1. Nu kae wòle be míawɔ be míate ŋu atsi agbe ne Yehowa ƒe ŋkekea va?

 NE BIBLIA zã nya “Yehowa ƒe ŋkeke” la, ekuna ɖe ɣeyiɣi si wòadrɔ̃ ʋɔnu eƒe futɔwo eye wòaxɔ na eƒe amewo ŋu. Le blemaa, Yehowa drɔ̃ ʋɔnu dukɔ aɖewo eye wòhe to na wo. (Yes. 13:1, 6; Eze. 13:5; Zef. 1:8) Yehowa ƒe ŋkeke si gbɔna adze egɔme ne dukɔwo dze Babilon Gã la dzi eye wòawu enu le Armagedon-ʋaa me. Be míatsi agbea, ele be míadzra ɖo fifia. Menye ɖeko Yesu gblɔ be míadzra ɖo ɖe “xaxa gã” la ŋu o, ke egblɔ hã be ‘míanɔ dzadzraɖoɖi.’—Mat. 24:21; Luka 12:40.

2. Aleke 1 Tesalonikatɔwo me dzodzro aɖe vi na mí?

² Le agbalẽ gbãtɔ si Mawu ƒe gbɔgbɔ ʋã apostolo Paulo wòŋlɔ na Kristotɔ siwo le Tesalonika mea, ewɔ kpɔɖeŋu vovovowo tsɔ kpe ɖe wo ŋu be woanɔ dzadzraɖoɖi na Yehowa ƒe ŋkeke gã la. Paulo nya be Yehowa ƒe ŋkekea mava ɣemaɣi o. (2 Tes. 2:1-3) Ke hã, ede dzi ƒo na nɔviawo be woadzra ɖo ɖe ŋkeke ma ŋu abe ɖe ŋkekea gbɔna le ŋufɔke ene. Míawo hã míate ŋu awɔ ɖe aɖaŋuɖoɖo ma dzi egbea. Mina míadzro nya siwo wògblɔ tso nu etɔ̃ siwo gbɔna ŋua me: (1) ale si Yehowa ƒe ŋkekea ava, (2) ame siwo matsi agbe le ŋkeke ma dzi o, kple (3) ale si míadzra ɖo be míate ŋu atsi agbe.

3. Aleke Yehowa ƒe ŋkekea ava abe ale si fiafitɔ vana le zã me ene? (Kpɔ nɔnɔmetataa hã.)

³ “Abe ale si tututu fiafitɔ vana le zã me ene.” (1 Tes. 5:2) Esiae nye kpɔɖeŋunyagbɔgblɔ etɔ̃ si Paulo zã tsɔ ɖɔ ale si  Yehowa ƒe ŋkekea avae ƒe gbãtɔ. Zi geɖea, fiafiwo dzea ame dzi kpata le zã me esime amewo mele mɔ kpɔm o. Nenema kee Yehowa ƒe ŋkekea hã ava le vo me esime amewo mele mɔ kpɔm o. Ale si nuwo adzɔ kpata akplɔ wo nɔewo ɖo awɔ nuku na Kristotɔ vavãwo gɔ̃ hã. Gake womatsrɔ̃ Kristotɔ vavãwo ya o; ame vɔ̃ɖiwoe woatsrɔ̃.

4. Mɔ ka nue Yehowa ƒe ŋkekea le abe fuɖuame ene le?

⁴ “Abe ale si fuɖuame va lilia funɔ ene.” (1 Tes. 5:3) Funɔ menya ga si me tututu wòadzi vi o, gake eka ɖe edzi be yeadzi vi godoo. Ne ɣeyiɣia dea, fua tea eɖuɖu eye wòsea veve atraɖii. Nenema kee míenya ŋkeke kple gaƒoƒo si Yehowa ƒe ŋkekea adze egɔme o. Gake míeka ɖe edzi be ava godoo. Eye Mawu ƒe ʋɔnudɔdrɔ̃ ava ame vɔ̃ɖiwo dzi kpoyi eye womate ŋu asi le enu o.

5. Mɔ ka nue xaxa gãa le abe agudzedze ene le?

⁵ Abe ale si agu dzena ene. Paulo ƒe kpɔɖeŋu etɔ̃lia gaƒo nu tso ale si fiafitɔ va fia fi le zã mea ŋu. Gake le afi sia, edze be Paulo tsɔ Yehowa ƒe ŋkekea sɔ kple agudzedze. (1 Tes. 5:4) Ame siwo fia fi le zã me ate ŋu aɖe ŋu ɖi eye womade dzesii be ɣeyiɣi le yiyim o. Kaka woanyɔ le wo ɖokui mea, ŋu ke ɖe wo eye woléa wo. Abe ale si wònɔna le fiafitɔ gome enea, nenema kee xaxa gãa aklo nu le ame siwo ɖoe kplikpaa wɔa nu siwo medzea Mawu ŋu oa dzi. Be ŋkeke ma nagalili mí abe woawo ene oa, ele be míanɔ klalo aƒo asa na nuwɔna siwo medzea Yehowa ŋu o, eye míati “nyuiwɔwɔ kple dzɔdzɔenyenye kpakple nyateƒe ɖe sia ɖe ƒomevi” yome. (Ef. 5:8-12) Paulo gawɔ kpɔɖeŋu eve siwo de sɔsɔ ge kple wo nɔewo tsɔ ɖɔ ame siwo atsi agbe.

6. Gɔmesese ka nue ame geɖewo le alɔ̃ dɔm le? (1 Tesalonikatɔwo 5:6, 7)

⁶ “Ame siwo dɔa alɔ̃.” (Xlẽ 1 Tesalonikatɔwo 5:6, 7.) Paulo tsɔ ame siwo matsi agbe le Yehowa ƒe ŋkekea dzi o la sɔ kple ame siwo dɔa alɔ̃. Womenya be ɣeyiɣia le yiyim o, eye womenya nu siwo le edzi yim ƒo xlã wo o. Eya ta womedea dzesii ne nane le dzɔdzɔm kaka ahayi afɔ ɖe ge o. Ame geɖewo le alɔ̃ dɔm le kpɔɖeŋunyagbɔgblɔ nu. (Rom. 11:8) Womedea dzesii be nu siwo le dzɔdzɔm le xexea me ɖo kpe edzi be míele “ŋkeke mamlɛawo” me eye be xaxa gãa adze egɔme kpuie o. Ne nu ɖedzesiwo dzɔ le xexea mea, enana ame aɖewo nyɔna eye wotsɔa ɖe le Fiaɖuƒegbedeasia me. Gake wo dometɔ geɖe gayia alɔ̃ me. Ame siwo xɔe se be ʋɔnudrɔ̃ŋkeke aɖe gbɔna dometɔ aɖewo gɔ̃ hã susu be ele adzɔge ʋĩi. (2 Pet. 3:3, 4) Ke hã, míawo ya míedea dzesii be zi ale si ŋkekeawo va le yiyimaa, ehiã vevie be míanɔ ŋute.

7. Nu ka tae Biblia tsɔ ame siwo Mawu atsrɔ̃a sɔ kple ahamulawo?

⁷ “Ame siwo mua aha.” Apostoloa tsɔ ame siwo Mawu atsrɔ̃a sɔ kple ahamulawo. Ame siwo mua aha mewɔa nu kpata ne nane le dzɔdzɔm le afi si wole o, eye womete ŋu tsoa nya me nyuie o. Nenema kee ame vɔ̃ɖiwo meɖoa to Mawu ƒe nuxlɔ̃ame o. Ale si wonɔa agbee kplɔa wo yina ɖe tsɔtsrɔ̃ me. Gake Biblia xlɔ̃ nu Kristotɔwo be woanɔ mo xexi eye woanɔ ŋute le susu me. (1 Tes. 5:6) Biblia ŋutinunyala aɖe gblɔ be ŋutenɔnɔ le susu me fia be “ame ƒe susu me nakɔ, wòanɔ ŋute ate ŋu ada nuwo akpɔ nyuie ale be wòate ŋu awɔ nyametsotso nyuitɔ.” Nu ka tae wòle be míaƒe susu me nakɔ eye míanɔ ŋute? Elabe esia akpe ɖe mía ŋu be míagaƒo mía ɖokuiwo ɖe dunyahenyawo me o eye míagavu ɖe xexe sia me kuxiwo gbɔ kpɔkpɔ ŋu o. Esi Yehowa ƒe ŋkekea le aƒe tumaa, woagaƒoe ɖe mía nu geɖe wu be míade akpa aɖe dzi. Gake mele be míatsi dzi ɖe ale si míawɔ nu ɣemaɣia ŋu o. Mawu ƒe gbɔgbɔa ate ŋu akpe ɖe mía ŋu be míaƒe susu me nakɔ, míabu nuwo ŋu nyuie eye míatso nya me nyuie.—Luka 12:11, 12.

8. Le 1 Tesalonikatɔwo 5:8 ƒe nya nua, nu kae akpe ɖe mía ŋu be míayi edzi anɔ ŋudzɔ eye míanɔ mo xexi? (Kpɔ nɔnɔmetataa hã.)

⁸ ‘Do akɔtakpoxɔnu la, eye nàɖɔ gakuku la.’ Paulo tsɔ mí sɔ kple asrafo siwo le klalo na aʋawɔwɔ. (Xlẽ 1 Tesalonikatɔwo 5:8.) Ehiã be asrafo nanɔ dzadzraɖoɖi ɣesiaɣi na aʋawɔwɔ. Nenema kee wòle le míawo hã gome egbea. Míenɔa dzadzraɖoɖi na Yehowa ƒe ŋkekea ne míeyi edzi do xɔse kple lɔlɔ̃ ƒe akɔtakpoxɔnu la eye míeɖɔ mɔkpɔkpɔ ƒe gakuku la. Ne míewɔe alea, aɖe vi na mí geɖe.

9. Aleke míaƒe xɔse kpɔa mía tae?

⁹ Ale si akɔtakpoxɔnu kpɔa asrafo ƒe dzi taa, nenema kee xɔse kple lɔlɔ̃ kpɔa míaƒe kpɔɖeŋudzia ta. Woakpe ɖe mía ŋu míayi edzi asubɔ Yehowa eye míadze Yesu yome. Xɔse nana míekana ɖe edzi be Yehowa nyea teƒeɖola na ame siwo dinɛ vevie tso dzi blibo me. (Heb. 11:6) Akpe ɖe mía ŋu míayi edzi awɔ nuteƒe na míaƒe Kplɔla Yesu, ne esia wɔwɔ ana míakpe fu gɔ̃ hã. Yehowa subɔla siwo yi edzi wɔ nuteƒe le yometiti kple nɔnɔme sesẽ bubuwo me ƒe ŋutinyawo xexlẽ ado ŋusẽ  míaƒe xɔse ale be míate ŋu ado dzi. Azɔ hã míate ŋu asrɔ̃ ame siwo nɔ agbe tsɛ eye wotsɔ Fiaɖuƒea ƒe nuwo ɖo nɔƒe gbãtɔ ƒe kpɔɖeŋu eye esia akpe ɖe mía ŋu míaƒo asa na ga kple ŋutilãmenuwo lɔlɔ̃. b

10. Aleke lɔlɔ̃ na Mawu kple lɔlɔ̃ na mía havi kpena ɖe mía ŋu míedoa dzi?

¹⁰ Lɔlɔ̃ hã akpe ɖe mía ŋu míayi edzi anɔ ŋudzɔ eye míanɔ mo xexi. (Mat. 22:37-39) Lɔlɔ̃ na Mawu kpena ɖe mía ŋu míedoa dzi le gbeƒãɖeɖedɔa me nu ka kee ɖadzɔ o. (2 Tim. 1:7, 8) Esi míelɔ̃ ame siwo menye Yehowa subɔlawo o hã taa, míeyia edzi ɖea gbeƒã le míaƒe anyigbamamawo me eye míewɔa esia to telefondziɖaseɖiɖidɔa alo lɛtaŋɔŋlɔ gɔ̃ hã dzi. Míeka ɖe edzi be gbe ɖekaa, wo dometɔ aɖewo atrɔ eye woava wɔ nu si sɔ.—Eze. 18:27, 28.

11. Ne míelɔ̃ mía nɔvi Kristotɔwoa, nu kae esia aʋã mí míawɔ? (1 Tesalonikatɔwo 5:11)

¹¹ Míelɔ̃ mía nɔvi Kristotɔwo hã vevie. Míeɖea lɔlɔ̃ sia fiana ne ‘míedea dzi ƒo na mía nɔewo eye míetua mía nɔewo ɖo.’ (Xlẽ 1 Tesalonikatɔwo 5:11.) Abe asrafo siwo le wo nɔewo ŋu le aʋagbedzi enea, míedea dzi ƒo na mía nɔewo. Ate ŋu adzɔ be asrafo nawɔ nu vevi ehavi asrafo le manyamanya me ya, gake maɖoe koŋ awɔe nenema o. Nenema kee mímaɖoe koŋ awɔ nu wòave mía nɔviwo alo aɖo vɔ̃ vɔ̃ teƒe gbeɖe o. (1 Tes. 5:13, 15) Azɔ hã míeɖea lɔlɔ̃ fiaa nɔvi siwo le ŋgɔ xɔm le hamea me ne míedea bubu wo ŋu. (1 Tes. 5:12) Woɖo Tesalonika hamea teti koe nye ema Paulo ŋlɔ agbalẽ sia na wo. Anɔ eme be nuteƒekpɔkpɔ boo mesu nɔvi siwo nɔ ŋgɔ xɔm la si o, eye woanya da vo aɖewo. Togbɔ be ele alea hãa, ehiã be nɔviawo nade bubu wo ŋu. Esi xaxa gãa le aƒe tumaa, míaxɔ mɔfiame geɖe tso míaƒe hamemetsitsiwo gbɔ wu ɣeyiɣi bubu ɖe sia ɖe. Ate ŋu adzɔ be kadodo magava nɔ mía kple habɔbɔa ƒe dɔwɔƒegãa kple alɔdzedɔwɔƒea dome o, eya ta ele vevie be míalɔ̃ míaƒe hamemetsitsiwo fifia eye  míade bubu wo ŋu. Nu ka kee ɖadzɔ o, mina míayi edzi anɔ mo xexi eye míagatsɔ susu aɖo woƒe gbɔdzɔgbɔdzɔwo ŋu o, ke boŋ míaɖo ŋku edzi be Yehowa to Kristo dzi le mɔ fiam wo.

12. Aleke míaƒe mɔkpɔkpɔa kpɔa míaƒe susu ta?

¹² Ale si ko gakuku kpɔa asrafo ƒe ta taa, nenema kee míaƒe xɔxɔ ƒe mɔkpɔkpɔa kpɔa míaƒe susu ta eye wòkpena ɖe mía ŋu míebua nuwo ŋu nyuie. Míaƒe mɔkpɔkpɔa kpena ɖe mía ŋu míedea dzesii be viɖe aɖeke mele nu siwo xexea dona ɖe ŋgɔa ŋu o. (Flp. 3:8) Ekpena ɖe mía ŋu hã be míeɖea dzi ɖi eye míenɔa ŋute. Aleae wòdzɔe le Wallace kple Laurinda siwo subɔ le Afrika gome. Le kwasiɖa etɔ̃ pɛ ko mea, Wallace nɔ ku, eye Laurinda tɔ hã ku. Le corona dɔvɔ̃a taa, womete ŋu zɔ mɔ yi aƒe o. Wallace gblɔ be: “Tsitretsitsimɔkpɔkpɔa wɔe be nyemetsɔa susu ɖoa ale si wonɔ hafi wokua ŋu o, ke boŋ nye susu nɔa ale si woava nɔ ne Mawu fɔ wo ɖe tsitrea ŋu. Esia kpena ɖe ŋunye meɖea dzi ɖi le ɣeyiɣi siwo melé blanui me.”

13. Nu kae míawɔ be Mawu nana gbɔgbɔ kɔkɔea mí?

¹³ “[Mègatsi] gbɔgbɔ la ƒe dzo la o.” (1 Tes. 5:19) Paulo tsɔ gbɔgbɔ kɔkɔea sɔ kple dzo aɖe si le mía me. Ne Mawu ƒe gbɔgbɔa le dɔ wɔm ɖe mía dzia, dzo ɖoa mía me be míawɔ nu si sɔ eye edoa ŋusẽ mí be míawɔ dɔ na Yehowa. (Rom. 12:11) Nu kae míawɔ be Mawu nana eƒe gbɔgbɔa mí? Míate ŋu ado gbe ɖa be Mawu nana eƒe gbɔgbɔa mí, míasrɔ̃ eƒe Nyaa, eye míanɔ habɔbɔa ŋu kplikplikpli. Ne míewɔe alea, míatu ‘gbɔgbɔa ƒe kutsetsea’ ɖo.—Gal. 5:22, 23.

14. Ne míedi be Mawu nayi edzi ana gbɔgbɔ kɔkɔea mía, nu kawoe wòle be míaƒo asa na? (Kpɔ nɔnɔmetataa hã.)

¹⁴ Ne Mawu na gbɔgbɔ kɔkɔea mía, ele be míakpɔ nyuie be ‘míagatsi gbɔgbɔ la ƒe dzoa o.’ Ame siwo ƒe tamesusuwo le dzadzɛ eye wonɔa agbe dzadzɛ koe Mawu naa gbɔgbɔ kɔkɔea. Yehowa mayi  edzi ana eƒe gbɔgbɔa mí ne míaƒe nuŋububu kple nuwɔna mele dzadzɛ o. (1 Tes. 4:7, 8) Nenema kee mayi edzi ana gbɔgbɔ kɔkɔea mí ne “míedoa vlo nyagblɔɖiwo o.” (1 Tes. 5:20) Nya “nyagblɔɖiwo” si wozã le kpukpui sia mea fia gbedeasi siwo Mawu toa eƒe gbɔgbɔa dzi naa mí. Wo dometɔ aɖewo ku ɖe Yehowa ƒe ŋkekea kple ale si wòle be míawɔ nu kpata fifia ŋu. Mele be míasusui be Yehowa ƒe ŋkekea alo Armagedon mava le míaƒe agbenɔɣi o. Ke boŋ ele be míaɖee afia be míele mɔ kpɔm be ava kpuie to ale si míedoa vevie subɔsubɔdɔa eye míenɔa agbe dzadzɛ gbe sia gbee me.—2 Pet. 3:11, 12.

15. Nu kae míawɔ be gbɔgbɔ vɔ̃wo ƒe nufiafiawo kple alakpanyawo nagaflu mí o? (1 Tesalonikatɔwo 5:21)

¹⁵ Madidi o, tsitretsiɖeŋulawo ato mɔ aɖe dzi aɖe gbeƒãe be: “Ŋutifafa kple dedienɔnɔ” li. (1 Tes. 5:3) Ɣemaɣia, gbɔgbɔ vɔ̃wo ƒe nufiafiawo ayɔ anyigba dzi eye woaflu ame geɖe. (Nyaɖ. 16:13, 14) Be woagaflu míawo hã oa, ele be ‘míado nuwo katã kpɔ.’ (Xlẽ 1 Tesalonikatɔwo 5:21.) Helagbe me nya si gɔme woɖe be ‘do nu kpɔ’ nye nya si wotsɔ ɖɔa ale si amewo doa sika, klosalo kple ganu bubuwo kpɔna. Eya ta ehiã be míado nya siwo míesena kple nu siwo míexlẽna kpɔ akpɔe ɖa be wonyo ŋutɔŋutɔ hã. Nya sia nɔ vevie na Tesalonikatɔwo, gake ele vevie na mí wu, vevietɔ esi xaxa gãa le aƒe tum kabakaba ta. Mele be míaxɔ nya sia nya dzi se o, ke boŋ ele be míazã míaƒe nuŋububuŋutete atsɔ nya siwo míesena kple nu siwo míexlẽna asɔ kple nu si Biblia kple habɔbɔa fia mí. Ne míewɔe alea, gbɔgbɔ vɔ̃wo ƒe nufiafia aɖeke maflu mí o.—Lod. 14:15; 1 Tim. 4:1.

16. Mɔkpɔkpɔ nyui kae le mía si, eye nu kae esia aʋã mí be míawɔ?

¹⁶ Míenya be Yehowa ƒe amewo atsi agbe le xaxa gãa me. Gake le mí ame ɖekaɖekawo gomea, míenya ale si nuwo anɔ na mí le etsɔme o. (Yak. 4:14) Ke hã, ne míeku do ŋgɔ na xaxa gãa alo míetso xaxa gãa o, Yehowa ayra mí eye wòana míanɔ agbe tegbee ne míeyi edzi wɔ nuteƒe. Amesiaminawo awɔ ɖeka kple Kristo le dziƒo eye alẽ bubuawo anɔ paradiso me le anyigba dzi. Neva eme be míana míaƒe susu katã nanɔ míaƒe mɔkpɔkpɔ wɔnukua ŋu eye míanɔ dzadzraɖoɖi na Yehowa ƒe ŋkekea.