NUSƆSRƆ̃NYATI 49
Míate Ŋu Anɔ Agbe Tegbee
“Esiae nye agbe mavɔ la.”—YOH. 17:3.
HADZIDZI 147 Wodo Agbe Mavɔ Ŋugbe
NYA VEVIAWO a
1. Nu ka tae wònyo be míade ŋugble le ŋugbe si Yehowa do na mí ŋu?
YEHOWA do ŋugbe be ame siwo ɖoa toe ava kpɔ “agbe mavɔ.” (Rom. 6:23) Ne míedea ŋugble le ŋugbedodo ma ŋua, lɔlɔ̃ si le mía si na Yehowa me gasẽna ɖe edzi. Wò ya bu eŋu kpɔ ko: Mía Fofo si le dziƒoa lɔ̃ mí ale gbegbe be medi be mía kpli ye dome naklã gbeɖe o.
2. Aleke ŋugbe si Mawu do be míava nɔ agbe tegbee kpena ɖe mía ŋu?
2 Ŋugbe si Mawu do be míava nɔ agbe tegbee kpena ɖe mía ŋu míedoa dzi le xaxa siwo me tom míele fifia me. Ne míaƒe futɔwo tsɔ ku do ŋɔdzi na mí hãa, míedzudzɔa Yehowa subɔsubɔ o. Nu ka tae? Susu ɖekae nye be, míenya be ne míewɔ nuteƒe na Yehowa va se ɖe ku mea, afɔ mí ɖe tsitre eye mɔnukpɔkpɔ asu mía si be míanɔ agbe tegbee. (Yoh. 5:28, 29; 1 Kor. 15:55-58; Heb. 2:15) Susu kawo tae míate ŋu aka ɖe edzi be anya wɔ be míanɔ agbe tegbee? Na míadzro wo dometɔ aɖewo me kpɔ.
YEHOWA LI TEGBEE
3. Nu ka tae míate ŋu aka ɖe edzi be Yehowa ate ŋu ana míanɔ agbe tegbee? (Psalmo 102:12, 24, 27)
3 Míenya be Yehowa ate ŋu ana míanɔ agbe tegbee elabe eya gbɔe agbe dzɔ tso eye eya ŋutɔ hã li tegbee. (Ps. 36:9) Biblia ɖo kpe edzi be gɔmedzedze meli na Yehowa o eye nuwuwu hã meli nɛ o. Le kpɔɖeŋu me, Psalmo 90:2 gblɔ be Yehowa li “tso mavɔ me yi mavɔ me.” Nya ma tɔgbi dze le Psalmo 102 lia. (Xlẽ Psalmo 102:12, 24, 27.) Nyagblɔɖila Habakuk hã gblɔ tso mía Fofo si le dziƒo ŋu be: “Oo Yehowa, ɖe mèli tso gbe aɖe gbe ke oa? Oo nye Mawu, nye Kɔkɔetɔ, mèkuna o.”—Hab. 1:12.
4. Ne esesẽ na mí be míase egɔme be Yehowa li tso mavɔ me yi mavɔ mea, ɖe wòle be esia naɖe fu na mía? Ðe eme.
4 Ðe wòsesẽna na wò be nàse egɔme be Yehowa li tso mavɔ me yi mavɔ mea? (Yes. 40:28) Ne nenemaea, ke menye wò ɖekae o. Mawuvɔ̃la Elihu gblɔ kpɔ be “[Mawu ƒe] ƒewo ƒe agbɔsɔsɔ gbɔ míaƒe gɔmesese ŋu.” (Hiob 36:26) Gake ne míese nya aɖe gɔme oa, ema mefia be menye nyateƒe o. Le kpɔɖeŋu me, ne míese ale si elɛktrikŋusẽ wɔa dɔe gɔme bliboe oa, ɖe wòfia be elɛktrikŋusẽ meli oa? Kura o. Nenema kee mí amegbetɔwo míate ŋu ase ale si wòanya wɔ be Yehowa nanɔ anyi tso mavɔ me yi mavɔ me gɔme bliboe gbeɖe o. Gake ema metrɔ nya ma ƒe nyateƒenyenye o. Nyaa koe nye be Wɔla la nye Mavɔtɔ. (Rom. 11:33-36) Eli xoxoxo hafi va wɔ ɣe, ɣleti, kple nu siwo katã le xexea me. “[Eyae] tsɔ eƒe ŋusẽ wɔ anyigba” eye ‘wòkeke dziƒowo me.’ (Yer. 51:15; Dɔw. 17:24) Azɔ míakpɔ susu bubu aɖe si tae míate ŋu aka ɖe edzi be anya wɔ be míanɔ agbe tegbee.
YEHOWA WƆ MÍ BE MÍANƆ AGBE TEGBEE
5. Mɔnukpɔkpɔ kae Mawu na atsu kple asi gbãtɔ?
5 Amegbetɔwo to vovo le nu gbagbe siwo katã Yehowa wɔ ɖe anyigba dzi me elabe woawo koe wòna mɔnukpɔkpɔe be woanɔ agbe tegbee alo womaku o. Ke hã, Yehowa xlɔ̃ nu Adam be: “Sidzedze nyui kple vɔ̃ ƒe atia ya la, mègaɖu eƒe tsetse aɖeke o, elabena gbe si gbe nàɖu eƒe ɖe la, ku kee nàku.” (1 Mose 2:17) Ne ɖe Adam kple Xawa ɖo to Yehowa, anye ne womeku o. Elabe anɔ eme be le ɣeyiɣi aɖe megbea, Yehowa aɖe mɔ na wo be woaɖu ‘agbeti la ƒe tsetse’ wòanye kpeɖodzi tso egbɔ na wo be woanɔ “agbe tegbee.” b—1 Mose 3:22.
6-7. Nu kawoe ɖo kpe edzi be Mawu mewɔ amegbetɔwo be woaku o? (b) Nu kawoe nàdi be yeawɔ ne èva le agbe tegbee? (Kpɔ nɔnɔmetataawo.)
6 Dzɔdzɔmeŋutinunyala aɖewo ƒe numekukuwo ɖee fia be, nyatakaka siwo gbegbe ate ŋu anɔ amegbetɔ ƒe ahɔhɔ̃ mea sɔ gbɔ sãsãsã wu nu siwo míeléna ɖe susu me le ƒe siwo míenɔa agbe egbea me. Le ƒe 2010 mea, magazine aɖe gblɔ be nyatakaka si gbegbe míaƒe ahɔhɔ̃a ate ŋu alé ɖi anɔ abe nyatakaka si le video si xɔ gaƒoƒo miliɔn etɔ̃ sɔŋ me ene. (Scientific American Mind) Ne ame aɖe le video ma kpɔm madzudzɔmadzudzɔea, axɔ ƒe 300 kple edzivɔ hafi wòakpɔe avɔ. Ke hã, anɔ eme be míaƒe ahɔhɔ̃a ate ŋu alé nyatakaka si wu ema sãsãsã gɔ̃ hã ɖi. Esia ɖo kpe edzi be Yehowa wɔ míaƒe ahɔhɔ̃a be wòate ŋu alé nyatakaka geɖe ɖi wu esiwo míeléna ɖe susu me le ƒe 70 alo ƒe 80 siwo míenɔa agbe me.—Ps. 90:10.
7 Azɔ hã, Biblia gblɔ be Mawu ‘de mavɔmavɔ dzi me na’ amegbetɔwo. (Nyagb. 3:11) Esia tae míedina vevie be míayi edzi anɔ agbe eye míebua ku be enye futɔ ɖo. (1 Kor. 15:26) Ne míedze dɔ veviea, míenɔa anyi naneke mawɔmawɔe be míaku o, ke boŋ míeyia kɔdzi eye míenoa atike be míahaya. Míewɔa nu sia nu si míate ŋui be míagaku o. Azɔ hã ne ame aɖe si míelɔ̃ vevie ku, eɖanye ɖevi alo ame tsitsi o, míesea veve ŋutɔ. (Yoh. 11:32, 33) Eme kɔ ƒãa be ɖe mía Wɔla lɔ̃amea ɖoe be míanɔ agbe tegbee, eye esia tae wòna didia kple ŋutetea mí be míayi edzi anɔ agbe. Gake susu bubuwo gali siwo tae míeka ɖe tame si Yehowa ɖo le gɔmedzedzea me be míanɔ agbe tegbee dzi. Na míakpɔ nu siwo Yehowa wɔ va yi kple nu siwo wɔm wòle fifia siwo ɖo kpe edzi be tame si wòɖo metrɔ o.
Esi míenya be míava nɔ agbe tegbee taa, dzi dzɔa mí ne míebua nu siwo míate ŋu ava wɔ le etsɔme ŋu (Kpɔ memama 7 lia) c
TAME SI YEHOWA ÐO LA METRƆ O
8. Aleke Yesaya 55:11 me nyawo ka ɖe edzi na mí be tame si Yehowa ɖo ɖe mía ŋu metrɔ o?
8 Togbɔ be nu vɔ̃ si Adam kple Xawa wɔ la he ku vɛ na wo viwo hãa, tame si Yehowa ɖo metrɔ o. (Xlẽ Yesaya 55:11.) Egadi kokoko be nuteƒewɔlawo nanɔ agbe tegbee. Nya siwo Yehowa gblɔ kple nu siwo wòwɔ ale be eƒe tameɖoɖoa nava eme na míeka ɖe esia dzi.
9. Ŋugbe kae Mawu do? (Daniel 12:2, 13)
9 Yehowa do ŋugbe be yeafɔ ame siwo ku la ɖe tsitre eye yeana mɔnukpɔkpɔ wo be woava nɔ agbe tegbee. (Dɔw. 24:15; Tito 1:1, 2) Nuteƒewɔla Hiob ka ɖe edzi be ele Yehowa dzrom vevie be yeafɔ ame siwo ku la ɖe tsitre. (Hiob 14:14, 15) Nyagblɔɖila Daniel nyae be woava fɔ ame siwo ku la ɖe tsitre eye mɔnukpɔkpɔ asu wo si be woanɔ agbe tegbee. (Ps. 37:29; xlẽ Daniel 12:2, 13.) Yudatɔ siwo nɔ anyi le Yesu ƒe ŋkekea me hã nyae be Yehowa do ŋugbe be yeana ye subɔla wɔnuteƒewo nakpɔ “agbe mavɔ.” (Luka 10:25; 18:18) Yesu ƒo nu tso ŋugbedodo sia ŋu zi geɖe; eye Fofoa fɔ eya ŋutɔ hã ɖe tsitre.—Mat. 19:29; 22:31, 32; Luka 18:30; Yoh. 11:25.
Esi Eliya fɔ ahosia ƒe viŋutsu ɖe tsitrea, nu ka dzie esia na míeka ɖo? (Kpɔ memama 10 lia)
10. Nu ka dzie tsitretsitsi siwo ŋu woƒo nu tsoe le Biblia mea ɖo kpee na mí? (Kpɔ nɔnɔmetataa.)
10 Yehowae nye Agbenala, eye ŋusẽ le esi be wòagbɔ agbe ame siwo ku. Ena ŋusẽ nyagblɔɖila Eliya wòfɔ ahosi si nɔ Zarefat la ƒe viŋutsu ɖe tsitre. (1 Fia. 17:21-23) Emegbe ena nyagblɔɖila Elisa fɔ Sunam nyɔnu aɖe ƒe viŋutsu ɖe tsitre. (2 Fia. 4:18-20, 34-37) Nudzɔdzɔ siawo kple bubuwo ɖo kpe edzi be ŋusẽ le Yehowa si be wòagbɔ agbe ame siwo ku. Esi Yesu nɔ anyigba dzia, eɖee fia be ye Fofo na ŋusẽ ye be yeafɔ amewo ɖe tsitre. (Yoh. 11:23-25, 43, 44) Fifia Yesu le dziƒo, eye wotsɔ “ŋusẽ si le dziƒo kple anyigba dzi la katã” de asi nɛ. Eya ta, ate ŋu ana ŋugbedodo si nye be “ame siwo katã le ŋkuɖodziyɔdowo me” afɔ eye mɔnukpɔkpɔ asu wo si be woanɔ agbe tegbee la nava eme.—Mat. 28:18; Yoh. 5:25-29.
11. Aleke tafea na mɔnukpɔkpɔ su mía si be míanɔ agbe tegbee?
11 Nu ka tae Yehowa ɖe mɔ Via malɔ̃nugbɔa ku? Yesu na míenya susu si tae esi wògblɔ be: “Mawu lɔ̃ xexea ale gbegbe be wòtsɔ eƒe Tenuvi la na, be ame sia ame si xɔa edzi sena la nagatsrɔ̃ o, ke boŋ wòakpɔ agbe mavɔ.” (Yoh. 3:16) Mawu ʋu mɔnukpɔkpɔ ɖi na mí be míakpɔ agbe mavɔ esi wòna Via va xe fe ɖe míaƒe nu vɔ̃wo ta. (Mat. 20:28) Apostolo Paulo na akpa vevi si Yesu wɔ be Mawu ƒe tameɖoɖo nava emea me kɔ esi wògblɔ be: “Esi wònye ame dzie ku to va ta la, ame kukuwo ƒe tsitretsitsi la hã to ame dzi va. Elabena ale si ko amewo katã kuna le Adam me la, nenema kee woagbɔ agbe wo katã hã le Kristo me.”—1 Kor. 15:21, 22.
12. Aleke Yehowa ato Fiaɖuƒea dzi ana tame si wòɖo ɖe mía ŋu nava eme?
12 Yesu fia eyomedzelawo be woado gbe ɖa be Mawu Fiaɖuƒea nava eye woawɔ Mawu ƒe lɔlɔ̃nu le anyigba dzi. (Mat. 6:9, 10) Mawu ƒe tameɖoɖo ƒe akpa aɖee nye be amegbetɔwo nanɔ agbe tegbee le anyigba dzi. Be esia nava emea, Yehowa ɖo Via wònye Mesia Fiaɖuƒea ƒe Fia. Eye ele ame 144,000 nu ƒom ƒu tso anyigba dzi be woawɔ dɔ kple Yesu ale be yeƒe lɔlɔ̃nu nava eme.—Nyaɖ. 5:9, 10.
13. Nu ka wɔm Yehowa le fifia, eye nu kae wò hã nàte ŋu awɔ?
13 Yehowa le “ameha gã aɖe” hã nu ƒom ƒu eye wòle hehe nam wo be woava nye yeƒe Fiaɖuƒea teviwo. (Nyaɖ. 7:9, 10; Yak. 2:8) Togbɔ be ame siawo le xexe sia si me fuléle kple aʋawɔwɔ de mama amewo me le me hãa, wodzea agbagba ɖua fuléle ɖe sia ɖe ƒomevi dzi. Wotoa woƒe nuwɔnawo me ɖenɛ fiana be yewotsɔ yewoƒe yiwo tu agblenuwoe. (Mika 4:3) Womeƒoa wo ɖokui ɖe aʋawɔwɔ me o, ke boŋ wofiaa nu amewo tso Mawu kple eƒe tameɖoɖowo ŋu ale be yewoakpe ɖe wo ŋu woƒe asi nasu “agbe vavã la” dzi. (1 Tim. 6:19) Togbɔ be etea ŋu dzɔna be ƒometɔwo tsia tsitre ɖe wo ŋu eye gakuxiwo ɖea fu na wo le esi wole Mawu Fiaɖuƒea ƒe akpa dzi ta hãa, Yehowa kpɔa woƒe nuhiahiã veviwo gbɔ na wo. (Mat. 6:25, 30-33; Luka 18:29, 30) Esiawo katã na míeka ɖe edzi be Mawu Fiaɖuƒea li ŋutɔŋutɔ eye ayi edzi ana Yehowa ƒe tameɖoɖoa nava eme.
ETSƆME NYUI AÐE LE MÍA ŊGƆ
14-15. Aleke ŋugbe si Yehowa do be yeaɖe ku ɖa tegbee ava eme mlɔeba?
14 Yesu le fia ɖum fifia le Mawu Fiaɖuƒea me le dziƒo, eye ana ŋugbe siwo katã Yehowa do nava eme. (2 Kor. 1:20) Tso ƒe 1914 mea, Yesu le eƒe futɔwo dzi ɖum. (Ps. 110:1, 2) Eteƒe madidi o, Yesu kple eƒe hatidziɖulawo aɖu woƒe futɔwo dzi keŋkeŋ eye woatsrɔ̃ ame vɔ̃ɖiwo katã ɖa.—Nyaɖ. 6:2.
15 Le Yesu ƒe Ƒe Akpe Ðeka Dziɖuɖua mea, woafɔ ame kukuwo ɖe tsitre eye woana ame siwo katã ɖo to Yehowa nade blibo. Le dodokpɔ mamlɛtɔ megbea, ame siwo Yehowa kpɔ be wonye ame dzɔdzɔewo “anyi anyigba la dome, eye woanɔ edzi tegbee.” (Ps. 37:10, 11, 29) “Futɔ mamlɛtɔ si woaɖe ɖa lae nye ku,” eye esia ana dzi nadzɔ mí ŋutɔ.—1 Kor. 15:26.
16. Susu vevitɔ si tae míesubɔa Yehowa ɖoe nye eka?
16 Abe ale si míekpɔe le nyati sia me enea, Mawu ƒe Nyaa ɖee fia kɔtɛ be míate ŋu anɔ agbe tegbee. Kakaɖedzi le mɔkpɔkpɔ sia ŋu eye ate ŋu akpe ɖe mía ŋu míayi edzi awɔ nuteƒe le ŋkeke mamlɛ sesẽ siawo me. Gake menye esi míedi be míayi edzi anɔ agbe ta koe míadze agbagba be míadze Yehowa ŋu o. Susu vevitɔ si tae míewɔa nuteƒe na Yehowa kple Yesu ye nye be míelɔ̃ wo vevie. (2 Kor. 5:14, 15) Lɔlɔ̃ ma ʋãa mí míedzea agbagba srɔ̃a wo eye míeƒoa nu tso mɔkpɔkpɔ si le mía si ŋu na amewo. (Rom. 10:13-15) Ne míewɔa nyui na amewo eye míedia mía ɖokui tɔ oa, adzɔ dzi na Yehowa be míanye ye xɔlɔ̃wo tegbee.—Heb. 13:16.
17. Tiatia kae dze ŋgɔ mía dometɔ ɖe sia ɖe? (Mateo 7:13, 14)
17 Ðe míanɔ ame siwo akpɔ agbe mavɔ domea? Yehowa ʋu esia ƒe mɔnukpɔkpɔ ɖi na mí. Fifia, ekpo ɖe míawo ŋutɔ gbɔ be míayi edzi anɔ mɔ si kplɔa ame yia agbe me dzi. (Xlẽ Mateo 7:13, 14.) Aleke agbea anɔ ne míeva le agbe tegbee? Míadzro esia me le nyati si kplɔe ɖo me.
HADZIDZI 141 Agbe Nye Nukunu
a Ðe nèkpɔa mɔ be yeava nɔ agbe tegbeea? Yehowa do ŋugbe na mí be ɣeyiɣi aɖe avaa, míanɔ agbe tegbee, eye míatsi dzi be míava ku o. Le nyati sia mea, míadzro susu siwo ta míate ŋu aka ɖe edzi bliboe be Yehowa ana eƒe ŋugbedodoa nava emea dometɔ aɖewo me.
b Kpɔ aɖaka si ƒe tanyae nye “ Gɔmesese Si Le Nya ‘Tegbee’ Ŋu Le Biblia Me.”
c NU SI LE EDZI YIM LE FOTOAWO ME: Nɔviŋutsu tsitsi aɖe le nu siwo wòawɔ nenye be eva le agbe tegbee la dometɔ aɖewo kpɔm le susu me.
