1-2. Aleke wòle be dzilawo nawɔ nui ne wo viwo bia nya tso míaƒe dzixɔsewo ŋu?

 AME geɖe lɔ̃ ɖe edzi be dzilanyenye menye ŋkeke ɖeka ƒe dɔ o. Míekafu mi dzila siwo le agbagba dzem le mia viwo hem be xɔse sẽŋu nasu wo si. (5 Mose 6:​6, 7) Ne viwòa le tsitsim la, ɖewohĩ ava nɔ nya aɖewo biam tso míaƒe dzixɔsewo ŋu. Le kpɔɖeŋu me, adi be yeanya nu si tae Yehowa medi be míawɔ nanewo o.

² Ðewohĩ gbã la, nya siwo wòabia ate ŋu ana nàtsi dzi vie eye nàsusu gɔ̃ hã be eƒe xɔsee le gbɔdzɔgbɔdzɔm. Gake nyateƒeae nye be ne ɖeviwo le tsitsim la, ehiã be woanɔ nya biam be wòakpe ɖe wo ŋu woate ŋu ali ke le xɔse me. (1 Kor. 13:11) Eya ta ne viwòa bia nya wò la, mele be nàvɔ̃ kura o. Wɔ mɔnukpɔkpɔa ŋu dɔ nàkpe ɖe eŋu wòasrɔ̃ ale si wòade ŋugble nyuie. Esia awɔe be wòaxɔ Mawu kple Biblia dzi ase geɖe wu.

3. Nu kawo mee míadzro le nyati sia me?

³ Le nyati sia me la, míakpɔ nu siwo dzilawo ate ŋu awɔ atsɔ akpe ɖe wo viwo ŋu be (1) woaxɔ Mawu kple Biblia dzi ase geɖe wu, (2) woakpɔ nu si tae wòle vevie be woawɔ ɖe Biblia ƒe mɔfiamewo dzi, eye (3) woanya ale si woaɖe woƒe dzixɔsewo me na amewo. Azɔ hã, míakpɔ nu si tae wònyo be ɖeviwo nanɔ nya biam kple ale si dzilawo ate ŋu azã mɔnukpɔkpɔ si ʋu ɖi na wo atsɔ aƒo nu tso nu siwo dzi woxɔ se la ŋu na wo viwo.

 KPE ÐE VIWÒWO ŊU BE WOAXƆ MAWU KPLE BIBLIA DZI ASE GEÐE WU

4. Nya kawoe ɖevi ate ŋu abia eɖokui, eye nu ka tae?

⁴ Dzila Kristotɔwo nyae be ɖeviwo menyia xɔse dome tso wo dzilawo gbɔ o. Wò dzilaa hã, mènyi xɔse dome tso dziwòlawo gbɔ o. Esi viwò menyi xɔse dome tso gbɔwò o ta ne ele tsitsim la, biabia siawo tɔgbi ate ŋu ava susu me nɛ: ‘Aleke mawɔ aka ɖe edzi be Mawu li? Ðe mate ŋu aka ɖe nya siwo Biblia gblɔ dzia?’ Le nyateƒe me la, Biblia de dzi ƒo na mí be míazã míaƒe “tamebubuŋutete” eye ‘míado nuwo katã kpɔ.’ (Rom. 12:1; 1 Tes. 5:21) Ke aleke nàte ŋu akpe ɖe viwò ŋu be wòado ŋusẽ eƒe xɔse?

5. Aleke dzilawo ate ŋu akpe ɖe wo viwo ŋu be woaka ɖe Biblia dzi? (Romatɔwo 12:2)

⁵ Kpe ɖe viwò ŋu be wòaka ɖe Biblia me nyawo dzi. (Xlẽ Romatɔwo 12:2.) Ne viwòa bia nya aɖe la, wɔ mɔnukpɔkpɔa ŋu dɔ nàfiae ale si wòazã numekugbalẽwo abe Watch Tower Publications Index (Index des publications des Témoins de Jéhovah) kple Numekuku Ŋuti Mɔfiagbalẽ Na Yehowa Ðasefowo ene atsɔ adi ŋuɖoɖoawo. Le Numekuku Ŋuti Mɔfiagbalẽa gome la, ate ŋu adi nyati si nye “Biblia,” eyome wòadi tanya sue si nye “Etso Mawu Ƒe Gbɔgbɔ Me.” Akpɔ nyati vovovo siwo ɖo kpe edzi be menye agbalẽ nyui aɖe si amewo ŋlɔ ye Biblia nye o, ke boŋ enye “Mawu ƒe nya.” (1 Tes. 2:13) Le kpɔɖeŋu me, ate ŋu aku nu me le Asiriatɔwo ƒe blema dugã si nye Niniwe ŋu. Tsã la, ame siwo kea ɖi Biblia gblɔ be blemadu aɖeke menɔ anyi si woyɔ be Niniwe o. Gake le ƒe 1850-awo me la, tomenukulawo va ke ɖe Niniwe dua ƒe glikpowo ŋu, si ɖo kpe edzi be nya si Biblia gblɔ la de pɛpɛpɛ. (Zef. 2:​13-15) Biblia gblɔe ɖi be woatsrɔ̃ Niniwe dua, eye wòva eme hã. Viwòa ate ŋu akpɔ esia ƒe kpeɖodzi ne exlẽ nyati si nye “Ènyaa?” le November 2021 ƒe Gbetakpɔxɔ me. Ne etsɔ nu siwo wòsrɔ̃ le míaƒe agbalẽwo me sɔ kple nu siwo le numekugbalẽ xɔŋkɔ bubuwo me la, esia ate ŋu akpe ɖe eŋu wòaka ɖe edzi be nya siwo Biblia gblɔ la nye nyateƒe.

6. Nu ka hãe dzilawo ate ŋu awɔ be wo viwo naka ɖe Biblia me nyawo dzi? Gblɔ eƒe kpɔɖeŋu. (Kpɔ fotoa hã.)

⁶ Kpe ɖe viwò ŋu wòade ŋugble le nu si tae míeka ɖe Biblia me nyawo dzi ŋu. Mɔnukpɔkpɔ geɖe ʋuna ɖi na dzilawo be woaɖo dze kple wo viwo tso Biblia alo ale si míexɔ Mawu dzi see ŋu. Miate ŋu aɖi tsa ayi blemanudzraɖoƒe, tsaɖibɔ me, alo Yehowa Ðasefowo ƒe alɔdzedɔwɔƒe. Le kpɔɖeŋu me, ne mieɖi tsa yi blemanudzraɖoƒe aɖe alo le blemanuwo kpɔm le  internet dzi la, àte ŋu ahe ɖevia ƒe susu ayi ŋutinya alo blemanu aɖe si ate ŋu akpe ɖe eŋu wòaka ɖe edzi be Biblia me nyawo de pɛpɛpɛ la dzi. Àte ŋu afia nu viwòa tso Moabtɔwo Ƒe Kpea ŋu. Kpe sia xɔ ƒe 3,000, eye Mawu ƒe ŋkɔ le edzi. Kpe sia le blemanudzraɖoƒe si nye Louvre Museum, si le Paris le France. Azɔ hã, ne mieyi ɖe Yehowa Ðasefowo ƒe xexea me katã ƒe dɔwɔƒegã si le Warwick le New York la, miakpɔ Moabtɔwo Ƒe Kpea ƒe wɔwɔe aɖe le blemanudzraɖoƒea ƒe akpa si nye “Biblia Kple Mawu Ƒe Ŋkɔ.” Woŋlɔ ɖe Moabtɔwo Ƒe Kpea dzi be Moab-fia Mesa dze aglã ɖe Israel ŋu. Esia wɔ ɖeka kple nya si Biblia gblɔ. (2 Fia. 3:​4, 5) Ne viwòa ŋutɔ tsɔ eƒe ŋkuwo kpɔ kpeɖodzi siwo ɖee fia be Biblia nye nyateƒe la, ado ŋusẽ eƒe xɔse.—Tsɔe sɔ kple 2 Kronika 9:6.

7-8. (a) Nu kae atsyã tɔxɛ si me dzɔdzɔmenuwo le la fia mí? Gblɔ eƒe kpɔɖeŋu. (Kpɔ fotoa hã.) (b) Biabia kawoe ate ŋu akpe ɖe viwò ŋu wòaxɔe ase be Wɔla aɖe li?

⁷ Kpe ɖe viwò ŋu wòade ŋugble le dzɔdzɔmenuwo ŋu. Ne wò kple viwò miele tsa ɖim le afi si atiwo kple gbe damawo le alo miele dɔ wɔm le abɔ me la, àte ŋu ahe eƒe susu ayi ale si nuwɔwɔwo nya kpɔ kple ale si woɖo atsyɔ̃e dzi. Nu ka tae? Atsyɔ̃ɖoɖo siawo nye kpeɖodzi be nunyala gã aɖee wɔ wo. Le kpɔɖeŋu me, dzɔdzɔmeŋutinunyalawo srɔ̃ nu tso ale si nuwo abe abɔbɔgo ene xatsa le ɖoɖo tɔxɛ aɖe nu la ŋu ƒe geɖe. Nu gbagbewo ŋuti nunyala Nicola Fameli ɖe eme be akɔntabubu tɔxɛ aɖe nue nu gbagbe mawo ƒomevi xatsana ɖo. Woyɔa akɔntabubu tɔxɛ ma le Eŋlisigbe me be Fibonacci sequence. Nu bubu aɖewo abe ɣletivihatsotsowo, ƒumebɔbɔgo aɖewo, kpakple aŋgba kple seƒoƒo aɖewo xatsana ɖe ɖoɖo ma nu. a

⁸ Ne viwòa va le nu bubuwo srɔ̃m tso dzɔdzɔmeŋutinunya ŋu le suku la, akpɔe be dzɔdzɔmese aɖewoe nana nuwo nɔa atsyã tɔxɛ aɖewo me. Le kpɔɖeŋu me, atiwo dzea alɔwo, eye alɔawo gadzea alɔ sue bubu siwo le abe gbãtɔawo ene, eye alɔ sue mawo hã gadzea alɔ wluiwluiwlui bubuwo nenema ke. Eye dzɔdzɔmenu bubuwo hã nɔa ɖoɖo ma ke tɔgbi nu. Ke ame kae wɔ dzɔdzɔmese siwo nana nuwo nɔa atsyã tɔxɛ mawo me? Ðe wòanye nunyala gã aɖee wɔ woa? Ne viwò le ŋugble dem tso biabia mawo tɔgbi ŋu la, ate ŋu ana wòava ka ɖe edzi be Mawue wɔ nuwo katã. (Heb. 3:4) Ne viwò le tsitsim la, àte ŋu abiae be, “Ne Mawue wɔ mí la, mèkpɔe be eyae afia mɔ mí be míakpɔ dzidzɔ le agbe me oa?” Eyome àte ŋu ana viwòa nakpɔe be Biblia mee mɔfiame nyui mawo le.

 KPE ÐE VIWÒ ŊU BE WÒADE ASIXƆXƆ BIBLIA ƑE MƆFIAMEWO ŊU

9. Nu ka gbɔe wòate ŋu atso be ɖevi nabia nya tso nu si Biblia gblɔ ku ɖe agbe nyui nɔnɔ ŋu la ŋuti?

⁹ Ne viwò bia nya wò tso ale si Biblia fia mí be míanɔ agbee ŋu la, dze agbagba nànya susu si tae wòle nyawo biam ɖo. Ðe wòanye be melɔ̃ ɖe Biblia ƒe agbe nyui nɔnɔ ƒe mɔfiamewo dzi oa, alo ɖeko wòdi be yease nuwo gɔme nyuie wu ale be yeate ŋu aɖe wo me na ye hatiwoa? Aleke kee wòɖale o, àte ŋu akpe ɖe viwòa ŋu wòade asixɔxɔ Biblia ƒe mɔfiamewo ŋu ne miesrɔ̃ Kpɔ Dzidzɔ Le Agbe Me Tegbee! gbalẽa. b

10. Aleke nàte ŋu akpe ɖe viwò ŋu wòadi be ye kple Yehowa dome nanɔ kplikplikpli?

¹⁰ Kpe ɖe viwò ŋu wòana eya kple Yehowa dome xɔlɔ̃wɔwɔa nanɔ vevie nɛ. Ne èle Biblia srɔ̃m kple viwò la, dze agbagba nàzã kpɔɖeŋu kple nyabiase siwo tɔgbi le Kpɔ Dzidzɔ Le Agbe Me Tegbee! gbalẽa me nàtsɔ akpe ɖe eŋu wòagblɔ nu siwo le dzi me nɛ. (Lod. 20:5) Le kpɔɖeŋu me, nusɔsrɔ̃ 8 lia tsɔ Yehowa sɔ kple xɔlɔ̃ nyui si gblɔa nu si míawɔ be míanɔ dedie eye eme nanyo na mí la na mí. Ne miedzro 1 Yohanes 5:3 me vɔ la, àte ŋu abiae be, “Esi míenya be Yehowa nye xɔlɔ̃ nyui na mí la, ke aleke wòle be míabu nu si wòbia tso mía si be míawɔ lae?” Esia adze biabia bɔbɔe, ke hã akpe ɖe viwòa ŋu wòakpɔe be esi Mawu lɔ̃ mí tae wòde sewo na mí ɖo.—Yes. 48:​17, 18.

11. Aleke nàte ŋu akpe ɖe viwò ŋu wòade asixɔxɔ Biblia me mɔfiamewo ŋu? (Lododowo 2:​10, 11)

¹¹ Midzro ale si Biblia ƒe mɔfiamewo dzi wɔwɔ ɖea vi na míi me. Ne miexlẽ Biblia alo dzro gbe sia gbe mawunyakpukpuia me vɔ la, miƒo nu tso ale si Biblia me mɔfiamewo le vi ɖem na ƒomea ŋu. Le kpɔɖeŋu me, ɖe viwòa kpɔe be dɔ sesẽ wɔwɔ kple anukwareɖiɖi ɖea via? (Heb. 13:18) Àte ŋu ate gbe ɖe edzi nɛ hã be Biblia me mɔfiamewo dzi wɔwɔ kpɔa mía ta eye wòdea míaƒe lãmesẽ dzi. (Lod. 14:​29, 30) Biblia me mɔfiamewo me dzodzro kple viwò alea ana wòakpɔ ŋudzedze ɖe Biblia ƒe aɖaŋuɖoɖowo ŋu geɖe wu.—Xlẽ Lododowo 2:​10, 11.

12. Aleke vifofo aɖe kpe ɖe via ŋu wòva de asixɔxɔ Biblia ƒe mɔfiamewo ŋu?

¹² Steve, si nye vifofo le France, gblɔ ale si eya kple srɔ̃a kpe ɖe wo viŋutsu Ethan, si nye ƒewuivi ŋu wòkpɔe be esi Yehowa lɔ̃ mí tae wòde sewo na mí ɖo. Steve gblɔ be: “Míebiaa nya siawo tɔgbi mía via, ‘Nu ka tae Yehowa di be míawɔ ɖe mɔfiame sia dzi? Aleke esia ɖee fia be elɔ̃ mí? Ne mèwɔ ɖe mɔfiame sia dzi o la, nu kae ate ŋu adzɔ ɖe dziwò?’” Dzeɖoɖo siawo tɔgbi kpe ɖe Ethan ŋu wòka ɖe edzi be Yehowa ƒe mɔfiamewoe nye nyuitɔ. Steve gblɔ kpee be: “Míaƒe taɖodzinue nye be míakpe ɖe Ethan ŋu wòakpɔe be Biblia ƒe mɔfiamewo de ŋgɔ wu amegbetɔwo ƒe nunya.”

13. Gblɔ ale si dzilawo ate ŋu akpe ɖe wo viwo ŋu be woawɔ ɖe Biblia ƒe mɔfiamewo dzi la ƒe kpɔɖeŋu.

¹³ Na hehe viwò be wòawɔ ɖe Biblia ƒe mɔfiamewo dzi. Le kpɔɖeŋu me, woate ŋu abia tso viwòa si be wòaxlẽ agbalẽ aɖe le sukudɔdeasi aɖe me. Ame siwo ŋu woƒo nu tsoe le agbalẽa me la ate ŋu anye ame siwo ƒoa wo ɖokui ɖe gbɔdɔdɔ ƒe agbe gbegblẽ nɔnɔ me, alo be wowɔa ŋutasẽnuwo. Eye ate ŋu adze abe ɖe naneke megblẽ le eŋu be sukuviwo nasrɔ̃ nuwɔna mawo o ene. Àte ŋu ade dzi ƒo na viwòa  be wòatsɔ ame siwo ŋu wòxlẽ nu tsoe le agbalẽa me ƒe nuwɔnawo asɔ kple Biblia ƒe mɔfiamewo. (Lod. 22:​24, 25; 1 Kor. 15:33; Flp. 4:8) Esia ate ŋu akpe ɖe viwòa ŋu be ne nufialaa kple sukuvi bubuawo va ƒo ƒu be yewoadzro dɔdeasi ma me la, dzi anɔ eƒo wòate ŋu aɖi ɖase na wo.

KPE ÐE VIWÒ ŊU WÒANYA ALE SI WÒAƲLI EƑE DZIXƆSEWO TA

14. Sukunufiafia kae ate ŋu ana vɔvɔ̃ naɖo sɔhɛ Kristotɔ, eye nu ka tae?

¹⁴ Vɔvɔ̃ ate ŋu awɔe be wòasesẽ na sɔhɛ Kristotɔ aɖewo be woaʋli woƒe dzixɔsewo ta, vevietɔ ne wole nu fiam wo tso ame dzɔ tso kese me alo nɔnɔmetɔtrɔ ŋuti nufiafia ŋu. Nu ka tae? Elabe nufialaawo ate ŋu anɔ tɔ tem ɖe edzi be nufiafia ma nye nyateƒe. Ne dzilae nènye la, aleke nàte ŋu akpe ɖe viwò ŋu wòaka ɖe edzi be nu siwo dzi míexɔ se ye nye nyateƒea?

15. Nu kae ate ŋu akpe ɖe sɔhɛ Kristotɔ ŋu wòaka ɖe edzi be nu si dzi yexɔ se ye nye nyateƒea?

¹⁵ Kpe ɖe viwò ŋu dzi nanɔ eƒo wòaka ɖe nu siwo dzi míexɔ se la dzi. Mele be ŋu nakpe viwòa le esi wòxɔe se be ame aɖee wɔ nuwo katã ta o. (2 Tim. 1:8) Susu si tae nye be dzɔdzɔmeŋutinunyala geɖe hã xɔe se be nuwo medzɔ le wo ɖokui si zi ɖeka kpoyi o. Wokpɔ kpeɖodzi be aɖaŋuwɔla deŋgɔ aɖee wɔ nu gbagbe siwo katã li. Le esia taa, womexɔ ame dzɔ tso kese me ƒe nufiafiaa dzi se o. Nu si akpe ɖe viwòa ŋu wòado ŋusẽ eƒe xɔsee nye be wòaxlẽ nu tso nu si tae nɔvi Kristotɔwo xɔe se be Wɔla aɖee wɔ nuwo katã la ŋu. c

16. Aleke dzilawo akpe ɖe wo viwo ŋu woaʋli woƒe dzixɔse ta be Wɔla aɖe li? (1 Petro 3:15) (Kpɔ fotoa hã.)

¹⁶ Kpe ɖe viwòa ŋu be wòate ŋu aɖe nu si tae wòxɔe se be Wɔla aɖe li la me na amewo. (Xlẽ 1 Petro 3:15.) Àte ŋu adzro nyati vovovo siwo le jw.org siwo nye “Sɔhɛwo Biana Be—Ðe Xexea Dzɔ Le Eɖokui Sia?” me kple viwòa. Eyome na viwòa natia numeɖeɖe si wòkpɔ be yeate ŋu azã atsɔ akpe ɖe amewo ŋu woase egɔme be Wɔla aɖe li. Ðo ŋku edzi nɛ be mehiã be wòanɔ nya hem kple eƒe sukuhatiwo o. De dzi ƒo nɛ be wòazã numeɖeɖe bɔbɔewo atsɔ ade ŋugble kple ame siwo lɔ̃ faa be yewoaɖo dze kplii. Le kpɔɖeŋu me eƒe  sukuhati aɖe ate ŋu agblɔ be: “Nye ya nu siwo mekpɔna ko dzie mexɔna sena, Mawu ya nyemekpɔe kpɔ o.” Ne ame aɖe gblɔ nya ma tɔgbia, viwòa ate ŋu awɔ kpɔɖeŋu sia nɛ be: “Tsɔe be èyi ɖe ave dodo aɖe me afi si ame aɖeke mele o eye kaka nàkpɔa, vudo nyui aɖee nye ema, woɖo kpe ɖe eme eye tsikunu hã le edzi. Nu kae ava susu me na wò? Ðe nàgblɔ be ame aɖee ɖe vudoa loo alo ɖeko wòdzɔ le eɖokui sia? Ne ame aɖee ɖe vudo ma la, ke ɖe màlɔ̃ ɖe edzi be ame aɖee wɔ anyigba sia kple nu gbagbe vovovo siwo le edzi oa?”

17. Aleke dzilawo ate ŋu akpe ɖe wo viwo ŋu be woadi mɔnu vovovowo atsɔ agblɔ Biblia me nyateƒea na amewo?

¹⁷ Kpe ɖe viwò ŋu be wòadi mɔnu siwo dzi wòato aƒo nu tso Biblia ŋu na amewo. (Rom. 10:10) Dzilawo ate ŋu atsɔ Biblia me nyateƒea gbɔgblɔ na amewo asɔ kple ale si amewo srɔ̃a haƒonuwo ƒoƒo. Le gɔmedzedzea mea, amea asrɔ̃ gbeɖiɖi siwo ƒoƒo le bɔbɔe. Ne ɣeyiɣiawo va le yiyim la, haƒoƒoa anɔ bɔbɔe nɛ. Nenema kee nàte ŋu akpe ɖe viwò sɔhɛ ŋu be wòazã mɔnu siwo le bɔbɔe ne ele eƒe dzixɔsewo me ɖem. Le kpɔɖeŋu me, viwòa ate ŋu abia eƒe sukuhati aɖe be, ‘Ènya be zi geɖea, nu gbagbewo ŋue mɔ̃ɖaŋu ŋuti nunyalawo léa ŋku ɖo tsɔ wɔa wo tɔa? Na matsɔ video nyui aɖe afia wò.’ Ðevia ate ŋu aɖe video siwo nye, Ðe Wowɔea? dometɔ ɖeka nɛ. Eyome wòagblɔ be, ‘Ne míekafua dzɔdzɔmeŋutinunyalawo ɖe nu si wowɔ ta la, ke ame si wɔ esi dzi wokpɔ hafi wɔ wo tɔ ya ɖe?’ Ne ɖevia zã mɔnu sia la, aʋã eƒe sukuhatia wòadi be yeagasrɔ̃ nu geɖe tso Yehowa ŋu.

YI EDZI NÀKPE ÐE VIWÒ ŊU BE WÒALI KE LE XƆSE ME

18. Nu kae dzilawo ayi edzi anɔ wɔwɔm be wo viwo nali ke le xɔse me?

¹⁸ Egbea, ame akpa gãtɔ mexɔ Yehowa dzi se o. (2 Pet. 3:3) Eya ta dzilawo, ne miele Biblia srɔ̃m kple mia viwo la, mide dzi ƒo na wo be woadzro nyati vovovo siwo ana woagade asixɔxɔ gã Mawu ƒe Nyaa kple eƒe dzidzenu dzɔdzɔeawo ŋu me. He woƒe susu yi Yehowa ƒe nuwɔwɔ vovovowo dzi eye nàkpe ɖe wo ŋu woade ŋugble le wo ŋu. Kpe ɖe wo ŋu woase Biblia me nyagblɔɖi siwo va eme xoxo la gɔme nyuie. Ƒo wo katã ta la, do gbe ɖa kple viwòwo edziedzi eye nànɔ gbe dom ɖa ɖe wo ta. Ne èwɔe alea la, àte ŋu aka ɖe edzi be Yehowa ayra ɖe agbagba siwo dzem nèle be yeakpe ɖe wo ŋu be woali ke le xɔse me la dzi.—2 Kron. 15:7.