Dɔ si Yehowa de asi na amegbetɔwo be ‘woadzi ayɔ anyigba dzi eye woaɖu edzi’ ɖee fia be anyigba bliboa ava zu paradiso mlɔeba. (1 Mose 1:28) Dɔ ma kpɔtɔ li, eye ame siwo anyi anyigba dome ava wɔe ade goe. Gake Eden-bɔa alo paradiso meli woakeke ɖe enu o. Eya ta tso nuɖoanyi yeyea ƒe gɔmedzedze koa, dɔ geɖe anɔ anyi woawɔ atsɔ adzra anyigba ƒe teƒe siwo gblẽ ɖo. Dɔ gã aɖe ŋutɔe wòanye!

Esia na míeɖo ŋku dɔ si wòhiã be Israel-viwo nawɔ esi wogbɔ tso aboyo me le Babilon dzi. Ƒe 70 sɔŋ ye nye ema woƒe anyigba tsi ƒuƒlu. Gake Yesaya gblɔe ɖi be le Yehowa ƒe kpekpeɖeŋu mea, woagadzra anyigbaa ɖo wòanya kpɔ. Egblɔe ɖi be: “[Yehowa awɔ] eƒe gbegbe wòanɔ abe Eden-bɔ ene kple eƒe tagba abe Yehowa ƒe abɔ ene.” (Yes. 51:3) Israel-viwo te ŋu dzra woƒe anyigba ɖo wònya kpɔ. Nenema kee Yehowa akpe ɖe ame siwo anyi anyigba dome ŋu woadzra edzi ɖo wòazu paradiso.  Nu geɖe li nàte ŋu awɔ fifia gɔ̃ hã atsɔ aɖee afia be yedi vevie be yeakpe asi ɖe dɔ ma ŋu.

Nu mawo dometɔ ɖekae nye be nàwɔ nu si nàte ŋui be wò aƒe me kple nutoa me nanɔ dzadzɛ eye nuwo nanɔ ɖoɖo nu, ne wò aƒelikawo mele ewɔm o gɔ̃ hã. Azɔ hãa, àte ŋu akpe asi ɖe Fiaɖuƒe Akpatawo kple takpekpewɔƒewo dzadzraɖo kple beléle na wo ŋu. Ne anya wɔa, àte ŋu ade asi agbalẽ te be yeawɔ kpekpeɖeŋunadɔwo ne afɔku dzɔ. Esia aɖee afia be èle klalo be yeana kpekpeɖeŋu ne eva hiã. Bia ɖokuiwò be, ‘Ðe mate ŋu asrɔ̃ aɖaŋudɔ aɖewo siwo mate ŋu azã ne Yehowa na meva nyi anyigba domea?’

Esi Yesu fɔ Yairo vinyɔnua ɖe tsitre tetia, egblɔ be woadi nane nɛ wòaɖu. (Marko 5:42, 43) Manye nu sesẽ be woakpɔ nyɔnuvi ma si xɔ ƒe 12 la ƒe nuhiahiã gbɔ nɛ o. Gake bu dɔ si gbegbe wòahiã be míawɔ ne Yesu na ŋugbe si wòdo be, “ame siwo katã le ŋkuɖodziyɔdowo me la ase [yeƒe] gbe, eye woado go” la va eme ŋu kpɔ. (Yoh. 5:28, 29) Togbɔ be Biblia megblɔ nya boo aɖeke tso nya sia ŋu o hãa, edze ƒãa be ahiã be míakpe ɖe ame siwo woafɔ ɖe tsitre ŋu be woakpɔ nuɖuɖu, mlɔƒe, kple nudodowo. Aleke nàte ŋu aɖee afia fifia gɔ̃ hã be yele klalo be yeana kpekpeɖeŋu? Bu nyabiase siwo gbɔna ŋu kpɔ.

Ne woɖe gbeƒã be nutome sue dzikpɔla ava srã mi kpɔa, ɖe nèwɔa ɖoɖo be yeakpee ne yewoaɖu nu ɖekaea? Ne woɖɔ li dɔ na Betel ƒomea me tɔ alo nutome sue dzikpɔla aɖe eye woɖoe ɖe miaƒe nutoa mea, ɖe nàte ŋu akpe ɖe eŋu wòakpɔ xɔa? Ne woawɔ takpekpe gã alo takpekpe tɔxɛ aɖe le miaƒe nutoa mea, ɖe nàte ŋu atsɔ ɖokuiwò ana be yeakpe asi ɖe dɔ ŋu do ŋgɔ na takpekpea alo le takpekpea megbe alo ado wòezɔ na vavalawoa?

Nya si le Dɔwɔwɔwo 24:15 na míele mɔ kpɔm be woava fɔ ame miliɔn akpe geɖe ɖe tsitre. Wo dometɔ akpa gãtɔ anye ame siwo si mɔnukpɔkpɔ mesu be woanya Yehowa o. Mɔnukpɔkpɔ ma ava su wo si ne wofɔ wo ɖe tsitre. a Mawusubɔla wɔnuteƒe siwo si nuteƒekpɔkpɔ su afia nu wo. (Yes. 11:9) Nɔvinyɔnu Charlotte, si ɖe gbeƒã le Europa, Anyiehe Amerika, kple Afrika la le mɔ kpɔm vevie na dɔ sia wɔwɔ. Egblɔ dzidzɔtɔe be: “Mele mɔ kpɔm vevie be mava fia nu ame siwo woafɔ ɖe tsitre. Ne mexlẽ nu tso ame aɖe si nɔ anyi va yi ŋua, megblɔna zi geɖe be: ‘Ne ɖe wònya Yehowa, anye ne agbea de edzi sãsãsã wu.’ Mele lalam vevie be mafia nu ame siwo woafɔ ɖe tsitrea tso Yehowa ŋu, eye makpe ɖe wo ŋu woasubɔe be woakpɔ dzidzɔ.”

Yehowa subɔla wɔnuteƒe aɖewo nɔ anyi do ŋgɔ na Yesu ƒe anyigba dzi vava. Nu geɖe li wòle be woawo gɔ̃ hã nasrɔ̃. Le kpɔɖeŋu me, Daniel ŋlɔ nyagblɔɖi aɖewo siwo gɔme eya ŋutɔ mese o. Bu dzidzɔ si gbegbe wòanye ne mɔnukpɔkpɔa su mía si be míaɖe ale si wova emee me nɛ ŋu kpɔ. (Dan. 12:8) Míakpe ɖe Rut kple Naomi hã ŋu woanya ale si Mesia va do tso woƒe ƒomea me. Dzidzɔ ka gbegbee nye esi wòanye be míakpe asi ɖe nufiafiadɔ ma si ayi edzi le xexea me godoo ŋu! Ɣemaɣia, xexe vɔ̃ɖi sia ƒe kuxiwo kple susuhenuwo maganɔ anyi o.

Aleke nàte ŋu aɖee afia fifia be yele dzadzraɖoɖi be yeakpe asi ɖe dɔ ma ŋu? Mɔ nyui ɖekae nye be nàdze agbagba ana ale si nèfiaa nu amewoe naganyo ɖe edzi, eye nàwɔ gbeƒãɖeɖedɔ si le edzi yim le xexea me godoo egbea edziedzi. (Mat. 24:14) Ne tsitsi alo wò nɔnɔmewo maɖe mɔ fifia be nàwɔ geɖe o hãa, yi edzi nàwɔ wò ŋutete katã. Esia aɖee afia be èle dzadzraɖoɖi be yeafia nu ame siwo woafɔ ɖe tsitre.

Eya ta, biabiae nye be: Ðe nèle mɔ kpɔm be yeava nyi anyigba domea? Ðe wòdoa dzidzɔ na wò be yeava dzra anyigba dzi ɖo le etsɔme, yeakpe ɖe ame siwo woafɔ ɖe tsitre ŋu woakpɔ woƒe nuhiahiã veviwo, eye yeafia nu woa? Ekema wɔ mɔnukpɔkpɔ siwo le ʋuʋu ɖi egbea ŋu dɔ nàkpe asi ɖe dɔ siwo tɔgbi nàva wɔ ɣemaɣi ŋu. Esia aɖee afia be èle klalo anyi anyigba dome!