Ðe nèxlẽ Gbetakpɔxɔ ƒe tata siwo do le ƒe sia me la beléletɔea? Ekema, kpɔe ɖa be àte ŋu aɖo biabia siwo gbɔna ŋu hã:

Ne míedia ɣeyiɣi doa gbe ɖa, srɔ̃a nu, eye míedea ŋugblea, aleke esia aɖe vi na mí?

Akpe ɖe mía ŋu míatso nya me nyuie, ale si míefiaa nui aganyo ɖe edzi, míaƒe xɔse asẽ ɖe edzi, eye míagalɔ̃ Yehowa ɖe edzi.—w22.01, axa 30-31.

Ne míeka ɖe Yehowa kple eteƒenɔla siwo le anyigba dzi la dzia, aleke wòaɖe vi na mí?

Fifiae wòle be míasrɔ̃ ale si míaka ɖe ale si Mawu wɔa nui dzi. Míate ŋu awɔ esia ne míelɔ̃na ɖe hamemetsitsiwo ƒe nyametsotsowo dzi. Esia awɔe be le xaxa gãa mea, anɔ bɔbɔe na mí be míawɔ ɖe mɔfiame siwo woana mí la dzi, ne edze abe susu mele wo me o ene gɔ̃ hã.—w22.02, axa 4-6.

Nya si mawudɔlaa gblɔ na Zakariya tso “tsumikpe si le [Nutodziɖula] Zerubabel si” ŋu la gɔme ɖe? (Zak. 4:8-10)

Zakariya ƒe ŋutegaa ka ɖe edzi na Mawu ƒe amewo be togbɔ be gbedoxɔ yeye si tum wole made xoxoa nu o hãa, woatui awu enu eye adze Yehowa ŋu.—w22.03, axa 16-17.

Aleke míeɖenɛ fiana be míenye “kpɔɖeŋu . . . le nuƒoƒo me”? (1 Tim. 4:12)

Míeƒoa nu tufafatɔe eye míedea bubu amewo ŋu le gbeadzi, míedzia ha tso dzi me eye míeɖoa nya ŋu le kpekpeawo me edziedzi, míetoa nyateƒe, míegblɔa nya siwo tua ame ɖo, eye míeƒoa asa na nya veamewo gbɔgblɔ.—w22.04, axa 6-9.

Nu ka tae nu siwo dze le lã (dziɖuɖu) ene siwo ŋu woƒo nu tsoe le Daniel ta 7 ŋu la katã dze le lã ɖeka si ŋu Nyaɖeɖefia 13:1, 2 ƒo nu tsoe ŋu?

Menye dziɖuɖu ɖeka aɖe koe lã si le Nyaɖeɖefia 13 la le tsitre ɖi na o. Ke boŋ, ele tsitre ɖi na dunyaheŋusẽ siwo katã kpɔ ŋusẽ ɖe amegbetɔwo dzi.—w22.05, axa 9.

Aleke míate ŋu aɖee afia be míeka ɖe edzi be Yehowa adrɔ̃ ʋɔnu dzɔdzɔe ɣesiaɣi?

Ne ame aɖe dzu mí alo dze agɔ le mía dzi alo wɔ nu vɔ̃ ɖe mía ŋua, míagblẽ nyaa ɖe Yehowa si me, míadze agbagba aɖe asi le dziku ŋu, eye mímalé amea ɖe dɔme o. Yehowa ava ɖɔ nu siwo katã nu vɔ̃ gblẽ le mía ŋu ɖo.—w22.06, axa 10-11.

Ne wobia tso nɔviŋutsu aɖe si be wòaxɔ ŋgɔ ado gbe ɖa le kpekpe mea, nu ka dzie wòle be wòaɖo ŋkui?

Mesɔ be wòazã gbedodoɖaa atsɔ aɖe gbeƒã alo agbe nya na nɔviwo o. Mehiã be wòaƒo nu fũu o, vevietɔ ne kpekpea ƒe gɔmedzedzee. (Mat. 6:7)—w22.07, axa 24-25.

Mɔ ka nue woafɔ “ame siwo wɔ nu vlowo la” hena “ʋɔnudɔdrɔ̃ ƒe tsitretsitsi” le? (Yoh. 5:29)

Womabu fɔ wo le agbe si wonɔ hafi ku la ta o. Ke boŋ woanɔ ŋku lém ɖe woƒe nuwɔna kple nɔnɔme ŋu le woƒe tsitretsitsi megbe.—w22.09, axa 18.

Nya kae J. F. Rutherford gblɔ tsɔ ʋã vavalawo le takpekpe si wowɔ le September 1922 me?

Le takpekpe aɖe si wowɔ le Cedar Point, Ohio, le Amerika mea, egblɔ be: “Fia la le dzi ɖum! Miawoe nye eƒe nyakakalawo. Eya ta miɖe gbeƒã, miɖe gbeƒã, miɖe gbeƒã Fia la kple eƒe Fiaɖuƒe la.”—w22.10, axa 3-5.

Yesaya ta 30 lia ƒo nu tso mɔ etɔ̃ aɖewo siwo dzi Yehowa tona kpena ɖe eƒe amewo ŋu be woado dzi ŋu. Woawoe nye kawo?

Ta sia ɖee fia be (1) Yehowa ɖoa to míaƒe gbedodoɖawo eye wòɖoa wo ŋu, (2) efiaa mɔ mí, eye (3) eyraa mí fifia eye ava yra mí le etsɔme.—w22.11, axa 9.

Nu ka tae míate ŋu aƒo nya ta be nya siwo le Psalmo 37:10, 11, 29 va eme le blema eye woagava eme le etsɔme hã?

David ƒe nyawo ku ɖe ale si Yehowa yra Israel le Salomo ƒe dziɖuɣi ŋu. Yesu he susu yi paradiso si ava le etsɔme dzi eye wòyɔ nya tso kpukpui 11 lia me. (Mat. 5:5; Luka 23:43)—w22.12, axa 8-10, 14.