1-2. Nɔnɔme ka mee míele egbea si sɔ kple Lot tɔ?

 ALE SI gbegbe agbe nyui nɔnɔ yi toe le xexea me egbea nana míesena le mía ɖokui me abe ame dzɔdzɔe Lot ene. “Sedzimawɔlawo ƒe ŋukpenanuwɔwɔ dzimesesẽtɔe ɖe fu na [Lot] vevie,” elabe enyae be mía Fofo si le dziƒo lé fu nuwɔna gbegblẽwo. (2 Pet. 2:7, 8) Esi Lot vɔ̃a Mawu eye wòlɔ̃e taa, elé fu eŋɔlimetɔwo ƒe nuwɔna gbegblẽ mawo. Míawo hã míele ame siwo menɔa agbe ɖe Yehowa ƒe dzidzenuwo nu o eye wometsɔa ɖeke le eme oa dome egbea. Togbɔ be ele alea hã, ne míelɔ̃ Mawu eye míevɔ̃nɛa, míate ŋu ayi edzi anɔ agbe nyui.—Lod. 14:2.

² Yehowa na woŋlɔ mɔfiame kple dzideƒonyawo na mí le Lododowo ƒe agbalẽa me be wòakpe ɖe mía ŋu míayi edzi anɔ agbe nyui. Aɖaŋuɖoɖo nyui siwo le Lododowo ƒe agbalẽa me ate ŋu aɖe vi na Kristotɔwo katã—ŋutsuwo, nyɔnuwo, ɖeviwo kple ame tsitsiwo siaa.

3. Le Lododowo 17:3 ƒe nya nua, nu ka tae wòhiã be míadzɔ míaƒe dzi ŋu? (Kpɔ fotoa hã.)

³ Susu vevi si tae wòle be míakpɔ míaƒe kpɔɖeŋudzia tae nye be, Yehowa dzroa dzia me kpɔna. Esia fia be ekpɔa nu yia ŋgɔ wu ale si míele dzedzem le amewo ŋkume eye wòkpɔa ame si míenye ŋutɔŋutɔ le ememe. (Xlẽ Lododowo 17:3.) Yehowa alɔ̃ mí ne míena eƒe aɖaŋuɖoɖo siwo ana míanɔ agbe tegbeea yɔ míaƒe dzi me fũu. (Yoh. 4:14) Ne míewɔe alea, Satana ƒe alakpanyawo kple agbe ƒaƒã nɔnɔ si bɔ ɖe xexea me magblẽ nu le mía ŋu gbeɖe o. (1 Yoh. 5:18, 19) Ne míeyi edzi te ɖe Yehowa ŋua, míava lɔ̃e ɖe edzi eye míade bubu geɖe eŋu. Esi míedi gbeɖe be míawɔ nu wòave mía Fofo la o taa, nu vɔ̃ ŋu bubu ɖeɖe dzaa anyɔ ŋu na mí. Ne míedo go nɔnɔme aɖe si ate ŋu akplɔ mí ade nu vɔ̃ mea, anyo be míabia mía  ɖokui be, ‘Nu ka tae maɖoe koŋ awɔ nu wòave Ame si lɔ̃m vevie?’—1 Yoh. 4:9, 10.

4. Aleke Yehowa vɔvɔ̃ kpe ɖe nɔvinyɔnu aɖe ŋu be wòƒo asa na gbɔdɔdɔ manɔsenu?

⁴ Nɔvinyɔnu Marta si le Croatia ɖo nɔnɔme aɖe me si ate ŋu ana wòaƒo eɖokui ɖe gbɔdɔdɔ manɔsenu me. Egblɔ be: “Menɔ bɔbɔe nam be mabu nuwo ŋu nyuie eye mawɔ avu kple dzodzro vɔ̃ ma o. Gake Yehowa vɔvɔ̃ kpɔ tanye.” b Aleke mawuvɔvɔ̃ kpɔ Marta tae? Egblɔ be yede ŋugble le nu si gbegbe wòagblẽ ne yeƒo ye ɖokui ɖe gbɔdɔdɔ manɔsenu me ŋu. Míawo hã míate ŋu awɔe nenema, eye míabu ale si gbegbe nuwɔna mawo ate ŋu agbã dzi na Yehowa eye mɔnukpɔkpɔ si li be míasubɔe tegbeea nato mía ŋua ŋu.—1 Mose 6:5, 6.

5. Nu kae míate ŋu asrɔ̃ tso nu si dzɔ ɖe Leo dzi me?

⁵ Ne míevɔ̃a Yehowa la, ke míakpɔ nyuie be míagade ha kple ame siwo wɔa nu gbegblẽwo o. Leo, si le Congo, mewɔ ɖe aɖaŋuɖoɖo sia dzi o. Esi wòxɔ nyɔnyrɔ ƒe ene megbea, eva nɔ ha dem kple ame siwo wɔa nu gbegblẽ. Esusui be naneke megblẽ le ha si dem yele ŋu o, elabe ye ŋutɔ yemele nu gbegblẽwo wɔm o. Gake eteƒe medidi o, hadede mawo kplɔe de aha tsu nono me eye wòva ƒo eɖokui ɖe gbɔdɔdɔ manɔsenu me. Eva nɔ ŋugble dem le nu siwo edzilawo fiae tso Biblia me kple ale si wòkpɔ dzidzɔ esime wònɔ Yehowa subɔm la ŋu. Esiae wɔe be wòva nyɔ le eɖokui me. Hamemetsitsiwo hã kpe ɖe eŋu wòtrɔ gbɔ va Yehowa gbɔ. Fifia, dzi le edzɔm ŋutɔ, eye wònye hamemetsitsi kple mɔɖela vevi.

6. Kpɔɖeŋunyɔnu eve kawo ŋue míaƒo nu tsoe le nyati sia me?

⁶ Azɔ míadzro Lododowo ta 9 lia si ƒo nu tso kpɔɖeŋunyɔnu eve ŋu me. Ðeka le tsitre ɖi na nunya, eye evelia le tsitre ɖi na bometsitsi. (Tsɔe sɔ kple Romatɔwo 5:14;  Galatiatɔwo 4:24.) Ne míele eme dzromaa, nenɔ susu me na wò be Satana ƒe xexea yɔ fũu kple gbɔdɔdɔ manɔsenu kple gbɔdɔnuwɔnawo kpɔkpɔ. (Ef. 4:19) Eya ta ele vevie be míayi edzi avɔ̃ Mawu eye míaƒo asa na nu vɔ̃ɖi. (Lod. 16:6) Míeɖanye ŋutsu alo nyɔnu o, Lododowo ta 9 lia me dzodzro aɖe vi na mí katã. Woƒo nu tso nyɔnu evea siaa ŋu be wole ame siwo si nuteƒekpɔkpɔ mesu o, alo ame siwo si “dzi nyanu mele o” la kpem. Ðeko wòle abe wo dometɔ ɖe sia ɖe le gbɔgblɔm be, ‘Va ɖu nu le nye aƒe me’ ene. (Lod. 9:1, 5, 6, 13, 16, 17; etenuŋɔŋlɔ) Vovototo gã aɖe le nu si ado tso eme na ame siwo awɔ ɖe amekpekpeawo dometɔ ɖe sia ɖe dzi la me.

7. Le Lododowo 9:13-18 ƒe nya nua, nu kae adzɔ ɖe ame siwo katã wɔ ɖe ‘nyɔnu movitɔa’ ƒe amekpekpea dzi la dzi? (Kpɔ nɔnɔmetataa hã.)

⁷ Wò ya bu amekpekpe si tso “nyɔnu movitɔ” la gbɔ ŋu kpɔ. (Xlẽ Lododowo 9:13-18.) Ele ɣli dom ŋumakpetɔe le ame siwo si nuteƒekpɔkpɔ mesu oa yɔm be woava yeƒe aƒe me ava ɖu nu kpli ye. Nu kae dzɔna ɖe ame siwo yia egbɔa dzi? “Tsieƒe ƒe gogloeƒe kee” wova kpɔa wo ɖokui le. Ðewohĩ esia na nèɖo ŋku kpɔɖeŋunyagbɔgblɔ si ku ɖe nyɔnu dzeha kple nyɔnu ahasitɔ si le Lododowo ƒe ta siwo do ŋgɔ mea dzi. Biblia gblɔ be: “Eƒe aƒe kplɔa ame yia ku me.” (Lod. 2:11-19) Lododowo 5:3-10 hã xlɔ̃ nu mí tso “nyɔnu dzeha” bubu aɖe si ƒe “afɔwo ɖi abu yina ku gbɔ” la ŋu.

8. Nyametsotso kae ate ŋu adze ŋgɔ mí?

⁸ Ehiã be ame siwo kpem ‘nyɔnu movitɔa’ lea natso nya me ne woayi loo alo womayi o. Nyametsotso ma tɔgbi ate ŋu adze ŋgɔ mí egbea. Le kpɔɖeŋu me, nu kae míawɔ ne ame aɖe dze agbagba be yeana míaƒo mía ɖokui ɖe gbɔdɔdɔ manɔsenu me, alo ne míaƒe ŋku kli amamaɖeɖefoto aɖe?

9-10. Susu kawo tae wòle be míaƒo asa na gbɔdɔdɔ manɔsenu?

⁹ Susu nyuiwo li siwo tae wòle be míaƒo asa na gbɔdɔdɔ manɔsenu. Nya siwo ‘nyɔnu movitɔa’ gblɔa ƒe ɖee nye be: “Tsi si wofi la, ɖe wòvivina.” Nu kae “tsi si wofi la” le tsitre ɖi na? Biblia tsɔ gbɔdɔnuwɔna siwo yia edzi le srɔ̃tɔwo domea sɔ kple tsi nyui. (Lod. 5:15-18) Ŋutsu kple nyɔnu siwo ɖe wo nɔewo le se nu ate ŋu adɔ wo nɔewo gbɔ eye woase vivi nɛ. Esia to vovo sãa na “tsi si wofi.” “Tsi si wofi la” le tsitre ɖi na gbɔdɔdɔ si mele se nu o. Zi geɖea, ame siwo ƒoa wo ɖokuiwo ɖe emea wɔnɛ le bebe me abe ale si fiafi wɔa nui ene. “Tsi si wofi” alo gbɔdɔdɔ manɔsenu  adze abe ɖe wòvivi ene, vevietɔ ne ame siwo ƒoa wo ɖokui ɖe eme susui be ame aɖeke manya nu tso nuvɔ̃gbe si nɔm yewole ŋu o. Woble wo ɖokuiwo ŋutɔ! Elabe Yehowa kpɔa nu sia nu. Ŋkubiãnya gã aɖee wònye be ame kple Yehowa dome nagblẽ. Eya ta naneke ‘mevivi’ le nu si gbegbe wòagblẽ le wo ŋu la ŋu o. (1 Kor. 6:9, 10) Gake gbɔdɔdɔ manɔsenu me tsonu gbegblẽawo mese ɖe afi ma o.

¹⁰ Ame siwo ƒoa wo ɖokuiwo ɖe gbɔdɔdɔ manɔsenu mea sena le wo ɖokuiwo me be viɖe aɖeke mele yewo ŋu o, ŋu kpea wo, wofɔa gbɔmeyafu, eye woƒe ƒomewo gbãna. Eya ta nunya le eme be míagbe nyɔnu movitɔa ƒe amekpekpea. Azɔ hã ame siwo ƒoa wo ɖokuiwo ɖe gbɔdɔdɔ manɔsenu mea kple Yehowa dome xɔlɔ̃wɔwɔa me gblẽna, eye woxɔa dɔléle siwo ate ŋu akplɔ wo ayi ku me. (Lod. 7:23, 26) Ta 9 ƒe kpukpui 18 ƒo eta be: “Tsieƒe ƒe gogloeƒe kee” ame siwo ƒoa wo ɖokuiwo ɖe gbɔdɔdɔ manɔsenu me akpɔ wo ɖokuiwo le. Ke nu ka tae ame geɖe lɔ̃na ɖe eƒe amekpekpe si me afɔku lea dzi?—Lod. 9:13-18.

11. Aleke amamaɖeɖe kple gbɔdɔdɔ ƒe nuwɔnawo kpɔkpɔ gblẽa nu le ame ŋui?

¹¹ Nu ɖeka aɖe si bɔ si wòle be míaƒo asa nae nye amamaɖeɖe kple gbɔdɔdɔ ƒe nuwɔnawo kpɔkpɔ. Ame aɖewo susui be megblẽa naneke le ame ŋu o. Gake le nyateƒe mea, afɔku le amamaɖeɖe kple gbɔdɔdɔ ƒe nuwɔnawo kpɔkpɔ me. Egblẽa nu le ame ŋu eye wòva zua numame. Ne amewo kpɔ amamaɖeɖe ƒe fotowoa, etsia susu me na wo ɖikaa eye wòsesẽna be woaŋlɔe be. Azɔ hã amamaɖeɖe kple gbɔdɔdɔ ƒe nuwɔnawo kpɔkpɔ mewua dzodzro vɔ̃ si le ame me o, ke boŋ ɖe wònyɔnɛ ɖe ame me. (Kol. 3:5; Yak. 1:14, 15) Eya ta ame siwo kpɔa amamaɖeɖe kple gbɔdɔdɔ ƒe nuwɔnawo ƒe foto alo videowo va ƒoa wo ɖokui ɖe nuwɔna mawo me.

12. Aleke míaɖee afia be míele ŋudzɔ ɖe foto siwo ate ŋu anyɔ gbɔdɔdɔ ƒe dzodzro vɔ̃ ɖe mía mea ŋu?

¹² Nu kae wòle be mí Kristotɔwo míawɔ ne amamaɖeɖe ƒe foto aɖe dze le míaƒe mɔ̃wo dzi? Ele be míaɖee ɖa enumake! Esia anɔ bɔbɔe na mí ne ƒomedodo si le mía kple Yehowa domee nye nu vevitɔ na mí. Le nyateƒe mea, foto siwo menye amamaɖeɖefotowo o gɔ̃ hã ate ŋu anyɔ gbɔdɔdɔ ƒe dzodzro ɖe ame me. Nu ka tae wòle be míaƒo asa na wo? Elabe mímadi be míaɖe afɔ aɖeke si akplɔ mí ade gbɔdɔdɔ manɔsenu me o. (Mat. 5:28, 29) Hamemetsitsi aɖe si le Thailand si ŋkɔe nye David gblɔ be: “Mebiaa ɖokuinye be: ‘Ne fotoawo menye amamaɖeɖefotowo o hãa, ɖe wòadze Yehowa ŋu ne meyi edzi le wo kpɔma?’ Nuwo ŋu bubu alea kpena ɖe ŋunye mewɔa nu le nunya me.”

13. Nu kae kpena ɖe mía ŋu míewɔa nu le nunya me?

¹³ Yehowa vɔvɔ̃ awɔe be míaƒo asa na nu siwo medzea eŋu o wɔwɔ eye akpe ɖe mía ŋu míawɔ nu le nunya me. Mawuvɔvɔ̃e nye “nunya ƒe gɔmedzedze.” (Lod. 9:10) Esia dze ƒãa le Lododowo ta 9 lia ƒe kpukpui gbãtɔwo me, afi si wotsɔ “nunya vavãtɔ” sɔ kple kpɔɖeŋunyɔnu bubu le.

14. Amekpekpe bubu ka ŋue míexlẽ nu tsoe le Lododowo 9:1-6?

¹⁴ Xlẽ Lododowo 9:1-6. Le kpukpui siawo mea, woƒo nu tso amekpekpe bubu aɖe ŋu. Etso mía Wɔla Yehowa, Ame si gbɔ nunyawo katã dzɔ tsoa gbɔ. (Lod. 2:6; Rom. 16:27) Kpukpui mawo ƒo nu tso xɔ gã aɖe si ŋu sɔti adre le ŋu. Esia ɖee fia be Yehowa ƒe dɔme nyo eye wòle ame siwo  katã di be yewoasrɔ̃ nu tso egbɔ ne yewoadze nunyaa kpem.

15. Nu kae Mawu kpe mí be míawɔ?

¹⁵ Yehowa ƒe dɔme nyo ŋutɔ eye wònaa nu le agbɔsɔsɔ me. Nɔnɔme siawo dze le nyɔnu si woɖɔ le Lododowo ta 9 lia be enye “nunya vavãtɔ” la ƒe kpɔɖeŋua me. Ŋɔŋlɔa gblɔ be kpɔɖeŋunyɔnu sia tsɔ lã kple wain ɖo kplɔ̃ nyui aɖe eye wòkpe amewo be woava ɖu nu le yeƒe aƒe me. (Lod. 9:2) Le kpukpui 4 kple 5 ƒe nya nua, nunya vavãtɔ le ‘ame siwo si dzi nyanu mele oa’ kpem be ‘woava ɖu yeƒe abolo.’ Nu ka tae wòle be míawɔ ɖe nyɔnu si woɖɔ be enye nunya vavãtɔ ƒe amekpekpea dzi? Yehowa di be ye viwo nadze nunya eye woanɔ dedie. Medi be míakpe fu ato xaxawo me hafi adze nunya o. Esia tae “[wòdzra] nunya vavãtɔ ɖo ɖi na nu dzɔdzɔe wɔlawo.” (Lod. 2:7) Ne míevɔ̃a Yehowa la, míadi be míawɔ nu wòadze eŋu. Míaɖo to eƒe aɖaŋuɖoɖo nyuiawo, eye míawɔ ɖe wo dzi kple dzidzɔ.—Yak. 1:25.

16. Aleke mawuvɔvɔ̃ kpe ɖe Alain ŋu wòtso nya me nyuie, eye nu kae do tso eme?

¹⁶ Mawuvɔvɔ̃ kpe ɖe Alain si nye hamemetsitsi kple sukunufiala ŋu wòtso nya me nyuie. Egblɔ be: “Hanyeti nufiala bubuawo bua amamaɖeɖe kple gbɔdɔnuwɔnawo ƒe filmwo kpɔkpɔ be enye mɔ si dzi yewotona srɔ̃a nu tso gbɔdɔdɔ ŋu.” Gake Alain nya be alakpanyae. Egblɔ be: “Esi melɔ̃ Yehowa eye medea bubu eŋu taa, megbe gbidii be nyemakpɔ film mawo o. Eye meɖe susu si tae la me na nye dɔwɔhatiawo.” Alain nɔ wɔwɔm ɖe “nunya vavãtɔ” ƒe aɖaŋuɖoɖo si nye be míalé ‘gɔmesese ƒe mɔ atsɔ tẽe’ la dzi. (Lod. 9:6) Ale si wòtɔ afɔ to sesĩe wɔe be ehati nufiala aɖewo te Biblia sɔsrɔ̃ eye wova nɔ kpekpeawo dem.

17-18. Yayra ka kpɔm ame siwo wɔ ɖe “nunya vavãtɔ” ƒe amekpekpea dzi le fifia, eye yayra kae woakpɔ le etsɔme? (Kpɔ nɔnɔmetataa hã.)

¹⁷ Yehowa zã kpɔɖeŋunyɔnu eveawo tsɔ fia nu siwo míawɔ be míakpɔ dzidzɔ le etsɔme tegbeea mí. Ame siwo wɔna ɖe ‘nyɔnu movitɔa’ ƒe amekpekpea dzi la ƒoa wo ɖokuiwo ɖe gbɔdɔnuwɔnawo me kple susu be yewoakpɔ dzidzɔ. Gake womenya be nu si wɔm yewole agblẽ nu le yewo ŋu le etsɔme o. “Tsieƒe ƒe gogloeƒe kee” woava kpɔ wo ɖokuiwo le.—Lod. 9:13, 17, 18.

¹⁸ Gake eme anyo na ame siwo wɔ ɖe nyɔnu si le tsitre ɖi na “nunya vavãtɔ” la ƒe amekpekpea dzi! Dzi dzɔa wo, elabe nu siwo katã ana wo kple Yehowa dome nanɔ kplikplikplia su wo si. (Yes. 65:13) Yehowa gblɔ to nyagblɔɖila Yesaya dzi be: “Milé to ɖe ŋunye nyuie, ne miaɖu nu si  nyo, eye miakpɔ dzidzɔ ɖe nu damiwo ŋu.” (Yes. 55:1, 2) Míele agbagba dzem be míasrɔ̃ ale si míalɔ̃ nu siwo Yehowa lɔ̃ eye míalé fu nu siwo wòlé fui. (Ps. 97:10) Eye dzi dzɔa mí ne míekpe ame bubuwo hã be woava ne “nunya vavãtɔ” naɖe vi na wo. Ðeko wòle abe míele ɣli dom “le dua ƒe kɔkɔƒewo be, ‘Ame sia ame si si nuteƒekpɔkpɔ mesu o la, neva dze afii’” ene. Viɖe siwo mía kple ame siwo awɔ ɖe amekpekpea dzi akpɔ manɔ anyi ɣeyiɣi vi aɖe ko o, ke boŋ woanɔ anyi ɖaa eye woana míanɔ “agbe” tegbee ne míelé “gɔmesese ƒe mɔ tsɔ tẽe.”—Lod. 9:3, 4, 6.

19. Le Nyagblɔla 12:13, 14 ƒe nya nua, nu kae wòle be míaɖoe kplikpaa awɔ? (Kpɔ aɖaka si nye “ Mawuvɔvɔ̃ Ðea Vi Na Mí.”)

¹⁹ Xlẽ Nyagblɔla 12:13, 14. Neva eme be mawuvɔvɔ̃ nadzɔ míaƒe dzi ŋu eye wòakpe ɖe mía ŋu míanɔ agbe nyui, eye mía kple Yehowa dome nanɔ kplikplikpli le ŋkeke mamlɛ vɔ̃ɖi siawo me. Mina mawuvɔvɔ̃ naʋã mí be míayi edzi akpe ɖe ame geɖe ale si wòanya wɔe ŋu be woadi “nunya vavãtɔ” eye wòaɖe vi na wo.