1. Le 1 Petro 5:2 ƒe nya nua, dɔ vevi kae wòhiã be hamemetsitsiwo nawɔ?

 YEHOWA de dɔ asi na hamemetsitsiwo be woalé be na yeƒe alẽ xɔasiawo. Hamemetsitsi dovevienu siawo dea asixɔxɔ mɔnukpɔkpɔ si su wo si be woasubɔ wo nɔviwo ŋu; wonye ‘lãkplɔvi siwo doa vevie dɔ léa be na alẽhaa.’ (Yer. 23:4; xlẽ 1 Petro 5:2.) Dzidzɔ gã wònye na mí be ŋutsu dovevienu siawo le mía si le hamea me.

2. Kuxi kawoe hamemetsitsi aɖewo doa goe?

² Hamemetsitsiwo doa go kuxi geɖe le woƒe dɔa me. Le nyateƒe mea, beléle na hamea bia dɔ geɖe ŋutɔ. Hamemetsitsi aɖe si le Amerika, si ŋkɔe nye Tony, de dzesii be ehiã be yeada asɔ le dɔ agbɔsɔsɔ si yelɔ̃na xɔnaa me. Eɖe eme be: “Esi corona dɔvɔ̃a dze egɔmea, meku kutri wɔ dɔ geɖe be mawɔ ɖoɖo ɖe kpekpeawo kple gbeadzi ŋu. Gake aleke kee medze agbagbae o, dɔ geɖe li wòle be mawɔ ɣesiaɣi. Vivivia, nyemegava nɔ fɔ lém ɖe Biblia xexlẽ, ɖokuisinusɔsrɔ̃ kple gbedodoɖa ŋu o.” Nɔviŋutsu Ilir si hã nye hamemetsitsi le Kosovo do go kuxi bubu. Esi wònɔ nuto aɖe si me wonɔ aʋa wɔm lea, esesẽ nɛ be wòawɔ ɖe habɔbɔa ƒe mɔfiamewo dzi. Egblɔ be: “Esi alɔdzedɔwɔƒea bia tso asinye be makpe ɖe nɔvi siwo le afi si aʋaa nu sẽ le ŋua, esia do nye dzinɔameƒo kpɔ. Vɔvɔ̃ ɖom, eye wòwɔ nam be mɔfiame ma mesɔ o.” Esesẽ na Tim, si nye dutanyanyuigblɔla le Asia, be wòawɔ nu siwo katã wòle be wòawɔ gbe sia gbe. Egblɔ be: “Ɣeaɖewoɣia, nu tea ŋunye belibeli.” Nu kae akpe ɖe hamemetsitsi siwo le kuxi mawo tɔgbi me tom ŋu?

3. Nu kae míate ŋu asrɔ̃ tso Ʋɔnudrɔ̃la Gideon ƒe kpɔɖeŋua me?

 ³ Ʋɔnudrɔ̃la Gideon ƒe kpɔɖeŋua ate ŋu akpe ɖe hamemetsitsiwo ŋu. (Heb. 6:12; 11:32) Gideon kplɔ Mawu ƒe amewo eye wòkpɔ wo ta. (Ʋɔn. 2:16; 1 Kron. 17:6) Abe Gideon enea, woɖo hamemetsitsiwo hã be woalé be na Mawu ƒe amewo le ɣeyiɣi sesẽ siawo me. (Dɔw. 20:28; 2 Tim. 3:1) Hamemetsitsiwo ate ŋu asrɔ̃ nu geɖe tso Gideon ƒe ɖokuibɔbɔ, toɖoɖo, kple dzidodo me. Eƒe kpɔɖeŋua ate ŋu akpe ɖe ame siwo menye hamemetsitsi o hã ŋu be woayi edzi ade asixɔxɔ hamemetsitsiwo ŋu eye woakpe asi ɖe wo ŋu.—Heb. 13:17.

4. Aleke Gideon ɖe ɖokuibɔbɔ fiae?

⁴ Gideon nya afi si eƒe ŋutete se ɖo eye wòbɔbɔ eɖokui. b Esi Yehowa ƒe dɔla gblɔ na Gideon be Yehowa tiae be wòaɖe Israel tso Midiantɔwo si mea, eɖo eŋu ɖokuibɔbɔtɔe be: “Hlɔ̃ si me metso ye nye suetɔ le Manase, eye nyee nye ame tsɛtɔ kekeake le fofonye ƒe me.” (Ʋɔn. 6:15) Gideon se le eɖokui me be yemedze awɔ dɔ ma o, gake Yehowa ya nya be ate ŋu awɔe. Yehowa kpe ɖe eŋu wòwɔ eƒe dɔdeasia wu enu dzidzedzetɔe.

5. Nɔnɔme kawo mee wòate ŋu asesẽ na hamemetsitsi le be wòabɔbɔ eɖokui alo anya afi si eƒe ŋutete se ɖo?

⁵ Hamemetsitsiwo dzea agbagba be yewoabɔbɔ yewo ɖokuiwo le nu sia nu me. (Mika 6:8; Dɔw. 20:18, 19) Womeƒoa adegbe le nu siwo wote ŋu wɔ ta o, eye womebunɛ hã be yewomele ɖeke me o le yewoƒe gbɔdzɔgbɔdzɔwo ta o. Gake ɣeaɖewoɣia, esesẽna na hamemetsitsiwo be woabɔbɔ wo ɖokuiwo alo anya afi si woƒe ŋutete se ɖo. Le kpɔɖeŋu me, hamemetsitsi aɖe alɔ̃ axɔ dɔdeasi geɖe, gake ate ŋu asesẽ nɛ be wòawɔ wo katã. Alo ate ŋu adzɔ be amewo nakpɔ kpɔgblɔe le ale si wòwɔ dɔ aɖe ŋu alo woakafui ɖe dɔ aɖe si wòwɔ ta. Nu kae hamemetsitsiwo ate ŋu asrɔ̃ tso Gideon gbɔ si akpe ɖe wo ŋu le nɔnɔme mawo tɔgbi me?

6. Nu kae hamemetsitsiwo ate ŋu asrɔ̃ tso Gideon ƒe ɖokuibɔbɔa me? (Kpɔ fotoa hã.)

 ⁶ Bia kpekpeɖeŋu. Ame si nya afi si eƒe ŋutete se ɖo dea dzesii be nanewo li yemate ŋu awɔ le ye ɖokui si o. Esi Gideon nya afi si eƒe ŋutete se ɖo taa, ebia kpekpeɖeŋu. (Ʋɔn. 6:27, 35; 7:24) Hamemetsitsi siwo dze aɖaŋu hã wɔnɛ nenema. Tony, si ŋu míeƒo nu tsoe va yi ɖe eme be: “Hehe si mexɔ le ɖevime wɔe be melɔ̃na xɔa dɔ wòsɔa gbɔ wu esi mate ŋu awɔ. Eya ta meɖoe be míadzro nyati si nye ɖokuibɔbɔ me le míaƒe ƒometadedeagu me, eye mebia srɔ̃nye be wòagblɔ akpa siwo wòkpɔ be magate ŋu adze agbagba lea nam. Medzro video si nye Na Hehe Amewo, Ka Ðe Wo Dzi, Eye Nàna Ŋusẽ Wo, Abe Ale Si Yesu Wɔe Ene hã me le jw.org.” Esia na be Tony de dɔ ame bubuwo hã si be woakpe ɖe ye ŋu. Nu kae do tso eme? Tony gblɔ be: “Míete ŋu le hamea ƒe dɔwo gbɔ kpɔm eye ɣeyiɣi geɖe va le asinye metsɔ doa ŋusẽ nye kple Yehowa dome ƒomedodoa.”

7. Aleke hamemetsitsiwo ate ŋu asrɔ̃ Gideon ƒe kpɔɖeŋua ne wokpɔ kpɔgblɔe le nu si nèwɔ ŋu? (Yakobo 3:13)

⁷ Wɔ nu tufafatɔe ne wokpɔ kpɔgblɔe le nu si nèwɔ ŋu. Esia ate ŋu anye kuxi na hamemetsitsiwo. Gake Gideon ƒe kpɔɖeŋua ate ŋu akpe ɖe wo ŋu. Gideon nya be yemede blibo o, ta esi Efrayimtɔwo he nya ɖe eŋua, eɖo eŋu tufafatɔe. (Ʋɔn. 8:1-3) Gideon meɖo nya ŋu le dziku me o, ke boŋ eɖo to wo ɖokuibɔbɔtɔe eye wòkpɔ nyaa gbɔ ŋuɖɔɖotɔe si wɔe be woƒe dzi dze eme. Hamemetsitsi siwo dze aɖaŋu srɔ̃a Gideon ƒe kpɔɖeŋua le mɔ sia nu be woɖoa to nyuie eye woɖoa nya ŋu tufafatɔe ne wokpɔ kpɔgblɔe le nu si wowɔ ŋu. (Xlẽ Yakobo 3:13.) Esia wɔnɛ be ŋutifafa nɔa hamea me.

8. Aleke wòle be hamemetsitsiwo nawɔ nui ne wokafu wo? Gblɔ eƒe kpɔɖeŋu.

⁸ Tsɔ kafukafua na Yehowa. Esi Gideon ɖu Midiantɔwo dzi eye wokafuia, etsɔ kafukafua na Yehowa. (Ʋɔn. 8:22, 23) Aleke ame siwo le agbanɔamedzinɔƒewo ate ŋu asrɔ̃ Gideon? Ne wowɔ nane eye wokafu woa, ele be woatsɔ kafukafua ana Yehowa. (1 Kor. 4:6, 7) Le kpɔɖeŋu me, ne wokafu hamemetsitsi aɖe le ale si wòfia nui taa, ate ŋu ahe susu ayi afi si nufiamea tso, si nye Mawu ƒe Nyaa alo hehe si Yehowa ƒe habɔbɔa nae dzi. Ɣeaɖewoɣia, anyo be hamemetsitsiwo nade ŋugble akpɔe ɖa be ɖe yewole susu hem va yewo ɖokui dzi fũu akpa hã. Bu hamemetsitsi aɖe si ŋkɔe nye Timothy ŋu kpɔ. Esi woɖoe hamemetsitsia, elɔ̃a dutoƒonuƒowo ƒoƒo. Egblɔ be: “Mezãa ŋgɔdonya kple kpɔɖeŋu legbee siwo awɔ dɔ ɖe nyaselawo dzi. Esia nana amewo kafuam, gake nublanuitɔea, dzinye koe amewo ƒe susu nɔna, ke menye Biblia alo Yehowa dzi o.” Ɣeyiɣi aɖe megbea, Timothy de dzesii be ehiã be yeatrɔ asi le ale si yefiaa nui ŋu ale be yeagahe susu ava ye ɖokui dzi fũu o. (Lod. 27:21) Nu kae do tso eme? Eɖe eme be: “Fifia, nɔviwo gblɔa ale si nye nuƒoa te wo ɖe Yehowa ŋu, ale si wòkpe ɖe wo ŋu wonɔ te ɖe kuxi aɖe nu alo na wote ŋu ɖu tetekpɔ aɖe dzia nam. Nya siawo nana dzi dzɔam geɖe wu kafukafu siwo mexɔ va yi.”

9. Aleke wodo Gideon ƒe toɖoɖo kple dzinɔameƒo kpɔe? (Kpɔ nɔnɔmetata si le akpaa dzi.)

⁹ Esi Mawu ɖo Gideon ʋɔnudrɔ̃lae la, ehiã be wòaɖo to eye dzi nanɔ eƒo. Le kpɔɖeŋu me, ede dɔ aɖe si me afɔku lea esi be wòagbã vɔsamlekpui si fofoa ɖi na  Baal. (Ʋɔn. 6:25, 26) Emegbe esi Gideon ƒo asrafowo nu ƒua, Yehowa gblɔ nɛ zi eve sɔŋ be wòaɖe wo dzi akpɔtɔ. (Ʋɔn. 7:2-7) Mlɔebaa, Yehowa gblɔ nɛ be wòadze futɔwo ƒe asaɖa dzi le zã me.—Ʋɔn. 7:9-11.

10. Nu kae ate ŋu ana wòasesẽ na hamemetsitsi aɖe be wòaɖo to?

¹⁰ Ele be hamemetsitsiwo ‘nalɔ̃ faa aɖo to.’ (Yak. 3:17) Hamemetsitsi si ɖoa to wɔna ɖe Ŋɔŋlɔawo ƒe mɔfiame kple mɔfiame si tso Mawu ƒe habɔbɔa gbɔ dzi. Etoa esia dzi ɖoa kpɔɖeŋu ɖi na ame bubuwo. Ke hã, ate ŋu asesẽ nɛ ɣeaɖewoɣi be wòaɖo to. Le kpɔɖeŋu me, ne mɔfiameawo sɔ gbɔ alo sẽe kple sẽe ko wogatrɔ asi le wo ŋua, ate ŋu asesẽ nɛ be wòawɔ ɖe wo dzi. Le go aɖewo mea, ɖewohĩ abia eɖokui be, ‘Ðe susu le mɔfiame siawo mea?’ Alo woabia tso esi be wòawɔ dɔ aɖe si ate ŋu ade eƒe ablɔɖe afɔku me. Ne edzɔ alea, aleke hamemetsitsiwo ate ŋu asrɔ̃ Gideon ƒe toɖoɖo?

11. Nu kae akpe ɖe hamemetsitsiwo ŋu be woawɔ ɖe mɔfiamewo dzi?

¹¹ Ðo to mɔfiamewo nyuie eye nàwɔ ɖe wo dzi. Mawu na mɔfiame Gideon ku ɖe ale si wòagbã fofoa ƒe vɔsamlekpui, teƒe si wòaɖi vɔsamlekpui yeye ɖo na Yehowa, kple lã siwo wòatsɔ asa vɔ le edzi ŋu. Gideon meto nyatoƒoe le mɔfiame siwo wonae ŋu o; ewɔ ɖe wo dzi pɛpɛpɛ. Egbea hãa, Yehowa ƒe habɔbɔa toa lɛtawo kple gbeƒãɖeɖewo dzi naa mɔfiame vovovowo hamemetsitsiwo. Mɔfiame siawo kpena ɖe mía ŋu míenɔa dedie eye mía kple Yehowa dome nɔa kplikplikpli. Míelɔ̃ hamemetsitsiwo ɖe ale si wodzea agbagba be yewoawɔ ɖe teokrasimɔfiamewo dzi nuteƒewɔwɔtɔe ta. Esia ɖea vi na hame bliboa.—Ps. 119:112.

12. Aleke hamemetsitsiwo ate ŋu awɔ ɖe mɔfiame si dze le Hebritɔwo 13:17 dzi ne wotrɔ asi le teokrasimɔfiamewo ŋu?

¹² Lɔ̃ faa nàwɔ tɔtrɔwo. Ðo ŋku edzi be Yehowa bia tso Gideon si be wòaɖo asrafo akpa gãtɔ ɖe aƒe. (Ʋɔn. 7:8) Ate ŋu asusui be, ‘Ðe tɔtrɔ sia hiã ŋutɔŋutɔa? Aɖe via?’ Ke hã, Gideon ɖo to. Egbea, hamemetsitsiwo srɔ̃a Gideon ƒe kpɔɖeŋua eye wowɔna ɖe tɔtrɔ siwo habɔbɔa wɔa dzi. (Xlẽ Hebritɔwo 13:17.) Le kpɔɖeŋu me, le ƒe 2014 mea, Dɔdzikpɔhaa trɔ asi le ale si woadzɔ ga atsɔ atu Fiaɖuƒe Akpata kple Takpexɔwo ŋu. (2 Kor. 8:12-14) Womagado ga na hamewo be woatsɔ atu Fiaɖuƒe Akpata eye emegbe woava xee o. Fifiaa, hame siwo le xexea me godooa dzɔa nu be woatsɔ atu Fiaɖuƒe Akpatawo kple Takpexɔwo le afi si wohiã le, ne hame aɖe ƒe nudzɔdzɔwo le sue gɔ̃ hã. Esi José se tɔtrɔ si habɔbɔa wɔa, esusu be ɖoɖo ma mawɔ dɔ o, eya ta egblɔ be: ‘Womete ŋu le Fiaɖuƒe Akpata ɖeka gɔ̃  hã tu ge o. Menye nenemae nuwo yia edzi le mía gbɔ o.’ Nu kae kpe ɖe José ŋu wòkpe asi ɖe ɖoɖo sia ŋu? Egblɔ be: “Nya siwo dze le Lododowo 3:5, 6 ɖo ŋku edzi nam be maɖo ŋu ɖe Yehowa ŋu. Nu siwo do tso emea wɔ nuku nam ŋutɔ! Ðoɖo yeyea wɔe be míele Fiaɖuƒe Akpata geɖewo tum fifia. Eye míaƒe nudzɔdzɔwo le vi ɖem na nɔviwo katã ale be nuwo nada asɔ.”

13. (a) Nu ka dzie Gideon ka ɖo? (b) Aleke hamemetsitsiwo ate ŋu asrɔ̃ eƒe kpɔɖeŋua? (Kpɔ fotoa hã.)

¹³ Dzi nenɔ ƒowò nàwɔ Yehowa ƒe lɔlɔ̃nu. Gideon ɖo to Yehowa togbɔ be enɔ vɔvɔ̃m eye afɔku nɔ dɔ si wode esi me hã. (Ʋɔn. 9:17) Gideon nya be Yehowa li kpli ye, eya ta eka ɖe edzi bliboe be akpe ɖe ye ŋu yeakpɔ eƒe amewo ta. Hamemetsitsi siwo le dukɔ siwo me woɖo asi míaƒe dɔa dzi lea srɔ̃a Gideon ƒe kpɔɖeŋu. Dzi nɔa wo ƒo woxɔa ŋgɔ le kpekpeawo kple gbeadzisubɔsubɔdɔa me, togbɔ be woate ŋu alé wo alo abia gbe wo, dɔ nagblẽ na wo, alo woasẽ ŋuta le wo ŋu hã. c Le xaxa gãa mea, ahiã be dzi nanɔ hamemetsitsiwo ƒo woawɔ ɖe mɔfiame siwo woaxɔ dzi, ne esia wɔwɔ asesẽ gɔ̃ hã. Mɔfiame siawo ate ŋu aku ɖe ale si míaɖe gbeƒã ʋɔnudrɔ̃gbedeasi si le abe kpetsi ene kple nu si míawɔ be míatsi agbe le Gog si tso Magog ƒe amedzidzedzea me ŋu.—Eze. 38:18; Nyaɖ. 16:21.

14. Nu ka tae menɔ bɔbɔe na Gideon be wòado dzi o?

¹⁴ Dɔ si Yehowa de Gideon si be wòanye ʋɔnudrɔ̃laa nye dɔ sesẽ. Esi Midiantɔwo si le aʋa si wowɔ le zã me nua, Gideon ti wo yome tso Yezreel Balia me kaka va ɖo Yordan-tɔsisi si avewo anya ƒo xlãe to. (Ʋɔn. 7:22) Ðe Gideon dzudzɔ wo yome titi esi wòɖo tɔa toa? Kura o! Togbɔ be ɖeɖi te eya kple ame 300-awo ŋu hãa, wotso tɔa eye woyi edzi ti Midiantɔawo  yome va se ɖe esime wotu wo, eye woɖu wo dzi.—Ʋɔn. 8:4-12.

15. Nu kawoe nana nu tea hamemetsitsiwo ŋu ɣeaɖewoɣi?

¹⁵ Ɣeaɖewoɣia, ɖeɖi tea hamemetsitsiwo ŋu belibeli le hamea ƒe dɔwo kple beléle na woƒe ƒomea ta. Ne edzɔa alea, aleke hamemetsitsiwo ate ŋu asrɔ̃ Gideon ƒe kpɔɖeŋua?

16-17. Nu kae kpe ɖe Gideon ŋu be wòte ŋu yi dɔa dzi? Nu ka dzie hamemetsitsiwo ate ŋu aka ɖo? (Yesaya 40:28-31) (Kpɔ fotoa hã.)

¹⁶ Ka ɖe edzi be Yehowa ado ŋusẽ wò. Gideon ka ɖe edzi be Yehowa ado ŋusẽ ye, eye Yehowa do ŋusẽe hã. (Ʋɔn. 6:14, 34) Gbe ɖekaa, Gideon kple eŋumewo ƒu du ti Midian-fia eve siwo nɔ kposɔwo dzi yome. (Ʋɔn. 8:12, 21) Gake Mawu kpe ɖe Israel-vi siawo ŋu wotu wo eye woɖu wo dzi le aʋa me. Hamemetsitsiwo hã ate ŋu aɖo ŋu ɖe Yehowa, ‘ame si ŋu ɖeɖi metena o,’ ŋu. Ana ŋusẽ si wohiã la wo ɣesiaɣi.—Xlẽ Yesaya 40:28-31.

¹⁷ Matthew nye Kɔdzi Kadododzikpɔkɔmiti me tɔ. Nu kae kpe ɖe eŋu wòte ŋu yi eƒe dɔa dzi eye mena ta o? Egblɔ be: “Mekpɔ nya siwo dze le Filipitɔwo 4:13 ƒe nyateƒenyenye dze sii. Zi geɖe ne nu te ŋunye eye mese le ɖokuinye me be nyemagate ŋu ayi dɔa dzi oa, medoa gbe ɖa vevie ɖea kuku na Mawu be wòado ŋusẽm mayi edzi akpe ɖe nɔvinyewo ŋu. Le ɣeyiɣi mawo mea, mekpɔnɛ be Yehowa tsɔ eƒe gbɔgbɔa le ŋusẽ domem be mayi dɔa dzi.” Abe Gideon enea, míaƒe hamemetsitsiwo wɔa dɔ sesĩe tsɔ léa be na Yehowa ƒe amewo togbɔ be esia wɔwɔ mele bɔbɔe ɣesiaɣi o hã. Ehiã be woade dzesii be menye nu sia nu si yewodi be yewoawɔe woate ŋu awɔ o ya. Ke hã, woate ŋu aka ɖe edzi be Yehowa ase yewoƒe kokoƒoƒo eye wòado ŋusẽ yewo be yewoayi edzi awɔ dɔa.—Ps. 116:1; Flp. 2:13.

18. Aleke hamemetsitsiwo ate ŋu asrɔ̃ Gideon ƒe kpɔɖeŋua?

¹⁸ Nu geɖe li hamemetsitsiwo ate ŋu asrɔ̃ tso Gideon ƒe kpɔɖeŋua me egbea. Ahiã be hamemetsitsiwo nada asɔ le dɔ agbɔsɔsɔ si woalɔ̃ axɔ me eye woabɔbɔ wo ɖokui ne wokpɔ kpɔgblɔe le nu si wowɔ ŋu alo wokafu wo. Ehiã be dzi nanɔ wo ƒo eye woawɔ ɖe teokrasimɔfiamewo dzi, vevietɔ esi nuɖoanyi sia ƒe nuwuwu le aƒe tum. Ehiã be woaka ɖe edzi be kuxi ka kee yewoado goe o, Mawu ate ŋu ado ŋusẽ yewo. Le nyateƒe mea, míedea asixɔxɔ alẽkplɔla dovevienu siawo ŋu eye ‘míedea bubu wo ŋu vevie.’—Flp. 2:29.