Tɔnye nye nutoa me sɔlemeha aɖe ƒe hamemegã, ta kwasiɖa ɖe sia ɖea, ekplɔa nye kple nɔvinyenyɔnua yia sɔleme. Gbãa, ekplɔa mí yia ɖeviwo ƒe Kwasiɖagbe sukua eye ne sukua kpaa, míeyia sɔlemea ŋutɔ ga 11. Le ŋdɔ mea, míekplɔa mía nɔ hã ɖo yia Fiaɖuƒe Akpata me. Esia na wònɔ bɔbɔe na mí be míakpɔ vovototo si le subɔsubɔha eveawo dome.

Mía nɔ ƒoa nu tso eƒe dzixɔse yeyea ŋu na exɔ̃lɔ Bob kple Marion Hutcheson, si wɔe be woawo hã va xɔ nyateƒea. Le ƒe 1958 mea, Hutcheson ƒomea kplɔ nye kple wo viŋutsu etɔ̃awo míede Mawu ƒe Lɔlɔ̃nu Dukɔwo Dome Takpekpe si wowɔ ŋkeke enyi le New York dugãa me. Egbea, meva de dzesi agbagba si gbegbe wodze ɣemaɣi hafi kplɔm yi takpekpea. Takpekpe ma nye nu siwo nyemaŋlɔ be le nye agbe me oa dometɔ ɖeka.

Le nye ƒewuiwo mea, míenɔ agblekɔƒe aɖe nɔ lãwo nyim. Dɔ sia wɔwɔ dzɔa dzi nam ŋutɔ, ta edzroam vevie be mazu lãwo ƒe ɖɔkta. Nɔnye gblɔe na hamemetsitsi aɖe. Hamemetsitsia ɖo ŋku edzi nam lɔlɔ̃tɔe be míele “ŋkeke mamlɛwo me,” eye wòna mede ŋugble le ale si yunivɛsiti dede ƒe geɖe akpɔ ŋusẽ ɖe nye kple Yehowa dome ƒomedodoa dzia ŋu. (2 Tim. 3:1) Esia na meva tso nya me be nyemagade yunivɛsiti o.

 Gake medea ŋugble le nu si mawɔ ne medo le sekɛndrisuku (lycée) ŋu. Togbɔ be medea gbeadzi kwasiɖa nuwuwu ɖe sia ɖe hãa, nyemesea vivi na gbeadzisubɔsubɔdɔa o, eye nyemeka ɖe edzi be mate ŋu awɔ mɔɖeɖedɔa o. Ɣemaɣi tututua, tɔnye kple tɔnyeɖia, siwo menye Ðasefowo o nɔ dzi dem ƒo nam be mava wɔ dɔ le dɔwɔƒe gã aɖe le Toronto. Esi tɔnyeɖia hã nye amegã le afi ma taa, melɔ̃.

Esi menɔ Toronto la, meva nɔ ɣeyiɣi geɖe zãm ɖe dɔa ŋu eye medea ha kple ame siwo menye Ðasefowo o, si wɔe be nyemegatea ŋu dea kpekpeawo kple gbeadzi edziedzi o. Gbãa, tɔgbuinye si menye Ðasefo o gbɔe menɔ, gake esi wòkua, eva hiã be madi teƒe bubu.

Hutcheson ƒomea, si kplɔm yi takpekpe le ƒe 1958 mea, tsɔm abe wo vi ene. Wona meva nɔ wo gbɔ eye wokpe ɖe ŋunye nye kple Yehowa dome gava nyo ɖe edzi. Le ƒe 1960 mea, nye kple wo viŋutsu John míexɔ nyɔnyrɔ. John va zu mɔɖela eye esia ʋãm be nye hã mawɔ geɖe le gbeƒãɖeɖedɔa me. Nɔviŋutsu tsitsiawo de dzesi nye agbagbadzedzewo, ta wotiam be manye Teokrasi Subɔsubɔ Sukua dzikpɔla. a

Le ƒe 1966 mea, meɖe Nɔvinyɔnu Randi Berge, si nye mɔɖela dovevienu, si dina vevie be yeasubɔ le afi si hiahiã geɖe le. Dzikpɔla mɔzɔla si nɔ mía gbɔa tsɔ ɖe le eme na mí eye wòde dzi ƒo na mí be míava kpe ɖe hame si le Orillia, Ontario ŋu. Ta míeʋu enumake.

Esi míeva ɖo Orillia tetia, nye hã meva zu mɔɖela. Dzo si nɔ srɔ̃nye Randi mea kpɔ ŋusẽ ɖe dzinye ale gbegbe! Esi meva tsɔ dzo ɖe mɔɖeɖedɔa ŋua, meva bi ɖe Biblia zazã me eye mete ŋu fiaa nyateƒea amewo wòɖoa woƒe dzi gbɔ. Esia na dzi dzɔam ŋutɔ. Yayra gã aɖee wònye be míete ŋu kpe ɖe atsu kple asi aɖe si le Orillia ŋu be wowɔ tɔtrɔwo le woƒe agbe me, eye wova zu Yehowa subɔlawo.

Gbe ɖeka míeɖi tsa yi Toronto, eye míedo go Arnold MacNamara, si nye nɔviŋutsu siwo nɔ ŋgɔ xɔm le Betel la dometɔ ɖeka. Ebiam be míadi be míanye mɔɖela veviwo hã. Meɖo ŋu enumake be, “Míedii! Gake menye le Quebec o!” Susu totro si nɔ Canada-Eŋlisigbedolawo si ɖe Fransegbedolawo ŋu le Quebec nutoa mea, kpɔ ŋusẽ ɖe dzinye. Ɣemaɣi hã, dunyaheha aɖe di be Quebec nutoa nama ɖa tso Canada ŋu.

Nɔviŋutsu Arnold ɖo eŋu be, “Quebec koe alɔdzedɔwɔƒea le mɔɖela veviwo ɖom ɖo fifia.” Eya ta melɔ̃ enumake be míayi elabe menya be srɔ̃nye Randi ya di xoxo be yeasubɔ le afi ma. Emegbea, meva kpɔe be míetso nya me nyuie ŋutɔ!

Esi nye kple srɔ̃nye Randi míesrɔ̃ Fransegbea kwasiɖa atɔ̃ megbea, mía kple atsu kple asi bubu míezɔ mɔ kilometa 540 kple edzivɔ yi Rimouski, si le Montreal ƒe dzieheɣedzeƒe. Le kpekpe aɖe si míede le afi ma mea, wona mexlẽ gbeƒãɖeɖewo. Ale si mexlẽe na wòdze ƒãa be nu geɖe li wòle be míasrɔ̃. Nu si dzɔe ye nye be, le esi teƒe be magblɔ be le takpekpe si gbɔna mea, míele mɔ kpɔm na “vavala geɖe tso Austria la,” nu si megblɔ boŋue nye be míele mɔ kpɔm na “vavala siwo nye xewo.”

Nɔviŋutsu Huberdeaus kple srɔ̃a kpakple wo vinyɔnu eveawo, kple nɔvinyɔnu veviedola siwo nye trewo, va wɔ ɖeka kpli mí le Rimouski. Huberdeaus ƒomea nɔ aƒe gã aɖe si wohaya, si me xɔdɔme adre lea me, eye woɖe mɔ mɔɖelawo va nɔ aƒea me kpli wo. Mɔɖelaawo dzɔa ga tsɔ kpea asi ɖe xɔfetua xexe ŋu. Míeyɔ aƒea be Fiasã Ɣi elabe wosi aŋɔ ɣi nɛ. Zi geɖea, ame 12 alo 14 ye nɔa aƒea me. Esi nye kple Randi míenye mɔɖela veviwo taa, míeyia gbeadzi ŋdi, ŋdɔ, kple fiẽ, eya ta edzɔa na mí be amewo li azɔ kpli mí le gbeadzi le fiẽsiwo me, le vuvɔŋɔliwo kura gɔ̃ hã.

Mía kple mɔɖela wɔnuteƒe mawo va nɔ abe ƒome ene. Ɣeaɖewoɣia, míeƒua dzo le gota, eye ɣeaɖewoɣi hãa, “míeɖaa nu ɖekae.” Nɔviŋutsuawo dometɔ ɖeka nya haƒoƒo, ta le Memleɖa fiẽwoa, míedzia ha ɖua ɣe.

Míekpe ɖe ame geɖe ŋu woxɔ nyateƒea le Rimouski. Kaka ƒe atɔ̃ nava yia, ame geɖe si míenɔ Biblia srɔ̃m kplia yi ŋgɔ va xɔ nyɔnyrɔ, eye gbeƒãɖela siwo nɔ hamea mea dzi ɖe edzi va ɖo 35.

Míexɔ hehe geɖe le nya nyui gbɔgblɔ dɔa me le Quebec. Míekpɔe be Yehowa kpe ɖe mía ŋu le gbeƒãɖeɖedɔa me eye wòkpɔ míaƒe nuhiahiãwo gbɔ. Míeva lɔ̃ Fransegbedolawo kple woƒe dekɔnuwo hã, eye esia na wònɔ bɔbɔe na mí be míalɔ̃ ame ƒomevi vovovowo.—2 Kor. 6:13.

Míexɔ agbalẽ aɖe le vo me tso alɔdzedɔwɔƒea. Wobia tso mía si be míaʋu ayi Tracadie, si le New Brunswick ƒe ɣedzeƒe ƒuta godzi. Esia ɖe fu na mí vie elabe míede asi agbalẽ te be míahaya xɔ aɖe teti koe nye ema, eye mekpɔ ɣeyiɣi aɖe ƒe nufiafiadɔ le suku aɖe. Míaƒe Biblia nusrɔ̃vi aɖewo hã zu gbeƒãɖelawo teti koe nye ema, eye míenɔ Fiaɖuƒe Akpata hã tum.

Míedo gbe ɖa tso nyaa ŋu kwasiɖa nuwuwu bliboa, eye míeɖi tsa yi Tracadie dua me. Míekpɔe be afi ma to vovo vie na Rimouski. Gake esi Yehowa di be míayi afi ma taa, míeɖoe be míayi. Míetsɔ esia do Yehowa kpɔ, eye míekpɔe be eɖe mɔxenu ɖe sia ɖe ɖa le ŋgɔ na mí. (Mal. 3:10)  Abe ale si wònɔna ɖaa enea, srɔ̃nye Randi lɔ̃ Yehowa vevie, elɔ̃na faa tsɔa eɖokui saa vɔ, eye wòdoa nukokoe na ame, ta ena wònɔ bɔbɔe na mí be míaʋu.

Esi míeva ɖo afi maa, Nɔviŋutsu Robert Ross koe nye hamemetsitsi si nɔ hamea me. Eya kple srɔ̃a Linda nye mɔɖelawo, eye esi wodzi wo vi gbãtɔa, wotiae be yewoakpɔtɔ anɔ afi ma. Togbɔ be vi nɔ wo si hãa, ale si woxɔ mí alɔ eve eye wodoa vevie nu le gbeƒãɖeɖedɔa me de dzi ƒo na mí ŋutɔ.

Esi míesubɔ le Tracadie hena ƒe evea, míegaxɔ dɔdeasi yeye si míenɔ mɔ kpɔm na kura o. Wokpe mí be míava wɔ dzikpɔla mɔzɔla ƒe dɔa. Míesubɔ Eŋlisigbe nutome suewo ƒe adre, eye emegbe wona míesubɔ Fransegbe nutome sue aɖe le Quebec. Nɔviŋutsu Léonce Crépeault, si nye nutome gã dzikpɔla le Quebec, kafuam ne meƒo nye nuƒowo vɔ. Gake emegbe ebianam be, “Aleke nàgate ŋu atrɔ asi le wo ŋu be woagaɖe vi na nɔviawo geɖe wu?” b Ale si wòtsɔ ɖe le eme nam wɔe be nye nufiafia ganyo ɖe edzi eye egɔme nya sena bɔbɔe.

Dɔdeasi si nyemaŋlɔ̃ be o ye nye esi mewɔ le “Aʋadziɖuɖu ƒe Xɔse” Dukɔwo Dome Takpekpe si wowɔ le ƒe 1978 me le Montreal. Mewɔ dɔ le Nuɖuɖu Dzikpɔƒea. Míenɔ mɔ kpɔm na ame 80,000, eye habɔbɔa wɔ nuɖuɖu ƒe ɖoɖo yeye aɖe ɣemaɣi. Nu sia nu trɔ: nuɖanuawo, nu si míaɖa, kple ale si míaɖae siaa. Wona nufamɔ̃ 20 siwo me míade nuɖuɖuwoe la mí, gake ɣeaɖewoɣia, womewɔa dɔ nyuie o. Ŋkeke si do ŋgɔ na takpekpea, mímete ŋu ge ɖe takpekpewɔƒea o va se ɖe zãtsiƒe ke, elabe wonɔ kamedefefe aɖe wɔm le teƒea, evɔ ele be míaɖo nuwo ɖe ɖoɖo nu, ado dzo adze ŋdinu ɖaɖa hafi ŋu nake! Ðeɖi tea mía ŋu belibeli, gake mesrɔ̃ nu geɖe tso nɔvi siwo mewɔ dɔ kplii la gbɔ. Wonye dɔ sesẽ wɔlawo, wolɔ̃ Yehowa, eye wowɔ dɔ kple dzidzɔ. Míewɔ nuwo ɖekae si na míezu xɔlɔ̃wo va se ɖe egbe. Enye dzidzɔ na mí be míenɔ eme wowɔ takpekpe ɖedzesi sia le Quebec, afi si tututu woti mía nɔviwo yome vevie le, le ƒe 1940-awo kple 1950-awo me!

Mesrɔ̃ nu geɖe tso dɔdzikpɔla bubuwo gbɔ le takpekpe gã siwo míewɔ le Montreal me. Edzɔ kpɔ be le ƒe aɖe mea, David Splane, si nye  Dɔdzikpɔha me tɔ fifiae, kpɔ takpekpea dzi. Ɣebubuɣia, wode dɔ asi nam be makpɔ takpekpea dzi, eye David lɔ̃ faa kpe ɖe ŋunye.

Esi nye kple Randi míewɔ dzikpɔla mɔzɔla dɔa ƒe 36 vɔ megbe le ƒe 2011 mea, wokpem be mava fia nu le Hamemetsitsiwo Ƒe Suku. Le ƒe eve mea, nye kple Randi míemlɔ xɔ vovovo 75 sɔŋ me, gake dɔ siwo míewɔa ɖe vi geɖe. Kwasiɖa ɖe sia ɖe ƒe nuwuwua, hamemetsitsiawo daa akpe ɖe sukua ta, elabe wokpɔe be Dɔdzikpɔhaa tsɔ ɖe le eme na yewo.

Emegbe mɔnukpɔkpɔ su asinye mefia nu le Fiaɖuƒe Nyanyuigblɔlawo Ƒe Suku. Zi geɖea, nu tea sukuviawo ŋu eye wosena le wo ɖokui me be ewu tsɔtsɔ na yewo, elabe wonɔa suku gaƒoƒo adre gbe sia gbe, wozãa gaƒoƒo etɔ̃ tsɔ wɔa woƒe sukudɔdeasiwo fiẽ sia fiẽ, eye wowɔa dɔdeasi ene alo atɔ̃ le sukua kwasiɖa ɖe sia ɖe. Nye kple nufiala kemɛa míena eme kɔ na wo be womate ŋu awɔ nu siawo katã ne Yehowa mekpe ɖe wo ŋu o. Ewɔ nuku na sukuviawo ŋutɔ esi wova kpɔ ale si ŋuɖoɖo ɖe Yehowa ŋu kpe ɖe wo ŋu wowɔ geɖe wu ale si wosusu be yewoate ŋui. Megaɖoa ŋku ale si wòwɔ nuku na woea dzi va se ɖe egbe.

Ale si nɔnye tsɔa ɖe le eme na amewo na be eƒe Biblia nusrɔ̃viwo yi ŋgɔ le Yehowa subɔsubɔ me, eye esia wɔe be susu nyui va su tɔnye hã si ɖe nyateƒea ŋu. Le kpɔɖeŋu me, ŋkeke etɔ̃ le nɔnye ƒe ku megbea, ewɔ nuku na mí be tɔnye va se nuƒo le Fiaɖuƒe Akpata me, eye wòyi edzi de kpekpea hena ƒe 26 sɔŋ. Togbɔ be tɔnye mexɔ nyɔnyrɔ o hãa, hamemetsitsiwo na menya be eyae nyea ame gbãtɔ si vaa kpekpeawo kwasiɖa ɖe sia ɖe.

Kpɔɖeŋu nyui si nɔnye ɖoa kpɔ ŋusẽ nyui ɖe nye kple nɔvinyenyɔnuawo hã dzi. Wo ame etɔ̃a katã kple wo srɔ̃wo le Yehowa subɔm nuteƒewɔwɔtɔe. Wo dometɔ eve le dɔ wɔm le Betel; ɖeka le Portugal, eye evelia le Haiti.

Fifia nye kple Randi míenye mɔɖela veviwo le Hamilton, le Ontario. Esi míenɔ dzikpɔla mɔzɔla dɔa wɔmaa, edzɔa dzi na mí be mí kple nɔviwo míawɔ tɔtrɔyiwo eye míayi woƒe Biblia nusrɔ̃viwo gbɔ. Gake fifia, enye dzidzɔ na mí be míele kpekpem ɖe mía ŋutɔwo míaƒe Biblia nusrɔ̃viwo ŋu be woava lɔ̃ Yehowa. Míeva dze xɔlɔ̃ nɔviwo le míaƒe hame yeyea me, eye ale si Yehowa kpena ɖe wo ŋu le ɣeyiɣi deamedziwo kple ɣeyiɣi sesẽwo siaa mea, dea dzi ƒo na mí ŋutɔ.

Ale si ame geɖe tsɔ ɖe le eme na mí la dzea mía ŋu ŋutɔ! Le esia ta, míawo hã míedzea agbagba be ‘míatsɔ ɖe le eme na amewo vevie,’ eye míade dzi ƒo na wo be woawɔ woƒe ŋutete katã le Yehowa subɔsubɔ me. (2 Kor. 7:6, 7) Le kpɔɖeŋu me, le ƒome aɖe mea, srɔ̃nyɔnua kple wo vi eve nɔ gbesiagbe mɔɖeɖedɔa wɔm. Ta mebia srɔ̃ŋutsua be, ‘Àdi be yeawɔ mɔɖeɖedɔa?’ Egblɔ be, ‘mele mɔɖela etɔ̃ sɔŋ dzi kpɔm.’ Eya ta mebiae be, “Ðe nàte ŋu akpɔ wo dzi wu ale si Yehowa awɔea?” Eye mede dzi ƒo nɛ be wòawɔ mɔɖeɖedɔa ne eya hã nakpɔ dzidzɔ si kpɔm wole. Ɣleti ade megbea, eya hã va zu mɔɖela.

Nye kple Randi míayi edzi aɖe gbeƒã Yehowa ƒe “nukudɔwo” na “dzidzime si gbɔna,” eye míeka ɖe edzi bliboe be woakpɔ dzidzɔ le Yehowa subɔsubɔ me, abe míawo ke ene.—Ps. 71:17, 18.