Na Wò Dɔme Natrɔ Ðe “Ame Ƒomeviwo Katã” Ŋu
ESI Yesu fia eƒe nusrɔ̃lawo ale si woaɖe gbeƒã nya nyuia la, ena wonya hã be menye ame sia amee axɔ Fiaɖuƒegbedeasia nyuie o. (Luka 10:3, 5, 6) Le míaƒe gbeƒãɖeɖedɔa me la, míado go ame siwo mawɔ nu ɖe mía ŋu nyuie o alo ame siwo ada gbe ɖe mía gbɔ gɔ̃ hã. Le nyateƒe me la, esia ate ŋu ana wòasesẽ na mí be míaƒe dɔme natrɔ ɖe ame siwo míeɖea gbeƒã na la ŋu eye asesẽ be míawɔ nu ɖe wo ŋu dɔmenyotɔe.
Ame si ƒe dɔme trɔna ɖe ame ŋu la dea dzesi amewo ƒe hiahiãwo kple kuxi siwo me tom wole, esea veve ɖe wo nu eye wòdina be yeakpe ɖe wo ŋu. Ke hã, ne míegava le veve sem ɖe ame siwo míedoa goe le míaƒe gbeƒãɖeɖedɔa me la nu ale o la, esia ate ŋu awɔe be dzo si le mía me la anɔ tsitsim eye míaganɔ dzidzedze kpɔm o. Gake ne míeyi edzi tu nɔnɔme si nye dɔmetɔtrɔ ɖo la, ɖeko wòanɔ abe ɖe míele dzo tum ɖo ene—míana dzo si le mía me ɖe gbeƒãɖeɖedɔa ŋu la nu nasẽ ɖe edzi.—1 Tes. 5:19.
Aleke míawɔ atu dɔmetɔtrɔ ɖo ne nɔnɔmea wɔe be esia wɔwɔ le sesẽm na mí gɔ̃ hã? Na míadzro ame etɔ̃ siwo ƒe kpɔɖeŋuwo míate ŋu asrɔ̃ la me—Yehowa, Yesu kple apostolo Paulo.
SRƆ̃ YEHOWA ƑE DƆMETRƆTRƆ
Ƒe akpe geɖee nye esia Yehowa le dzi dom le vlodoame si amewo he va eƒe ŋkɔa dzi la ta. Ke hã, eyia edzi ‘nyoa dɔme na ame madakpewo kple ame vɔ̃ɖiwo.’ (Luka 6:35) Eɖe eƒe dɔmenyo fia le ale si wògbɔ dzi ɖi na amewo katã me. Yehowa ƒe didie nye be woaɖe “ame ƒomeviwo katã.” (1 Tim. 2:3, 4) Togbɔ be Mawu lé fu vɔ̃ɖinyenye hã, edea asixɔxɔ gã amegbetɔwo ŋu eye medi be ame aɖeke nabu eƒe agbe o.—2 Pet. 3:9.
Yehowa nya ale si gbegbe Satana gbã ŋku na dzimaxɔsetɔwoe. (2 Kor. 4:3, 4) Wofia alakpanyawo kple nuwɔna gbegblẽwo ame geɖe tso woƒe ɖevime ke, eye esia na wòsesẽ na wo be woaxɔ nyateƒea. Yehowa le klalo be yeakpe ɖe ame siawo tɔgbi ŋu. Aleke míewɔ nya?
De ŋugble le ale si Yehowa bu blema Niniwetɔwoe ŋu kpɔ. Togbɔ be wonye ŋutasẽnuwɔlawo hã, Yehowa gblɔ na Yona be: “Ðe Niniwe, du gã si me amewo le wu ame akpe alafa ɖeka blaeve, eye womenya nyui kple vɔ̃ o . . . la ƒe nu mavem oa?” (Yona 4:11) Yehowa nyae be Niniwetɔwo menya nyateƒea tso ye ŋu o, eye ede dɔ asi na Yona be wòayi aɖaxlɔ̃ nu wo.
Míawo hã míedea asixɔxɔ amewo ŋu abe ale si Yehowa wɔnɛ ene. Míate ŋu asrɔ̃ eyama ne míedzea agbagba kpena ɖe amewo ŋu, nenye be edze abe womaxɔ nyateƒea o ene gɔ̃ hã.
SRƆ̃ YESU ƑE DƆMETƆTRƆ
Abe ale si Yehowa wɔe ene la, Yesu hã kpɔ nublanui na ame siwo dɔ nɔ wuwum le gbɔgbɔ me. Biblia gblɔ be: “Esi wòkpɔ amehawo la, woƒe nu wɔ nublanui nɛ, elabena wowɔ fu wo, eye wotsi yame abe alẽ siwo nu kplɔla mele o la ene.” (Mat. 9:36) Yesu de dzesi nu si tae wonɔ nɔnɔme ma me ɖo; ede dzesii be subɔsubɔhakplɔlawo fia alakpanufiafiawo ame siwo nɔ to ɖom yeƒe nyawo, eye wowɔ ŋlɔmi le wo ŋu. Togbɔ be Yesu nyae be ame geɖe aɖe mɔ kplamatsɛdonuwo nawɔe be womaxɔ nya nyuia o hã, eyi edzi ‘fia nu geɖe wo.’—Marko 4:1-9.
Ne ame aɖe mexɔ gbedeasia nyuie le gɔmedzedzea me o la, dzi megaɖe le ƒowò o
Ale si ko nɔnɔmewo trɔna le amewo ƒe agbe me la, nenema kee ale si wowɔa nu ɖe nyateƒea ŋui hã ate ŋu atrɔ
Ne amewo mexɔ míaƒe gbedeasia ŋu nyuie o la, ele be míabu nuwo ŋu ayi ŋgɔe wu nɔnɔme si ameawo ɖe fia eye míadi be míanya nu si tae wowɔ nu nenema ɖo. Ðewohĩ susu manyomanyowo le ame aɖewo si ɖe Biblia alo Kristotɔnyenye ŋu le nu tovo siwo ame siwo yɔa wo ɖokuiwo be Kristotɔwo la wɔ ta. Ðewohĩ, amewo gblɔ alakpanyawo tso míaƒe dzixɔsewo ŋu na wo dometɔ aɖewo. Eye le wo dometɔ aɖewo gome la, ɖewohĩ woƒe ƒometɔwo alo nutoa me tɔwo agbe nu le wo gbɔ ne woxɔ mí nyuie.
Anɔ eme be ame siwo míedoa goe le gbeƒãɖeɖedɔa me la dometɔ aɖewo mexɔa mí nyuie o, le esi woto nɔnɔme sesẽ siwo gblẽ nu le wo ŋu vevie la me ta. Nɔvinyɔnu dutanyanyuigblɔla aɖe si ŋkɔe nye Kim gblɔ be: “Le míaƒe anyigbamamaa ƒe akpa aɖe la, ame siwo le afi ma la dometɔ geɖe nye ame siwo ŋu aʋawɔwɔ gblẽ nu le eye wobu woƒe nunɔamesiwo katã. Etsɔmemɔkpɔkpɔ aɖeke mele wo si o. Dzi ɖe le wo ƒo eye womegakana ɖe ame aɖeke dzi o. Le nuto sia me la, míedoa go ame siwo tsia tsitre ɖe míaƒe gbedeasia ŋu la enuenu. Gbe ɖeka esi menɔ gbeƒã ɖem la, wodo asi ɖe gbɔnye.”
Aleke Kim wɔ be eƒe dɔme gatrɔna ɖe amewo ŋu kokoko togbɔ be wowɔ nu ɖe eŋu alea hã? Egblɔ be: “Ne amewo mewɔ nu ɖe ŋunye nyuie o la, medzea agbagba tsɔa nye susu ɖoa Lododowo 19:11 me nyawo dzi. Afi ma gblɔ be: ‘Ame si sea nu gɔme nyuie la, medoa dziku kabakaba o.’ Ŋkuɖoɖo nu siwo me míaƒe anyigbamamaa me tɔwo to dzi kpena ɖe ŋunye nye dɔme trɔna ɖe wo ŋu. Eye menye ame sia ame si míedo goe lae wɔa nu ɖe mía ŋu nenema o. Le nuto ma ke me la, míewɔa tɔtrɔyi nyui aɖewo.”
Míate ŋu abia mía ɖokuiwo be, ‘Ne nyee le nɔnɔme si me ame siwo míeɖea gbeƒã na le la me la, aleke mawɔ nu ɖe Fiaɖuƒegbedeasia ŋu?’ Le kpɔɖeŋu me, aleke mawɔ nui ne amewo gblɔa alakpanyawo tso Yehowa Ðasefowo ŋu nam enuenu? Ne ɖe míele nɔnɔme siawo tɔgbi me la, anɔ eme be míawo hã míaxɔ gbedeasia nyuie o, eye ahiã be gbeƒãɖelawo ƒe dɔme natrɔ ɖe mía ŋu. Ne míeɖoa ŋku se si Yesu de be ale si míedina be amewo nawɔ nu ɖe mía ŋu la míawo hã míawɔ nenema ke na wo dzi la, esia ʋãa mí be míawɔ nu ɖe amewo ŋu veveseɖeamenutɔe nenye be esesẽ na mí gɔ̃ hã.—Mat. 7:12.
SRƆ̃ PAULO ƑE DƆMETƆTRƆ
Apostolo Paulo ƒe dɔme trɔ ɖe ame siwo tsi tsitre ɖe eŋu hewɔ ŋutasẽnu ɖe eŋu la gɔ̃ hã ŋu. Nu ka tae? Meŋlɔ ame si ƒomevi eya ŋutɔ nye tsã la be o. Egblɔ be: “Tsã la, menye busunyagblɔla kple yometila kpakple ame mabuame hã. Gake wokpɔ nublanui nam, elabena mewɔe le manyamanya me kple dzimaxɔse me.” (1 Tim. 1:13) Ede dzesii be Yehowa kple Yesu kpɔ nublanui na ye ale gbegbe. Edze ƒãa be ekpɔe be ye ŋutɔ hã yewɔ nu abe ame siwo yeɖea gbeƒã na la dometɔ aɖewo ene kpɔ.
Ɣeaɖewoɣi la, Paulo do go ame siwo me alakpanufiafiawo ƒo ke ɖe to sesĩe le. Aleke wòwɔ nui? Dɔwɔwɔwo 17:16 gblɔ be esime Paulo nɔ Atene la, “ekpɔ be dua me yɔ fũu kple legbawo, eye esia te ɖe eƒe gbɔgbɔ dzi.” Ke hã, Paulo zã nu si tututu te ɖe edzi la tsɔ ɖi ɖase nyui aɖe na dua me tɔwo. (Dɔw. 17:22, 23) Etrɔa asi le eƒe nufiafiamɔnuwo ŋu be woasɔ ɖe ame ƒomevi vovovo siwo wòdoa goe la ƒe nɔnɔmewo nu kple susu be ‘yeate ŋu aɖe wo dometɔ aɖewo kokoko.’—1 Kor. 9:20-23.
Ne míele gbeƒã ɖem na ame siwo mewɔa nu ɖe nyateƒea ŋu nyuie o alo ame siwo xɔ alakpanufiafiawo dzi se la, míate ŋu awɔ nu abe ale si Paulo wɔe ene. Míate ŋu azã nu si míenya tso wo ŋu atsɔ akpe ɖe wo ŋu be woasrɔ̃ “nu si nyo wu ŋuti nya nyui” la. (Yes. 52:7) Nɔvinyɔnu aɖe si ŋkɔe nye Dorothy gblɔ be: “Le míaƒe anyigbamama me la, wofia nu ame geɖe be Mawu ƒe nya me sẽ eye edia vodada le ame ŋu. Mekafua wo ɖe woƒe Mawu dzi xɔse ta eye mehea woƒe susu yia nya si Biblia gblɔ tso Yehowa ƒe nɔnɔme nyoameŋuawo ŋu kple ŋugbe siwo wòdo ku ɖe etsɔme ŋu la dzi.”
“YI EDZI NÀTSƆ NU NYUI ANƆ NU VƆ̃ÐI DZI ÐUM”
Esi ‘ŋkeke mamlɛ’ siawo ƒe nuwuwu le aƒe tum la, ele be míakpɔ mɔ be ame siwo míeɖea gbeƒã na la dometɔ aɖewo ƒe nɔnɔme “anɔ vɔɖivɔ̃ɖim ɖe edzi.” (2 Tim. 3:1, 13) Gake mele be míaɖe mɔ woƒe nuwɔna nawɔe be míaƒe dɔme magatrɔ ɖe amewo ŋu o alo míagakpɔ dzidzɔ le gbeƒãɖeɖedɔa me o. Yehowa ate ŋu ana ŋusẽ si míehiã be ‘míayi edzi atsɔ nu nyui anɔ nu vɔ̃ɖi dzi ɖum’ la mí. (Rom. 12:21) Nɔvinyɔnu mɔɖela aɖe si ŋkɔe nye Jessica la gblɔ be: “Zi geɖe la, medoa go ame siwo nye dadalawo eye womebua mí alo míaƒe gbedeasia ɖe nemi me o. Esia kua dzi nam ɣeaɖewoɣi. Eya ta, ne medze dzeɖoɖo gɔme kple ame aɖe la, medoa gbe ɖa le susu me hebiaa Yehowa be wòakpe ɖe ŋunye mabu amea abe ale si wòbunɛ ene. Esia ɖea nye susu ɖa le nye seselelãmewo dzi eye wònana mebua ale si mate ŋu akpe ɖe amea ŋu boŋ ŋuti.”
Míeyia edzi dia ame siwo si dzi ƒe nɔnɔme nyui le hena agbe mavɔ kpɔkpɔ
Ame aɖewo wɔa nu ɖe mía ŋu nyuie ne míedzea agbagba be míakpe ɖe wo ŋu dzigbɔɖitɔe
Ele be míabu ale si míade dzi ƒo na nɔvi siwo míele gbeƒã ɖem kplii la hã ŋu. Jessica gblɔ be: “Ne amewo mewɔ nu ɖe mía dometɔ aɖe ŋu nyuie o la, medzea agbagba be mana míaɖe susu ɖa le nu si dzɔ la ŋu. Nu si mewɔnae nye be, metrɔa dzeɖoɖoa wòkuna ɖe nya tuameɖowo, abe nu nyui siwo dona tsoa míaƒe gbeƒãɖeɖedɔa me togbɔ be ame aɖewo mewɔa nu ɖe mía ŋu nyuie o hã boŋ ŋu.”
Yehowa nya kuxi siwo míedoa goe le gbeƒãɖeɖedɔa me la nyuie. Aleke gbegbe wòkpɔa dzidzɔe nye esi ne ekpɔe be míesrɔ̃ yeƒe nublanuikpɔkpɔ! (Luka 6:36) Ele eme be Yehowa ƒe dɔme matrɔ ɖe amewo ŋu ɖaa o. Míate ŋu aka ɖe edzi be enya ɣeyiɣi nyuitɔ si dzi wòahe nuɖoanyi sia ava nuwuwui. Gake hafi ɣemaɣi naɖo la, míaƒe gbeƒãɖeɖedɔa hiã kpata. (2 Tim. 4:2) Eya ta mina mí katã míayi edzi awɔ dɔ si Mawu de mía si la dzonɔamemetɔe eye míaƒe dɔme natrɔ ɖe “ame ƒomeviwo katã” ŋu.
