1. Le Hebritɔwo 12:1 ƒe nya nua, nu kae wòhiã be míawɔ be míate ŋu aƒu agbedua awu enu?

 BIBLIA tsɔ mí Kristotɔwo ƒe agbenɔnɔ sɔ kple duƒuƒu. Kristotɔ siwo te ŋu ƒu agbedua wu enu akpɔ agbe mavɔ. (2 Tim. 4:7, 8) Ehiã fifia wu ɣeyiɣi bubu ɖe sia ɖe be míaku kutri vevie ayi dua dzi, elabe míeɖo nuwuƒea vɔ. Apostolo Paulo te ŋu ƒu agbedua wu enu eye wòde dzesi nu vevi siwo akpe ɖe míawo hã ŋu be míaƒu dua awu enu. Eɖo aɖaŋu na mí be ‘míaɖe nu kpekpe sia nu kpekpe ɖa, eye míatsɔ dzidodo anɔ duɖimekeke si woɖo na mí la dzi.’—Xlẽ Hebritɔwo 12:1.

2. Nu kae wòfia be ‘míaɖe nu kpekpe sia nu kpekpe ɖa’?

² Esi Paulo gblɔ be ‘míaɖe nu kpekpe sia nu kpekpe ɖa’ la, ɖe wòfia be agba aɖeke meli wòle be Kristotɔ natsɔ oa? Ao, mefia nenema o. Nu si wòfia boŋue nye be míaɖe agba ɖe sia ɖe si mehiã oa ɖa. Agba si mehiã o ate ŋu ahe mí ɖe megbe eye wòana ɖeɖi nate mía ŋu. Ehiã vevie be míade dzesi agba mawo tɔgbi eye míaɖe wo ɖa kaba. Gake ele be míakpɔ nyuie be míagaɖe asi le agba siwo wòle be míatsɔ ya ŋu o. Elabe ne ame aɖe ɖe asi le agba si wòle be wòatsɔ ŋua, ke aɖee afia be yemegadze aƒu agbedua o. (2 Tim. 2:5) Agba kawoe wòle be míatsɔ?

3. (a) Le Galatiatɔwo 6:5 ƒe nya nua, nu kawoe wòle be míatsɔ? (b) Nu ka mee míadzro le nyati sia me, eye nu ka tae?

³ Xlẽ Galatiatɔwo 6:5. Paulo tɔ asi agba si wòle be míatsɔa dzi. Egblɔ be “ame sia ame atsɔ eya ŋutɔ  ƒe agba.” Le kpukpui sia mea, Paulo nɔ nu ƒom tso agba si le mía dometɔ ɖe sia ɖe dzi le Mawu ŋkumea ŋu. Ame aɖeke mate ŋu atsɔ agba ma ɖe mía nu o. Le nyati sia mea, míakpɔ nu siwo nye ‘ame ŋutɔ ƒe agba,’ kple ale si míawɔ atsɔe. Azɔ hã, míade dzesi agba siwo ɖewohĩ míetsɔ evɔ womehiã o, eye míakpɔ ale si míawɔ aɖe asi le wo ŋu. Ne míetsɔ agba siwo wòle be míatsɔ eye míeɖe asi le agba siwo mehiã o ŋua, akpe ɖe mía ŋu míaƒu agbedua awu enu.

4. Nu ka tae adzɔgbe si míeɖea dzi wɔwɔ mesesẽ akpa o? (Kpɔ fotoa hã.)

⁴ Adzɔgbe si míeɖe. Esi míeɖe adzɔgbe na Yehowa la, míedo ŋugbe nɛ be míasubɔe eye míawɔ eƒe lɔlɔ̃nu. Ele be míawɔ ɖe adzɔgbe ma si míeɖea dzi. Agbanɔamedzi gã aɖee wònye, gake menye nu si manya wɔe wònye o. Elabe Yehowa wɔ mí be míawɔ yeƒe lɔlɔ̃nu. (Nyaɖ. 4:11) Ewɔ mí ɖe eƒe nɔnɔme nu eye wòdee mía me be míadi ye, anya ye, eye míasubɔ ye. Esia taa, míetea ŋu tena ɖe  eŋu eye eƒe lɔlɔ̃nu wɔwɔ dzɔa dzi na mí. (Ps. 40:8) Azɔ hã ne míewɔ Mawu ƒe lɔlɔ̃nu eye míedze Via ƒe afɔɖoƒewo yomea, ‘míakpɔ gbɔdzɔe.’—Mat. 11:28-30.

5. Nu kae akpe ɖe ŋuwò be nàwɔ adzɔgbe si nèɖea dzi? (1 Yohanes 5:3)

⁵ Aleke nàwɔ atsɔ agba sia? Nu eve akpe ɖe ŋuwò. Gbã, lɔ̃ Yehowa ɖe edzi. Ne èdea ŋugble le nu nyui siwo katã Yehowa wɔ na wò va yi kple esiwo wòawɔ na wò le etsɔme ŋua, àva lɔ̃e geɖe wu eye anɔ bɔbɔe na wò be nàɖo toe. (Xlẽ 1 Yohanes 5:3.) Evelia, srɔ̃ Yesu. Yesu te ŋu wɔ Mawu ƒe lɔlɔ̃nu bliboe elabe edo gbe ɖa edziedzi na Yehowa be wòakpe ɖe ye ŋu. Azɔ hã etsɔ eƒe susu ɖo ale si Yehowa aɖo eteƒe na yea ŋu. (Heb. 5:7; 12:2) Abe ale si Yesu wɔe enea, do gbe ɖa na Yehowa be wòado ŋusẽ wò, eye na wò susu nanɔ agbe mavɔ ƒe ŋugbe si Yehowa doa dzi. Ne èlɔ̃ Mawu ɖe edzi eye nèsrɔ̃ Via Yesua, anɔ bɔbɔe be nàwɔ ɖe adzɔgbe si nèɖea dzi.

6. Nu ka tae wòle be míatsɔ agba siwo le mía dzi le ƒomea me? (Kpɔ fotoa hã.)

⁶ Míaƒe ƒomegbanɔamedziwo. Le agbedu si ƒum míele mea, ele be míalɔ̃ Yehowa kple Yesu wu míaƒe ƒometɔwo. (Mat. 10:37) Gake esia mefia be míaɖe ta le míaƒe ƒomegbanɔamedziwo te o. Le nyateƒe mea, hafi míaƒe nu nadze Mawu kple Kristo ŋua, ele be míatsɔ agba siwo le mía dzi le ƒomea me. (1 Tim. 5:4, 8) Ne míewɔe alea, míakpɔ dzidzɔ. Yehowa ŋutɔe ɖoe alea, elabe enya be ne atsu kple asi lɔ̃ wo nɔewo eye wodea bubu wo nɔewo ŋu, ne dzilawo lɔ̃ wo viwo hemlaa wo, eye ɖeviwo ɖoa to wo dzilawoa, dzidzɔ anɔ ƒomea me.—Ef. 5:33; 6:1, 4.

7. Aleke nàte ŋu awɔ wò akpa dzi le ƒomea me?

⁷ Aleke nàwɔ atsɔ agba sia? Èɖanye srɔ̃ŋutsu, srɔ̃nyɔnu, alo ɖevi o, ka ɖe Biblia ƒe aɖaŋuɖoɖowo dzi. Mègawɔ nu si wò ŋutɔ nèsusu o, nenema kee mègawɔ nu si wɔm ame akpa gãtɔ le alo nu si yeaɖi nunyalawo gblɔ dzi o. (Lod. 24:3, 4) Àkpɔ aɖaŋuɖoɖo nyui geɖe le míaƒe Biblia-srɔ̃gbalẽwo me siwo akpe ɖe ŋuwò nàwɔ Biblia me gɔmeɖosewo ŋu dɔ nyuie. Le kpɔɖeŋu me, le jw.org ƒe akpa si nye “Nu Si Akpe Ðe Ƒomewo Ŋu” tea, wota nyati aɖewo koŋ be woatsɔ akpe ɖe srɔ̃tɔwo, dzilawo kple sɔhɛwo ŋu be woate ŋu anɔ te ɖe kuxi siwo wodoa goe egbea nu. b Ðoe kplikpaa nàwɔ ɖe Biblia ƒe mɔfiamewo dzi, ne ƒomea me tɔ bubuwo mele ewɔm o gɔ̃ hã. Ne èwɔe alea, aɖe vi na wò ƒomea eye Yehowa ayra wò.—1 Pet. 3:1, 2.

8. Nu kawoe ate ŋu ado tso míaƒe nyametsotsowo me?

⁸ Míaƒe nyametsotso me tsonuwo. Yehowa na ablɔɖe mí be míatso nya me na mía ɖokui; edi be míawɔ tiatia siwo sɔ siwo aɖe vi na mí ale be míakpɔ dzidzɔ. Gake ne mímetso nya me nyuie oa, mexea mɔ ɖe nu siwo ado tso emea nu o. (Gal. 6:7, 8) Eya ta ne míewɔ tiatia si mesɔ o, míegblɔ nya aɖe si ŋu míebu nyuie o, alo míetsɔ dzitsitsi wɔ nanea, ele be míalɔ̃ ɖe emetsonuawo dzi. Ðewohĩ nu si míewɔa ate ŋu ana míaƒe dzitsinya nabu fɔ mí. Gake esi míenya be nu  siwo míewɔna me tsonu ava mía dzi taa, esia aʋã mí be míaʋu míaƒe nu vɔ̃wo me, míaɖɔ míaƒe vodadawo ɖo, eye míaƒo asa na vodada mawo ke wɔwɔ. Ne míewɔe alea, akpe ɖe mía ŋu míayi edzi aƒu agbedua.

9. Ne mètso nya me nyuie oa, nu kae nàte ŋu awɔ? (Kpɔ fotoa hã.)

⁹ Aleke nàwɔ atsɔ agba sia? Ne mètso nya me nyuie o, evɔ màte ŋu atrɔe hã oa, nu kae nàte ŋu awɔ? Lɔ̃ ɖe edzi be nu si dzɔa dzɔ xoxo. Mègagblẽ ɣeyiɣi anɔ ɖokuiwò ta ʋlim alo anɔ fɔ bum ame bubuwo alo ɖokuiwò o. Ke boŋ lɔ̃ ɖe edzi be yeda vo eye nàdze agbagba awɔ tɔwò sinua le nɔnɔmea me. Ne wò dzitsinya le fɔ bum wò le vodada aɖe si nèwɔ taa, do gbe ɖa na Yehowa, gblɔ wò vodadaa nɛ, eye nàɖe kuku nɛ be wòatsɔe ake wò. (Ps. 25:11; 51:3, 4) Ðe kuku na ame siwo dzi nànya dze agɔ le, eye ne ehiãa, bia hamemetsitsiwo woakpe ɖe ŋuwò. (Yak. 5:14, 15) Srɔ̃ nu tso wò vodadawo me, eye nàdze agbagba aƒo asa na vodada mawo ke wɔwɔ. Ne èwɔe alea, àte ŋu aka ɖe edzi be Yehowa akpɔ nublanui na wò eye wòakpe ɖe ŋuwò.—Ps. 103:8-13.

10. Nu ka tae míate ŋu atsɔ didi siwo mate ŋu ava eme o asɔ kple agba kpekpe? (Galatiatɔwo 6:4)

¹⁰ Míaƒe didi siwo mate ŋu ava eme o. Ne míetsɔa mía ɖokui sɔna kple ame bubuwoa, ɖeko wòana míado agba kpekpe na mía ɖokui dzodzro. (Xlẽ Galatiatɔwo 6:4.) Ne míetsɔa mía ɖokui sɔna kple ame bubuwoa, ate ŋu ana be míava nɔ ŋu ʋãm wo alo anɔ ho ʋlim kpli wo. (Gal. 5:26) Ne míele kutri kum be míawɔ nu si ame bubuwo te ŋu wɔ, evɔ ŋutetea mele mía ŋu oa, esia ate ŋu agblẽ nu le mía ŋu. Biblia gblɔ be, “mɔkpɔkpɔ si meva eme kaba o nana dzi sea veve,” eya ta kpɔ ale si gbegbe dzi aɖe le mía ƒoe ne míele agbagba dzem be míawɔ nane si mímate ŋu awɔ gbeɖe oa ɖa! (Lod. 13:12) Esia ate ŋu ana ŋusẽ navɔ le mía ŋu eye agbedua manya ƒu na mí o.—Lod. 24:10.

11. Nu kae akpe ɖe ŋuwò be màdi nu geɖe fũu akpa tso ɖokuiwò si o?

¹¹ Aleke nàwɔ aɖe asi le agba ma ŋu? Mègatsɔ nu geɖe do agba na ɖokuiwò wu nu siwo Yehowa bia tso asiwò o. Mebiaa nu si gbɔ míaƒe ŋutete ŋu tso mía si o. (2 Kor. 8:12) Ka ɖe edzi be Yehowa metsɔa nu siwo nèwɔna sɔna kple ame bubuwo tɔ o. (Mat. 25:20-23) Edea asixɔxɔ wò nuteƒewɔwɔ, wò dzidodo, kple ale si nèsubɔnɛ kple dzi bliboa ŋu. Lɔ̃ ɖe edzi be ate ŋu adzɔ be tsitsi, dɔléle, kple nɔnɔme aɖewo nawɔe be màte ŋu awɔ nu sia nu si nèdi o. Ne dɔléle alo tsitsi maɖe mɔ na wò be nàwɔ dɔdeasi aɖe oa, srɔ̃ Barzilai ƒe kpɔɖeŋua nàgbe faa. (2 Sam. 19:35, 36) Anyo hã be nàsrɔ̃ Mose ƒe kpɔɖeŋua alɔ̃ faa woakpe ɖe ŋuwò eye nàde dɔ ame bubuwo si ale si dze. (2 Mose 18:21, 22) Esia aɖee afia be ènya afi si wò ŋutete se ɖo, eye màdi nu geɖe fũu akpa tso ɖokuiwò si o. Ne èwɔe alea, nu mate ŋuwò o, eye àƒu agbedua awu enu.

12. Ðe wòle be míabu fɔ mía ɖokui ne amewo ɖe afɔ siwo mesɔ oa? Ðe eme.

¹² Fɔbubu mía ɖokui ɖe ame bubuwo ƒe nyametsotso gbegblẽwo ta. Mímate ŋu atso nya me na amewo o; nenema kee mímate ŋu akpɔ wo ta be tiatia gbegblẽ si wowɔa me tsonuwo nagava wo dzi o.  Le kpɔɖeŋu me, ate ŋu adzɔ be nɔvi aɖe ƒe vi natso nya me be yemagasubɔ Yehowa o. Nyametsotso ma ate ŋu ana edzilawo naxa nu vevie. Ke hã, dzila siwo bua fɔ wo ɖokuiwo ɖe nyametsotso gbegblẽ si wo vi wɔ taa, doa agba kpekpe na wo ɖokui. Gake Yehowa medi be woatsɔ agba ma o.—Rom. 14:12.

13. Nu kae dzilawo ate ŋu awɔ ne wo vi aɖe metso nya me nyuie o?

¹³ Aleke nàwɔ aɖe asi le agba ma ŋu? Ðo ŋku edzi be Yehowa na tiatiawɔblɔɖe mí katã. Eɖea mɔ ame sia ame tsoa nya me na eɖokui. Eya ta ame ŋutɔe atso nya me be yeasubɔ Yehowa loo alo yemasubɔe o. Yehowa nya be menye dzila debliboe nènye o; nu si wòdi tso asiwò koe nye be nàdze agbagba awɔ tɔwò sinua. Tiatia si viwòa wɔa nye eya ŋutɔ ƒe agba, ke menye wò agba o. (Lod. 20:11) Gake ɖewohĩ, àtsi dzi le esi nèda vo aɖewo le ɖevia hehe me ta. Ne nenemaea, do gbe ɖa nàgblɔe na Yehowa eye nàbia eƒe tsɔtsɔke. Yehowa nya be màgate ŋu atrɔ nu si dzɔ va yia o. Eye mele mɔ kpɔm be nàkpɔ ɖevia ta be wòagakpɔ tiatia gbegblẽ si wòwɔa me tsonu o. Nenɔ susu me na wò be ne viwòa ɖe afɔ be yeatrɔ ava Yehowa gbɔa, axɔe alɔ eve.—Luka 15:18-20.

14. Nu ka tae fɔbubuameɖokui fũu akpa nye agba kpekpe si ŋu wòle be míaɖe asi le?

¹⁴ Fɔbubuameɖokui fũu akpa. Ne míewɔ nu vɔ̃a, esɔ be míabu fɔ mía ɖokui. Gake Yehowa medi be míanɔ fɔ bum mía ɖokui fũu akpa o. Elabe esia nye agba kpekpe si ŋu wòle be míaɖe asi le. Ne míeʋu míaƒe nu vɔ̃ me, míetrɔ dzi me, eye míeɖe afɔ siwo ana míaƒo asa na nu vɔ̃ ma wɔwɔa, míate ŋu aka ɖe edzi be Yehowa tsɔe ke mí. (Dɔw. 3:19) Ne míenya ɖe afɔ mawo koa, Yehowa medi be míayi edzi aganɔ fɔ bum mía ɖokui o. Enya be ne míebua fɔ mía ɖokui fũu akpaa, ate ŋu agblẽ nu le mía ŋu. (Ps. 31: 10) Ate ŋu ana hã be míalé blanui fũu akpa eye míana ta.—2 Kor. 2:7.

15. Nu kae akpe ɖe ŋuwò be màganɔ fɔ bum ɖokuiwò fũu akpa o? (1 Yohanes 3:19, 20) (Kpɔ fotoa hã.)

¹⁵ Aleke nàwɔ aɖe asi le agba ma ŋu? Ne wò dzi gale fɔ bum wò kokokoa, na wò susu nanɔ Mawu ƒe “tsɔtsɔke vavãtɔ” ŋu. (Ps. 130:4) Ðo ŋku edzi be Yehowa tsɔna kea ame siwo trɔ dzi me vavã, eye wòdo ŋugbe be ‘yemagaɖo ŋku woƒe nu vɔ̃wo dzi azɔ o.’ (Yer. 31:34) Esia fia be Yehowa magabu fɔ wò ɖe nu vɔ̃ siwo nèwɔ va yia ta o. Eya ta mègasusui be nɔnɔme sesẽ si me tom nèle le nu vɔ̃ si nèwɔ va yi taa fia be Yehowa metsɔe ke wò o. Eye mègado dziku ɖe ɖokuiwò ŋu ne nu vɔ̃ si nèwɔ va yia wɔe be subɔsubɔmɔnukpɔkpɔ aɖewo ge le asiwò le hamea me o. Yehowa meyia edzi nɔa nu vɔ̃ siwo nèwɔa ŋu bum o, ta wò hã mèganɔ wo ŋu bum o.—Xlẽ 1 Yohanes 3:19, 20.

16. Nu kae wòle be míade dzesi esi míele agbedua ƒum?

¹⁶ Ele be míaƒu agbedua “le mɔ si ana [míaxɔ] fetu la nu.” (1 Kor. 9:24) Ne míete ŋu de dzesi agba siwo wòle be míatsɔ kple agba siwo ŋu wòle be míaɖe asi lea, míate ŋu aƒu agbedua awu enu. Agba siwo wòle be míatsɔ kple esiwo ŋu wòle be míaɖe asi lea dometɔ ʋɛ aɖewo ko mee míedzro le nyati sia me. Gake bubu geɖe gali. Le kpɔɖeŋu me, Yesu gblɔ be míakpɔ mía ɖokui dzi nyuie be ‘nu tsu ɖuɖu kple aha tsu nono kpakple agbemedzimaɖitsitsiwo nagate míaƒe dzi ɖe to o.’ (Luka 21:34) Mawunyakpukpui sia kple bubu geɖe ate ŋu akpe ɖe mía ŋu míade dzesi tɔtrɔ siwo wòle be míawɔ be míate ŋu aƒu agbedua.

17. Nu ka tae míeka ɖe edzi be míaƒu agbedua awu enu?

¹⁷ Míeka ɖe edzi be míaƒu agbedua awu enu, elabe Yehowa ado ŋusẽ mí. (Yes. 40:29-31) Eya ta ɖeɖi megate ŋuwò o! Srɔ̃ apostolo Paulo ƒe kpɔɖeŋua nàwɔ wò ŋutete katã be wò asi nasu dziɖuɖufetua dzi. (Flp. 3:13, 14) Ame aɖeke mate ŋu aƒu agbedua na wò o. Gake Yehowa akpe ɖe ŋuwò nàkpɔ dzidzedze. Akpe ɖe ŋuwò nàtsɔ wò agbawo eye nàɖe asi le esiwo mehiã oa ŋu. (Ps. 68:19) Yehowa li kpli wò; akpe ɖe ŋuwò nàdo dzi aƒu agbedua awu enu!