Papa kple Dada nye Katolikotɔ dovevienuwo. Gake esi wova srɔ̃e le Biblia me be Mawu ƒe ŋkɔe nye Yehowa la, wova zu Yehowa Ðasefowo eye woléa fɔ ɖe subɔsubɔdɔa ŋu. Papa nye atikpala eye ekpaa Yesu ƒe nɔnɔmewɔwɔwo tsã. Gake eva dzudzɔ eye wòzã eƒe atikpaɖaŋua tsɔ trɔ asi le míaƒe dziƒoxɔa ƒe xɔ etetɔwo ŋu wòzu Fiaɖuƒe Akpata. Esiae nye Fiaɖuƒe Akpata gbãtɔ le San Juan del Monte, si nye du aɖe si te ɖe Philippines ƒe dugã Manila ŋu.

Wodzim le ƒe 1952 me, eye dzinyelawo te nufiafiam tso Yehowa ŋu abe ale si wonɔ ewɔm na fonye eneawo kple daanye etɔ̃awo hã ene. Esi menɔ tsitsim la, Papa de dzi ƒo nam be maxlẽ Biblia ƒe ta ɖeka gbe sia gbe, eye wòzã habɔbɔa ƒe agbalẽ vovovowo tsɔ fia num. Ɣeaɖewoɣi la, dzinyelawo kpea dzikpɔla mɔzɔlawo kple alɔdzedɔwɔƒea ƒe ame dɔdɔwo be woava dze mía gbɔ. Nuteƒekpɔkpɔ siwo nɔvi siawo gblɔna na mí la dea dzi ƒo na mí henana míekpɔa dzidzɔ ale gbegbe. Esia ʋã mí katã be míana Yehowa subɔsubɔ nanye nu vevitɔ na mí le agbe me.

Dzinyelawo ɖo xɔse ƒe kpɔɖeŋu nyui aɖe nam. Esi Dada lé dɔ vevie heku vɔ megbe la, nye kple Papa míedze mɔɖeɖedɔa gɔme ɖekae le ƒe 1971 me. Gake le ƒe 1973 me esi mexɔ ƒe 20 la, Papa hã ku. Dzinyelawo ƒe kua na mese le ɖokuinye me be metsi asi eye metsi akogo. Gake Biblia me mɔkpɔkpɔ ‘si ŋu kakaɖedzi le eye wòli ke’ la lém ɖe te abe seke ene. Esia wɔe be nyemelé blanui fũu o, ke boŋ meku ɖe Yehowa ŋu goŋgoŋ. (Heb. 6:19) Le Papa ƒe ku megbe kpuie la, wode dɔ asi nam be manye mɔɖela vevi le Coron si nye ƒukpo saɖeaga aɖe dzi, le Palawan nutoa me.

Ƒe 21 ye nɔ asinye esi meyi Coron. Esi metso dugã me ta la, ewɔ nuku nam ŋutɔ be elektrik-kaɖi, pɔmpimetsi, ʋuwo kple  dzokekewo mebɔ ɖe ƒukpo ma dzi o. Togbɔ be nɔvi ʋɛ aɖewo nɔ afi ma hã la, eva hiãna ɣeaɖewoɣi be nye ɖeka mayi gbeadzi elabena zɔhɛ mɔɖela aɖeke menɔ asinye o. Le ɣleti gbãtɔ me la, mesusua nye ƒometɔwo kple xɔ̃nyewo vevie. Le zã aɖewo me la, mefɔa mo dzi léa ŋku ɖe ɣletiviwo ŋu le dziŋgɔlia me, eye mefaa avi. Mesena le ɖokuinye me be maɖe asi le nye dɔdeasia ŋu atrɔ ayi aƒe.

Le ɣeyiɣi mawo me la, megblɔa nye seselelãmewo katã na Yehowa. Meɖoa ŋku dzideƒonya siwo mexlẽ va yi le Biblia alo míaƒe agbalẽwo me dzi. Psalmo 19:14 me nyawo vaa susu me nam edziedzi. Mekpɔe be ne mede ŋugble le nu siwo dzea Yehowa ŋu, abe eƒe dɔwɔwɔwo kple eƒe nɔnɔme lédzinamewo ene ŋu la, ekema Yehowa anye “nye Agakpe kple nye Xɔnametɔ.” Gbetakpɔxɔ ƒe nyati si ƒe tanyae nye “Mawu Magblẽ Wò Ði Gbeɖe O” a kpe ɖe ŋunye ale gbegbe. Mexlẽe, gaxlẽe zi geɖe. Ne míagblɔe la, togbɔ be nye ɖeka koe li hã la, nyemetsi akogo o, ke boŋ Yehowa nɔ kplim le ɣeyiɣi mawo me eye mewɔ mɔnukpɔkpɔa ŋu dɔ do gbe ɖa, srɔ̃ nu hede ŋugble.

Esi meva Coron vɔ megbe kpuie la, woɖom hamemetsitsi. Nye ɖeka koe nye hamemetsitsi le afi ma, eya ta mekpɔa Teokrasi Subɔsubɔ Suku, Subɔsubɔ Kpekpe, Hamea Ƒe Agbalẽ Me Nusɔsrɔ̃, kple Gbetakpɔxɔ Nusɔsrɔ̃a dzi kwasiɖa sia kwasiɖa. Nye kee ƒoa dutoƒonuƒo kwasiɖa ɖe sia ɖe. Esi dɔ gbogbo siawo le dzinye ta la, ɖeko nye akogotsitsia bu enumake!

Subɔsubɔdɔ si mewɔ le Coron la tse ku geɖe, eye nye Biblia nusrɔ̃vi aɖewo va xɔ nyɔnyrɔ. Gake kuxi aɖewo hã nɔ anyi. Ɣeaɖewoɣi la, mezɔna tso ŋdi ʋuu va se ɖe ŋdɔ hafi ɖoa anyigbamamaa me, evɔ nyemenyana afi si matsi adɔ hã o. Ƒukpo suesue geɖewo hã le hamea ƒe anyigbamama me. Zi geɖe la, meɖoa tɔdziʋu toa atsiaƒu dzeagbowo dzi yia ƒukpo mawo dzi, togbɔ be nyemenya tsiƒuƒu o hã. Ke hã, Yehowa kpɔ tanye eye wòlém ɖe te le esiawo katã me. Meva kpɔe dze sii emegbe be ɖe Yehowa nɔ nye dzram ɖo ɖe kuxi sesẽ siwo me mava to le dɔdeasi si le ŋgɔ nam me la ŋu.

Le ƒe 1978 me la, woɖom ɖe Papua New Guinea, le Australia ƒe dziehe. Towo sɔ gbɔ ɖe Papua New Guinea. Ewɔ nuku nam be togbɔ be ame miliɔn etɔ̃ aɖewo koe le dukɔa me hã la, gbegbɔgblɔ 800 kple edzivɔ ye wodona le afi ma. Gake enyo ŋutɔ be ame akpa gãtɔ tea ŋu doa Melanesiatɔwo ƒe Pidgingbe si woyɔna be Tok Pisin.

Woɖom ɖe Eŋlisi hame aɖe me le Port Moresby, si nye woƒe dugãa me be manɔ afi ma hena ɣeyiɣi aɖe. Gake emegbe meʋu yi Tok Pisin gbedolawo ƒe hame me eye mede suku aɖe be masrɔ̃ gbea. Mezã nu siwo wofiam la le gbeƒãɖeɖedɔa me. Esia kpe ɖe ŋunye mesrɔ̃ gbea kabakaba. Eteƒe medidi o, mete ŋu ƒoa dutoƒonuƒo le Tok Pisin gbea me. Ewɔ nuku nam ŋutɔ be esi meva Papua New Guinea eye mekpɔ de ƒe ɖeka gɔ̃ hã o la, woɖom nutome sue dzikpɔla be masubɔ Tok Pisin hamewo le nuto gbogbo aɖewo me.

Esi hameawo didi tso wo nɔewo gbɔ ta la, ehiã be mawɔ ɖoɖo ɖe nutome sue takpekpe  geɖewo ŋu eye mazɔ mɔ edziedzi hã. Gbã la, mese le ɖokuinye me be metsi akogo elabe mele dukɔ yeye me, eye amewo ƒe dekɔnuwo kple gbegbɔgblɔwo hã to vovo. Tonuto mee eye anyigba le glidzaglidza ta ʋumɔwo meɖo afi sia afi o. Esia na wòva hiã be maɖo yameʋu kwasiɖa ɖe sia ɖe kloe hafi aɖo hame bubu gbɔ. Yameʋu sue xoxoe aɖe si mele nɔnɔme nyui me o ye meɖona eye ɣeaɖewoɣi la, nye ɖeka koe nyea mɔzɔla nɔa eme. Mɔzɔzɔ mawo nana mevɔ̃na ŋutɔ abe ale si ko wònɔna ne meɖo tɔdziʋu ene.

Telefon mele ame geɖe si o, eya ta lɛtae meŋlɔna na hameawo. Zi geɖe la, meva ɖona hafi lɛtaa va kaa nɔviawo si, eya ta media nɔviawo hafi kena ɖe wo ŋu. Gake ɣesiaɣi si meke ɖe nɔviawo ŋu la, woxɔam nyuie ale gbegbe be dzi dzɔam be medze agbagba di wo. Yehowa kpe ɖe ŋunye le mɔ geɖe nu, eye meva te ɖe eŋu geɖe wu.

Zi gbãtɔ si mede kpekpe le ƒukpo si woyɔna be Bougainville dzi la, atsu kple asi aɖe te ɖe ŋunye eye wotsɔ dzidzɔ biam be: “Èɖo ŋku mía dzia?” Meɖo ŋku edzi be zi gbãtɔ si meyi Port Moresby la, meɖi ɖase na wo eye medze Biblia sɔsrɔ̃ gɔme kpli wo. Emegbe mena nɔviŋutsu bubu va yi edzi. Fifia wo ame evea siaa xɔ nyɔnyrɔ! Esia nye yayra gbogbo siwo mekpɔ le ƒe etɔ̃ siwo mesubɔ le Papua New Guinea la dometɔ ɖeka.

Hafi madzo le Coron le ƒe 1978 me la, medo go nɔvinyɔnu dzetugbe aɖe si ŋkɔe nye Adel. Etsɔa eɖokui saa vɔ ale gbegbe, enye gbesiagbe mɔɖela eye eya ɖekae kpɔa via eve siwo nye Samuel kple Shirley dzi. Le ɣeyiɣi ma ke me la, enɔ dadaa tsitsi dzi kpɔm. Le May 1981 me la, metrɔ yi Philippines vae ɖe Adel. Le míaƒe srɔ̃ɖeɖe megbe la, míewɔ gbesiagbe mɔɖeɖedɔa eye míekpɔ ƒomea dzi ɖekae.

Togbɔ be srɔ̃ kple viwo le asinye fifia hã la, le ƒe 1983 me la, wogaɖom mɔɖela vevi be mawɔ dɔ le Linapacan Ƒukpoa dzi, le Palawan nutoa me. Míaƒe ƒome bliboa ʋu yi teƒe saɖeaga sia si Ðasefo aɖeke mele o. Abe ƒe ɖeka ene megbe la, Adel dada ku. Ke hã míeyi subɔsubɔdɔa dzi veviedodotɔe, eye esia na míete ŋu nɔ te ɖe vevesesea nu. Míete Biblia sɔsrɔ̃ kple ame geɖe le Linapacan eye wodi be yewoade kpekpeawo. Eteƒe medidi o, míehiã teƒe si míawɔ kpekpewo le. Eya ta míawo ŋutɔ míetu Fiaɖuƒe Akpata sue aɖe. Ƒe etɔ̃ pɛ ko tso esime míeva ɖo ƒukpo sia dzi megbe la, dzi dzɔ mí ŋutɔ be ame 110 sɔŋ de Ŋkuɖodzia, eye wo dometɔ geɖe yi ŋgɔ va xɔ nyɔnyrɔ le míaƒe dzodzo megbe.

Le ƒe 1986 me la, woɖom ɖe Culion ƒukpoa dzi eye anyidɔlélawo ƒe nɔƒe aɖe hã le afi ma. Emegbe la, woɖo Adel hã mɔɖela vevii. Gbã la, míenɔ vɔvɔ̃m be míaɖe gbeƒã na ame siwo lé anyidɔa. Gake nɔvi siwo le nutoa me ka ɖe edzi na mí be mehiã be míavɔ̃ fũu o elabe woda dɔ na wo. Wo dometɔ aɖewo dea kpekpeawo le nɔvinyɔnu aɖe ƒe aƒe me. Eteƒe medidi o míegavɔ̃na be míaɖe gbeƒã na wo o, ke boŋ edzɔa dzi na mí be míagblɔ Biblia me  mɔkpɔkpɔa na ame mawo tɔgbi siwo sena le wo ɖokuiwo me be Mawu kple amegbetɔwo siaa gbe yewo. Ne wosrɔ̃e be yewoava nɔ lãmesẽ deblibo me gbe ɖeka la, dzi dzɔa wo ŋutɔ eye esia nana dzi dzɔa míawo hã.—Luka 5:​12, 13.

Aleke mía viwo wɔ trɔ ɖe nɔnɔmeawo ŋu le Culion? Nye kple Adel míekpe nɔvinyɔnu sɔhɛ eve tso Coron be woava nɔ mía gbɔ ale be mía viwo nate ŋu ade ha kpli wo. Samuel, Shirley, kple nɔvinyɔnu eveawo wɔ gbeƒãɖeɖedɔa veviedodotɔe. Wosrɔ̃ Biblia kple ɖevi geɖewo eye nye kple Adel míesrɔ̃ Biblia kple ɖevi mawo dzilawo. Eva ɖo ɣeaɖeɣi la, míenɔ Biblia srɔ̃m kple ƒome wuiɖekɛ sɔŋ. Eteƒe medidi o, míaƒe Biblia nusrɔ̃vi geɖewo nɔ ŋgɔ yim ale gbegbe be míete ŋu ɖo hame yeye!

Le gɔmedzedzea la, nye ɖeka koe nye hamemetsitsi le nuto ma me. Eya ta alɔdzedɔwɔƒea bia tso asinye be makpɔ kpekpeawo dzi na gbeƒãɖela enyi siwo le Culion eye mavae kpɔ edzi na gbeƒãɖela asieke siwo le kɔƒedu si nye Marily hã me; meɖoa tɔdziʋu gaƒoƒo etɔ̃ hafi ɖoa Marily. Le kpekpeawo megbe la, nye kple ƒome bliboa míezɔna toa tonutowo me gaƒoƒo geɖe va srɔ̃a Biblia kple amewo le kɔƒe aɖe si woyɔna be Halsey me.

Mlɔeba la, ame geɖe va xɔ nyateƒea le Marily kple Halsey ale gbegbe be míetu Fiaɖuƒe Akpata ɖe teƒe evea siaa. Abe ale si wònɔ le Linapacan ene la, nɔviwo kple ɖetsɔlemetɔwo na xɔtunu gbogbo aɖewo hewɔ dɔa akpa gãtɔ. Akpata si míetu ɖe Marily la ate ŋu axɔ ame 200 eye woate ŋu akekee ɖe enu gɔ̃ hã; esia ta míete ŋu wɔa nutome sue takpekpewo le afi ma.

Le ƒe 1993 me esime mía viwo tsi vɔ la, nye kple Adel míedze nutome sue dzikpɔkpɔ dɔa gɔme le Philippines. Eye le ƒe 2000 me la, mede Subɔsubɔdɔ Ƒe Hehenasuku be maxɔ hehe ava fia nu le sukua me. Nyemesusu be medze na dɔ ma o, gake Adel dea dzi ƒo nam zi geɖe. Eɖo ŋku edzi nam be Yehowa ado ŋusẽm be mawɔ dɔdeasi yeye sia. (Flp. 4:13) Adel ka ɖe esia dzi elabe togbɔ be lãmesẽ mede edzi o hã Yehowa nɔ ŋusẽ domee wòyi edzi nɔ subɔsubɔdɔa wɔm.

 Le ƒe 2006 me esime menɔ nu fiam le Hehenasukua me la, wokpɔ ahɔhɔ̃medɔ aɖe si nana ame ƒe lãme nɔa ƒoƒom (Parkinson’s) la le Adel ŋu. Ðeko nyaa dze mí kpo! Megblɔ na Adel be maɖe asi le nye dɔdeasia ŋu ale be mate ŋu alé be nɛ, gake ɖeko wògblɔ be: “Meɖe kuku wò ya di ɖɔkta si ate ŋu akpe ɖe ŋunye ko, eye meka ɖe edzi be Yehowa akpe ɖe mía ŋu míayi míaƒe dɔdeasia dzi.” Adel yi edzi subɔ Yehowa ƒe ade siwo kplɔe ɖo, eye metoa nyatoƒoe o. Esi megate ŋu zɔna o la, enɔa bunɔkeke me ɖea gbeƒã. Esi nu meganya ƒona nɛ tututu o la, egblɔa nya ɖeka alo eve tsɔ ɖoa nya ŋu le kpekpeawo me. Nɔvi geɖewo ŋlɔa nu ɖona ɖee tsɔ daa akpe nɛ ɖe eƒe dzidodo ƒe kpɔɖeŋu ɖedzesia ta va se ɖe esime wòku le ƒe 2013 me. Ƒe 30 kple edzivɔe nye ema nye kple srɔ̃nye lɔlɔ̃a Adel míenɔ anyi ɖekae, eya ta esi wòku la, megalé blanui vevie eye metsi akogo.

Adel ƒe didi vevi ye nye be mayi subɔsubɔdɔa dzi, eya ta mewɔe nenema. Meƒo ɖokuinye ɖe subɔsubɔdɔa me bliboe, eye esia na meɖu akogotsitsia dzi. Tso ƒe 2014 va ɖo ƒe 2017 me la, wode dɔ asi nam be masrã Tagalog-gbedolawo ƒe hamewo kpɔ le dukɔ siwo me woɖo asi míaƒe dɔa dzi le ɣemaɣi la me. Emegbe meva srãa Tagalog hamewo kpɔna le Taiwan, Amerika kple Canada. Le ƒe 2019 me la, mefia nu le Fiaɖuƒe Nyanyuigblɔlawo Ƒe Sukua le Eŋlisigbe me le India kple Thailand. Mekpɔ dzidzɔ le dɔdeasi siawo katã me. Ɣesiaɣi si menyrɔ ɖokuinye ɖe Yehowa ƒe dɔwo me la, mekpɔa dzidzɔ wu gbɔgblɔ.

Afi sia afi si woɖom ɖo la, nye kple nɔviawo dome va nɔa kplikplikpli ale gbegbe be dzodzo le wo gbɔ menɔa bɔbɔe kura o. Le ɣeyiɣi mawo me la, mesrɔ̃ ale si maɖo ŋu ɖe Yehowa ŋu bliboe. Enuenu la, mekpɔe be Yehowa kpe ɖe ŋunye, eye esia wɔe be mete ŋu kɔ dzi me trɔ ɖe nɔnɔme ɖe sia ɖe si medo goe le agbe me ŋu. Egbea, menye mɔɖela vevi le Philippines. Nye dzi dze eme le nye hame yeyea me. Nɔviawo va le abe ƒome ene nam eye woléa be nam ŋutɔ. Dzidzɔ gãe wònye nam hã be Samuel kple Shirley le xɔse ɖem fia abe wo dada ke ene.—3 Yoh. 4.

Meto nɔnɔme sesẽ geɖe me le agbe me. Mekpɔ eteƒe dɔléle vɔ̃ɖi aɖe wɔ fu srɔ̃nye lɔlɔ̃a wòkpe fu ʋuu hafi ku. Eva hiã be matrɔ ɖe nɔnɔme vovovowo hã ŋu. Ke hã, mekpɔe be Yehowa ‘mele adzɔge tso mía dometɔ aɖeke gbɔ o’ vavã. (Dɔw. 17:27) Yehowa ƒe alɔ “meto ɖe eme” be mate ŋu ado ŋusẽ esubɔlawo o, ne nuto saɖeaga mee wole gɔ̃ hã. (Yes. 59:1) Medaa akpe na Yehowa, nye Agakpe la, elabe eli kplim le nye agbemeŋkekewo katã me. Megblẽm ɖi gbeɖe o.