“NE MESE xɔ̃nye siwo yi ɖasubɔ le afi si mɔɖela geɖe wu hiã le ƒe nuteƒekpɔkpɔwo la, edzroa nye hã be makpɔ dzidzɔ si kpɔm wole. Gake menɔ vɔvɔ̃m hã be manya wɔ nam be masubɔ le afi si gbeƒãɖela geɖe wu hiã le o.” Nya mawoe Sylviana, si nye mɔɖela si xɔ ƒe 27 la gblɔ.

Ðe wò hã èsena le ɖokuiwò me abe Sylviana enea? Ðe wòdzroa wò hã vevie be yeasubɔ le afi si Fiaɖuƒegbeƒãɖela geɖe wu hiã le evɔ wòwɔna na wò be manya wɔ na ye oa? Ne nenemae la, dzi megaɖe le ƒowò o! Le Yehowa ƒe kpekpeɖeŋu me la, nɔviŋutsu kple nɔvinyɔnu akpeakpewo te ŋu ɖu mɔxenu siwo na wòsesẽ na wo be woadzi woƒe subɔsubɔdɔa ɖe edzi la dzi. Be míakpɔ ale si Yehowa kpe ɖe wo dometɔ aɖewo ŋui la, na míayi Madagascar, si nye ƒukpo enelia si lolo wu le anyigba dzi.

Ƒe ewo aɖewoe nye esia la, gbeƒãɖela kple mɔɖela 70 kple edzivɔ siwo me dzo le la tso dukɔ * 11 me yi ɖasubɔ le Afrika ƒe dukɔ sia si me dɔa le ku tsem le, si me ame geɖe dea bubu Biblia ŋu le la me. Azɔ hã, gbeƒãɖela gbogbo aɖewo siwo le dukɔ sia me la lɔ̃ faa ʋu yi ɖale asi kpem ɖe Fiaɖuƒegbedeasia kaka dɔa ŋu le ƒukpo gã sia ƒe teƒeteƒewo. Na míadzro wo dometɔ aɖewo ƒe nuteƒekpɔkpɔwo me kpɔ.

Louis kple Perrine nye atsu kple asi siwo xɔ wu ƒe 30, eye woʋu tso France yi Madagascar. Wonɔ eŋu bum ƒe geɖe be yewoaʋu aɖakeke yewoƒe subɔsubɔdɔa ɖe enu le duta, gake esia nɔ sesẽm na Perrine. Egblɔ be: “Menɔ vɔvɔ̃m be mayi tɔmanyaƒe nɔmanyaƒe. Ne mebu eŋu be magblẽ míaƒe ƒometɔwo, hamea me tɔwo, míaƒe aƒea, teƒe siwo míenya kple nu siwo wɔwɔ ma mí ɖe megbe la, esia nana metsia dzimaɖi. Le nyateƒe me la, nu siwo ŋu metsi dzi ɖo la koŋue zu mɔxenu nam.” Ke le ƒe 2012 me la, dzi ɖo Perrine ƒo, eye eya kple Louis woʋu yi Madagascar. Aleke wòle sesem le eɖokui me tso nyametsotso ma ŋu? Egblɔ be: “Ne metrɔ kpɔ megbe la, magblɔ be ale si gbegbe Yehowa kpe ɖe mía ŋui la teƒe kpɔkpɔ do ŋusẽ míaƒe xɔse ŋutɔ.” Louis hã  gblɔ kpee be, “Bu eŋu kpɔ ko—esi míede Ŋkuɖodzia zi gbãtɔ le Madagascar la, míaƒe Biblia nusrɔ̃vi ewo va wɔnaa teƒe!”

Nu kae kpe ɖe atsu kple asi sia ŋu woyi edzi subɔ le duta esime wodo go kuxiwo? Wodo gbe ɖa ɖe kuku na Yehowa vevie be wòado ŋusẽ yewo ne yewoayi edzi ado dzi. (Flp. 4:13) Louis gblɔ be: “Míede dzesii be Yehowa ɖo míaƒe gbedodoɖaa ŋu eye wòna ‘Mawu ƒe ŋutifafa’ mí. Ewɔe be míete ŋu tsɔ susu ɖo dzidzɔ si kpɔm míele le subɔsubɔdɔa me ŋu. Tsɔ kpe ɖe eŋu la, mía xɔlɔ̃ siwo míegblẽ ɖe aƒe la ɖo e-mail kple lɛtawo ɖe mí tsɔ de dzi ƒo na mí be míagana ta o.”—Flp. 4:6, 7; 2 Kor. 4:7.

Yehowa ɖo Louis kple Perrine ƒe dzidodoa teƒe na wo geɖe. Louis gblɔ be: “Le October 2014 me la, míede Kristotɔ Srɔ̃tɔwo Ƒe Bibliasrɔ̃sukua * le France. Suku sia si míede la nye nunana nyui aɖe tso Yehowa gbɔ, si míaŋlɔ be akpɔ o.” Esi wowu sukua nu la, dzi dzɔ wo ŋutɔ be habɔbɔa gaɖo wo ɖe Madagascar.

Didier kple srɔ̃a Nadine xɔ ƒe 50 kple edzivɔ esi woʋu tso France yi Madagascar le ƒe 2010 me. Didier gblɔ be: “Ƒe aɖewo va yi la, mí ame evea míewɔ mɔɖeɖedɔa, eye emegbe míenyi mía vi etɔ̃awo. Esi wotsi la, míeva bu eŋu kpɔ be ɖe míayi aɖasubɔ le duta hã.” Ke hã, Nadine gblɔ be: “Dzodzo le mía viwo gbɔ nɔ sesẽm nam, gake wogblɔ na mí be: ‘Ne mieʋu yi duta ɖasubɔ le afi si gbeƒãɖela geɖe wu hiã le la, miazu dada na mí!’ Woƒe nyawo de dzi ƒo na mí míeʋu. Togbɔ be mía kple mía viwo dome didi fifia hã la, edzɔa dzi na mí be míetea ŋu ɖoa dze kpli wo edziedzi.”

Malagasygbea sɔsrɔ̃ menɔ bɔbɔe na Didier kple Nadine kura o. Nadine ko alɔgbɔnu esi wògblɔ be, “Menye ƒe 20-viwoe míeganye o.” Ke aleke wowɔ srɔ̃ gbea? Gbã la, woyi ɖanɔ Fransegbe hame aɖe me. Emegbe esi wokpɔe be yewosu te azɔ be yewoasrɔ̃ Malagasygbea la, woʋu yi Malagasygbe hame me. Nadine gblɔ be: “Ame siwo míedoa goe le gbeƒãɖeɖedɔa me la dometɔ geɖe lɔ̃ Biblia sɔsrɔ̃. Zi geɖe la, wodaa akpe na mí be míeva yewo gbɔ. Le gɔmedzedzea me la, ɖeko wònɔ abe drɔ̃e kum menɔ ene. Mɔɖeɖedɔa wɔwɔ le afi sia dzɔa dzi nam ŋutɔ. Ne mefɔ ŋdi la, megblɔna na ɖokuinye be, ‘Ahã, meyina gbeƒã ɖe ge egbea hã!’”

Didier ko alɔgbɔnu esi wògblɔ tso ɣeyiɣi si me wodze Malagasygbea sɔsrɔ̃ gɔme ŋu be: “Menɔ hame ƒe kpekpe aɖe dzi kpɔm, ke hã nyemenɔ nɔviawo dometɔ aɖeke ƒe nyaŋuɖoɖo gɔme sem o. Nya si megblɔna koe nye, ‘Akpe.’ Esi meda akpe na nɔvinyɔnu aɖe ɖe eƒe nyaŋuɖoɖoa ta la, ame siwo nɔ emegbe la wɔ asi nam be eƒe nyaŋuɖoɖoa mede o. Enumake meyɔ nɔviŋutsu aɖe wògaɖo nyaa ŋu—ɖeko metsɔe be eɖo eŋu nyuie.”

Le ƒe 2005 ƒe takpekpe aɖe me la, Thierry kple srɔ̃a, Nadia, wokpɔ drama si ƒe tanyae nye “Ti Taɖodzinu Siwo Dzea Mawu Ŋu Yome” (ele yevugbe me). Drama  ma, si wotu ɖe Biblia dzi si ku ɖe Timoteo ŋu la wɔ dɔ ɖe wo dzi, eye wòna wògadzro wo vevie be woayi aɖasubɔ le afi si Fiaɖuƒegbeƒãɖela geɖe wu hiã le. Thierry gblɔ be: “Esi dramaa wu ene eye míenɔ asikpe ƒom la, menyè kɔ kpɔ srɔ̃nye hebiae be, ‘Afi kae míayi?’ Srɔ̃nye gblɔ nam be nya ma tututu ŋu bum ye hã yenɔ.” Esia megbe kpuie ko la, wote afɔ siwo hiã la ɖeɖe be yewoaɖo yewoƒe taɖodzinua gbɔ. Nadia gblɔ be, “Ʋɛʋɛʋɛ la, míeɖe míaƒe nunɔamesiwo dzi kpɔtɔ va se ɖe esime míaƒe nunɔamesiwo katã te ŋu ge ɖe mɔzɔkplo ene pɛ ko me!”

Wova ɖo Madagascar le ƒe 2006 me, eye wose vivi na gbeƒãɖeɖedɔa tso gɔmedzedzea me ke. Nadia gblɔ be, “Ame siwo míedoa goe la nana míekpɔa dzidzɔ ŋutɔ.”

Gake le ƒe ade megbe la, kuxi aɖe do mo ɖa. Nadia dada, Marie-Madeleine, si le France la dze anyi, si wɔe be eƒe abɔ ŋe eye eƒe ta xɔ abi. Esi Nadia kple srɔ̃a woƒo nu kple Marie-Madeleine ƒe ɖɔkta tso nɔnɔmea ŋu vɔ la, wogblɔ na Marie-Madeleine be wòava nɔ yewo gbɔ le Madagascar. Togbɔ be exɔ ƒe 80 ɣemaɣi hã la, elɔ̃ faa be yeaɖanɔ wo gbɔ. Aleke wòse le eɖokui me tso dutayiyi ŋu? Egblɔ be: “Ɣeaɖewoɣi la, esesẽna nam be matrɔ ɖe nɔnɔmeawo ŋu, gake togbɔ be nye lãmesẽa mede dzinye tututu o hã la, mesena le ɖokuinye me be nye hã mele akpa aɖe wɔm le hamea me. Eye nu si dzɔ dzi nam wue nye be, nye vava wɔe be vinyewo kpɔtɔ le woƒe subɔsubɔdɔ si le ku tsem la dzi.”

Riana nye nɔviŋutsu si xɔ ƒe 22. Alaotra Mangoro, si nye nuto aɖe si me nukuwo wɔna le nyuie le Madagascar ƒe ɣedzeƒe la mee wònɔ tsi. Ewɔ dɔ nyuie le suku eye wòdi be yeade suku kɔkɔ. Ke hã, esi wòsrɔ̃ Biblia la, etrɔ eƒe susu. Egblɔ be: “Medze agbagba srɔ̃ nu vevie be mawu sekɛndrisuku (lycée) nu kaba, eye medo ŋugbe na Yehowa be, ‘Ne mekpɔ dzidzedze le dodokpɔ mamlɛa me la, madze mɔɖeɖedɔa gɔme.’” Esi Riana wu sukua nu la, ewɔ eƒe ŋugbedodoa dzi. Eʋu yi ɖatsi nɔviŋutsu aɖe si hã nye mɔɖela la gbɔ, edi ɣeyiɣi aɖe ƒe dɔ, eye wòdze mɔɖeɖedɔa gɔme. Egblɔ be, “Emae nye nyametsotso nyuitɔ kekeake si mewɔ.”

Gake, Riana ƒe ƒometɔwo mese nu si tae medi dɔwɔɖui si ana nu nadze edzi nɛ o la gɔme o. Egblɔ be: “Tɔnye, tɔnyeɖia, kple mamanye siaa de dzi ƒo nam be made suku kɔkɔ. Gake nyemedi be madzudzɔ mɔɖeɖedɔa le naneke ta o.” Ɣeyiɣi kpui aɖe megbe la, Riana di be yeayi aɖasubɔ le afi si gbeƒãɖela geɖe wu hiã le. Nu kae na wòdi be yeaɖe afɔ ma? Egblɔ be: “Fiafiwo va ge ɖe mía ƒe me eye wolɔ nye nunɔamesi geɖe dzoe. Esia na mebu tame le nya si Yesu gblɔ ku ɖe ‘kesinɔnuwo nu ƒoƒo ƒu ɖe dziƒo’ ŋu la ŋu. Meɖoe be maku kutri vevie aƒo kesinɔnuwo nu ƒu ɖe dziƒo.” (Mat. 6:19, 20) Eʋu yi nuto aɖe si me ku ɖina le, si le dukɔa ƒe anyiehe kekeake la me. Teƒea didi tso afi si wònɔ kilometa 1,300 sɔŋ. Nuto ma mee Antandroytɔwo le. Nu ka tae wòyi afi ma ɖo?

Riana dze Biblia sɔsrɔ̃ gɔme kple Antandroy ŋutsu eve aɖewo ɣleti ɖeka megbee fiafiwo va fi eƒe nuwo. Esrɔ̃ nya ʋɛ aɖewo le wo degbea me eye wòbu Antandroytɔ gbogbo siwo mekpɔ se Fiaɖuƒegbedeasia haɖe o la ŋu. Egblɔ be: “Medo gbe ɖa na Yehowa be wòakpe ɖe ŋunye maʋu ayi Tandroy-gbedolawo dome.”

Riana ʋu hã vavã, eye esia megbe teti ko la, edo go kuxi sesẽ aɖe. Mekpɔ dɔ aɖeke awɔ o. Ŋutsu aɖe gblɔ nɛ be: “Nu ka tae nèʋu va afi sia? Ne afi sia tɔwo le dɔ dim be yewoawɔ la, afi si nètso vae woyina!” Kwasiɖa eve megbe la, ga vɔ le Riana si keŋkeŋ kloe esime wòdze mɔ yina nutome gã takpekpe aɖe, eye wònɔ nu si wòawɔ ŋu bum. Le takpekpea ƒe ŋkeke mamlɛtɔ dzi la, nɔviŋutsu aɖe tsɔ nane ƒo ɖe kotu si Riana do la ƒe kotoku me. Gae nɔviŋutsua tsɔ de kotoku me nɛ. Ga home si wònae la ade be wòaɖo ʋu atrɔ ayi Antandroy nutoa me eye ɖe nasusɔ wòatsɔ adze numeɖenu fafɛ dzadzra gɔme. Riana gblɔ be: “Mese le ɖokuinye me be Yehowa tsom xɔ le ɣeyiɣi nyuitɔ dzi. Esia wɔe be mete ŋu yi edzi kpe ɖe ame siwo si mɔnukpɔkpɔ mesu be woasrɔ̃ nu tso Yehowa ŋu o la ŋu!” Dɔ geɖe hã nɔ hamea me. Riana gblɔ be: “Wonana meƒoa dutoƒonuƒo kwasiɖa eve sia kwasiɖa eve. Yehowa nɔ hehe namem to  eƒe habɔbɔa dzi.” Egbea, Riana gakpɔtɔ le Fiaɖuƒegbedeasia gblɔm na Tandroy-gbedola geɖe siwo di be yewoasrɔ̃ nu tso Yehowa ŋu.

Yehowa ka ɖe edzi na mí be “ame sia ame si di be woayra ye le anyigba dzi la, nyateƒe Mawu la ayrae.” (Yes. 65:16) Ne míekua kutri vevie ɖua mɔxenuwo dzi ale be míakeke míaƒe subɔsubɔdɔa ɖe enu la, Yehowa yraa mí. Bu Sylviana, si ŋu míeƒo nu tsoe le nyati sia ƒe gɔmedzedze ŋu kpɔ. Ðo ŋku edzi be ebui be manya wɔ na ye be yeasubɔ le afi si gbeƒãɖela geɖe wu hiã le o. Nu ka tae wòsusui nenema? Eɖe eme be: “Nye ɖusifɔ didi wu nye miafɔ sentimeta 9. Eya ta metɔna le afɔ ɖeka dzi, si wɔnɛ be ɖeɖi tea ŋunye kaba.”

Ke hã, le ƒe 2014 me la, Sylviana kple nɔvinyɔnu aɖe si ŋkɔe nye Sylvie Ann, si nye ɖetugbui mɔɖela aɖe le woƒe hamea me la wɔ ɖeka heʋu yi kɔƒe sue aɖe si didi tso wo de kilometa 85 la me. Togbɔ be Sylviana ƒe nɔnɔmea mede edzi o hã, eƒe dzimedidia va eme nɛ—eye wòkpɔ yayra nyui aɖe! Egblɔ be: “Esi medze subɔsubɔ le afi sia ƒe ɖeka pɛ ko megbe la, ɖetugbui aɖe si nye vidada, si ŋkɔe nye Doratine, si nye nye Biblia nusrɔ̃vi la xɔ nyɔnyrɔ le míaƒe nutome sue takpekpea me.”

Abe ale si wòdze le nya siwo ame siwo ʋu yi ɖasubɔ le afi si gbeƒãɖela geɖe wu hiã le gblɔ me ene la, ne míedze agbagba ɖu mɔxenuwo dzi hekeke míaƒe subɔsubɔdɔa ɖe enu la, ŋugbe si Yehowa do be, “Mado ŋusẽ wò; makpe ɖe ŋuwò” la vaa eme na mí. (Yes. 41:10) Esia wɔnɛ be mía kple Yehowa dome va nɔa kplikplikpli. Gakpe ɖe eŋu la, ne míetsɔa mía ɖokui nana faa, eɖanye le dukɔ si me míele loo alo duta o la, esia naa hehe mí ɖe teokrasidɔ siwo míava wɔ le xexe yeyea me ŋu. Didier si ŋu míeƒo nu tsoe la ɖee gblɔ ale, “subɔsubɔ le afi si gbeƒãɖela geɖe wu hiã le dzraa mí ɖo nyuie ɖe etsɔme ŋu!” Míele mɔ kpɔm be lɔlɔ̃nu faa dɔwɔla geɖe wu adze hehe sia xɔxɔ gɔme kpuie!