Wodzim le May 19, 1940 me, le du si nye Amioûn me, le Lebanon. Ƒe ʋɛ aɖewo megbe la, míaƒe ƒomea ʋu yi Tripoli dugãa me, afi si metsi le. Míaƒe ƒomea lɔ̃ Yehowa Mawu eye nuwo nɔ edzi yim nyuie. Mí ame atɔ̃e wodzi; nyɔnuvi etɔ̃ kple ŋutsuvi eve, eye nyee nye ɖevitɔ. Gadidi menye nu vevitɔ na dzinyelawo o. Nu si nɔ vevie na míaƒe ƒomeae nye Biblia sɔsrɔ̃, kpekpewo dede, kple ale si míakpe ɖe amewo ŋu woanya Mawu.

Kristotɔ amesiamina geɖe nɔ míaƒe hamea me. Wo dometɔ ɖeka ŋkɔe nye Michel Aboud si kpɔa hamea ƒe Biblia nusɔsrɔ̃ dzi ɣemaɣi. Esrɔ̃ nyateƒea le New York, eye eyae nye ame gbãtɔ si dze gbeƒãɖeɖe le Lebanon le ƒe 1920-awo me. Meɖo ŋku ale si wòdea bubu Anne kple Gwen Beavor, siwo de Gilead Sukua ŋu eye wòkpe ɖe wo ŋu la dzi. Wova zu mía xɔlɔ̃ veviwo. Ƒe geɖe megbea, dzi dzɔm ŋutɔ esi meva do go Anne le Amerika. Ɣeyiɣi aɖe megbea, meva do go Gwen hã, si ɖe Wilfred Gooch eye wonɔ subɔsubɔm le Betel le London, England.

Esi menye sɔhɛa, gbeƒãɖela ʋɛ aɖewo koe nɔ Lebanon. Gake míeƒoa nu tso nu  siwo míenya le Biblia me la ŋu na amewo dzonɔamemetɔe. Togbɔ be subɔsubɔhakplɔlawo tsi tsitre ɖe mía ŋu hãa, míena ta o. Megaɖoa ŋku nanewo siwo dzɔ va yia dzi.

Gbe ɖekaa, nye kple nɔvinyenyɔnu Sana, míenɔ gbeƒã ɖem le dziƒoxɔ aɖe dzi. Zi ɖeka koa, osɔfo aɖe va do ɖe mía dzi. Ame aɖee anya yɔe. Osɔfoa te nɔvinyea dzudzu. Edo dziku ale gbegbe be etutu Sana tso atrakpuia dzi eye nu vevi wɔe. Ame aɖe ƒo ka na poliswo wova kpɔ nu si dzɔ la, eye wona ame aɖe kpe ɖe Sana ŋu. Wokplɔ osɔfoa yi poliswo ƒe dɔwɔƒea, eye wokpɔe be tu nɔ eŋu. Polis-megãa biae be: “Ame ka ŋutɔe nènye? Osɔfoe nènye loo alo nu vlo wɔla?”

Nu bubu aɖe si dzi megaɖoa ŋkui ye nye esime míaƒe hamea da ʋu be míavae ɖe gbeƒã le nuto saɖeaga aɖe me. Míenɔ gbeƒã ɖem nyuie, gake zi ɖeka koa, osɔfo aɖe ƒo ameha aɖewo nu ƒu ɖe mía ŋu. Wodo ŋɔdzi na mí nɔ kpewo dam mí gɔ̃ hã, eye nu vevi wɔ tɔnye. Meɖo ŋku edzi be ʋu gbã bla eƒe mo katã. Nɔnye kplɔ tɔnye ɖo ta ʋua gbɔ eye míawo hã míetsi dzi dze wo yome. Nyemaŋlɔ nya si nɔnye gblɔ esime wònɔ ʋua tutum le mo na tɔnye be o. Egblɔ be: “Yehowa, meɖe kuku tsɔe ke wo. Womenya nu si wɔm wole o.”

Ɣebubuɣi la, míevae srã míaƒe ƒometɔwo kpɔ le mía de. Bisiɔp aɖe va tɔgbuinye gbɔ le aƒea me. Bisiɔp la nya nyuie be Yehowa Ðasefowoe dzinyelawo nye. Togbɔ be ƒe ade vi koe menye ɣemaɣi hãa, eyɔm biam be, “Kpɔ ɖa wòe, nu ka tae womenyrɔ wò o?” Meɖo eŋu be nyemetsi o eye ehiã be maganya nu geɖe le Biblia me be xɔse sẽŋu nanɔ asinye hafi maxɔ nyɔnyrɔ. Ale si meɖo nyaa ŋu nɛ la medzɔ dzi nɛ o, eya ta egblɔ na tɔgbuinye be menye vi mabuame.

Nu siwo me metoa dometɔ aɖewoe nye emawo. Lebanontɔwo lɔ̃a ame eye wowɔa amedzro. Eya ta, míesrɔ̃a Biblia kple wo dometɔ geɖe, eye míesea vivi na nusɔsrɔ̃awo.

Esime menɔ suku dem la, nɔviŋutsu sɔhɛ aɖe si tso Venezuela ɖi tsa va Lebanon. Evaa míaƒe kpekpewo eye wòva dze xɔ̃ nɔvinyenyɔnu Wafa. Ɣeyiɣi aɖe megbe la, woɖe srɔ̃ eye woyi Venezuela. Wafa ŋlɔa lɛta na mí enuenu, eye wògblɔna na tɔnye be mí katã míaʋu ava Venezuela, elabe ele mía susum ŋutɔ. Mlɔeba la, ƒomea katã ʋu yi Venezuela.

Míeʋu yi Venezuela le ƒe 1953 me, eye míenɔ Caracas. Afi si míenɔa medidi tso dukplɔla ƒe aƒe gbɔ o. Esi menye ɖevi taa, ne mekpɔ dukplɔla wòle eƒe ʋu gã me va yina la, dzi dzɔam ŋutɔ. Gake menɔ bɔbɔe na dzinyelawo ya be woatrɔ ɖe gbegbɔgblɔa, dekɔnua, nuɖuɖu, kple yame ƒe nɔnɔme ŋu le dukɔ yeyea me o. Le nyateƒe  mea, ɖeko dukɔa me va nɔ dzinyelawo mam teti koe nye ema nya vɔ̃ aɖe dzɔ.

Tɔnye va dze dɔ. Ewɔ nuku na mí elabe ame sesẽe wònye, eye teƒe aɖeke menɔ evem o. Míeɖo ŋku edzi be edze dɔ kpɔ o. Gake wova kpɔ kansa le eŋu, eye wowɔ dɔ nɛ. Nublanuitɔea, le kwasiɖa ɖeka megbea, eku.

Nu mate ŋu agblɔ ale si gbegbe eƒe kua gbã dzi na míi o. Ƒe 13 ko mexɔ ɣemaɣi. Míenɔ mɔ kpɔm na esia o, ɖeko wòle abe xexea mee wu enu na mí ene. Le gɔmedzedzea, esesẽ na nɔnye be wòaxɔe ase be ye srɔ̃ ku. Gake naneke meli míawɔ o, ele be míadze ŋgɔ agbea, eye Yehowa kpe ɖe mía ŋu hã. Medo go le sekɛndrisuku (lycée) le Caracas esi mexɔ ƒe 16, eye medi vevie be mawɔ dɔ akpe ɖe míaƒe ƒomea ŋu.

Ɣemaɣia, Nɔviŋutsu Rubén Araujo, si wu Gilead Suku nu eye wòtrɔ va Venezuela la ɖe nɔvinyenyɔnu Sana. Emegbe woʋu yi New York. Esi ƒomea tso nya me be mayi yunivɛsiti la, meɖoe be mavae nɔ nɔvinyenyɔnua kple srɔ̃a gbɔ anɔ sukua dem. Wokpe ɖe ŋunye meva te ɖe Yehowa ŋu wu. Azɔ hã, nɔvi gbogbo aɖewo siwo tsi le xɔse me la nɔ Spaingbe dolawo ƒe hame si me menɔ le Brooklyn la me. Nɔvi mawo dometɔ evee nye Milton Henschel kple Frederick Franz; wo ame evea wonɔ dɔ wɔm le Brooklyn Betel, eye woƒe nu dzɔa dzi nam.

Esi nye yunivɛsiti yiyi ƒe ƒe gbãtɔ nɔ enu wum la, menɔ ɖokuinye biam be, taɖodzinu ka koŋue le asinye le agbe me fifia. Mexlẽ nyati siwo le Gbetakpɔxɔ me siwo ƒo nu tso ale si wòle be míaɖo taɖodzinu nyuiwo le agbe me ŋu eye medea ŋugble vevie. Mekpɔe be mɔɖelawo kple Betel nɔvi siwo nɔ hamea me la nɔ dzidzɔ kpɔm, eye medi vevie be manɔ abe woawo ene. Gake nyemexɔ nyɔnyrɔ ɣemaɣi gɔ̃ hã o. Eteƒe medidi o, meva kpɔ nu si tae wòle vevie be matsɔ ɖokuinye aɖe adzɔgbe na Yehowa. Meva ɖe adzɔgbe na Yehowa eye mexɔ nyɔnyrɔ le March 30, 1957 dzi.

Esi mexɔ nyɔnyrɔ vɔ megbea, medi be mazã ɣeyiɣi geɖe atsɔ anɔ Biblia fiam amewo. Togbɔ be didi ma nɔ menye hãa, mekpɔe be esia wɔwɔ manɔ bɔbɔe o. Menɔ ɖokuinye biam be, ‘Aleke mate ŋu awɔ esia aganɔ sukua hã dem?’ Meŋlɔ lɛtawo na míaƒe ƒomea tsɔ na wonya be metso nya me be madzudzɔ sukua dede eye matrɔ ava Venezuela ava wɔ mɔɖeɖedɔa, eye woawo hã woɖo lɛta mawo ŋu.

Metrɔ gbɔ va Caracas le June 1957 me. Mekpɔe be nɔnɔmeawo nɔ sesẽm na míaƒe ƒomea. Ehiã be ame aɖe nanɔ dɔ aɖe wɔm atsɔ akpe ɖe ƒomea ŋu. Nu ka wɔgee mala? Mekpɔ dɔ aɖe le gadzraɖoƒe aɖe,  gake medi vevie be mawɔ mɔɖeɖedɔa hã. Mɔɖeɖedɔa tae metrɔ gbɔ. Eya ta, meɖoe be mawɔ evea siaa. Menɔ mɔɖeɖedɔa wɔm ganɔ dɔ wɔm le gadzraɖoƒea hã ƒe geɖe. Vovo menɔa ŋunye kura o, gake mekpɔ dzidzɔ ŋutɔ!

Medo go nɔvinyɔnu dzetugbe aɖe si ŋkɔe nye Sylvia, si tso Germany eye eya kple eƒe ƒomea ʋu va Venezuela. Sylvia lɔ̃ Yehowa vevie. Míeɖe srɔ̃ eye esia gana mekpɔ dzidzɔ geɖe. Míedzi ŋutsuvi kple nyɔnuvi; ŋutsuvia ŋkɔe nye Michel (alo Mike), eye nyɔnuvia ŋkɔe nye Samira. Eva hiã be makpɔ nɔnye hã dzi. Eva nɔ mía gbɔ. Togbɔ be eva hiã be madzudzɔ mɔɖeɖedɔa wɔwɔ ale be makpɔ nye ƒomea dzi hãa, meyi edzi tsɔ dzo ɖe gbeƒãɖeɖedɔa ŋu. Nye kple Sylvia míewɔa kpekpeɖeŋu mɔɖeɖedɔa le mɔkeɣiwo ne nɔnɔmeawo ɖe mɔ.

Mía viawo nɔ sue eye wonɔ suku dem esime menɔ ŋugble dem tso nu si ŋu meƒo nu tsoe le gɔmedzedzea me la ŋu. Ɣemaɣia, nu dze edzi nam le agbe me, eye wodea bubu ŋunye abe gadzraɖoƒedɔwɔla ene. Ke hã, medi be amewo nanyam koŋ be menye Yehowa subɔla. Meyi edzi nɔ ŋugble dem le nu si va tame nam gbe ma gbe la ŋu. Eya ta nye kple srɔ̃nye míenɔ anyi be míalé ŋku ɖe míaƒe ganyawo ŋu. Ne meɖe asi le gadzraɖoƒedɔa ŋua, woaxe ga gbogbo aɖe nam. Fe aɖeke menɔ mía ŋu o, eya ta míekpɔe be ne míenɔ agbe tsɛ la, míate ŋu anɔ agbe ɖe ga ma nu ɣeyiɣi didi aɖe.

Nyametsotso ma menɔ bɔbɔe o, gake nɔnye kple srɔ̃nye lɔlɔ̃a siaa da asi ɖe edzi. Eya ta, meɖoe be magadze mɔɖeɖedɔa gɔme. Mekpɔ dzidzɔ ŋutɔ! Edze abe mɔa dzi kɔ nam ene. Gake eteƒe medidi o, míese nyaa aɖe si dze mí kpo.

Gbe ɖekaa, míaƒe ɖɔkta na míenya be Sylvia fɔ fu. Nya sia dze mí kpo! Dzi dzɔ mí ya; gake menɔ nyametsotso si mewɔ be mawɔ mɔɖeɖedɔa ŋu bum. Mebia ɖokuinye be, ‘Ðe magate ŋu awɔ mɔɖeɖedɔa?’ Míedzra susu ɖo eye míenɔ mɔ kpɔm na vi si míava dzi la. Ke ɖoɖo nyui siwo mewɔ ɖe mɔɖeɖedɔa ŋu ya ɖe?

Míegalé ŋku ɖe míaƒe ɖoɖoawo ŋu eye míetso nya me be mawɔ mɔɖeɖedɔa.  Míedzi mía vi Gabriel le April ƒe 1985 me. Meva ɖe asi le gadzraɖoƒedɔa ŋu eye medze mɔɖeɖedɔa gɔme le June ƒe 1985 me. Ɣeyiɣi aɖe megbea, mɔnukpɔkpɔ su asinye be mawɔ dɔ kple Alɔdzekɔmitia. Gake alɔdzedɔwɔƒea menɔ Caracas o, eya ta ehiã be mazɔ mɔ kilometa 80 zi eve alo zi etɔ̃ kwasiɖa sia kwasiɖa avae kpe asi ɖe dɔa ŋu.

Alɔdzedɔwɔƒea nɔ du si nye La Victoria, eya ta míetso nya me be míaʋu ayi afi ma ale be míate ɖe alɔdzedɔwɔƒea ŋu. Tɔtrɔ gã aɖee esia hã nye na mí. Nyemate ŋu adzudzɔ akpedada na nye ƒomea gbeɖe o. Wokpea asi ɖe ŋunye ŋutɔ. Nɔvinyɔnu Baha lɔ̃ faa be yeakpɔ mía nɔ dzi. Mike ɖe srɔ̃, gake Samira kple Gabriel gakpɔtɔ nɔ mía gbɔ le aƒe me. Eya ta esi wòva hiã be míaʋu ayi La Victoria la, esia fia be woagblẽ wo xɔlɔ̃ siwo le Caracas la ɖi. Azɔ hã, ehiã be srɔ̃nye lɔlɔ̃a Sylvia natrɔ ɖe agbenɔnɔ le kɔƒe me ŋu. Eye eva hiã be mí katã míatrɔ ɖe ale si míanɔ aƒe kpokploe aɖe me la ŋu. Ehiã be míawɔ tɔtrɔ geɖe hafi ate ŋu aʋu tso Caracas ayi La Victoria.

Ke hã, tɔtrɔ bubu gava. Gabriel va ɖe srɔ̃, eye Samira va le eɖokui si. Emegbe wokpe nye kple Sylvia míeva Betel le ƒe 2007 me, eye míele afi ma va se ɖe fifia. Mía viŋutsu tsitsitɔ Mike nye hamemetsitsi eye eya kple srɔ̃a Monica wole gbesiagbe mɔɖeɖedɔa wɔm. Gabriel hã nye hamemetsitsi, eye eya kple srɔ̃a Ambra wole subɔsubɔm le Italy. Samira nye gbesiagbe mɔɖela, eye ekpea asi ɖe dɔ ŋu le Betel.

Mewɔ nyametsotso vevi geɖe le agbe me. Gake nyametsotso mawo mevem kpɔ o. Ne mɔnukpɔkpɔa agasu asinyea, nyametsotso mawo kee mawɔ. Medaa akpe na Yehowa tso dzi me ɖe dɔdeasi kple mɔnukpɔkpɔ siwo su asinye le esubɔsubɔ me la ta. Le nye agbe me katã la, meva kpɔ ale si gbegbe wòle vevie be míana mía kple Yehowa dome nanɔ kplikplikpli la dze sii. Nyametsotso ka kee ɖadze ŋgɔ mí o, eɖanye sue alo gã o, Mawu ana eƒe ŋutifafa, “si ƒo gɔmesesewo katã ta” la mí. (Flp. 4:6, 7) Nye kple Sylvia míele dzidzɔ kpɔm le míaƒe Betel subɔsubɔdɔa me, eye míekpɔe be Yehowa yra ɖe míaƒe nyametsotso ɖe sia ɖe dzi, elabe míetsɔe ɖona nɔƒe gbãtɔ ɣesiaɣi.