NUSƆSRƆ̃NYATI 31
HADZIDZI 12 Mawu Gã Yehowa
Nu Si Yehowa Wɔ Be Yeaɖe Mí Tso Nu Vɔ̃ Kple Ku Si Me
“Mawu lɔ̃ xexea ale gbegbe be wòtsɔ eƒe Tenuvi la na.”—YOH. 3:16.
TAÐODZINUA
Nyati sia akpe ɖe mía ŋu míakpɔ afɔ siwo ɖem Yehowa le be yeakpe ɖe mía ŋu míaɖu nu vɔ̃ dzi. Azɔ hã míakpɔ ɖoɖo si wòwɔ be yeaɖe mí be tso nu vɔ̃ si me ale be míate ŋu anɔ agbe tegbee.
1-2. (a) Nu kae nye nu vɔ̃, eye aleke míawɔ aɖu nu vɔ̃ dzi? (Kpɔ “Nyameɖeɖe” hã.) (b) Nu ka mee míadzro le nyati sia kple nyati bubu siwo le Gbetakpɔxɔ sia me la me? (Kpɔ aɖaka si nye “Na Nuxlẽla” si le Gbetakpɔxɔ sia me hã.)
ÀDI BE yeanya ale si gbegbe Yehowa Mawu lɔ̃ wòea? Nu si akpe ɖe ŋuwò nàkpɔ ŋuɖoɖo na nyabiase mae nye be nàsrɔ̃ nu tso nu siwo wòwɔ be yeaɖe wò tso nu vɔ̃ kple ku si me la ŋu. Futɔ vɔ̃ɖi aɖee nu vɔ̃ a nye, eye màte ŋu aɖu edzi le wò ŋutɔ wò ŋusẽ me o. Mí katã míewɔa nu vɔ̃ gbe sia gbe eye nu vɔ̃e he ku vɛ. (Rom. 5:12) Ke hã, nya nyui aɖe li. Le Yehowa ƒe kpekpeɖeŋu me la, míaɖu nu vɔ̃ kple ku dzi. Míeka ɖe esia dzi bliboe!
2 Ƒe 6,000 kple edzivɔ sɔŋ ye nye esia Yehowa Mawu le kpekpem ɖe mía ŋu be míawɔ avu kple nu vɔ̃. Nu ka tae? Le esi wòlɔ̃ mí vevie tae. Esi wòlɔ̃ mí amegbetɔwo tso gɔmedzedzea me ke ta la, ele nu geɖe wɔm be yeatsɔ akpe ɖe mía ŋu míawɔ avu kple nu vɔ̃. Mawu nyae be nu vɔ̃ hea ku vanɛ eye medi be míaku o. Edi be míanɔ agbe tegbee. (Rom. 6:23) Esia tututu dim Yehowa le na wò hã. Le nyati sia mea, míadzro biabia etɔ̃ siawo me: (1) Mɔkpɔkpɔ kae Yehowa na mí amegbetɔ nuvɔ̃mewo? (2) Nu kae ame aɖewo wɔ le Biblia ŋlɔɣiwo be yewoƒe nu nadze Yehowa ŋu? (3) Nu kae Yesu wɔ be yeaɖe ameƒomea tso nu vɔ̃ kple ku si me?
MƆKPƆKPƆ KAE YEHOWA NA MÍ AMEGBETƆ NUVƆ̃MEWO?
3. Nu kae na mía dzila gbãtɔwo wɔ nu vɔ̃?
3 Esi Yehowa wɔ ŋutsu kple nyɔnu gbãtɔ la, edi be woakpɔ dzidzɔ. Eya ta etso abɔ dzeani aɖe be wòanye woƒe aƒe, ena wozu atsu kple asi, eye wòde dɔ dodzidzɔname aɖe wo si. Edi be woadzi ayɔ anyigba dzi eye woakeke Eden-bɔa ɖe enu ale be anyigba bliboa nazu paradiso. Se bɔbɔe ɖeka pɛ koe wòde na wo. Exlɔ̃ nu wo be ne woda le se ma dzi heɖoe koŋ dze aglã ɖe ye ŋu la, ke wowɔ nu vɔ̃. Ekema ku ado tso eme na wo. Míenya nu si va dzɔ. Mawudɔla aɖe si melɔ̃ Mawu o eye melɔ̃ woawo hã o la va do ɖe abɔa me hete wo kpɔ be woagbe toɖoɖo Mawu. Adam kple Xawa wɔ ɖe mawudɔla vɔ̃ɖi ma si nye Satana ƒe nyawo dzi. Esi womeka ɖe wo Fofo lɔ̃amea dzi o ta, wowɔ nu vɔ̃. Nu si Yehowa gblɔ be adzɔ ne womeɖo to o lae va dzɔ: wotsi ku amegã, eye mlɔeba woku.—1 Mose 1:28, 29; 2:8, 9, 16-18; 3:1-6, 17-19, 24; 5:5.
4. Nu ka tae Yehowa lé fu nu vɔ̃ eye wòle kpekpem ɖe mía ŋu be míaɖu nu vɔ̃ dzi? (Romatɔwo 8:20, 21)
4 Yehowa na woŋlɔ nudzɔdzɔ wɔnublanui ma ɖe Biblia me na mí. Esia kpe ɖe mía ŋu míekpɔ nu si tae wòlé fu nu vɔ̃ vevie ɖo. Nu vɔ̃ tea mí ɖa tso mía Fofo lɔ̃amea gbɔ eye wòkplɔa ame yia ku me. (Yes. 59:2) Satana nya esia nyuie. Ema tae wòlɔ̃ nu vɔ̃ hele nu vɔ̃ dom ɖe ŋgɔ be yeatsɔ agblẽ mía kple Yehowa dome ɖo. Anya nɔ susum be yeɖu dzi le Eden-bɔa me. Gake menya ale si gbegbe Yehowa ƒe lɔlɔ̃ de toe o. Mawu metrɔ tame si wòɖo ɖe Adam kple Xawa ƒe dzidzimeviwo ya ŋu o. Elɔ̃ ameƒomea vevie, eya ta ewɔ ɖoɖo enumake tsɔ na mɔkpɔkpɔ mí katã. (Xlẽ Romatɔwo 8:20, 21.) Yehowa nya be Adam kple Xawa ƒe dzidzimevi aɖewo alɔ̃ ye eye woadi be wòakpe ɖe yewo ŋu yewoawɔ avu kple nu vɔ̃. Eye esi wònye Yehowae nye mía Fofo kple mía Wɔla ta la, ewɔ ɖoɖo na mí be míate ɖe ye ŋu ne míavo tso nu vɔ̃ kple ku si me. Ðoɖo kae Yehowa wɔ?
5. Ɣekaɣie Yehowa na mɔkpɔkpɔ ƒe kekeli aɖe te keklẽ na amegbetɔ nuvɔ̃mewo? Ðe eme. (1 Mose 3:15)
5 Xlẽ 1 Mose 3:15. Nya gbãtɔ si Yehowa gblɔ esi wònɔ ʋɔnu drɔ̃m Satana la na mɔkpɔkpɔ ƒe kekeli aɖe te keklẽ na amegbetɔwo. Mawu gblɔe ɖi be “dzidzimevi” aɖe dzie mɔkpɔkpɔ ato ava na amegbetɔwo. Dzidzimevi sia ava gbã ta na Satana mlɔeba eye wòaɖɔ nu siwo katã futɔ sia gblẽ tso Eden-bɔa me la ɖo. (1 Yoh. 3:8) Gake gbã la, Satana aɖu afɔkpodzi na dzidzimevia, si fia be ana woawui. Esia ate ɖe Yehowa dzi vevie ŋutɔ. Gake Yehowa lɔ̃ faa be nu sia nadzɔ ale be yeato edzi aɖe amegbetɔwo tso nu vɔ̃ kple ku si me.
NU KAE AMEGBETƆ NUVƆ̃ME AÐEWO WƆ BE WOƑE NU DZE YEHOWA ŊU?
6. Nu kae Abel, Noa, kple nuteƒewɔla bubuwo wɔ be woate ŋu ate ɖe Yehowa ŋu?
6 Esi ƒeawo va nɔ yiyim la, Yehowa na ale si amegbetɔ nuvɔ̃mewo awɔ ate ɖe ye ŋu la me va nɔ kɔkɔm ɖe edzi vivivi. Abel, si nye Adam kple Xawa ƒe vi eveliae nye ame gbãtɔ si xɔ Yehowa dzi se tso esime edzilawo dze aglã ɖe Yehowa ŋu le Eden-bɔa me. Esi Abel lɔ̃ Yehowa eye wòdi be yeƒe nu nadze eŋu ne ye kplii dome nanɔ kplikplikpli ta, eɖoe be yeasa vɔ na Yehowa. Alẽkplɔlae Abel nye, eya ta etsɔ eƒe alẽawo ƒe ɖe sa vɔ na Yehowa. Nu kae do tso eme? “Abel kple eƒe vɔsa la dze Yehowa ŋu.” (1 Mose 4:4) Yehowa kpɔ ŋudzedze ɖe Noa kple ame bubu siwo lɔ̃e eye woka ɖe eyama dzia ƒe vɔsawo hã ŋu. (1 Mose 8:20, 21) Esi Yehowa xɔ woƒe vɔsa mawo la, efia be amegbetɔ nuvɔ̃mewo ƒe nu ate ŋu adze eŋu eye woate ŋu ate ɖe eŋu. b
7. Nu kae míesrɔ̃ tso ale si Abraham lɔ̃ faa be yeatsɔ via asa vɔe me?
7 Yehowa bia tso Abraham, ame si si xɔse sẽŋu le la si be wòawɔ nane si sesẽ ŋutɔ. Eyae nye be wòatsɔ eya ŋutɔ via Isak asa vɔ na ye. Nyateƒee, nu si Yehowa bia tso Abraham si be wòawɔ la sesẽ ale gbegbe. Gake elɔ̃ faa be yeawɔ ɖe Yehowa ƒe nyaa dzi. Esi Abraham tsɔ hɛ be yeawu Isak la, Mawu ɖo asi edzi. Ke hã, nudzɔdzɔ ma fia nu vevi aɖe mí tso nu si Yehowa ŋutɔ ava wɔ ŋu. Yehowa alɔ̃ faa atsɔ Via malɔ̃nugbɔa asa vɔ ɖe amegbetɔwo ta. Aleke gbegbee Yehowa lɔ̃ amegbetɔwoe nye esi!—1 Mose 22:1-18.
8. Nu ka dzie vɔsa vovovo siwo Mose ƒe Sea bia la nɔ susu hem yi? (3 Mose 4:27-29; 17:11)
8 Ƒe alafa aɖewo megbea, Mawu na Se Israel dukɔa si bia tso wo si be woasa vɔ vovovowo atsɔ alé avu ɖe woƒe nu vɔ̃wo ta. (Xlẽ 3 Mose 4:27-29; 17:11.) Vɔsa mawo nɔ mɔ dzi dzram ɖo na vɔsa bubu aɖe si de ŋgɔ wu, si ava ɖe amegbetɔƒomea ƒe nu vɔ̃wo ɖa keŋkeŋ. Mawu to eƒe nyagblɔɖilawo dzi na míenya be dzidzimevi la, si va nye Mawu ŋutɔ ƒe Vi malɔ̃nugbɔ la, ava kpe fu eye wòaku ɖe míaƒe nu vɔ̃wo ta. Woawui abe vɔsalẽvi ene. (Yes. 53:1-12) Wò ya bu eŋu kpɔ ko: Yehowa awɔ ɖoɖo atsɔ eya ŋutɔ ƒe Vi malɔ̃nugbɔa asa vɔ ɖe ameƒomea ta be yeaɖe wo tso nu vɔ̃ kple ku si me—wò hã èle eme!
NU KAE YESU WƆ TSƆ ÐE AMEGBETƆWO?
9. Nya kae Yohanes Amenyrɔɖetsimela gblɔ tso Yesu ŋu? (Hebritɔwo 9:22; 10:1-4, 12)
9 Le ƒe alafa gbãtɔ K.Ŋ. mea, Yohanes Amenyrɔɖetsimela fia asi Yesu Nazaretetɔ la eye wògblɔ tso eŋu be: “Kpɔ ɖa, Mawu ƒe Alẽvi si le xexea ƒe nu vɔ̃ ɖem ɖa lae nye esi!” (Yoh. 1:29) Nya sia si Mawu ƒe gbɔgbɔ ʋãe wògblɔ la he susu yi Yesu dzi be eyae nye dzidzimevi si ŋugbe wodo. Atsɔ eƒe agbe ana ɖe mía ta. Azɔ mɔkpɔkpɔ vavã si ŋu kakaɖedzi le va su amegbetɔ nuvɔ̃mewo si—si nye be woado tso nu vɔ̃ ƒe xadza me keŋkeŋ.—Xlẽ Hebritɔwo 9:22; 10:1-4, 12.
10. Aleke Yesu ɖee fia be nu vɔ̃ wɔlawo tae yeva ɖo?
10 Yesu ƒe susu nɔ ame siwo ƒe dzi bua fɔ wo le woƒe nu vɔ̃wo ta la ŋu eye wòkpe wo be woadze ye yome. Yesu nyae be Adam ƒe nu vɔ̃ koŋ gbɔe amegbetɔwo ƒe fukpekpewo tso. Eya ta ekpe ɖe ŋutsu kple nyɔnu siwo amewo buna be wonye nu vɔ̃ wɔlawo la ŋu. Edo lo sia be: “Ame siwo le lãmesẽ me la mehiã gbedala o, ke boŋ dɔnɔwoe hiãe.” Egblɔ kpee be: “Menye ame dzɔdzɔewo yɔ gee meva o, ke boŋ nu vɔ̃ wɔlawoe.” (Mat. 9:12, 13) Yesu wɔ ɖe eƒe nyawo dzi. Ewɔ nu ɖe nyɔnu si fa aɖatsi ɖe eƒe afɔwo dzi hetsɔ eƒe taɖawo tutui la ŋu le tufafa me eye wòtsɔ eƒe nu vɔ̃wo kee. (Luka 7:37-50) Efia nyateƒenya vevi aɖewo Samaria-nyɔnua le vudoa to togbɔ be enyae be nyɔnua menɔa agbe ɖɔʋu o hã. (Yoh. 4:7, 17-19, 25, 26) Mawu na ŋusẽ Yesu wòkpɔ ŋusẽ ɖe nu vɔ̃ me tsonu si nye ku gɔ̃ hã dzi. Le mɔ ka nu? Yesu fɔ ŋutsuwo, nyɔnuwo, ɖeviwo, kple ametsitsiwo siaa ɖe tsitre.—Mat. 11:5.
11. Nu ka tae nu vɔ̃ wɔlawo dina be yewoate ɖe Yesu ŋu?
11 Mewɔ nuku o be ame siwo nu vɔ̃ do agba kpekpe na gɔ̃ hã te ɖe Yesu ŋu. Eƒe dɔme trɔ ɖe wo ŋu eye wòkpɔ nublanui na wo. Enɔ bɔbɔe na wo be woate ɖe Yesu ŋu eye woɖea dzi ɖi le egbɔ. (Luka 15:1, 2) Yesu kafu wo hekpe ɖe wo ŋu le esi woxɔ edzi se ta. (Luka 19:1-10) Yesu to eƒe nuwɔnawo me ɖe ale si gbegbe Fofoa kpɔa nublanui fia. (Yoh. 14:9) Yesu to eƒe nyagbɔgblɔ kple nuwɔnawo me ɖee fia be ye Fofo lɔ̃ amewo, ekpɔa nublanui na ame, esea veve ɖe ame nu eye wòdi be yeakpe ɖe wo ŋu woaɖu nu vɔ̃ dzi. Yesu wɔ nu si ana nuvɔ̃mewo nadi be yewoatrɔ yewoƒe agbenɔnɔ ava dze ye yome.—Luka 5:27, 28.
12. Nu kae Yesu na míenya tso eƒe kua ŋu?
12 Yesu nya be yeatsɔ yeƒe agbe asa vɔ ɖe mía ta. Ena eyomedzelawo nya be woade ye asi eye woahe ye ɖe ati ŋu. (Mat. 17:22; 20:18, 19) Enya be yeƒe vɔsaa aɖe xexea ƒe nu vɔ̃ ɖa abe ale si Yohanes Amenyrɔɖetsimela kple nyagblɔɖila bubuwo gblɔe ɖi ene. Yesu nya hã be ne yetsɔ yeƒe agbe na ɖe mía ta vɔa, yeahe “ameƒomeviwo katã ɖe” ye ɖokui ŋu. (Yoh. 12:32) Nu si amegbetɔ nuvɔ̃mewo awɔ be woƒe nu nadze Yehowa ŋue nye be woaxɔ woƒe Aƒetɔ Yesu dzi ase eye woanɔ eyome. Ne wowɔ esia ko hafi woakpɔ ‘ablɔɖe tso nu vɔ̃ me’ mlɔeba. (Rom. 6:14, 18, 22; Yoh. 8:32) Esi Yesu nya esiawo ta la, dzi nɔ eƒo wòlɔ̃ faa be yease veve helĩhelĩ ahaku ɖe mía ta.—Yoh. 10:17, 18.
13. Aleke Yesu kui, eye nu kae eƒe kua fia mí tso Yehowa Mawu ŋu? (Kpɔ nɔnɔmetataa hã.)
13 Wode Yesu asi, wolée, wodzui, woda alakpa ɖe esi, wowɔ funyafunyae eye wotso kufia nɛ gɔ̃ hã. Asrafowo kplɔe yi amewuƒea eye woklãe ɖe ati ŋu. Ðikeke mele eme o be Yehowa hã se veve vevie esi wònɔ Via kpɔm wònɔ nu mawo gbegbe me tom. Ŋusẽ geɖe le Yehowa si be wòaɖe Via tso vevesese ma me hafi, ke hã mewɔe o. Nu ka tae? Nu ka tae Vifofo lɔ̃ame sia aɖe asi le Via ŋu wòakpe fu nenema? Yesu gblɔ be: “Mawu lɔ̃ xexea ale gbegbe be wòtsɔ eƒe Tenuvi la na, be ame sia ame si xɔa edzi sena la nagatsrɔ̃ o, ke boŋ wòakpɔ agbe mavɔ.” (Yoh. 3:16) Esia na míekpɔe be lɔlɔ̃e ʋã Yehowa.
Yehowa to vevesese geɖe me esi wòɖe mɔ wowu Via ale be wòato esia dzi aɖe mí tso nu vɔ̃ kple ku si me (Kpɔ memama 13)
14. Nu kae Yesu ƒe kua na nède dzesi?
14 Yesu ƒe kua nye kpeɖodzi gãtɔ kekeake be Yehowa lɔ̃ Adam kple Xawa ƒe dzidzimeviwo. Eɖo kpe edzi be Yehowa lɔ̃ wò vevie ŋutɔ. Bu afɔ siwo gbegbe Yehowa ɖe tso keke aglãdzeɣia ke kple vevesese si me wòto ale be yeaɖe wò tso nu vɔ̃ kple ku me ŋu kpɔ. (1 Yoh. 4:9, 10) Ɛ̃, edi vevie be yeakpe ɖe mía dometɔ ɖe sia ɖe ŋu be míawɔ avu kple nu vɔ̃ eye míaɖu edzi!
15. Nu kae wòle be míawɔ be Mawu ƒe nunana si nye Yesu ƒe tafevɔsaa naɖe vi na mí?
15 Mawu ƒe nunana si nye Via malɔ̃nugbɔa ƒe tafevɔsaa na wòle bɔbɔe be wòatsɔ míaƒe nu vɔ̃wo ake mí. Gake nane li si wòle be míawɔ be Mawu natsɔ míaƒe nu vɔ̃wo ake mí. Eyae nye nu ka? Yohanes Amenyrɔɖetsimela kple Yesu Kristo ŋutɔ ɖo nya ma ŋu be: “Mitrɔ dzi me, elabena Dziƒofiaɖuƒe la gogo.” (Mat. 3:1, 2; 4:17) Eya ta ne míedi be woatsɔ míaƒe nu vɔ̃wo ake mí eye míate ɖe mía Fofo lɔlɔ̃a ŋu la, ele vevie be míatrɔ dzi me. Gake nu ka tututue dzimetɔtrɔ fia, eye aleke wòakpe ɖe mía ŋu be míaƒe nu nadze Yehowa ŋu togbɔ be míenye nuvɔ̃mewo hã? Míakpɔ ŋuɖoɖoa le nyati si kplɔe ɖo me.
HADZIDZI 18 Akpedada Ðe Tafea Ta
a Nyameɖeɖe: Le Biblia mea, nya “nu vɔ̃” ate ŋu afia nu gbegblẽ si ame wɔ. Ate ŋu afia hã be ame mete ŋu wɔ ɖe Yehowa ƒe nudidi dzɔdzɔeawo dzi o. Gake nya “nu vɔ̃” agate ŋu afia blibomademade alo nu vɔ̃ si ƒe dome míenyi tso Adam gbɔ. Nu vɔ̃ si ƒe dome míenyi tae míekuna ɖo.
