Ðe nèxlẽ Gbetakpɔxɔ ƒe tata siwo do le ƒe sia me la beléletɔea? Ekema kpɔe ɖa be àte ŋu aɖo biabia siwo gbɔna ŋu hã:

Kpɔɖeŋu kae Yehowa ɖo ɖi na mí le ale si wòle be míawɔ nu ɖe nyɔnuwo ŋui me?

Ewɔa nu ɖe ŋutsuwo kple nyɔnuwo ŋu sɔsɔe. Mawu ɖoa to nyɔnuwo, elabe etsɔ ɖe le ale si wosena le wo ɖokui me kple nu siwo me tom wole la me. Eye eka ɖe wo dzi be woate ŋu awɔ dɔ si yede wo si.—w24.01, axa 15-16.

Aleke míate ŋu awɔ nya siwo le Efesotɔwo 5:7 be, “Migade ha kpli wo o,”dzi?

Apostolo Paulo le nu xlɔ̃m mí be míagade ha kple ame siwo ana wòasesẽ na mí be míawɔ ɖe Mawu ƒe nudidiwo dzi la o. Hadede vɔ̃ siawo ate ŋu anye ame siwo míedea ha kplii ŋkume kple ŋkume kpakple ame siwo míedea ha kplii to hahoo kadomɔnuwo dzi hã.—w24.03, axa 22-23.

Alakpanya kawo ŋue wòle be míanɔ ŋudzɔ ɖo?

Ele be míakpɔ nyuie le nya siwo ŋu kpeɖodzi mele o siwo xɔlɔ̃wo aɖo ɖe mí, email siwo míaxɔ tso ame siwo míenya o gbɔ, kple xɔsegbela siwo wɔa nu abe ɖe wotsɔ ɖe le nya nyuia me ene ŋu.—w24.04, axa 12.

Nu kae míenya tso ale si Yehowa adrɔ̃ ʋɔnu Fia Salomo kple ame siwo ku le Sodom kple Gomora kpakple Tsiɖɔɖɔa me ŋu, eye nu kae mímenya tso eŋu o?

Mímate ŋu agblɔe kple kakaɖedzi be Yehowa na wotsrɔ̃ gbidii o. Gake míenya be enya nu siwo katã ku ɖe ame mawo ŋu, eye be ekpɔa nublanui geɖe.—w24.05, axa 3-4.

Esi Mawu nye “Agakpe” taa, kakaɖedzi kae ema na mí? (5 Mose 32:4)

Míate ŋu ana Yehowa nanye míaƒe sitsoƒe. Míate ŋu aɖo ŋu ɖe eŋu elabe ewɔa eƒe ŋugbedodowo dzi ɣesiaɣi. Eye metrɔna o, si fia be eƒe nɔnɔmewo kple tameɖoɖowo matrɔ o.—w24.06, axa 26-28.

Nu kawoe akpe ɖe ŋuwò ne èʋu yi hame yeye me?

Ðo ŋu ɖe Yehowa ŋu, eye akpe ɖe ŋuwò abe ale si wòkpe ɖe esubɔlawo ŋu le blema ene. Mègatsɔ hame yeyea nɔ sɔsɔm kple hame si me nèʋu le o. Ƒo ɖokuiwò ɖe hame yeyea me dɔwo me, eye dze agbagba nàdze xɔ̃ yeyewo.—w24.07, axa 26-28.

Nufiame etɔ̃ kawoe le lododo etɔ̃ siwo dze le Mateo ta 25 lia me na mí?

Alẽwo kple gbɔ̃wo ŋuti lododoa te gbe ɖe edzi be ele be míawɔ nu dzɔdzɔe kple nu si le eteƒe. Ðetugbui dzeaɖaŋuawo kple ɖetugbui tsibomeawo ŋuti lododoa ɖe ale si wòle vevie be míanɔ dzadzraɖoɖi ahanɔ ŋudzɔe fia. Eye talento ŋuti lododoa na míekpɔe be ele vevie be míado vevie nu, eye míawɔ dɔ sesĩe.—w24.09, axa 20-24.

Aleke gbedoxɔ si Salomo tu ƒe akpata ƒe kɔkɔme nɔ?

Le blema asinuŋɔŋlɔgbalẽ aɖewo mea, wogblɔ le 2 Kronika 3:4 be akpataa kɔ “abɔklugui 120,” si ade meta 53 (afɔ 175 ) sɔŋ. Gake blema asinuŋɔŋlɔgbalẽ bubu siwo ŋu kakaɖedzi le gblɔ be ekɔ “abɔklugui 20,” si ade meta asieke (afɔ 30). Edze ƒãa be dzidze sia sɔ ɖe ale si gbedoxɔa ƒe gliwo ƒe titrime le nu.—w24.10, axa 31.

Nu kae wòfia be subɔsubɔdɔwɔla “nanye nyɔnu ɖeka srɔ̃”? (1 Tim. 3:12)

Efia be srɔ̃ ɖeka ko nanɔ esi, eye mele be wòanye ame si ƒoa eɖokui ɖe gbɔdɔdɔ manɔsenu me o. Azɔ hã, mele be wòanɔ ŋku lém ɖe nyɔnu bubuwo ŋu madzemadzee o.—w24.11, axa 19.

Nu ka tae míate ŋu agblɔ be menye Aƒetɔ ƒe Fiẽnuɖuɖua ƒe nya gblɔmee Yesu nɔ le Yohanes 6:53 o?

Yesu gblɔ le Yohanes 6:53 be ehiã be woaɖu yeƒe ŋutilã ahano yeƒe ʋu. Ƒe 32 K.Ŋ. mee Yesu gblɔ nya ma na Yudatɔ siwo mexɔ edzi se haɖe o, le Galilea. Gake ƒe ɖeka le ema megbe hafi Yesu ɖo Aƒetɔ ƒe Fiẽnuɖuɖua anyi, le Yerusalem. Eye ame siwo aɖu fia kple Yesu le dziƒoe wògblɔ eƒe nyawo na ɣemaɣi.—w24.12, axa 10-11.