ÈDE dzesii be le xexea me egbea, ame geɖe sena le wo ɖokui me be yewodze na mɔnukpɔkpɔ tɔxɛ, ɖoƒe, alo be woawɔ nu ɖe yewo ŋu etɔxɛa? Mɔnukpɔkpɔ ka kee ɖasu wo si o, wosena le wo ɖokuiwo me kokoko be yewodze na geɖe wu. Nuŋububu alea sɔ kple ɖokuitɔdidi kple akpemadamada ƒe nɔnɔme si ŋu Biblia ƒo nu tsoe be axɔ aƒe ɖi le ŋkeke mamlɛ siawo me.—2 Tim. 3:2.

Le nyateƒe mea, menye egbee ɖokuitɔdidi dze egɔme o. Adam kple Xawa ɖoe be yewoatia nu si nye nyui kple vɔ̃ na yewo ɖokuiwo, eye nu siwo do tso emea mede ame dzi kura o. Ƒe alafa aɖewo megbea, Yuda Fia Uziya ɖoe be yeado dzudzɔ ʋeʋĩ na Yehowa le gbedoxɔa me, evɔ se meɖe mɔ nɛ be wòawɔ esia kura hafi o. (2 Kron. 26:​18, 19) Nenema kee Farisitɔwo kple Zadukitɔwo hã se le wo ɖokuiwo me be yewodze be Mawu nawɔ nu ɖe yewo ŋu etɔxɛ le esi yewonye Abraham ƒe dzidzimeviwo ta.—Mat. 3:9.

Egbea, míele ɖokuitɔdilawo kple ɖokuiŋudzelawo dome, eye woƒe nɔnɔme ate ŋu akpɔ ŋusẽ ɖe mía dzi bɔbɔe. (Gal. 5:26) Ate ŋu awɔ na mí be míedze na mɔnukpɔkpɔ aɖe alo be edze be woawɔ nu ɖe mía ŋu etɔxɛe. Aleke míawɔ aƒo asa na nuŋububu alea? Ele be Yehowa ƒe susu le nuwo ŋu nasu mía si. Biblia ƒe mɔfiame eve aɖewo akpe ɖe mía ŋu le esia me.

 Yehowae nya nu si míedze na. Bu esia ƒe kpɔɖeŋu aɖewo ŋu kpɔ.

• Le ɖoɖo si Yehowa wɔ na ƒomewo nu la, ele be srɔ̃ŋutsu nase le eɖokui me be ye srɔ̃ dea bubu ye ŋu, eye srɔ̃nyɔnu hã nase le eɖokui me be ye srɔ̃ lɔ̃ ye. (Ef. 5:33) Yehowa ƒe mɔfiame ye nye be atsu kple asi naɖe srɔ̃tɔwo dome lɔlɔ̃ afia wo nɔewo ɖeɖe ko. (1 Kor. 7:3) Esɔ be dzilawo nakpɔ mɔ be yewo viwo naɖo to yewo, eye ɖeviwo hã nakpɔe be yewo dzilawo lɔ̃ yewo vevie heléa be na yewo.—2 Kor. 12:14; Ef. 6:2.

• Le hamea me hã la, ele be míade bubu hamemetsitsiwo ŋu le woƒe dɔ sesẽ wɔwɔ ta. (1 Tes. 5:12) Ke hã, hamemetsitsiawo meɖua aƒetɔ ɖe nɔviawo dzi o.—1 Pet. 5:​2, 3.

• Mawu ɖe mɔ be amegbetɔ ƒe dziɖuɖuwo naxɔ adzɔ le woƒe dukɔmeviwo si eye dukɔmeviwo nade bubu dumegãwo ŋu.—Rom. 13:​1, 6, 7.

Yehowa wɔa nyui na mí lɔlɔ̃tɔe wu ale si míedze nɛ gɔ̃ hã. Esi míenye nu vɔ̃ mewo ta la, ku koe míedze na hafi. (Rom. 6:23) Gake le Yehowa ƒe lɔlɔ̃ si nu metsina o ta, ewɔa nyui geɖe na mí heyraa mí. (Ps. 103:​10, 11) Eƒe amenuveve geɖe la tae wòyraa mí henaa mɔnukpɔkpɔ geɖe sua mía si.—Rom. 12:​6-8; Ef. 2:8.

Kpɔ nyuie be xexea ƒe nuŋububu nagakpɔ ŋusẽ ɖe dziwò o. Ne míele ŋudzɔ o la, míava nɔ susum be míedze na mɔnukpɔkpɔ aɖewo wu ame bubuwo. Yesu wɔ kpɔɖeŋu aɖe si na míekpɔ ale si esia ate ŋu adzɔe. Eƒo nu tso dɔwɔla siwo wɔ dɔ le waingble me eye wolɔ̃ be woaxe denario ɖeka ƒe fetu na yewo la ŋu. Wodze dɔa gɔme tso ŋdi kanya hewɔ dɔ ŋkeke bliboa le ŋdɔkutsu dzatsɛe la gbe; ke dɔwɔla bubu aɖewo hã va emegbe va wɔ dɔ gaƒoƒo ɖeka pɛ ko. Dɔwɔla gbãtɔawo susui be yewodze na fetu geɖe wu le esi yewowɔ dɔ wu ame bubuawo ta. (Mat. 20:​1-16) Yesu do lo sia elabe edi be ye yomedzelawo nakpɔ ŋudzedze ɖe nu sia nu si Mawu wɔ na wo la ŋu.

Nye akpedala, ke menye ɖokuitɔdila o. (1 Tes. 5:18) Srɔ̃ apostolo Paulo ƒe kpɔɖeŋua. Paulo ate ŋu abia tso nɔvi siwo nɔ Korinto hamea me si be woakpɔ yeƒe ŋutilãmenuhiahiãwo  gbɔ na ye hafi, gake mewɔe nenema o. (1 Kor. 9:​11-14) Ele be míakpɔ ŋudzedze ɖe nu si amewo wɔ na mí la ŋu, ke menye míanɔ nu biam amewo anɔ wo dzi zim be woawɔ míaƒe didiwo dzi na mí o.

Nye ɖokuibɔbɔla. Ne ame aɖe bua eɖokui ŋu fũu akpa la, ate ŋu ava nɔ susum be yedze na mɔnukpɔkpɔ geɖe wu. Ðokuibɔbɔ akpe ɖe mía ŋu be míaƒo asa na nuŋububu ma si ate ŋu akplɔ mí ade afɔku me.

Nyagblɔɖila Daniel ɖo ɖokuibɔbɔ ƒe kpɔɖeŋu nyui na mí. Ƒome si me wòtso, eƒe ɖekadzedze, ale si eƒe tagbɔ ɖa, kple ŋutete siwo le esi la ate ŋu ana wòasusui be yedze na mɔnukpɔkpɔ tɔxɛ aɖewo alo be woawɔ nu ɖe ye ŋu etɔxɛe. (Dan. 1:​3, 4, 19, 20) Gake Daniel yi edzi bɔbɔ eɖokui, si na be eƒe nu dze Yehowa ŋu.—Dan. 2:30; 10:​11, 12.

Mina míaɖoe kplikpaa atsri ɖokuitɔdidi kple ɖokuiŋudzedze ƒe gbɔgbɔ si bɔ ɖe xexe sia me la keŋkeŋ. Neva eme be míayi edzi akpɔ ŋudzedze ɖe ale si Yehowa le mía nu vem hele mía yram la ŋu.