1-2. Nɔnɔme sesẽ kawoe ate ŋu ava Yehowa subɔla wɔnuteƒewo dzi?

 NU GBÃDZINAME ate ŋu adzɔ ɖe mía dzi zi ɖeka kpoyi eye wòatrɔ míaƒe agbe kura. Le kpɔɖeŋu me, ɖɔktawo kpɔ kansa vɔ̃ɖi aɖe le mía nɔvi wɔnuteƒe Luis a ŋu. Wogblɔ nɛ be dzinu ʋɛ aɖewo koe susɔ be wòaganɔ agbe. Monika kple srɔ̃a nɔ Yehowa subɔm ɖekae, gake gbe ɖekaa, Monika va kpɔe be ye srɔ̃ si nye hamemetsitsi nɔ agbe eve nɔm. Eva hiã be Olivia si nye tre nasi le aƒe me le ahom sesẽ aɖe si gbɔna tutu ge ta. Esi wòtrɔ vaa, ekpɔe be ahom la mu aƒea. Gbe ɖeka kple eƒe zãdodo koa nuwo trɔ kura le nɔvi siawo ƒe agbe me. Ðe nya vɔ̃ aɖe dzɔ ɖe dziwò kpɔ si na nuwo trɔ kura le wò agbe mea?

² Mí Yehowa subɔla wɔnuteƒewo hã míedzea dɔ, eye míetoa nɔnɔme sesẽwo me abe ame bubuwo ke ene. Azɔ hã, ame siwo lé fu Mawu ƒe amewo tea ŋu tsia tre ɖe mía ŋu alo tia mía yome. Togbɔ be Yehowa mexea mɔ be nu siawo nagadzɔ ɖe mía dzi o hãa, edo ŋugbe be yeakpe ɖe mía ŋu. (Yes. 41:10) Le eƒe kpekpeɖeŋu mea, míate ŋu ayi edzi akpɔ dzidzɔ, atso nya me nyuie, eye míayi edzi awɔ nuteƒe nɛ le nɔnɔme sesẽtɔwo gɔ̃ hã me. Le nyati sia mea, míadzro mɔ ene siwo dzi Yehowa tona kpena ɖe mía ŋu ne nya vɔ̃wo dzɔ ɖe mía dzi la me. Azɔ hã, míakpɔ nu siwo wòle be míawɔ be eƒe kpekpeɖeŋu naɖe vi na mí.

 YEHOWA ADZƆ ŊUWÒ

3. Ne nya vɔ̃ aɖe dzɔ ɖe mía dzia, nu ka wɔwɔe ate ŋu asesẽ na mí?

³ Kuxia. Ne nya vɔ̃ aɖe dzɔ ɖe mía dzia, ate ŋu asesẽ be míabu nuwo ŋu nyuie alo atso nya me nyuie. Nu ka tae? Elabe nɔnɔmea ate ŋu ana míalé blanui vevie eye míatsi dzimaɖi. Ate ŋu ana míatɔtɔ vevie eye mímanya nu si míawɔ o. De dzesi ale si nɔvi siwo ŋu míeƒo nu tsoe va yia se le wo ɖokuiwo me esime nya vɔ̃ mawo dzɔ ɖe wo dzi. Olivia gblɔ be: “Esi ahom la mu nye aƒea, mebú ɖe ɖokuinye eye wòwɔ nam be ewu tsɔtsɔ nam.” Monika si srɔ̃ mewɔ nuteƒe nɛ oa gblɔ be: “Mese le ɖokuinye me be etrɔm to eme. Mese veve eye nye dzi gbã. Nu siwo mewɔna gbe sia gbe meganya nɔ wɔwɔm nam o. Nyemesusui kpɔ be nu sia tɔgbi adzɔ ɖe dzinye o.” Nu kae Yehowa do ŋugbe be yeawɔ atsɔ akpe ɖe mía ŋu ne míele nɔnɔme gbãdziname siawo tɔgbi me tom?

4. Le Filipitɔwo 4:​6, 7 ƒe nya nua, nu kae Yehowa do ŋugbe be yeawɔ na mí?

⁴ Ale si Yehowa kpena ɖe mía ŋu. Yehowa do ŋugbe be yeana ‘yeƒe ŋutifafa’ mí. (Xlẽ Filipitɔwo 4:​6, 7.) Mawu ƒe ŋutifafa sia nye dziɖeɖi kple dzidzeme si sua ame si ne ele ƒomedodo nyui me kple Yehowa. Ŋutifafa sia “ƒo gɔmesesewo katã ta,” si fia be ale si ŋutifafa sia wɔa dɔe la wɔ nuku ŋutɔ. Ðe wòdzɔ ɖe dziwò be èdo gbe ɖa na Yehowa vevie eye kasia wò dzi dze eme kpɔa? Emae nye “Mawu ƒe ŋutifafa.”

5. Aleke Mawu ƒe ŋutifafa dzɔa míaƒe dzi kple susu ŋu?

⁵ Biblia gblɔ hã be Mawu ƒe ŋutifafa ‘adzɔ míaƒe dziwo kple míaƒe tamesusuwo ŋu.’ Helagbe me nya si gɔme woɖe be ‘woadzɔ nane ŋu’ nye nya si wozãna tsɔ ɖɔa ale si asrafowo dzɔa du aɖe ŋu be wòanɔ dedie. Ne asrafowo le du aɖe ŋu dzɔma, dua me nɔlawo ɖea dzi ɖi eye wosena le wo ɖokui me be yewole dedie. Nenema kee ne Mawu ƒe ŋutifafa dzɔ míaƒe dzi kple tamesusu ŋua, míeɖea dzi ɖi elabe míenya be míele dedie. (Ps. 4:8) Ne míaƒe nɔnɔmea metrɔ enumake abe ale si wònɔ na Hana ene o hã, ŋutifafa aɖe sinu asu mía si. (1 Sam. 1:​16-18) Eye ne míaƒe dzi dze emea, enɔa bɔbɔe na mí be míabu nuwo ŋu nyuie, eye míatso nya me le mɔ nyuitɔ nu.

6. Nu kae wòle be míawɔ be Yehowa nana eƒe ŋutifafa mí? (Kpɔ fotoa hã.)

⁶ Nu si wòle be nàwɔ. Ne nya vɔ̃ aɖe dzɔ ɖe dziwòa, do gbe ɖa vevie na Yehowa va se ɖe esime wòana eƒe ŋutifafa wò. (Luka 11:9; 1 Tes. 5:17) Luis, si ŋu míeƒo nu  tsoe va yi gblɔ ale si eya kple srɔ̃a Ana wɔ te ŋu do dzi esi wova nyae be ɣleti ʋɛ aɖewo koe susɔ na ye be yeaganɔ agbe. Egblɔ be: “Le nɔnɔme sia tɔgbi mea, esesẽ ŋutɔ be ame natso nya me le dɔdamɔnu kple nu vevi bubuwo ŋu. Gake gbedodoɖa kpe ɖe mía ŋu míete ŋu ɖe dzi ɖi le wo katã me.” Luis kple srɔ̃a gblɔ be yewodo gbe ɖa vevie enuenu bia Yehowa be wòana yewoƒe susu nadze akɔ anyi eye yewoate ŋu aɖe dzi ɖi. Wobiae hã be wòana nunya yewo be yewoatso nya me nyuie. Esi wowɔe alea, wokpɔe be Yehowa kpe ɖe yewo ŋu. Ne èle nɔnɔme sesẽ aɖe me toma, nɔ gbedodoɖa dzi eye Yehowa ƒe ŋutifafa adzɔ wò dzi kple susu ŋu.—Rom. 12:12.

YEHOWA ANA NÀNƆ TE SESĨE

7. Ne míele xaxa sesẽ aɖe me tom la, aleke míate ŋu ase le mía ɖokui me?

⁷ Kuxia. Ne míele xaxa sesẽ aɖe me toma, etea ŋu dzɔna be míaƒe seselelãmewo, nuŋububu kple nuwɔnawo trɔna. Míaƒe seselelãmewo tea ŋu nɔna abe tɔdziʋu aɖe si ƒutsotsoewo le nyamam ene. Etea ŋu trɔna kabakaba. Esia tɔgbi dzɔ ɖe Ana, si ŋu míeƒo nu tsoe va yia dzi le srɔ̃a Luis ƒe ku megbe. Seselelãme vovovowo ɖe fu nɛ. Egblɔ be: “Ɣeaɖewoɣia, nu tena ɖe dzinye vevie eye nye nu wɔa nublanui na ɖokuinye. Ɣeaɖewoɣi hã, medoa dziku be megali o.” Tsɔ kpe ɖe eŋua, fifia ele be Ana ŋutɔ natso nya me le nane siwo anye ne Luis ye atso nya me le wo ŋu hafia ŋu. Esia nana wòtsia akogo eye wòtɔtɔna. Ɣeaɖewoɣia, esena le eɖokui me abe ɖe ahomya sesẽ aɖee le ye lɔm ɖe enu ene. Aleke Yehowa kpena ɖe mía ŋu ne seselelãme siawo tɔgbi ɖea fu na mí?

8. Abe ale si wòdze le 1 Petro 5:10 enea, nu kae Yehowa do ŋugbe be yeawɔ na mí?

⁸ Ale si Yehowa kpena ɖe mía ŋu. Yehowa ka ɖe edzi na mí be yeana míanɔ te sesĩe. (Xlẽ 1 Petro 5:10.) Ne ahom tua, enɔa tɔdziʋu nyamam. Be woalé esia nua, wode nane tɔdziʋu geɖe gɔme be wòana tɔdziʋua nanɔ te ɖe ahom nu. Esia wɔnɛ be tɔdziʋua me nɔlawo nɔa dedie wu eye mɔzɔzɔa yina nyuie. Ke hã, nu si wode tɔdziʋua gɔme be wòate ŋu anɔ tea awɔ dɔ nyuie wu ne tɔdziʋua le zɔ ɖem. Le mɔ ma ke nua, Yehowa ana míanɔ te sesĩe le xaxaɣiwo ne míeyi edzi subɔe nuteƒewɔwɔtɔe.

9. Aleke numekuku le míaƒe agbalẽwo me ate ŋu akpe ɖe mía ŋu be míaɖu míaƒe seselelãmewo dzi? (Kpɔ fotoa hã.)

⁹ Nu si wòle be nàwɔ. Ne xaxawo wɔe be  nèse le ɖokuiwò me be nuwo wu tsɔtsɔ na wòa, wɔ tɔwò sinua be nalé ɖoɖo siwo nèwɔ ɖe Yehowa subɔsubɔ ŋua me ɖe asi. Ðewohĩ màte ŋu awɔe abe ale si nèwɔnɛ tsã ene o, gake ɖo ŋku edzi be Yehowa sea nu gɔme na mí. (Tsɔe sɔ kple Luka 21:​1-4.) Di ɣeyiɣi nàwɔ wò ɖokuisinusɔsrɔ̃ eye nàde ŋugble. Nu ka tae esia le vevie? Elabe Yehowa to eƒe habɔbɔa dzi na Ŋɔŋlɔawo me mɔfiamewo mí be woakpe ɖe mía ŋu míanɔ te sesĩe ne míele xaxawo me tom. Àte ŋu adi mɔfiame mawo le JW Library^® dɔwɔnua kple Numekuku Ŋuti Mɔfiagbalẽ Na Yehowa Ðasefowo me. Monika, si ŋu míeƒo nu tsoe va yi gblɔ be ɣesiaɣi si seselelãmewo wu tsɔtsɔ na yea, yekua nu me le míaƒe agbalẽwo me. Le kpɔɖeŋu me, ɣeaɖewoɣia, ekua nu me tso “dziku” ŋu eye ɣebubuɣiwo hã, ekua nu me tso “nuteƒemawɔmawɔ” alo “nuteƒewɔwɔ” ŋu. Eyomea, exlẽa nu siwo ŋu wòke ɖo le eƒe numekukuawo me ʋuu va se ɖe esime eƒe dzi dze eme. Egblɔ be: “Mekpɔnɛ be hafi madze numekuku aɖe gɔmea, nye nuxaxa nu sẽna, gake ne meva le nu siwo ŋu meke ɖo xlẽm la, mesena le ɖokuinye me abe ɖe Yehowa le atuu wɔm nam ene. Esia nana meva dea dzesii hã be Yehowa nya ale si menɔ sesem le ɖokuinye me, eye wòle kpekpem ɖe ŋunye.” Mɔfiame siwo Yehowa nana mí le míaƒe agbalẽwo me ate ŋu akpe ɖe wò hã ŋuwò be nàɖu wò seselelãmewo dzi ale be wò dzi nadze eme.—Ps. 119:​143, 144.

YEHOWA ADO ŊUSẼ WÒ

10. Aleke míesena le mía ɖokui me ne nya vɔ̃ aɖe dzɔ ɖe mía dzi?

¹⁰ Kuxia. Ne nya vɔ̃ aɖe dzɔ ɖe mía dzia, etea ŋu wɔnɛ be nu tea mía ŋu eye míeléa blanui. Míate ŋu ase le mía ɖokui me abe duƒula aɖe si te ŋu ƒua du sesĩe tsã, gake fifia wòva dze afɔku si na wòle tɔtɔm ene. Ðewohĩ nu siwo míete ŋu wɔna bɔbɔe tsã la va zu avu kple kɔ fifia alo míegadina be míawɔ nu siwo doa dzidzɔ na mí o. Eye abe Eliya enea, megadzroa mí be míawɔ naneke gɔ̃ hã o. (1 Fia. 19:​5-7) Nu kae Yehowa do ŋugbe be yeawɔ na mí ne míegbɔdzɔ?

11. Nu kae Yehowa wɔna tsɔ kpena ɖe mía ŋu? (Psalmo 94:18)

¹¹ Ale si Yehowa kpena ɖe mía ŋu. Edo ŋugbe be yealé mí ɖe te eye yeado ŋusẽ  mí. (Xlẽ Psalmo 94:18.) Ale si ko duƒula si dze afɔku hiã kpekpeɖeŋu be wòate ŋu azɔa, nenema kee míawo hã míahiã kpekpeɖeŋu be míagatsɔ dzo ɖe Yehowa subɔsubɔ ŋu ake ne kuxiwo na nu te mía ŋu gɔ̃ hã. Yehowa ka ɖe edzi na mí be yeakpe ɖe mía ŋu. Egblɔ be: “Nye, Yehowa wò Mawu, melé wò nuɖusi ɖe asi, nye ame si le gbɔgblɔm na wò be: ‘Mègavɔ̃ o. Makpe ɖe ŋuwò.’” (Yes. 41:13) Esia tututue wòwɔ na Fia David. Esi futɔwo nɔ eyome tim eye wònɔ xaxawo me tom la, egblɔ na Yehowa be: “Wò nuɖusi léam ɖe te.” (Ps. 18:35) Ke aleke Yehowa léa mí ɖe te?

12. Ne míegbɔdzɔa, ame kawo dzie Yehowa ate ŋu ato akpe ɖe mía ŋu?

¹² Zi geɖea, Yehowa ʋãa amewo be woakpe ɖe mía ŋu eye wòtoa esia dzi léa mí ɖe te. Le kpɔɖeŋu me, gbe ɖeka esi dzi ɖe le David ƒoa, exɔlɔ̃ Yonatan yi egbɔ vae de dzi ƒo nɛ eye wòdo ŋusẽe. (1 Sam. 23:​16, 17) Yehowa to Elisa hã dzi na kpekpeɖeŋu Eliya. (1 Fia. 19:​16, 21; 2 Fia. 2:2) Nenema kee egbea hã, Yehowa ate ŋu ato míaƒe ƒometɔwo, xɔlɔ̃wo alo hamemetsitsiwo dzi akpe ɖe mía ŋu. Gake ne nu te mía ŋua, etea ŋu dzɔna be míeɖea mía ɖokui ɖe aga eye míedina be amewo nate ɖe mía ŋu o. Esia le dzɔdzɔme nu. Ne edzɔ alea, nu kae míawɔ be Yehowa ƒe kpekpeɖeŋu naɖe vi na mí?

13. Nu kae wòle be míawɔ be Yehowa ƒe kpekpeɖeŋu naɖe vi na mí? (Kpɔ fotoa hã.)

¹³ Nu si wòle be nàwɔ. Dze agbagba vevie be nàgaɖe ɖokuiwò ɖe aga o. Elabe ne míeɖe mía ɖokui ɖe agaa, míaƒe susu katã kuna ɖe mía ɖokuiwo kple kuxi siwo me tom míelea ŋu. Esia ate ŋu awɔe be mímatso nya me nyuie o. (Lod. 18:1) Le nyateƒe mea, mí katã míehiã na ɣeyiɣi si míawo ɖeɖe míanɔ afi aɖe abu tame, vevietɔ ne nya vɔ̃ aɖe dzɔ ɖe mía dzi. Ke hã, ne míeɖe mía ɖokui ɖe aga ɣeyiɣi didia, ate ŋu awɔe be kpekpeɖeŋu si Yehowa ato amewo dzi ana mí la nato mía ŋu. Eya ta aleke kee nɔnɔmea ɖasesẽe o, lɔ̃ faa wò ƒomea, xɔlɔ̃wo kple hamemetsitsiwo nakpe ɖe ŋuwò. Nenɔ susu me na wò be Yehowa le wo zãm be yeatsɔ akpe ɖe ŋuwò.—Lod. 17:17; Yes. 32:​1, 2.

YEHOWA AFA AKƆ NA WÒ

14. Nu kawoe ate ŋu ana vɔvɔ̃ naɖo mí?

¹⁴ Kuxia. Nɔnɔme aɖewo ate ŋu awɔe  be vɔvɔ̃ naɖo mí vevie. Mawusubɔla wɔnuteƒe siwo ŋu Biblia ƒo nu tsoe gblɔ ale si futɔwo kple nɔnɔme aɖewo na vɔvɔ̃ ɖo wo eye wotsi dzodzodzoe. (Ps. 18:4; 55:​1, 5) Egbea hã, míaƒe sukuhatiwo, dɔwɔhatiwo, ƒometɔwo alo dziɖuɖua ate ŋu atsi tre ɖe mía ŋu. Ðewohĩ dɔlelé aɖe si le mía ŋu ate ŋu awɔe be míanɔ vɔvɔ̃m be míava ku. Ne edzɔ alea, míate ŋu ase le mía ɖokui me be wɔna vɔ le mía ŋu. Aleke Yehowa kpena ɖe mía ŋu le nɔnɔme siawo me?

15. Le Psalmo 94:19 ƒe nya nua, nu kae Yehowa awɔ na mí?

¹⁵ Ale si Yehowa kpena ɖe mía ŋu. Efaa akɔ na mí eye wònana míekpɔa gbɔdzɔe. Psalmo 94:19 me nyawo he míaƒe susu yi ale si ko ɖevi sue aɖe nanɔ vɔvɔ̃m eye alɔ̃ nabu ɖee ne tsi le dzadzam eye dzi le gbe ɖem sesĩe la dzi. (Xlẽe.) Fofoa ava kɔe ɖe akɔnu va se ɖe esime wòayi alɔ̃ me. Togbɔ be tsia gakpɔtɔ le dzadzam sesĩe hã, esi fofoa le egbɔ taa, ese le eɖokui me be yele dedie. Le mɔ ma ke nua, ne nɔnɔme sesẽ aɖewo wɔe be vɔvɔ̃ ɖo mía, míahiã mía Fofo si le dziƒo be wòakɔ mí ɖe eƒe akɔnu le mɔ sia nu be wòafa akɔ na mí va se ɖe esime nɔnɔmea ka ɖe eme. Ke nu kae míawɔ be Yehowa nafa akɔ na mí?

16. Nu kae míawɔ be Yehowa nafa akɔ na mí? (Kpɔ fotoa hã.)

¹⁶ Nu si wòle be nàwɔ. Nɔ gbe dom ɖa eye nànɔ Biblia xlẽm edziedzi. (Ps. 77:​1, 12-14) Ne èwɔnɛ alea, ke Yehowae anye ame gbãtɔ si ŋu nàte ɖo ne nu te ɖe dziwò. Gblɔ nu si ŋu nètsi dzi ɖo kple nu si tae vɔvɔ̃ ɖo wòa nɛ. Eyome xlẽ Biblia, elabe Yehowa ato edzi afa akɔ na wò. (Ps. 119:28) Biblia ƒe akpa aɖewo li siwo afa akɔ na wò vevie ne vɔvɔ̃ ɖo wò. Le kpɔɖeŋu me, nya fakɔname geɖe le Hiob, Psalmo, kple Lododowo ƒe agbalẽawo me. Àkpɔ ɖewo le Yesu ƒe nya siwo dze le Mateo ta 6 lia hã me. Ne èdo gbe ɖa na Yehowa eye nèxlẽ eƒe Nyaa, àkpɔ akɔfafa.

17. Nu ka dzie míate ŋu aka ɖo?

¹⁷ Míate ŋu aka ɖe edzi be Yehowa akpe ɖe mía ŋu ne nya vɔ̃wo dzɔ ɖe mía dzi. Magblẽ mí ɖi akpɔ gbeɖe o. (Ps. 23:4; 94:14) Yehowa do ŋugbe be yeadzɔ mía ŋu, yeana míanɔ te sesĩe, yeado ŋusẽ mí, eye yeafa akɔ na mí. Yesaya 26:3 gblɔ tso Yehowa ŋu be: “Àkpɔ ame siwo ziɔ ɖe ŋuwò bliboe la ta; àna ŋutifafa si nɔa anyi ɖaa la wo, elabena ŋuwòe woɖo ŋu ɖo.” Eya ta ɖo ŋu ɖe Yehowa ŋu eye nàwɔ nu sia nu si nàte ŋui be wòakpe ɖe ŋuwò. Ne èwɔe alea, ŋusẽ aɖo ŋuwò le ɣeyiɣi sesẽwo gɔ̃ hã me.