1. Nu kae nye “Mawu ƒe ŋutifafa,” eye aleke wòɖea vi na mí? (Filipitɔwo 4:6, 7)

 ŊUTIFAFA aɖe li si ŋu xexea menya nu tsoe o. Eyae nye “Mawu ƒe ŋutifafa,” si nye dziɖeɖi kple dzidzeme si sua mía si le ƒomedodo si le mía kple mía Fofo si le dziƒo dome ta. Ŋutifafa sia nana míesena le mía ɖokui me be míele dedie. (Xlẽ Filipitɔwo 4:6, 7.) Enana mía kple “ŋutifafa Mawu la” dome nɔa kplikplikpli eye ƒomedodo nyui nɔa mía kple ame siwo lɔ̃e dome. (1 Tes. 5:23) Ne míenya mía Fofo Yehowa, míeka ɖe edzi, eye míeɖoa toea, eƒe ŋutifafa ana míaƒe dzi nadze eme ne kuxi sesẽwo va mía dzi.

2. Nu ka tae míate ŋu aka ɖe edzi be anya wɔ be míaɖe dzi ɖi le ɣeyiɣi sesẽwo me?

² Ðe wòanya wɔ ŋutɔŋutɔ be Mawu ƒe ŋutifafa nasu mía si ne dɔvɔ̃ do, afɔku dzɔ, ʋunyaʋunya le edzi yim, alo wole mía yome tima? Ele bɔbɔe be nu siawo nana míavɔ̃. Gake Yesu de dzi ƒo na mí be: “Migana dzika natso mia ƒo o, eye vɔvɔ̃ hã megaɖo mi o.” (Yoh. 14:27) Nɔvi geɖewo wɔ ɖe Yesu ƒe aɖaŋuɖoɖoa dzi, eye Yehowa kpe ɖe wo ŋu woɖe dzi ɖi le ɣeyiɣi sesẽwo me.

3. Ne dɔvɔ̃ aɖe doa, kuxi kae wòhena vɛ?

³ Ne dɔvɔ̃ aɖe doa, ate ŋu ana nuwo natrɔ kura le míaƒe agbe me. Le kpɔɖeŋu me, numekuku ɖee fia be esime corona dɔvɔ̃a doa, ewɔe be ame geɖe megatea ŋu dɔa alɔ̃ nyuie o. Azɔ hã dzimaɖitsitsi, blanuilelé, aha geɖe nono, atike muamewo zazã, kple ŋutasesẽ le ƒometɔwo ŋu va  dzi ɖe edzi, eye ame geɖe tee kpɔ be yewoawu yewo ɖokui. Ne dɔvɔ̃ aɖe do le miaƒe nutoa mea, aleke nàwɔ aɖe dzi ɖi eye Mawu ƒe ŋutifafa nasu asiwò?

4. Nu ka tae Yesu ƒe nyagblɔɖi si ku ɖe ŋkeke mamlɛawo ŋu nana míeɖea dzi ɖi?

⁴ Yesu gblɔe ɖi be le ŋkeke mamlɛawo mea, dɔvɔ̃wo “ava teƒeteƒewo.” (Luka 21:11) Esia nyanya nana míeɖea dzi ɖi. Nu ka tae? Nu si tae nye be míekpɔe be nuwo le dzɔdzɔm abe ale si tututu Yesu gblɔe ɖi ene, taa mewɔa nuku na mí ne dɔvɔ̃wo do o. Míewɔna ɖe aɖaŋu si Yesu ɖo na ame siwo anɔ agbe le nuwuɣia dzi. Egblɔ be: “Dzika megatso mia ƒo o.”—Mat. 24:6.

5. (a) Le ɖekawɔwɔ me kple Filipitɔwo 4:8, 9 la, nu kawoe míate ŋu ado gbe ɖa abia ne dɔvɔ̃ aɖe do? (b) Aleke Biblia xexlẽ si wolé ɖi sese ɖe vi na nɔvinyɔnu aɖe, eye nu kae nèsrɔ̃ tso egbɔ?

⁵ Ne dɔ aɖe kaka le míaƒe nutoa mea, ate ŋu awɔe be míatsi dzimaɖi eye míavɔ̃ gɔ̃ hã. Esia tɔgbi dzɔ ɖe nɔvinyɔnu Desi dzi. b Corona dɔa wu etɔɖia, kple etɔgãa ƒe vi, kpakple eƒe ɖɔkta; esia na wòvɔ̃ be ye ŋutɔ hã yeava xɔ dɔa eye yeabae na ye nɔ tsitsia. Dɔvɔ̃a wɔe be etsi dzimaɖi be dɔ ava ge le ye si, eye wòtsi dzi ɖe ale si wòawɔ akpɔ ga aƒle nuɖuɖu alo axe xɔfetu ŋu. Nu siawo xɔ susu me nɛ ale gbegbe be mete ŋu dɔa alɔ̃ le zã me o. Gake Desi te ŋu va ɖe dzi ɖi. Nu kae kpe ɖe eŋu? Edo gbe ɖa na Yehowa be wòakpe ɖe ye ŋu yeaɖe dzi ɖi eye yeabu nu nyuiwo ŋu. (Xlẽ Filipitɔwo 4:8, 9.) Esea Biblia xexlẽ siwo wolé ɖe mɔ̃ dzi edziedzi, elabe ele nɛ ko abe Yehowa le nu ƒom nɛ tẽe ene. Egblɔ be: “Gbe si nuxlẽlawo tsɔ xlẽ Biblia nana nye dzi dzea eme eye wòɖoa ŋku edzi nam be Yehowa léa be nam.”—Ps. 94:19.

6. Aleke ɖokuisinusɔsrɔ̃ kple kpekpeawo dede ate ŋu aɖe vi na wò?

⁶ Ne dɔ aɖe kaka le miaƒe nutoa mea, ate ŋu agblẽ wò ɖoɖowo me, gake mègana wòagblẽ ɖoɖo siwo nèwɔ ɖe ɖokuisinusɔsrɔ̃ kple kpekpeawo dede ŋu me o. Nuteƒekpɔkpɔ siwo le míaƒe agbalẽwo kple videowo me akpe ɖe ŋuwò nàkpɔe be mía nɔviŋutsu kple nɔvinyɔnu geɖewo yi edzi le Yehowa subɔm le nɔnɔme sesẽ mawo tɔgbi me. (1 Pet. 5:9) Azɔ hã kpekpeawo akpe ɖe ŋuwò wò susu nanɔ Biblia me nya fakɔnamewo ŋu. Woana mɔnukpɔkpɔ wò be nàde dzi ƒo na nɔviwo eye woawo hã woade dzi ƒo na wò. (Rom. 1:11, 12) Ne ède ŋugble le ale si Yehowa kpe ɖe esubɔlawo ŋu esime wodze dɔ, wonɔ vɔvɔ̃m, alo wotsi akogo  ŋua, wò xɔse asẽ ɖe edzi eye àka ɖe edzi be akpe ɖe wò hã ŋuwò.

7. Nu kae nàte ŋu asrɔ̃ tso apostolo Yohanes gbɔ?

⁷ Do ka kple nɔviwo edziedzi. Ne dɔvɔ̃ aɖe do le nutoa mea, ate ŋu ahiã be míanɔ adzɔge na amewo, ne wonye haxɔsetɔwo gɔ̃ hã. Esia ate ŋu awɔe be nàse le ɖokuiwò me abe apostolo Yohanes ene. Edzroe vevie be yeakpɔ ye xɔlɔ̃ Gayo ŋkume kple ŋkume. (3 Yoh. 13, 14) Gake enya be manya wɔ le ɣeyiɣi ma me o. Eya ta ewɔ nu si wòate ŋui; eŋlɔ lɛta na Gayo. Ne manya wɔ be nàɖo dze kple nɔviawo ŋkume kple ŋkume oa, àte ŋu ayɔ wo le fon alo videokadodo dzi alo aɖo text message ɖe wo. Esia ana màtsi akogo fũu o, eye nàɖe dzi ɖi. Ne ètsi dzimaɖi veviea, àte ŋu agblɔe na hamemetsitsiwo eye woade dzi ƒo na wò.—Yes. 32:1, 2.

8. Ne afɔku dzɔa, aleke wòate ŋu ana nàse le ɖokuiwò me?

⁸ Ðe anyigba ʋuʋu le miaƒe nutoa me, tsi ɖe mi, alo dzo dze miaƒe aƒe alo agble kpɔa? Ne nenemaea, ke ɖewohĩ ena nètsi dzimaɖi vevie ɣeyiɣi didi aɖe. Eye ne wò ame vevi aɖe tsi eme alo wò nunɔamesiwo dome gblẽa, ɖewohĩ esia na nèxa nu vevie, mɔkpɔkpɔ bu ɖe wò alo nèdo dziku gɔ̃ hã. Esia mefia be wò dzi ku ɖe wò nunɔamesiawo ŋu alo xɔse mele asiwò o. Nu si dzɔ ɖe dziwò tae. (Hiob 1:11) Gake anya wɔ be wò dzi nafa. Nu kae akpe ɖe ŋuwò?

9. Nu kae Yesu na míenya tso afɔkuwo ŋu?

⁹ Ame aɖewo susuna be afɔku madzɔ ɖe yewo dzi gbeɖe o. Gake míawo ya míeɖoa ŋku edzi be Yesu gblɔ be afɔku geɖe adzɔ eye míenya be ɖewo ate ŋu adzɔ ɖe míawo ŋutɔwo dzi. Yesu gblɔe ɖi be “anyigba aʋuʋu ŋɔdzitɔe le teƒeteƒewo,” eye afɔku bubuwo hã adzɔ hafi nuwuwua nava. (Luka 21:11) Egblɔe ɖi hã be ‘sedzimawɔmawɔ adzi ɖe edzi,’ eye míekpɔe be esia le eme vam, elabe nu vlo wɔwɔ, ŋutasesẽ, kple ŋɔdzidolawo ƒe amedzidze va bɔ fifia ŋutɔ. (Mat. 24:12) Yesu megblɔ be ame siwo mesubɔa Yehowa o ko dzie nu siawo adzɔ ɖo o. Le nyateƒe mea, afɔkuwo dzɔ ɖe Yehowa subɔla wɔnuteƒe geɖe dzi. (Yes. 57:1; 2 Kor. 11:25) Yehowa maɖe mí tso afɔku ɖe sia ɖe me nukutɔe ya o, gake ana nu sia nu si míehiã be míaɖe dzi ɖi la mí.

10. Nu ka tae dzadzraɖo ɖe afɔku ŋu fifia aɖee afia be míeka ɖe Yehowa dzi? (Lododowo 22:3)

¹⁰ Ne míedzra ɖo ɖe afɔkuwo ŋua, anɔ bɔbɔe na mí be míaɖe dzi ɖi ne wodzɔ. Gake ɖe dzadzraɖo ɖe afɔku ŋu fia be míeka ɖe Yehowa dzi oa? Kura o. Le nyateƒe mea, eɖee fia boŋ be míeka ɖe edzi be Yehowa alé be na mí. Nu ka tae míegblɔe alea? Mawu ƒe Nyaa xlɔ̃ nu mí be míadzra ɖo ɖe afɔkuwo ŋu. (Xlẽ Lododowo 22:3.) Eye Mawu ƒe habɔbɔa to nyatiwo, hame ƒe kpekpewo, kple gbeƒãɖeɖewo dzi de dzi ƒo na mí enuenu be míadzra ɖo ɖe nudzɔdzɔ kpatawo ŋu. c Ne míeka ɖe Yehowa dzia, míawɔ ɖe mɔfiame mawo dzi fifia hafi afɔku aɖe nava dzɔ.

11. Nu kae nèsrɔ̃ tso Margaret gbɔ?

¹¹ Bu Margaret ƒe kpɔɖeŋua ŋu kpɔ: Dzo dze ave le woƒe nutoa me, ta wobia tso wo si be woadzo le woƒe aƒewo me. Esi ame geɖe nɔ sisim taa, ʋuwo va  sɔ gbɔ ɖe mɔdodowo dzi ale gbegbe be womegate ŋu nɔ zɔ ɖem o. Dzudzɔ bla yame kɔtɔɔ, eya ta Margaret mate ŋu ado le ʋua me o. Gake Margaret dzra ɖo do ŋgɔ; ede anyigbatata akpete me ale be wòakpe ɖe ye ŋu yeakpɔ mɔ si dzi yeato ayi dedienɔƒe ne afɔku dzɔ. Eku ʋu to mɔa dzi gɔ̃ hã be wòate ŋu anya mɔa nyuie do ŋgɔ. Esi Margaret dzra ɖo nyuie alea taa, ete ŋu tsi agbe esime afɔkua dzɔ.

12. Nu ka tae wòle be míawɔ ɖe dedienɔnɔ ŋuti mɔfiamewo dzi?

¹² Ne afɔku dzɔa, dumegãwo ate ŋu aɖe afɔ aɖewo be yewoatsɔ akpɔ amewo ta. Le kpɔɖeŋu me, woate ŋu ade se be amewo nagado le zã me o, alo amewo nayi dedienɔƒe aɖe alo woaɖe afɔ bubu aɖewo. Ame aɖewo medina be yewoawɔ ɖe mɔfiame mawo dzi o le esi womedi be yewoagblẽ yewoƒe nunɔamesiwo ɖi o ta. Ke aleke Kristotɔwo ya wɔa nui? Biblia gblɔ na mí be: “Mibɔbɔ mia ɖokui ɖe amegbetɔwo ƒe nuɖoanyiwo katã te le Aƒetɔ la ta, eɖanye fia si le ɖoƒe kɔkɔ, alo nutodziɖula siwo wòdɔna . . . la o.” (1 Pet. 2:13, 14) Mawu ƒe habɔbɔa hã naa mɔfiamewo mí be míanɔ dedie. Woɖoa ŋku edzi na mí enuenu be míatsɔ afi si míele kple kaƒodzesi siwo zãm míele na hamemetsitsiwo ale be woate ŋu ake ɖe mía ŋu ne nane dzɔ kpata. Ðe nèwɔe nenema? Azɔ hã woate ŋu ana mɔfiame mí be míatsi aƒe me alo míadzo ayi dedienɔƒe aɖe, eye woate ŋu ana mɔfiame mí ku ɖe ale si míawɔ akpɔ nuhiahiã veviwo alo akpe ɖe amewo ŋu ne afɔku dzɔ ŋu. Ne mímewɔ ɖe mɔfiame mawo dzi oa, míate ŋu ade míawo ŋutɔwo alo hamemetsitsiwo ƒe agbe afɔku me. Ðo ŋku edzi be, hamemetsitsi wɔnuteƒe mawo le mía ŋu dzɔm. (Heb. 13:17) Margaret gblɔ be: “Meka ɖe edzi bliboe be habɔbɔa kple hamemetsitsiawo ƒe mɔfiamewo dzi wɔwɔe na metsi agbe.”

13. Nu kae kpe ɖe nɔvi siwo dzi afɔku dzɔ ɖo la dometɔ geɖe ŋu be wogava le dzidzɔ kpɔm?

¹³ Nɔvi siwo si le woƒe aƒewo me le afɔku, aʋawɔwɔ alo ʋunyaʋunya ta la dometɔ geɖe te ŋu trɔ ɖe woƒe nɔnɔmea ŋu eye woyi edzi subɔ Yehowa. Woyia edzi ‘ɖea gbeƒã nya nyuia’ abe ale si ƒe alafa  gbãtɔ me Kristotɔ siwo ka hlẽ le yometiti ta wɔe ene. (Dɔw. 8:4) Gbeƒãɖeɖedɔa kpena ɖe wo ŋu woƒe susu nɔa Fiaɖuƒea ŋu tsɔ wu woƒe kuxiwo ŋu. Esia wɔe be woyi edzi kpɔ dzidzɔ eye woƒe dzi dze eme.

14. Ne wole mía yome timaa, aleke wòate ŋu ana míase le mía ɖokui me?

¹⁴ Ne wole mía yome timaa, ate ŋu ana míatsi dzodzodzoe. Edzɔa dzi na mí ŋutɔ ne wona ablɔɖe mí be míawɔ kpekpeawo, míaɖe gbeƒã, eye míawɔ míaƒe gbe sia gbe dɔ bubuwo, elabe míevɔ̃na be woava lé mí atu o. Gake ne woxɔ ablɔɖe mawo le mía sia, ate ŋu ana míatsi dzimaɖi alo míavɔ̃, eye esia le dzɔdzɔme nu. Ke hã, ele be míanɔ ŋudzɔ, elabe Yesu gblɔe ɖi be yometiti ate ŋu ana ye yomedzelawo nagbɔdzɔ. (Yoh. 16:1, 2) Ke aleke míawɔ aɖe dzi ɖi ne wole mía yome tim?

15. Nu ka tae mele be míavɔ̃ yometiti o? (Yohanes 15:20; 16:33)

¹⁵ Mawu ƒe Nyaa gblɔ be: “Ame siwo katã dina be yewoanɔ agbe ɖe ɖokuitsɔtsɔ na Mawu nu le Kristo Yesu me la, woati woawo hã yome tsã.” (2 Tim. 3:12) Esesẽ na Andrei be wòaxɔe ase be woati Yehowa subɔlawo katã yome abe ale si kpukpuia gblɔe ene esime woɖo asi míaƒe dɔa dzi le woƒe dukɔa me. Egblɔ be: ‘Ðasefowo sɔ gbɔ ɖe dukɔa me. Aleke woawɔ alé mí katã?’ Gake nuŋububu alea mena wòɖe dzi ɖi o, ke ɖe wòtsi dzodzodzoe boŋ. Nɔvi bubuwo ya nyae be woate ŋu alé yewo, taa wogblẽ nyaa ɖe Yehowa si me. Esia wɔe be wote ŋu ɖe dzi ɖi vie. Eya ta Andrei va tiae be yeawɔ nu abe nɔviawo ene, aɖo ŋu ɖe Yehowa ŋu bliboe. Ema na wòɖe dzi ɖi eye wòle dzidzɔ kpɔm fifia togbɔ be nɔnɔmea metrɔ o hã. Míawo hã míate ŋu aɖe dzi ɖi le nɔnɔme siawo tɔgbi me. Ele eme be Yesu gblɔ be míakpɔ mɔ be woati mía yome ya, gake eka ɖe edzi na mí hã be míate ŋu ayi edzi awɔ nuteƒe.—Xlẽ Yohanes 15:20; 16:33.

16. Mɔfiame kawo dzie wòhiã be míawɔ ɖo ne woxe mɔ ɖe míaƒe dɔ nu?

¹⁶ Ne woxe mɔ ɖe míaƒe dɔa nua, alɔdzedɔwɔƒea  alo hamemetsitsiwo ate ŋu ana mɔfiamewo mí. Woawɔ esia be woatsɔ akpɔ mía ta, woakpɔ egbɔ be nu siwo míehiã be míali ke le xɔse me su mía si, eye woakpe ɖe mía ŋu míayi edzi aɖe gbeƒã ale si wòanya wɔ. Dze agbagba nàwɔ ɖe mɔfiame mawo dzi ne mèse susu si tae wona wo ɖo gɔme bliboe o hã. (Yak. 3:17) Azɔ hã, mègaʋu go mía nɔviwo alo hamea ŋu nyawo na ame siwo mehiã be woasee o la gbeɖe o.—Nyagb. 3:7.

17. Abe apostolo siwo nɔ anyi le ƒe alafa gbãtɔ me enea, nu kae míeɖo kplikpaa be míawɔ?

¹⁷ Susu vevi si ta Satana ho aʋa ɖe Mawu ƒe amewo ŋue nye be “wode dɔ asi na wo be woaɖi ɖase le Yesu ŋuti.” (Nyaɖ. 12:17) Mègana Satana kple eƒe xexea nana nàvɔ̃ o. Gbeƒãɖeɖe kple nufiafia amewo nana míekpɔa dzidzɔ heɖea dzi ɖi ne wole mía yome tim hã. Esi Yudatɔwo ƒe amegãwo de se na apostoloawo le ƒe alafa gbãtɔ me be woadzudzɔ gbeƒãɖeɖea, apostolo wɔnuteƒe mawo tiae be yewoaɖo to Mawu boŋ. Woyi edzi ɖe gbeƒã eye esia na wokpɔ dzidzɔ. (Dɔw. 5:27-29, 41, 42) Ne woɖo asi míaƒe dɔa dzia, ele be míaɖɔ ŋu ɖo ne míedi be míaɖe gbeƒã na amewo. (Mat. 10:16) Gake ne míewɔ mía tɔ sinua, Mawu ana eƒe ŋutifafa mí le esi míaƒe nu dzea eŋu eye míekua kutri gblɔa agbenya na amewo ta.

18. Ame kae ate ŋu ana ŋutifafa vavãtɔ nasu mía si?

¹⁸ Míate ŋu aka ɖe edzi be nɔnɔme sesẽ ka kee ɖava mía dzi o, míate ŋu aɖe dzi ɖi. Ne edzɔ alea, ele be míaɖo ŋku edzi be Mawu ƒe ŋutifafae ana míaɖe dzi ɖi eye be Yehowa Mawu koe ana ŋutifafa ma mí. Eya ta ɖo ŋu ɖe eŋu ne dɔvɔ̃ do, afɔku dzɔ, alo wole mía yome tim. Nɔ eƒe habɔbɔa ŋu kplikplikpli. Wò susu nenɔ ŋugbe nyui siwo Mawu do ku ɖe etsɔme ŋua ŋu. Ne èwɔ nu siawoa, “ŋutifafa ƒe Mawu la anɔ anyi kpli [wò].” (Flp. 4:9) Le nyati si kplɔ esia ɖo mea, míakpɔ ale si míakpe ɖe mía nɔvi Kristotɔwo ŋu Mawu ƒe ŋutifafa nasu wo si le ɣeyiɣi sesẽwo me.