1. Nu ka tae Daniel ƒe nu nyo Babilontɔwo ŋu?

 ÐEKAKPUI dzaa koe Daniel nye esi Babilontɔwo ɖe aboyoe kplɔe dzoe le wo de Yerusalem yi keke Babilon. Gake edze ƒãa be eƒe nu nyo Babilontɔwo ŋu. Wokpɔ Daniel ƒe “dzedzeme” eye wokpɔe be ‘nu mewɔ afi aɖeke nɛ o, edze ɖeka,’ eye wòtso ƒome vevi aɖe hã me. (1 Sam. 16:7) Le susu mawo taa, Babilontɔwo na hehee be wòasubɔ le fiasã me.—Dan. 1:3, 4, 6.

2. Aleke Yehowa se le eɖokui me tso Daniel ŋu? (Ezekiel 14:14)

² Yehowa lɔ̃ Daniel, menye le esi wòdze ɖeka eye wòle subɔsubɔm le fiasã me ta o, ke boŋ esi wòtiae be yeawɔ nuteƒe na Yehowa tae. Le nyateƒe mea, Daniel anya xɔ abe ƒe 20 ene esi Yehowa gblɔ tso eŋu be enye ame dzɔdzɔe abe Noa kple Hiob, siwo subɔ Mawu nuteƒewɔwɔtɔe ƒe geɖe ene. (1 Mose 5:32; 6:9, 10; Hiob 42:16, 17; xlẽ Ezekiel 14:14.) Yehowa yi edzi lɔ̃ Daniel le eƒe agbemeŋkekewo katã me.—Dan. 10:11, 19.

3. Nu ka mee míadzro le nyati sia me?

³ Le nyati sia mea, míade dzesi nɔnɔme eve siwo Daniel ɖe fia siwo na Yehowa de asixɔxɔ eŋu. Gbãa, míaƒo nu tso nɔnɔmeawo dometɔ ɖe sia ɖe ŋu kple ɣeyiɣi siwo wòɖe wo fia. Eyome míakpɔ nu siwo kpe ɖe Daniel ŋu wòte ŋu tu nɔnɔme siawo ɖo. Mlɔebaa, míadzro ale si míawɔ asrɔ̃ eƒe kpɔɖeŋua me. Togbɔ be sɔhɛwoe wotrɔ asi le nyati sia ŋu na hãa, mí katã míate ŋu asrɔ̃ Daniel ƒe kpɔɖeŋua.

4. Aleke Daniel ɖe dzinɔameƒo fia? Gblɔ eƒe kpɔɖeŋu.

⁴ Ame siwo ƒo dzi le gɔ̃ hã vɔ̃na ɣeaɖewoɣi, gake womeɖea  mɔ esia xea mɔ na wo be woagawɔ nu si sɔ o. Daniel nye ɖekakpui aɖe si ƒo dzi nɔ ŋutɔ! Bu nudzɔdzɔ eve siwo me wòɖe esia fia lea ŋu kpɔ. Gbãtɔa anya dzɔ ƒe eve aɖewo megbe tso esime Babilontɔwo tsrɔ̃ Yerusalem. Babilon-fia Nebukadnezar ku drɔ̃e tso legba gã aɖe ŋu, si na vɔvɔ̃ ɖoe. Ebia tso eƒe nunyalawo si be woalĩ drɔ̃ea ahaɖe egɔme na ye, ne menye nenema oa, yeawu wo; Daniel hã le eme. (Dan. 2:3-5) Ehiã be Daniel nawɔ nu kpata; ne menye nenema oa, ame geɖe aku. Eya ta ‘eyi fia la gbɔ ɖabiae be wòana ɣeyiɣi ye, ne yeaɖe drɔ̃ea gɔme nɛ.’ (Dan. 2:16) Esia ɖee fia be dzi nɔ Daniel ƒo eye xɔse sẽŋu nɔ esi, elabe nuŋlɔɖi aɖeke meɖee fia be Daniel ɖe drɔ̃ewo gɔme kpɔ o. Ebia tso eƒe zɔhɛ siwo Babilontɔwo na ŋkɔe be Sadrak, Mesak, kple Abednego si be “woado gbe ɖa na dziƒo ƒe Mawu la be wòakpɔ nublanui na yewo le nya ɣaɣla sia ta.” (Dan. 2:18) Yehowa ɖo woƒe gbedodoɖaa ŋu. Ekpe ɖe Daniel ŋu wòte ŋu ɖe Nebukadnezar ƒe drɔ̃ea gɔme. Esia na womewu Daniel kple eƒe zɔhɛawo o.

5. Nu bubu kae dzɔ si na wòhiã be dzi nanɔ Daniel ƒo?

⁵ Esi Daniel ɖe drɔ̃e si ku ɖe legba gãa ŋu gɔme megbea, nu bubu aɖe gadzɔ si na wòhiã be dzi nanɔ eƒo. Nebukadnezar gaku drɔ̃e ɖivɔvɔ̃ aɖe. Drɔ̃e sia ya ku ɖe ati gã aɖe ŋu. Dzi nɔ Daniel ƒo wòɖe drɔ̃ea gɔme na fiaa, eye wògblɔ kpee hã be fiaa adze aɖaʋa eye fiaɖuƒea ado le esime hena ɣeyiɣi aɖe. (Dan. 4:25) Ele bɔbɔe be fia la nabu Daniel be enye yeƒe futɔ, eye ate ŋu aɖe gbe be woawui gɔ̃ hã. Gake dzi nɔ Daniel ƒo eye wòɖe drɔ̃ea gɔme.

6. Nu kae kpe ɖe Daniel ŋu be dzi nɔ eƒo?

⁶ Anye nu kae kpe ɖe Daniel ŋu be dzi nɔ eƒo le eƒe agbe me katã? Esime Daniel nye ɖevia, ɖikeke mele eme o be esrɔ̃ fofoa kple dadaa ƒe kpɔɖeŋu. Edze ƒãa be edzilawo wɔ ɖe mɔfiame si Yehowa na dzilawo le Israel la dzi hefia Mawu ƒe Sea wo via. (5 Mose 6:6-9) Eya ta Daniel nya Se Ewoawo, gake menye ema ɖeɖe koe o, enya se siwo ku ɖe nu siwo wòle be Israel-viwo naɖu kple nu siwo mele be woaɖu o  hã ŋu nyuie. b (3 Mose 11:4-8; Dan. 1:8, 11-13) Azɔ hã esrɔ̃ nu tso Mawu ƒe amewo ƒe ŋutinya ŋu eye wònya nu si dzɔ ɖe wo dzi esi womeɖo to Yehowa ƒe mɔfiamewo o. (Dan. 9:10, 11) Nu siwo me Daniel to le agbe mea na wòka ɖe edzi be Yehowa kple eƒe dɔla sẽŋuawo akpe ɖe ye ŋu.—Dan. 2:19-24; 10:12, 18, 19.

7. Nu bubu kae kpe ɖe Daniel ŋu be dzi nɔ eƒo? (Kpɔ nɔnɔmetataa hã.)

⁷ Daniel dzro nu siwo Mawu ƒe nyagblɔɖilawo ŋlɔa me, siwo dome Yeremiya ƒe nyagblɔɖiwo hã le. Esia na wòva de dzesii be eteƒe madidi o, woaɖe asi le Yudatɔ siwo le aboyo me le Babilon ŋu. (Dan. 9:2) Esi Daniel kpɔe be Biblia ƒe nyagblɔɖiwo va emea, edo ŋusẽe wòka ɖe Yehowa dzi. Ðikeke mele eme o be dzi nɔa ame siwo ka ɖe Mawu dzia ƒo. (Tsɔe sɔ kple Romatɔwo 8:31, 32, 37-39.) Nu vevitɔ si Daniel wɔnae nye be edoa gbe ɖa na Fofoa si le dziƒo zi geɖe. (Dan. 6:10) Eʋu eƒe nu vɔ̃wo me na Yehowa eye wògblɔ eƒe seselelãmewo nɛ. Ebiae be wòakpe ɖe ye ŋu. (Dan. 9:4, 5, 19) Amegbetɔ koe Daniel nye abe míawo ke ene; womedzii kple dzinɔameƒo o. Etu nɔnɔme sia ɖo elabe esrɔ̃a nu, edoa gbe ɖa eye wòka ɖe Yehowa dzi.

8. Nu kae míawɔ be dzi nanɔ mía ƒo?

⁸ Nu kae wòhiã be míawɔ be dzi nanɔ mía ƒo? Mía dzilawo ate ŋu ade dzi ƒo na mí be dzi nanɔ mía ƒo, gake míate ŋu anyi dzinɔameƒo ƒe dome tso wo gbɔ o. Míate ŋu atsɔ ale si míawɔ dzi nanɔ mía ƒo asɔ kple nu yeye aɖe sɔsrɔ̃. Mɔ ɖeka si dzi míato anya nua ye nye be míalé ŋku ɖe ame si le nua fiam mí la ŋu, eye míasrɔ̃ eƒe kpɔɖeŋua. Nenema kee dzi nɔa mía ƒo ne míeléa ŋku ɖe ame siwo ɖea nɔnɔme sia fiana ŋu eye míesrɔ̃a woƒe kpɔɖeŋua. Ta nu kae míesrɔ̃ tso Daniel gbɔ? Ele be míawo hã míasrɔ̃ Mawu ƒe Nyaa veviedodotɔe. Ele be míanɔ míaƒe dzimenyawo gblɔm na Yehowa faa ɣesiaɣi ale be mía kplii dome nanɔ kplikplikpli. Ehiã hã be míaɖo ŋu ɖe eŋu aka ɖe edzi be eli kpli mí. Ekema ne wodo míaƒe xɔse kpɔa, dzi anɔ mía ƒo.

9. Viɖe kae míakpɔ ne dzi le mía ƒo?

⁹ Ne dzi le mía ƒoa, eɖea vi na mí le mɔ geɖe nu. Bu Ben ƒe kpɔɖeŋua ŋu kpɔ. Ede suku le Germany, afi si ame geɖe xɔ nɔnɔmetɔtrɔ ŋuti nufiafia dzi se le eye wobua nya si Biblia gblɔ tso nuwɔwɔwo ŋu be enye alakpa. Gbe ɖeka wona mɔnukpɔkpɔ Ben be wòatsi tre ɖe klass la ŋgɔ ne wòaɖe susu siwo tae wòxɔe se be Mawue wɔ nuwo la me. Dzi nɔ eƒo wòɖe eƒe dzixɔsewo me. Nu kae do tso eme? Ben gblɔ be, “Nye nufiala ɖo to nyuie, eye wòwɔ nu siwo mezã tsɔ ɖe nye dzixɔsewo mea ƒe kɔpi na sukuviawo dometɔ ɖe sia ɖe.” Aleke Ben ƒe sukuhatiwo wɔ nui? Ben gblɔ be, “Wo dometɔ geɖe ɖo to se nya siwo megblɔ, eye wokafum.” Abe ale si Ben ƒe nuteƒekpɔkpɔa ɖee fia enea, wodea bubu ame siwo ƒo dzi lea ŋu. Esia ate ŋu ahe dzi nyuitɔwo va Yehowa gbɔ. Eme kɔ ƒaã be, susu nyui geɖe li si tae wòhiã be dzi nanɔ mía ƒo.

10. Nu kae nuteƒewɔwɔ fia?

¹⁰ Zi geɖe le Biblia mea, wozãa Hebrigbe  me nya “nuteƒewɔwɔ,” alo “lɔlɔ̃ si nu metsina o,” wòfiaa kukuɖeameŋu vividoɖeameŋutɔe, eye wozãa nya sia edziedzi tsɔ ɖɔa ale si Mawu lɔ̃a esubɔlawoe. Wogate ŋu zãa nya ma ke tsɔ ɖɔa lɔlɔ̃ si mawusubɔlawo ɖena fiana wo nɔewo. (2 Sam. 9:6, 7) Míaƒe nuteƒewɔwɔ ƒe lɔlɔ̃a me gasẽna ɖe edzi ne ɣeyiɣiawo va le yiyim. Mina míakpɔ ale si esia dzɔ le Daniel gomee ɖa.

11. Esi Daniel tsi ku amegãa, aleke wodo eƒe nuteƒewɔwɔ kpɔ? (Kpɔ nɔnɔmetata si le akpaa dzi.)

¹¹ Nu geɖe dzɔ le Daniel ƒe agbe me si do eƒe nuteƒewɔwɔ na Yehowa kpɔ. Gake sesẽtɔwo dometɔ ɖekae nye esi dzɔ le eƒe ƒe 90-awo me. Le ɣeyiɣi ma mea, Mediatɔwo kple Persiatɔwo ɖu Babilon dzi, eye Fia Dario nɔ dzi ɖum. Amegã siwo nɔ Fia Dario ŋu lé fu Daniel, eye womedea bubu Mawu si wòsubɔna hã ŋu o. Eya ta woɖo nugbe be yewoana woawu Daniel. Wona fia la de se si ado Daniel kpɔ nenye be ayi edzi awɔ nuteƒe na Mawu loo alo awɔ nuteƒe na fiaa. Le se ma ƒe nya nua, efia be Daniel hã nadzudzɔ gbedodoɖa na eƒe Mawu Yehowa ŋkeke 30 sɔŋ, atsɔ aɖee afia be yewɔa nuteƒe na fia la. Daniel ɖoe kplikpaa be yeawɔ nuteƒe na Yehowa. Le ema taa, wolée de dzatawo ƒe do me. Gake Yehowa megblẽ Daniel ɖi o, eɖo eƒe nuteƒewɔwɔa teƒe nɛ ɖee tso dzatawo ƒe nu me. (Dan. 6:12-15, 20-22) Aleke míawo hã míaɖoe kplikpaa awɔ nuteƒe na Yehowa abe Daniel ene?

12. Nu kae kpe ɖe Daniel ŋu wòɖoe kplikpaa yi edzi wɔ nuteƒe na Yehowa?

¹² Abe ale si míegblɔe va yi enea, ele be míalɔ̃ Yehowa vevie hafi ate ŋu awɔ nuteƒe nɛ. Daniel te ŋu yi edzi wɔ nuteƒe na Yehowa elabe elɔ̃e vevie. Ðikeke mele eme o be Daniel lɔ̃ Yehowa, elabe edia ɣeyiɣi bua tame le Yehowa ƒe nɔnɔmewo kple ale si wòɖea wo fianae la ŋu. (Dan. 9:4) Daniel de ŋugble le nu nyui siwo katã Yehowa wɔ nɛ kple esiwo wòwɔ na eƒe amewo hã ŋu eye wòkpɔ ŋudzedze ɖe wo ŋu.—Dan. 2:20-23; 9:15, 16.

13. (a) Dodokpɔ kae mía viwo doa goe? Gblɔ eƒe kpɔɖeŋu. (Kpɔ fotoa hã.) (b) Abe ale si wòdze le videoa me enea, ne wobia wò be ɖe Yehowa Ðasefowo da asi ɖe ŋutsu ŋutsugbɔdɔla alo nyɔnu nyɔnugbɔdɔla ƒe nuwɔna dzi hãa, aleke nàɖo eŋu?

¹³ Abe ale si wònɔ le Daniel ƒe ɣeyiɣiawo  me enea, mía vi geɖe le ame siwo medea bubu Yehowa ŋu o eye womewɔa eƒe sewo dzi oa dome. Ame siawo tɔgbi léa fu ame sia ame si gblɔna be yelɔ̃ Mawu. Wo dometɔ aɖewo gɔ̃ hã dzea agbagba sẽa ŋuta le mía viwo ŋu kple susu be woadzudzɔ nuteƒewɔwɔ na Yehowa. Le kpɔɖeŋu me, bu nu si dzɔ ɖe ɖekakpui aɖe si ŋkɔe nye Graeme, si le Australia dzi ŋu kpɔ. Edo go nɔnɔme sesẽ aɖe esime wònɔ sekɛndrisuku (lycée). Nufialaa bia sukuviawo be, aleke woawɔ nui ne wo xɔlɔ̃ aɖe ʋu eme na wo be yenye ŋutsu ŋutsugbɔdɔla alo nyɔnu nyɔnugbɔdɔla hã. Nufialaa yi eƒe nyaa dzi gblɔ be ame siwo katã da asi ɖe edzi be ye xɔlɔ̃ ate ŋu anye ŋutsu ŋutsugbɔdɔla alo nyɔnu nyɔnugbɔdɔlaa, naƒo ƒu ɖe xɔa ƒe akpa ɖeka; eye ame siwo meda asi ɖe edzi o hã nanɔ akpa kemɛ. Graeme gblɔ be, “Klass bliboa ƒo ƒu ɖe akpa ɖeka elabe woda asi ɖe nuwɔna ma dzi, eye nye kple nye sukuhati bubu si hã nye Ðasefo koe nɔ akpa kemɛa.” Nu si dzɔ kplɔe ɖoa do Graeme ƒe nuteƒewɔwɔ na Yehowa kpɔ vevie. Graeme gblɔ be, “Le gaƒoƒo siwo kplɔe ɖo mea, sukuviawo kple nufialaa gɔ̃ hã nɔ mía kom eye wonɔ mía dzum vevie. Mewɔ tɔnye sinua ʋli nye xɔse ta le ŋuɖɔɖo kple tufafa me, gake womeɖo to nye nyawo o.” Aleke nuteƒewɔwɔ ƒe dodokpɔ sia kpɔ ŋusẽ ɖe Graeme dzi? Egblɔ be, “Esi wonɔ mía dzum la, medzɔ dzi nam kura o, gake dzi dzɔm ale gbegbe elabe mewɔ nuteƒe na Yehowa eye mete ŋu ʋli nye dzixɔsewo ta.” c

14. Nu kae akpe ɖe mía ŋu be míaɖoe kplikpaa ayi edzi awɔ nuteƒe na Yehowa?

¹⁴ Ne míelɔ̃ Yehowa veviea, míayi edzi awɔ nuteƒe nɛ, abe ale si Daniel wɔe ene. Nu si akpe ɖe mía ŋu míalɔ̃ Yehowae nye be míasrɔ̃ nu tso eƒe nɔnɔmewo ŋu. Míate ŋu awɔ esia ne míesrɔ̃ nu tso eƒe nuwɔwɔwo ŋu. (Rom. 1:20) Ne èdi be yealɔ̃ Yehowa ɖe edzi eye nàde bubu eŋu geɖe wua, àte ŋu axlẽ nyati siwo nye “Ðe Wowɔea?” alo nàkpɔ eƒe videowo. Àte ŋu axlẽ agbalẽ gbadza si nye Was Life Created? (La vie a-t-elle été créée ?) kple The Origin of Life—Five Questions Worth Asking (Cinq questions à se poser sur l’origine de la vie.) hã. Se nya si nɔvinyɔnu sɔhɛ aɖe si ŋkɔe nye Esther si tso Denmark gblɔ tso agbalẽ siawo ŋu ɖa. Egblɔ be: “Numeɖeɖeawo me kɔ ale gbegbe. Agbalẽawo megblɔ nu siwo dzi wòle be nàxɔ se o; ke boŋ woɖe nyateƒenyawo ɖe go nyuie eye woɖe mɔ be wò ŋutɔ nàtso nya me.” Ben, si ŋu míeƒo nu tsoe va yi hã gblɔ be: “Dɔwɔnu siawo doa ŋusẽ ame ƒe xɔse ŋutɔ. Woɖo kpe edzi kɔtɛ be Mawu gbɔe agbe dzɔ tso.” Ne èxlẽ agbalẽ mawo vɔa, àlɔ̃ ɖe nya si Biblia gblɔ dzi be: “Yehowa, mía Mawu, wòe dze be nàxɔ ŋutikɔkɔe, bubu kple ŋusẽ, elabena wòe wɔ nuwo katã.”—Nyaɖ. 4:11. d

15. Nu bubu kae míate ŋu awɔ be mí kple Yehowa dome nanɔ kplikplikpli?

¹⁵ Nu bubu si míawɔ be míalɔ̃ Yehowa ɖe edzie nye be míasrɔ̃ nu tso ale si Via Yesu nɔ agbee ŋu tsitotsito. Nu ma tututue nɔvinyɔnu sɔhɛ aɖe si ŋkɔe nye Samira, si le Germany la wɔ. Egblɔ be: “Meva nya Yehowa nyuie to Yesu dzi.” Esi Samira nye ɖevia, esesẽna nɛ be wòase egɔme be Yehowa lɔ̃ ye eye yeate ŋu anye exɔlɔ̃. Gake enya be Yesu ya ate ŋu alɔ̃ ye adze  xɔlɔ̃ ye. Egblɔ be: “Melɔ̃ Yesu elabe ewɔa nu ɖe ame ŋu xɔlɔ̃wɔwɔtɔe eye wòlɔ̃ ɖeviwo.” Zi ale si Samira srɔ̃ nu tso Yesu ŋua, zi nenemae wòva nya Yehowa eye eya kplii dome va le kplikplikpli. Nu ka tae? Egblɔ be: “Vivivia, meva kpɔe be Yesu srɔ̃ Fofoa pɛpɛpɛ. Woƒe nɔnɔmewo wɔ ɖeka le nu geɖe me. Mede dzesii be esia tae Yehowa dɔ Yesu ɖe anyigba dzi be wòanɔ bɔbɔe na ameƒomea be woanya ye nyuie.” (Yoh. 14:9) Ne èdi be ye kple Yehowa dome xɔlɔ̃wɔwɔ me nasẽ ɖe edzia, ɖe manyo be nàdi ɣeyiɣi asrɔ̃ nu geɖe tso Yesu ŋu ale si nàte ŋui oa? Ne èwɔe alea, àlɔ̃ Yehowa ɖe edzi eye àwɔ nuteƒe nɛ.

16. Ne míeyi edzi wɔ nuteƒea, viɖe kae míakpɔ? (Psalmo 18:25; Mika 6:8)

¹⁶ Zi geɖea, ame siwo wɔa nuteƒe tea ŋu dzea xɔlɔ̃ nyuiwo eye wo dome nɔa kplikplikpli. (Rut 1:14-17) Ne míewɔ nuteƒe na Yehowaa, míaɖe dzi ɖi eye míaƒe dzi adze eme. Nu ka tae? Elabe Yehowa do ŋugbe be yeawɔ nuteƒe na ame siwo wɔa nuteƒe na ye. (Xlẽ Psalmo 18:25; Mika 6:8.) Bu eŋu kpɔ: Togbɔ be amegbetɔ tsɛwo koe míenye hãa, Wɔla ŋusẽkatãtɔa lɔ̃ faa be yeadze xɔlɔ̃ mí! Ne kadodo kplikplikpli sia va le mí kple Yehowa domea, tetekpɔ, tsitretsiɖeŋu, alo ku kura gɔ̃ hã mate ŋu ama mí ɖa tso Yehowa gbɔ o. (Dan. 12:13; Luka 20:37, 38; Rom. 8:38, 39) Ele vevie ŋutɔ be míasrɔ̃ Daniel ƒe kpɔɖeŋua, eye míayi edzi awɔ nuteƒe na Yehowa!

17-18. Nu bubu kae míagate ŋu asrɔ̃ tso Daniel gbɔ?

¹⁷ Daniel ƒe nɔnɔme eve ŋu koe míesrɔ̃ nu tsoe le nyati sia me. Gake nu geɖe li míate ŋu asrɔ̃ tso egbɔ. Le kpɔɖeŋu me, Yehowa na Daniel kpɔ ŋutegawo, ena wòku drɔ̃ewo, eye wòna ŋutetee wòɖe nyagblɔɖiwo me. Nyagblɔɖi mawo dometɔ geɖe va eme xoxo. Wo dometɔ aɖewo ku ɖe etsɔme nudzɔdzɔ siwo ka ame sia ame si le anyigba dzia ŋu.

¹⁸ Le nyati si kplɔ esia ɖo mea, míadzro Daniel ƒe nyagblɔɖi eve me. Ne míese nyagblɔɖi mawo gɔmea, akpe ɖe mí katã, ɖeviwo kple tsitsiawo siaa ŋu míatso nya me nyuie fifia. Nyagblɔɖi mawo ate ŋu ado ŋusẽ mí dzi nanɔ mía ƒo míayi edzi awɔ nuteƒe eye wòadzra mí ɖo ɖe dodokpɔ siwo ava mía dzi le etsɔmea ŋu.