Ame geɖe ʋu tso Philippines va le dɔ wɔm le dukɔ si me Mary kple srɔ̃a John a le la me. Esia ʋu mɔnukpɔkpɔ na dukɔa me tɔwo be woaɖe gbeƒã nya nyuia na amedzro siawo. Le korona dɔvɔ̃a ƒe ɣeyiɣia me la, Mary srɔ̃ Biblia kple ame geɖe le dukɔ si me wòle kple dukɔ bubuwo hã me. Aleke wòwɔe?

Mary biana eƒe Biblia nusrɔ̃viwo be, “Ðe nènya ame aɖe si hã di be yeasrɔ̃ Biblia?” Ne woɖo eŋu be ɛ̃ la, egblɔna na wo be woaƒo nu tso ye ŋu na wo. Nu nyui geɖe dona tsoa nya bɔbɔe sia si wòbiana la me. Nu ka tae? Elabe ame siwo dea asixɔxɔ Mawu ƒe Nyaa ŋu la dina be yewoaƒo nu tso nu siwo srɔ̃m yewole ŋu na yewo xɔlɔ̃wo kple ƒometɔwo. Nu kae do tso nya siwo Mary biana eƒe nusrɔ̃viwo la me?

Esi Mary bia nya sia eƒe nusrɔ̃vi Jasmin la, Jasmin tsɔ ame ene siwo di be yewoasrɔ̃ Biblia la ƒe ŋkɔwo nɛ. Nusɔsrɔ̃a vivi wo dometɔ ɖeka si ŋkɔe nye Kristine nu ale gbegbe be ebia tso Mary si be wòanɔ nua srɔ̃m kpli ye zi eve kwasiɖa sia kwasiɖa. Esi Mary bia Kristine be enya ame aɖe si Biblia sɔsrɔ̃ ado dzidzɔ na hã la, Kristine ɖo eŋu be: “Ɛ̃, matsɔ xɔ̃nye aɖewo ƒe ŋkɔwo ana wò.” Le kwasiɖa ʋɛ aɖewo ko mea, Kristine tsɔ exɔlɔ̃ ene ƒe ŋkɔwo na Mary. Mese ɖe afi ma o lo, Kristine gatsɔ exɔlɔ̃ bubuwo ƒe ŋkɔwo na Mary, eye xɔlɔ̃ yeye mawo hã tsɔ ame bubuwo ƒe ŋkɔwo na Mary.

Kristine di be yeƒe ƒometɔ siwo le Philippines hã nasrɔ̃ Biblia. Eya ta eƒo nu tso Biblia sɔsrɔ̃ ŋu na vianyɔnu Andrea. Gbã Andrea gblɔ le susu me be, ‘Vivimehae Yehowa Ðasefowo nye, womexɔ Yesu dzi se o, eye Nubabla Xoxoa koe wozãna.’ Gake zi gbãtɔ si wosrɔ̃ Biblia kplii ko la, ekpɔe be nu siwo yesusu tso Ðasefowo ŋu la menye nyateƒe o. Ne wole nu srɔ̃m kplii la, egblɔna be, “Esi wònye Bibliae gblɔe koa, ke nyateƒeae nye esia!”

Le ɣeyiɣi kpui aɖe megbea, Andrea ɖe exɔlɔ̃ eve kple eƒe dɔwɔhati siwo di be yewoasrɔ̃ Biblia la fia Mary. Azɔ hã ne Mary le nu srɔ̃m kple Andrea la menya be Andrea tasi Angela, si nye ŋkunɔ hã nɔa to ɖom o. Ke gbe ɖeka la, Angela bia tso Andrea si be wòaƒo nu tso ye ŋu na Mary ne wòate Biblia sɔsrɔ̃ kple ye hã. Nu siwo srɔ̃m Angela le la nɔ enu vivim ŋutɔ. Kaka ɣleti ɖeka nava yi la, Angela lé mawunyakpukpui gbogbo aɖewo ɖe tame eye wòbia tso Mary si be wòasrɔ̃ nua kpli ye zi ene le kwasiɖaa me! Andrea kpena ɖe Angela ŋu wòɖoa to kpekpea me nyawo edziedzi to videokadodowo dzi.

 Mary va de dzesii emegbe be ne yele Biblia srɔ̃m kple Kristine la, srɔ̃a Joshua hã nɔa anyi nɔa to ɖom, eya ta Mary bia Joshua be adi be yeasrɔ̃ Biblia hã. Joshua ɖo eŋu nɛ be: “Nye ya ɖeko medi be manɔ to ɖom mi, migabia nya aɖekem o; ne miebia nya aɖem la, ɖeko matso adzo le mia gbɔ.” Gake kaka miniti atɔ̃ nava yi la, Joshua boŋ bia nya gbogbo aɖewo wu esiwo Kristine bia gɔ̃ hã eye wòdi be woasrɔ̃ Biblia kpli ye hã.

Nyabiase bɔbɔe ma si Mary biana wɔe be wòkpɔ Biblia nusrɔ̃vi gbogbo aɖewo. Mary wɔ ɖoɖo be Ðasefo siwo le afi si nusrɔ̃viawo le nakpe ɖe wo dometɔ geɖe ŋu. Mlɔeba ame 28 sɔŋ siwo le dukɔ ene me ye lɔ̃ be Mary nasrɔ̃ Biblia kpli yewo.

Biblia nusrɔ̃vi gbãtɔ si nye Jasmin, xɔ nyɔnyrɔ le April 2021 me. Kristine hã xɔ nyɔnyrɔ le May 2022 me, hafi trɔ yi eƒe ƒomea gbɔ le Philippines. Kristine xɔlɔ̃ eve siwo wòɖe fia Mary la hã yi ŋgɔ va xɔ nyɔnyrɔ. Le ɣleti ʋɛ aɖewo megbea, Angela hã xɔ nyɔnyrɔ eye fifia enye gbesiagbe mɔɖela. Kristine srɔ̃ Joshua, kple wo vinyɔnu Andrea, kpakple Biblia nusrɔ̃vi bubu geɖewo hã le ŋgɔyiyi nyuiwo wɔm.

Le ƒe alafa gbãtɔ mea, nya nyuia kaka kabakaba le ƒometɔwo kple xɔlɔ̃wo dome. (Yoh. 1:​41, 42a; Dɔw. 10:​24, 27, 48; 16:​25-33) Anyo ŋutɔ be wò hã nànɔ wò Biblia nusrɔ̃viwo kple ɖetsɔlemetɔwo biam be,“Ðe nènya ame aɖe si hã adi be yeasrɔ̃ Biblia?” Ðewohĩ to biabia bɔbɔe sia dzia, Biblia nusrɔ̃vi geɖe ava su asiwò?