe wu le. Apostolo Paulo gblɔ be: “Aleke kee wòɖale o, afi ka kee míeyi ŋgɔ se ɖo o, mina míayi ŋgɔ tẽe le ɖoɖo nu le mɔ ma ke nu.”—Flp. 3:16.
18. Nu ka tae wòle be ‘míayi edzi azɔ le nyateƒea me’?
18 Bu ale si gbegbe wòaɖe vi na mí ne míewɔ nu sia nu si míate ŋui be ‘míayi edzi azɔ le nyateƒea me’ ŋu kpɔ. Míaƒe agbenɔnɔ anyo ɖe edzi, míado dzidzɔ na Yehowa ƒe dzi eye mía nɔviwo akpɔ dzidzɔ ɖe mía ŋu. (Lod. 27:11; 3 Yoh. 4) Neva eme be míana nu siawo naʋã mí míayi edzi alɔ̃ nyateƒea eye míanɔ agbe ɖe enu.
HADZIDZI 144 Wò Ŋku Nenɔ Fetu La Dzi!
^ Ne ame aɖe srɔ̃ Biblia eye wòwɔ tɔtrɔ siwo hiã heva le Yehowa subɔm kpli mía, míegblɔna be eva nyateƒea me. Míeɖale nyateƒea me eteƒe didi alo nyitsɔ laa koe míeva o, aɖe vi na mí ŋutɔ ne míede ŋugble le nu si tae míelɔ̃ nyateƒea ɖo la ŋu. Esia ana míagaɖoe kplikpaa be míayi edzi awɔ nu si adze Yehowa ŋu.
