NUSƆSRƆ̃NYATI 6
HADZIDZI 18 Akpedada Ðe Tafea Ta
Míedaa Akpe Na Yehowa Be Etsɔa Míaƒe Nu Vɔ̃wo Kea Mí
“Mawu lɔ̃ xexea ale gbegbe be wòtsɔ eƒe Tenuvi la na.”—YOH. 3:16.
TAÐODZINUA
Míakpɔ ale si míaɖe ŋudzedzekpɔkpɔ afia geɖe wu be Yehowa tsɔa míaƒe nu vɔ̃wo kea mí. Be míate ŋu awɔ esia la, ele be míase nu si dzi Yehowa nɔa te ɖo tsɔa míaƒe nu vɔ̃wo kea mí la gɔme.
1-2. Mɔ ka nue ameƒomea ƒe nɔnɔmea ɖi ɖekakpui si ŋu míeƒo nu tsoe le memama gbãtɔ me le?
BU ÐEKAKPUI aɖe si dzilawo nye kesinɔtɔwo la ŋu kpɔ. Gbe ɖekaa, afɔku aɖe dzɔ eye edzilawo ƒe agbe tsi eme. Nu si dzɔ la gbã dzi nɛ ale gbegbe. Gake nya dziŋɔ bubu aɖe gagbã dzi nɛ ɖe edzi. Eva see be ye dzilawo gblẽ ƒomea ƒe ga katã dome eye wonyi fe gbogbo aɖe hã. Azɔ kpɔe ɖa ko; le esi teƒe be wòanyi kesinɔnuwo dome la, eva nyi woƒe fe dome boŋ. Fetɔwo hã va le fe lĩm ɖekakpuia, gake fea lolo ale gbegbe be mate ŋu axee gbeɖe o.
2 Le mɔ aɖe nu la, míaƒe nɔnɔmea le abe ɖekakpui ma tɔ ene. Mía dzila gbãtɔwo, Adam kple Xawa, de blibo eye wonɔ paradiso-bɔ dzeani aɖe me. (1 Mose 1:27; 2:7-9) Mɔnukpɔkpɔ gã su wo si be woanɔ agbe tegbee le dzidzɔ me hafi. Gake nuwo trɔ kura. Wobú woƒe aƒe si nye Paradisoa eye agbe mavɔ mɔkpɔkpɔa hã bú ɖe wo. Domenyinu kae wogblẽ ɖi na woƒe dzidzimeviwo? Biblia gblɔ na mí be: “To ame ɖeka [Adam] dzi nu vɔ̃ va xexea me, eye to nu vɔ̃ me ku la va, ale ku la kaka ɖe amewo katã dome, esi wo katã wɔ nu vɔ̃ ŋuti.” (Rom. 5:12) Domenyinu si Adam gblẽ ɖi na mí lae nye nu vɔ̃ si hea ku vanɛ. Nu vɔ̃ si dome míenyi la le abe fe gã aɖe si ame aɖeke mate ŋu axe gbeɖe o la ene.—Ps. 49:8.
3. Nu ka tae woate ŋu atsɔ míaƒe nu vɔ̃wo asɔ kple “fewo”?
3 Yesu tsɔ nu vɔ̃wo sɔ kple “fewo.” (Mat. 6:12; Luka 11:4) Ne míewɔ nu vɔ̃ la, ele ko abe míenyi fe le Yehowa ŋu ene. Ele be míaxe nu vɔ̃ ƒe fe si míenyi. Ne míete ŋu xee o la, ke ɖeko míaku hafi woatutu fea ɖa.—Rom. 6:7, 23.
4. (a) Mawu ƒe kpekpeɖeŋu manɔmee la, nu kae adzɔ ɖe nuvɔ̃mewo katã dzi? (Psalmo 49:7-9) (b) Le Biblia me la, nu kae nya “nu vɔ̃” fia? (Kpɔ aɖaka si ƒe tanyae nye “ Nu Vɔ̃.”)
4 Ðe wòanya wɔ be nu siwo katã Adam kple Xawa bú la nagasu mía sia? Ɛ̃, gake míate ŋu awɔe le mía ɖokui si o. (Xlẽ Psalmo 49:7-9.) Ne Mawu mekpe ɖe mía ŋu o la, etsɔme nyui alo tsitretsitsimɔkpɔkpɔ aɖeke manɔ mía si o. Le nyateƒe me la, ɖeko míaku abe lãwo ke ene.—Nyagb. 3:19.
5. Aleke mía Fofo lɔlɔ̃a kpe ɖe mía ŋu le nu vɔ̃ ƒe fe si míenyi me? (Kpɔ foto si le akpaa dzi.)
5 Gabu ɖekakpui si ŋu míeƒo nu tsoe le nyatia ƒe gɔmedzedze ŋu kpɔ. Aleke wòase le eɖokui me ne kesinɔtɔ aɖe gblɔ nɛ be yeaxe fe siwo katã wònyi? Ðikeke mele eme o be dzi adzɔ ɖekakpui sia eye wòakpɔ ŋudzedze ɖe dɔmenyonunana gã ma ŋu ale gbegbe. Le mɔ ma ke nu la, mía Fofo lɔlɔ̃a Yehowa na nunana aɖe mí si axe nu vɔ̃ ƒe fe si dome míenyi tso Adam gbɔ la na mí. Yesu ɖe eme be: “Mawu lɔ̃ xexea ale gbegbe be wòtsɔ eƒe Tenuvi la na, be ame sia ame si xɔa edzi sena la nagatsrɔ̃ o, ke boŋ wòakpɔ agbe mavɔ.” (Yoh. 3:16) Nunana sia kee aʋu mɔnukpɔkpɔ na mí be mía kple Yehowa dome nanyo.
Yesu ɖe gbeƒã nya nyui si nye be Yehowa ato tafevɔsaa dzi atsɔ míaƒe nu vɔ̃wo ake mí. (Yoh. 3:16) Yesu lɔ̃ faa tsɔ eƒe agbe na be woatsɔ axe tafea (Kpɔ memama 5)
6. Biblia me nyagbe kawo mee míadzro le nyati sia me, eye nu ka tae?
6 Aleke míawɔ be nunana wɔnuku sia naɖe vi na mí ale be woatsɔ míaƒe nu vɔ̃wo, alo “fewo” ake mí? Míakpɔ nya mawo ƒe ŋuɖoɖowo le nyagbe aɖewo siwo Biblia zã me. Woawoe nye mía kple Mawu dome dzadzraɖo, avuléle, tafe, ɖeɖekpɔkpɔ kple ale si Mawu abu amewo be wole dzɔdzɔe. Le nyati sia me la, míadzro gɔmesese si le nya siawo dometɔ ɖe sia ɖe ŋu la me. Míagakpɔ ŋudzedze ɖe Yehowa ŋu geɖe wu ne míede ŋugble le nu siwo wòwɔ be yeatsɔ míaƒe nu vɔ̃wo ake mí la ŋu.
MAWU ƑE TAÐODZINU: BE YEADZRA MÍA KPLI YE DOME ÐO
7. (a) Nu ka hãe Adam kple Xawa bú? (b) Esi míenye Adam kple Xawa ƒe dzidzimeviwo ta la, nu kae míehiã vevie? (Romatɔwo 5:10, 11)
7 Adam kple Xawa bú agbe tegbee nɔnɔ ƒe mɔnukpɔkpɔa, eye ƒomedodo xɔasi si le wo kple wo Fofo Yehowa dome hã me gblẽ. Hafi Adam kple Xawa nawɔ nu vɔ̃ la, wonɔ Mawu ƒe ƒomea me. (Luka 3:38) Gake esi wogbe toɖoɖo Yehowa la, enya wo le eƒe ƒomea me hafi wova te vidzidzi. (1 Mose 3:23, 24; 4:1) Esi míenye Adam kple Xawa ƒe dzidzimeviwo ta la, ehiã be woadzra mía kple Yehowa dome ɖo. (Xlẽ Romatɔwo 5:10, 11.) Ne míagblɔe le mɔ bubu nu la, ehiã be míana kadodo nyui nanɔ mía kplii dome. Le numekugbalẽ aɖe ƒe nya nu la, Helagbe me nya si nye “dome dzadzraɖo” si wozã le afi sia ate ŋu afia be “ame ƒe futɔ nava zu exɔlɔ̃.” Nu si wɔ nuku ye nye be, Yehowae ɖe afɔa gbã be esia nanya wɔ. Aleke wòwɔe?
ÐOÐO SI MAWU WƆ: AVULÉLE
8. Nu kae nye avuléle alo avulévɔsa?
8 Avuléle nye ɖoɖo si Yehowa wɔ be yeana ƒomedodo nyui naganɔ ye kple amegbetɔ nuvɔ̃mewo dome. Esia bia be woatsɔ nane aɖo nu bubu teƒe, gake woƒe asixɔxɔ nasɔ. Le mɔ sia nu la, woagate ŋu akpɔ nu si bú alo dome gblẽ la ake. Kristotɔwo Ƒe Hela Ŋɔŋlɔawo zã nyagbe aɖe si sɔ kple “avuléle,” si nye avulévɔsa. (Rom. 3:25) Ðoɖo sia wɔnɛ be ŋutifafa nɔa ame kple Mawu dome eye wo kplii dome nɔa kplikplikpli.
9. Ðoɖo kae Yehowa wɔ na Israel-viwo be yeatsɔ woƒe nu vɔ̃wo ake wo?
9 Esi Yehowa di be kadodo nyui nanɔ ye kple Israel-viwo dome ta la, ewɔ ɖoɖo aɖe si dzi wòato atsɔ woƒe nu vɔ̃wo ake wo. Ƒe sia ƒe la, Israel-viwo ɖoa ŋku Avuléŋkekea dzi. Le ŋkeke ma dzi la, nunɔlagãa tsɔa lãwo saa vɔ ɖe dukɔa ta. Ele eme be lãwo ƒe vɔsa mate ŋu alé avu ɖe ame aɖeke ƒe nu vɔ̃wo ta keŋkeŋ o, elabe lãwo mexɔ asi de amegbetɔwo nu o. Gake zi ale si Israel-viwo trɔ dzi me eye wosa vɔ siwo Yehowa bia tso wo si la, elɔ̃na faa tsɔa woƒe nu vɔ̃wo kea wo. (Heb. 10:1-4) Tsɔ kpe ɖe eŋu la, vɔ siwo Israel-viwo sana le Avuléŋkekea dzi kple ɣebubuɣiwo la ɖoa ŋku edzi na wo be nuvɔ̃mewoe yewonye, eye yewohiã nane si aɖe yewoƒe nu vɔ̃wo ɖa keŋkeŋ.
10. Ðoɖo kae Yehowa wɔ si dzi wòato atsɔ ameƒomea ƒe nu vɔ̃wo ake?
10 Yehowa wɔ ɖoɖo aɖe hã si dzi wòato atsɔ ameƒomea ƒe nu vɔ̃wo ake. Edɔ Via malɔ̃nugbɔa wòtsɔ “eɖokui na zi ɖeka ɖe ɣeyiɣiawo katã nu be wòatsɔ ame geɖewo ƒe nu vɔ̃wo.” (Heb. 9:28) Yesu tsɔ ‘eƒe agbe na wònye tafe na ame geɖewo,’ alo fexexe ɖe ame geɖewo ta. (Mat. 20:28) Nu kae nye tafea?
FE SI MAWU XE: TAFEA
11. (a) Le Biblia ƒe nya nu la, nu kae nye tafea? (b) Nu kawoe hiã hafi woate ŋu axe tafe sia?
11 Le Biblia ƒe nya nu la, tafe nye fe si woxe tsɔ lé avu be woadzra amewo kple Mawu dome ɖo. Le Yehowa gbɔ la, tafea nye nu si dzi wòanɔ te ɖo agbugbɔ aɖo nu si bú la teƒe. Le mɔ ka nu? Ðo ŋku edzi be Adam kple Xawa bú agbe deblibo kple mɔnukpɔkpɔ si su wo si be woanɔ agbe tegbee la siaa. Eya ta ehiã be woaxe fe si ƒe asixɔxɔ sɔ kple nu si bú la. (1 Tim. 2:6) Ele be ame si axe fe ma nanye ŋutsu eye (1) wòade blibo; (2) wòanye ame si ate ŋu anɔ agbe tegbee le anyigba dzi; eye (3) wòalɔ̃ faa atsɔ eƒe agbe ana alo asa vɔ ɖe mía ta. Ema ko hafi eƒe agbe ate ŋu alé avu alo axɔ ɖe esi bú la teƒe.
12. Nu ka tae Yesu te ŋu xe tafea?
12 Na míakpɔ susu etɔ̃ siwo tae Yesue dze axe tafe ma la ɖa. (1) Ede blibo, “mewɔ nu vɔ̃ aɖeke o.” (1 Pet. 2:22) (2) Ŋutete le esi be wòanɔ agbe tegbee le anyigba dzi. (3) Elɔ̃ faa be yeaku eye yeatsɔ yeƒe agbe ana ɖe mía ta. (Heb. 10:9, 10) Yesu de blibo, eye wòsɔ kple ale si Adam nɔ hafi wɔ nu vɔ̃. (1 Kor. 15:45) Eya ta esi Yesu ku la, ete ŋu lé avu ɖe Adam ƒe nu vɔ̃wo ta, eye wòɖo nu si Adam bú la teƒe. (Rom. 5:19) Esia wɔe be Yesu va zu “Adam mamlɛtɔ.” Eya ta megahiã be ame deblibo bubu aɖeke nagava xe fe ɖe nu si Adam bú la ta o. Yesu ku “zi ɖeka ɖe ɣeyiɣiawo katã nu.”—Heb. 7:27; 10:12.
13. Vovototo kae le avuléle ƒe ɖoɖoa kple tafea dome?
13 Ekema vovototo kae le avuléle kple tafea dome? Avulélea ye nye ɖoɖo si Mawu wɔ be yeatsɔ adzra ye kple ameƒomea dome ɖo. Tafea nye fe si Mawu xe be yeatsɔ alé avu ɖe ameƒomea ƒe nu vɔ̃wo ta. Yesu ƒe ʋu xɔasi si wòkɔ ɖe anyi ɖe mía ta dzie Mawu to wɔ esia.—Ef. 1:7; Heb. 9:14.
EMETSONUAWO: WOAKPƆ ÐEÐE, WOABU WO BE WOLE DZƆDZƆE
14. Nu ka mee míadzro fifia, eye nu ka tae?
14 Nu kawoe do tso avuléle ƒe ɖoɖoa me? Biblia zã nya vovovowo tsɔ te gbe ɖe viɖe siwo le ɖoɖo ma me la dzi. Togbɔ be gɔmesese si le nya mawo ŋu de nu wo nɔewo me hã la, wo dometɔ ɖe sia ɖe te gbe ɖe avuléle ƒe ɖoɖo si awɔe be Yehowa natsɔ nu vɔ̃wo ake ƒe akpa aɖe dzi. Nya siawo me dzodzro akpe ɖe mía ŋu míakpɔ ale si ɖoɖo nyui sia aɖe vi na mía dometɔ ɖe sia ɖe.
15-16. (a) Le Biblia me la, nu kae nya “ɖeɖekpɔkpɔ” fia? (b) Vi kae esia aɖe na mí?
15 Biblia zã nya ɖeɖekpɔkpɔ wòfia ale si woaxe fe ɖe ame aɖe ta atsɔ aɖee alo ana ablɔɖee. Apostolo Petro ɖe eme ale: “Mienyae be menye nu siwo gblẽna, klosalo alo sika, ye wotsɔ ɖe mi [“ye wotsɔ xe mia tafe”] tso agbenɔnɔ maɖevi si mia tɔgbuiwo gblẽ ɖi na mi la me o. Ke boŋ ʋu xɔasi ye wotsɔ ɖe mi, abe alẽvi si nu mewɔ afi aɖeke na o, si ŋu kpɔtsɔtsɔ mele o la tɔ ene, si nye Kristo ƒe ʋu.”—1 Pet. 1:18, 19; etenuŋɔŋlɔ.
16 Tafea wɔe be míate ŋu avo tso nu vɔ̃ kple ku ƒe ŋusẽkpɔɖeamedzi me. (Rom. 5:21) Ðikeke mele eme o be susu nyui geɖe li siwo tae míada akpe na Yehowa kple Yesu ɖe ale si woto Yesu ƒe ʋu xɔasia dzi ʋu mɔnukpɔkpɔ ɖi na mí be míakpɔ ɖeɖe ta.—1 Kor. 15:22.
17-18. (a) Nu kae nya si Biblia gblɔ be wobu mí ame dzɔdzɔewoe la fia? (b) Aleke esia aɖe vi na mí?
17 Nya si Biblia gblɔ be wobu mí ame dzɔdzɔewoe la fia be wote fli ɖe míaƒe nu vɔ̃wo me alo tutui ɖa keŋkeŋ. Esia mefia be Yehowa ŋea aɖaba ƒua eƒe nudidi dzɔdzɔeawo dzi o. Mebua mí ame dzɔdzɔewo le esi míedze nɛ alo le esi wòda asi ɖe míaƒe nu vɔ̃wo dzi ta o. Ke boŋ, Yehowa lɔ̃ faa be yeatsɔ míaƒe nu vɔ̃wo ake mí le esi míexɔ avuléle ƒe ɖoɖoa kple tafea dzi se ta.—Rom. 3:24; Gal. 2:16.
18 Vi kae esia aɖe na mía dometɔ ɖe sia ɖe? Ame siwo Mawu tia be woaɖu fia kple Yesu le dziƒo la, wobu wo be wonye ame dzɔdzɔewo xoxo eye wozu Mawu ƒe viwo. (Tito 3:7; 1 Yoh. 3:1) Wotsɔ woƒe nu vɔ̃wo ke wo. Womegabua nu vɔ̃ mawo na wo kura o. Le esia ta wobu wo be wodze anɔ Fiaɖuƒea me. (Rom. 8:1, 2, 30) Mawu bua ame siwo le mɔ kpɔm be yewoanɔ agbe tegbee le anyigba dzi hã be wonye ame dzɔdzɔewo, etsɔ woƒe nu vɔ̃wo ke wo eye wova zu exɔlɔ̃wo. (Yak. 2:21-23) Mɔnukpɔkpɔ asu ameha gã si atsi agbe le Armagedon me la si be womaku akpɔ o. (Yoh. 11:26) Woafɔ ‘ame dzɔdzɔe kple ame madzɔmadzɔ’ siwo dɔ alɔ̃ le ku me la ɖe tsitre. (Dɔw. 24:15; Yoh. 5:28, 29) Mlɔeba la, Yehowa subɔla wɔnuteƒe siwo katã le anyigba dzi akpɔ “Mawu ƒe viwo ƒe ŋutikɔkɔe ƒe ablɔɖe la.” (Rom. 8:21) Míetsɔ dzidzɔ le mɔ kpɔm na ɣeyiɣi tɔxɛ ma si me míade blibo eye mía kple mía Fofo Yehowa dome anɔ kplikplikpli!
19. Aleke míaƒe nɔnɔme wɔnublanuia va trɔe? (Kpɔ aɖaka si nye “ Yehowa Ƒe Tsɔtsɔke” hã.)
19 Nyateƒee, tsã la, míaƒe nɔnɔmea ɖi ɖekakpui si ŋu míeƒo nu tsoe le nyati sia ƒe gɔmedzedze, si bú nu sia nu eye wònyi fe gã aɖe si mate ŋu axe gbeɖe o la tɔ. Gake dzidzɔnyae nye be Yehowa kpe ɖe mía ŋu. Avuléle ƒe ɖoɖoa kple tafevɔsaa wɔe be mɔkpɔkpɔ li! Míava vo tso nu vɔ̃ kple ku si me le esi míexɔ Yesu dzi se ta. Yehowa ate fli ɖe míaƒe nu vɔ̃wo me eye wòatutu wo ɖa keŋkeŋ. Vevietɔ wu la, kadodo kplikplikpli ate ŋu anɔ mía kple mía Fofo lɔ̃ame Yehowa dome fifia.
20. Nu ka mee míadzro le nyati si kplɔe ɖo me?
20 Míaƒe dzi yɔna fũu kple akpedada ne míede ŋugble le nu si gbegbe Yehowa kple Yesu wɔ na mí ŋu. (2 Kor. 5:15) Ne ɖe womexɔ na mí o la, anye ne mɔkpɔkpɔ aɖeke manɔ mía si kura o! Gake nu kae Yehowa ƒe tsɔtsɔke la fia na mía dometɔ ɖe sia ɖe? Míadzro nya ma me le nyati si kplɔ esia ɖo me.
HADZIDZI 10 Kafu Yehowa, Mía Mawu La!
