NUSƆSRƆ̃NYATI 20
Nyaɖeɖefia Ƒe Agbalẽa—Nu Si Adzɔ Ðe Mawu Ƒe Futɔwo Dzi
“Woƒo wo nu ƒu ɖe teƒe si woyɔna le Hebrigbe me be, Armagedon.”—NYAÐ. 16:16.
HADZIDZI 150 Di Mawu Be Nàkpɔ Ðeɖe
NYA VEVIAWO *
1. Nya kae Nyaɖeɖefia ƒe agbalẽa gblɔ tso Mawu ƒe amewo ŋu?
NYAÐEÐEFIA ƒe agbalẽa ɖee fia be woɖo Mawu Fiaɖuƒea anyi le dziƒo, eye wonya Satana ɖa le dziƒo. (Nyaɖ. 12:1-9) Esia na ame siwo le dziƒo kpɔ gbɔdzɔe, gake ehe kuxiwo vɛ na mí. Nu ka tae? Elabena Satana do dziku vevie ɖe ame siwo le nuteƒe wɔm na Yehowa le anyigba dzi ŋu.—Nyaɖ. 12:12, 15, 17.
2. Nu kae akpe ɖe mía ŋu be míayi edzi awɔ nuteƒe?
2 Nu kae akpe ɖe mía ŋu be míayi edzi awɔ nuteƒe togbɔ be Satana tɔ ŋku mí hã? (Nyaɖ. 13:10) Ðekae nye be míanya nu siwo ava dzɔ le etsɔme. Le kpɔɖeŋu me, apostolo Yohanes ƒo nu tso yayra siwo míakpɔ dometɔ aɖewo ŋu le Nyaɖeɖefia ƒe agbalẽa me. Yayra mawo dometɔ aɖee nye be woatsrɔ̃ Mawu ƒe futɔwo katã. Azɔ na míakpɔ ale si Nyaɖeɖefia ƒe agbalẽa ɖɔ futɔ siawo kple nu si ava dzɔ ɖe wo dzi.
WOZÃ “DZESIWO” TSƆ ÐƆ MAWU ƑE FUTƆWO
3. Dzesi siwo wozã le Nyaɖeɖefia ƒe agbalẽa me dometɔ aɖewo ɖe?
3 Le Nyaɖeɖefia ƒe gɔmedzedzea, wona míenya be wozã “dzesiwo,” alo nu siwo nye kpɔɖeŋuwo, tsɔ ɖɔ nu siwo míava xlẽ le agbalẽa me. (Nyaɖ. 1:1) Wozã kpɔɖeŋuwo tsɔ ɖɔ Mawu ƒe futɔwo. Woƒo nu tso lã wɔadã vovovowo ŋu. Le kpɔɖeŋu me, wogblɔ be “lã wɔadã aɖe [le] dodom tso atsiaƒu me, dzo ewo kple ta adre li nɛ.” (Nyaɖ. 13:1) Le ema yomea, woƒo nu tso “lã wɔadã bubu aɖe [ŋu] wòle dodom tso anyigba me.” Lã wɔadã sia ƒoa nu abe ʋɔ driba ene, eye “wòna dzo . . . ge tso dziƒo.” (Nyaɖ. 13:11-13) Eyome míekpɔ “lã wɔadã aɖe si biã helĩhelĩ,” eye gbolo aɖe bɔbɔ nɔ edzi. Lã wɔadã etɔ̃ siawo katã nye Yehowa Mawu ƒe futɔwo eye wotsi tsitre ɖe eƒe Fiaɖuƒea ŋu ɣeyiɣi didi aɖee nye esia. Eya ta ele vevie be míanya futɔ siawo.—Nyaɖ. 17:1, 3.
LÃ GÃ ENE
Wodo “tso atsiaƒu la me.” (Dan. 7:1-8, 15-17) Wotsi tre ɖi na xexemeŋusẽ siwo katã ƒe nuwɔna kpɔ ŋusẽ ɖe Mawu ƒe amewo dzi le mɔ ɖedzesi nu tso Daniel ƒe ŋkekea me. (memama 4, 7 lia)
4-5. Aleke Daniel 7:15-17 kpe ɖe mía ŋu míese dzesi siwo le Nyaɖeɖefia ƒe agbalẽa me gɔme?
4 Hafi míate ŋu anya ame siwo futɔ siawo nyea, ele be míase nu si dzesiawo fia gɔme. Nu si akpe ɖe mía ŋue nye be míaɖe mɔ Biblia ŋutɔ naɖe eme na mí. Biblia ƒe agbalẽ bubuwo na míenya nu si dzesi siwo dze le Nyaɖeɖefia ƒe agbalẽa me dometɔ geɖe le tsitre ɖi na. Le kpɔɖeŋu me, nyagblɔɖila Daniel ku drɔ̃e, si me wòkpɔ “lã gã ene do tso atsiaƒu la me.” (Dan. 7:1-3) Daniel na míenya nu si wole tsitre ɖi na. Wole tsitre ɖi na “fia” alo dziɖuɖu ene. (Xlẽ Daniel 7:15-17.) Numeɖeɖe sia na míekpɔe be, lã siwo ŋu woƒo nu tsoe le Nyaɖeɖefia ƒe agbalẽa me hã le tsitre ɖi na dunyahedziɖuɖuwo.
5 Azɔ na míadzro dzesi siwo ŋu woƒo nu tsoe le Nyaɖeɖefia ƒe agbalẽa me dometɔ aɖewo me, be míakpɔ ale si Biblia na míenya nu si dzesi mawo fia. Míadze egɔme kple lã wɔadã siwo do kplɔ wo nɔewo ɖo. Gbãa, míakpɔ nu si wole tsitre ɖi na. Eyome míakpɔ nu si ava dzɔ ɖe wo dzi. Eye mlɔeba míadzro nu si esiawo katã fia na mí me.
WOÐE AME SIWO MAWU ƑE FUTƆWO NYE ÐE GO
LÃ WƆADÃ SI TA ADRE LI NA
Edo “tso atsiaƒu me,” eto ta adre kple dzo ewo, eye fiakuku ewo le dzoawo dzi. (Nyaɖ. 13:1-4) Lã wɔadã sia le tsitre ɖi na dunyaheŋusẽ siwo katã ɖu amegbetɔwo dzi le ŋutinya katã me. Ta adreawo le tsitre ɖi na xexemeŋusẽ adre siwo ƒe nuwɔna kpɔ ŋusẽ ɖe Mawu ƒe amewo dzi le mɔ ɖedzesi nu. (memama 6-8 lia)
6. Nu kae lã wɔadã si ta adre li na, si ŋu woƒo nu tsoe le Nyaɖeɖefia 13:1-4 le tsitre ɖi na?
6 Nu kae lã wɔadã si ta adre li na la nye? (Xlẽ Nyaɖeɖefia 13:1-4.) Lã wɔadã sia ɖi laklẽ, gake eƒe afɔwo le abe sisiblisi tɔwo ene, eƒe nu le abe dzata ƒe nu ene, eye wòto dzo ewo ɖe ta. Nu siwo dze le lã sia ŋu kee dze le lã vovovo ene siwo ŋu woƒo nu tsoe le Daniel ta 7 lia me la ŋu. Vovototoa koe nye be, togbɔ be lã vovovo ene ŋue Daniel ƒe agbalẽa ƒo nu tso hãa, nu siwo dze le wo ŋu la katã dze le lã ɖeka pɛ ŋu le Nyaɖeɖefia ƒe agbalẽa me. Menye dziɖuɖu ɖeka aɖe alo xexemefiaɖuƒe ɖeka aɖe koe lã sia le tsitre ɖi na o. Wogblɔ tso lã sia ŋu be ekpɔ ŋusẽ ɖe “to sia to kple ame ɖe sia ɖe ƒomevi kple gbegbɔgblɔ sia gbegbɔgblɔ kpakple dukɔ sia dukɔ” dzi. Eya ta ekeke ta wu dukɔ ɖeka aɖe ko ƒe dziɖuɖu. (Nyaɖ. 13:7) Eme kɔ be, lã wɔadã sia le tsitre ɖi na dunyaheŋusẽ siwo katã kpɔ ŋusẽ ɖe amegbetɔwo dzi le ŋutinya katã me. *—Nyagb. 8:9.
7. Nu kae lã wɔadã la ƒe ta adreawo dometɔ ɖe sia ɖe le tsitre ɖi na?
7 Nu kae lã wɔadã la ƒe ta adreawo dometɔ ɖe sia ɖe le tsitre ɖi na? Nyaɖeɖefia ta 17 lia ate ŋu akpe ɖe mía ŋu. Eƒo nu tso lã wɔadã si le Nyaɖeɖefia ta 13 lia ƒe legba ŋu. Nyaɖeɖefia 17:10 gblɔ be: “Wonye fia adre: Atɔ̃ dze anyi, ɖeka li, mamlɛtɔ la meva ɖo haɖe o; ke ne eva ɖo la, anɔ anyi ɣeyiɣi vi aɖe ko.” Le dunyaheŋusẽ siwo katã Satana zã mea, wo dometɔ adre, siwo le abe ‘tawo’ ene koŋue ɖe dzesi. Woawoe nye xexemeŋusẽ siwo kpɔ ŋusẽ gã aɖe ɖe Mawu ƒe amewo dzi. Le apostolo Yohanes ƒe ŋkekea mea, wo dometɔ atɔ̃ do xoxo. Woawoe nye: Egipte, Asiria, Babilon, Medo-Persia, kple Hela. Xexemeŋusẽ adelia, si nye Roma, kpɔtɔ nɔ dzi ɖum esime woɖe nuwo fia Yohanes. Ke dziɖuɖu kae ava nye xexemeŋusẽ mamlɛtɔ alo ta adrelia?
8. Nu kae lã wɔadã la ƒe ta adrelia le tsitre ɖi na?
8 Nyagblɔɖi siwo le Daniel ƒe agbalẽa me akpe ɖe mía ŋu míade dzesi lã wɔadã la ƒe ta adrelia, si nye mamlɛtɔ. Xexemeŋusẽ kae le dzi ɖum le nuwuɣia, si nye “Aƒetɔ la ƒe ŋkeke la” me? (Nyaɖ. 1:10) Wonye dziɖuɖu eve siwo wɔ ɖeka—Britain kple Amerika, alo Anglo-Amerika Xexemeŋusẽa. Eya ta míate ŋu aƒo nya ta be Anglo-Amerikae nye lã wɔadã la ƒe ta adrelia, si ŋu woƒo nu tsoe le Nyaɖeɖefia 13:1-4.
LÃ WƆADÃ SI TO DZO EVE ABE ALẼVI TƆ ENE
Edo “tso anyigba me” eye wòƒoa nu “abe ʋɔ driba ene.” Ena ‘dzo ge tso dziƒo’ eye wòwɔ dzesiwo abe “aʋatsonyagblɔɖila” la ene. (Nyaɖ. 13:11-15; 16:13; 19:20) Lã wɔadã si to dzo eve, si woyɔ be aʋatsonyagblɔɖila la le tsitre ɖi na Anglo-Amerika Xexemeŋusẽa. Ele anyigba dzi nɔlawo katã blem, eye wògblɔna na wo be “woawɔ lã woadã” si ta adre kple dzo ewo li na la “ƒe legba.” (memama 9 lia)
9. Nu kae lã si ‘dzo eve le ta na abe alẽvi tɔ ene’ la le tsitre ɖi na?
9 Nyaɖeɖefia ta 13 lia gblɔ be lã wɔadã la ƒe ta adrelia, si nye Anglo-Amerika Xexemeŋusẽa wɔa nu abe lã si ‘to dzo eve ɖe ta abe alẽvi tɔ ene, gake wòƒoa nu abe ʋɔ driba ene.’ Lã sia wɔ “dzesi gãwo, eye wòna dzo gɔ̃ hã ge tso dziƒo va dze anyigba dzi le amegbetɔwo ŋkume.” (Nyaɖ. 13:11-15) Nyaɖeɖefia ta 16 kple ta 19 lia yɔ lã wɔadã sia be “aʋatsonyagblɔɖila.” (Nyaɖ. 16:13; 19:20) Daniel ƒe agbalẽa hã gblɔ nya ma tɔgbi be, Anglo-Amerika Xexemeŋusẽa “agblẽ nu eteƒe makɔ o.” (Dan. 8:19, 23, 24.) Nu ma tututue dzɔ le Xexemeʋa Evelia wɔɣi. Amerika kple Britain ƒe dzɔdzɔmeŋutinunyalawo ye ƒo ƒu wɔ atɔmik-bɔmb eve siwo woda, si gblẽ nu eteƒe mekɔ o, si he Xexemeʋa Evelia va nuwuwui. Ne míagblɔea, Anglo-Amerika Xexemeŋusẽa na “dzo gɔ̃ hã ge tso dziƒo va dze anyigba dzi.”
LÃ WƆADÃ SI BIÃ HELĨHELĨ
Gbolo, si nye Babilon Gã la bɔbɔ nɔ edzi. Lã sia le tsitre ɖi na fia enyilia. (Nyaɖ. 17:3-6, 8, 11) Gbãa, gbolo sia kpɔ ŋusẽ ɖe lã wɔadã la dzi, gake lã la va trɔ ɖe eŋu eye wòtsrɔ̃e. Gboloa tsi tre ɖi na alakpasubɔsubɔhawo katã ƒe ƒuƒoƒo. Egbea, lã la tsi tre ɖi na Dukɔ Ƒoƒuawo, si doa dunyahehe ɖe ŋgɔ le xexea me katã. (memama 10, 14-17 lia)
10. Nu kae nye “lã wɔadã la ƒe legba” la? (Nyaɖeɖefia 13:14, 15; 17:3, 8, 11)
10 Míegatrɔ ɖe lã wɔadã bubu aɖe ŋu. Eɖi lã si to ta adrea. Nu si to vovo le eŋu koe nye be, ebiã helĩhelĩ. Woyɔe be “lã wɔadã la ƒe legba” eye wogblɔ be enye “fia enyilia.” * (Xlẽ Nyaɖeɖefia 13:14, 15; 17:3, 8, 11.) Wogblɔ tso “fia” sia ŋu be, enɔ anyi kpɔ, gake megali o, eye wògado. Ale si woɖɔe la sɔ pɛpɛpɛ kple Dukɔ Ƒoƒuawo ƒe habɔbɔ, si ƒe taɖodzinue nye be, yewoado xexea me ƒe dunyahenyawo ɖe ŋgɔ! Woyɔnɛ tsã be Dukɔwo Ƒe Nubabla. Gake le Xexemeʋa Evelia mea, megava nɔ anyi o. Emegbea, egava fɔ ɖe te, eye wova yɔe be Dukɔ Ƒoƒuawo.
11. Nu kae lã wɔadãawo dea dzi ƒo na amewo be woawɔ, eye nu ka tae mele be míavɔ̃ o?
11 Lã wɔadã la alo dziɖuɖuwo, toa woƒe nyagbɔgblɔwo dzi dea dzi ƒo na amewo be woatsi tsitre ɖe Yehowa kple eƒe amewo ŋu. Yohanes gblɔ be wole “anyigba blibo la dzi fiawo” nu ƒom ƒu na Armagedon-ʋa, si nye “Mawu Ŋusẽkatãtɔ la ƒe ŋkeke gã la ƒe aʋawɔwɔ.” (Nyaɖ. 16:13, 14, 16) Gake mele be míavɔ̃ o, elabena mía Mawu Gã, Yehowa, atso enumake axɔ na ame siwo katã le eƒe dziɖuɖu ƒe akpa dzi.—Eze. 38:21-23.
12. Nu kae ava dzɔ ɖe lã wɔadãawo katã dzi?
12 Nu kae ava dzɔ ɖe lã wɔadãawo katã dzi? Nyaɖeɖefia 19:20 gblɔ be: “Wolé lã wɔadã la kple aʋatsonyagblɔɖila, si wɔ dzesiwo le eŋkume tsɔ flu ame siwo xɔ lã wɔadã la ƒe dzesia, kple ame siwo de ta agu na eƒe legba la. Wotsɔ wo kple evea siaa ƒu gbe agbagbee ɖe dzota si me dzokpe le bibim le la me.” Eya ta esime ŋusẽ kpɔtɔ le dziɖuɖu siawo, siwo nye Mawu ƒe futɔwo ŋua, woatsrɔ̃ wo ɖa keŋkeŋ.
13. Kuxi kae xexea me dziɖuɖuwo ahe ava Kristotɔwo dzi?
13 Nu kae esia fia na mí? Ele be mí Kristotɔwo míawɔ nuteƒe na Mawu kple eƒe Fiaɖuƒea. (Yoh. 18:36) Esia fia be, míagade akpa aɖeke dzi le xexe sia ƒe dunyahenyawo me o. Esia wɔwɔ ate ŋu asesẽ na mí, elabe xexea me dziɖuɖuwo di be míato míaƒe nuwɔna kple nyagbɔgblɔwo dzi anɔ yewoƒe akpa dzi bliboe. Ame siwo ana ta alɔ̃ anɔ woƒe akpa dzi la axɔ lã wɔadã la ƒe dzesi la. (Nyaɖ. 13:16, 17) Yehowa ƒe dziku ava ame sia ame si xɔ dzesi ma dzi, eye agbe mavɔ ato eŋu. (Nyaɖ. 14:9, 10; 20:4) Eya ta aleke kee woɖazi mía dzii o, ele be mía dometɔ ɖe sia ɖe naɖoe kplikpaa be yemade dunyaheha aɖeke dzi o!
WOATSRƆ̃ GBOLO GÃ LA
14. Le Nyaɖeɖefia 17:3-5 ƒe nya nua, nu wɔmoyaa bubu kae apostolo Yohanes gakpɔ?
14 Apostolo Yohanes gblɔ be, yegakpɔ nu bubu aɖe si ‘wɔ moyaa ŋutɔ.’ Nu kae wòkpɔ? Ekpɔ nyɔnu aɖe bɔbɔ nɔ lã wɔadãawo dometɔ ɖeka dzi. (Nyaɖ. 17:1, 2, 6) Biblia ɖɔ nyɔnua be enye “gbolo gã,” eye eŋkɔe nye “Babilon Gã la.” Nyɔnu sia wɔ “ahasi” kple “anyigbadzifiawo.”—Xlẽ Nyaɖeɖefia 17:3-5.
15-16. Nu kae nye “Babilon Gã la,” eye aleke míewɔ nya?
15 Nu kae nye “Babilon Gã la”? Gbolo sia menye dunyahedziɖuɖuwo o, elabe wogblɔ be ewɔ ahasi kple dunyahedziɖuɖuwo. (Nyaɖ. 18:9) Le nyateƒe mea, edze agbagba be yeakpɔ ŋusẽ ɖe wo dzi, eya ta woɖɔe be ebɔbɔ nɔ anyi ɖe wo dzi. Azɔ hã, mate ŋu atsi tsitre ɖi na Satana ƒe xexea ƒe asitsala ŋuklẽlawo o, elabe woyɔ asitsahawo tẽe le Biblia ƒe akpa bubuwo be “anyigbadzisitsalawo.”—Nyaɖ. 18:11, 15, 16.
16 Le Ŋɔŋlɔawo mea, nya “gbolo” ate ŋu afia ame aɖe si gblɔna be yesubɔa Mawu, gake wògasubɔa trɔ̃ eye wòdze xɔ̃ xexea. (1 Kron. 5:25; Yak. 4:4) Gake Biblia gblɔ tso ame siwo subɔa Mawu nuteƒewɔwɔtɔe ŋu be wole “dzadzɛ” alo wonye “ɖetugbui leaƒewo.” (2 Kor. 11:2; Nyaɖ. 14:4) Blema Babilon ye alakpasubɔsubɔ dzɔ tso. Esia fia be Babilon Gã la tsi tre ɖi na alakpasubɔsubɔwo katã. Le nyateƒe mea, eyae nye alakpasubɔsubɔhawo katã ƒe ƒuƒoƒo.—Nyaɖ. 17:5, 18; kpɔ jw.org nyati si nye “Nu Kae Nye Babilon Gã La?”
17. Nu kae adzɔ ɖe Babilon Gã la dzi?
17 Nu kae adzɔ ɖe Babilon Gã la dzi? Nyaɖeɖefia 17:16, 17 ɖo nya ma ŋu be: “Dzo ewo siwo nèkpɔ kple lã wɔadã la, woawo alé fu gbolo la, woagblẽe aɖe amae, aɖu eƒe ŋutilã, eye woatɔ dzoe wòafiã keŋkeŋ. Elabena Mawu tsɔe de woƒe dzi me be woawɔ nu si yeɖo ɖe tame la dzi.” Yehowa ana lã wɔadã si biã helĩhelĩ, si nye Dukɔwo Ƒoƒuawo, nadze alakpasubɔsubɔhawo katã dzi, eye woatsrɔ̃ wo ɖa keŋkeŋ.—Nyaɖ. 18:21-24.
18. Nu kawoe míawɔ be míagade Babilon Gã la dzi le mɔ aɖeke nu o?
18 Nu kae esia fia na mí? Ele be míakpɔ egbɔ be míaƒe ‘subɔsubɔ le dzadzɛ, eye ɖiƒoƒo mele eŋu o le mía Mawu ŋkume’ ɣesiaɣi. (Yak. 1:27) Mele be míaɖe mɔ be Babilon Gã la ƒe alakpanufiafiawo, aʋatsodzixɔsewo, agbe nyui nɔnɔ ƒe toyiyi, kple gbɔgbɔyɔyɔnuwɔnawo nakpɔ ŋusẽ ɖe mía dzi gbeɖe o! Eye míayi edzi anɔ gbeƒã ɖem na amewo be ‘woado go le eme,’ ale be woagaxɔ eƒe fuwɔamea ƒe ɖeke o.—Nyaɖ. 18:4.
WOATSRƆ̃ MAWU ƑE FUTƆ GÃTƆ LA
ƲƆ DRIBA HƐ̃ LA
Satanae naa ŋusẽ lã wɔadã la. (Nyaɖ. 12:3, 9, 13; 13:4; 20:2, 10) Woade Satana si nye Yehowa ƒe futɔ gãtɔ aʋli me hena ƒe 1,000. Emegbea, woatsɔ Satana aƒu gbe “ɖe dzota, si me dzokpe le bibim le la me.” (memama 19-20 lia)
19. Nu kae “ʋɔ driba hɛ̃ gã” sia nye?
19 Nyaɖeɖefia ƒe agbalẽa gaƒo nu tso “ʋɔ driba hɛ̃ gã” aɖe ŋu. (Nyaɖ. 12:3) Ʋɔ driba sia wɔ aʋa kple Yesu kpakple mawudɔlawo. (Nyaɖ. 12:7-9) Ewɔa aʋa kple Mawu ƒe amewo, eye wònaa ŋusẽ amegbetɔ ƒe dziɖuɖuwo. (Nyaɖ. 12:17; 13:4) Nu kae nye ʋɔ driba sia? Eyae nye “da xoxo la, si woyɔna be Abosam kple Satana.” (Nyaɖ. 12:9; 20:2) Eyae le megbe na ame siwo katã nye Yehowa ƒe futɔwo.
20. Nu kae adzɔ ɖe ʋɔ driba la dzi?
20 Nu kae adzɔ ɖe ʋɔ driba la dzi? Nyaɖeɖefia 20:1-3 gblɔ be mawudɔla aɖe atsɔ Satana aƒu gbe ɖe aʋli me wòanɔ abe ɖe wòle gaxɔ me ene. Ne Satana le afi maa, magate ŋu “[aflu] dukɔwo azɔ o va se ɖe esime ƒe akpe ɖeka la wu enu.” Mlɔebaa, woatsɔ Satana kple eƒe gbɔgbɔ vɔ̃wo aƒu gbe ɖe “dzota, si me dzokpe le bibim le” la me. Esia fia be, woatsrɔ̃ Satana kple eƒe gbɔgbɔ vɔ̃wo ɖa keŋkeŋ. (Nyaɖ. 20:10) Bu ale si xexea me anɔ ɣemaɣi ŋu kpɔ. Ɣeyiɣi dodzidzɔname aɖee wòanye!
21. Nu ka tae dzi dzɔ mí le nu siwo míexlẽ le Nyaɖeɖefia ƒe agbalẽa me ta?
21 Edzɔ dzi na mí ŋutɔ be míeva se nu si dzesi siwo le Nyaɖeɖefia ƒe agbalẽa me fia gɔme! Menye ɖeko míeva nya ame siwo Yehowa ƒe futɔwo nye ko evɔ o; míeva kpɔ nu si adzɔ ɖe wo dzi hã. Nyateƒee, “dzidzɔtɔe nye ame si xlẽa nyagblɔɖi sia me nyawo sesĩe kple ame siwo sea wo”! (Nyaɖ. 1:3) Gake ne wotsrɔ̃ Mawu ƒe futɔwo ɖa vɔa, yayra kawoe ame siwo wɔa nuteƒe akpɔ? Míadzro nya ma me le nyati si kplɔe ɖo me.
HADZIDZI 23 Yehowa Ƒe Dziɖuɖu Dze Egɔme
^ Nyaɖeɖefia ƒe agbalẽa zã dzesiwo tsɔ ɖɔ Mawu ƒe futɔwo. Daniel ƒe agbalẽa akpe ɖe mía ŋu míase nu si dzesi mawo fia gɔme. Le nyati sia mea, míatsɔ nyagblɔɖi aɖewo le Daniel ƒe agbalẽa me asɔ kple nyagblɔɖi siwo ɖi wo le Nyaɖeɖefia ƒe agbalẽa me. Esia akpe ɖe mía ŋu míanya ame siwo Mawu ƒe futɔwo nye. Eyome míakpɔ nu si ava dzɔ ɖe wo dzi.
^ Nu bubu si ɖo kpe edzi be lã wɔadã si ta adre li na le tsitre ɖi na dunyaheŋusẽwo katã ye nye be, eto “dzo ewo.” Le Biblia mea, wozãa xexlẽme ewo wòfiaa blibonyenye.
^ “Fiakuku” mele lã wɔadã la ƒe legba la ƒe dzoawo ŋu abe ale si wòle le lã wɔadã gbãtɔ gome ene o. (Nyaɖ. 13:1) Ele alea elabe “fia adreawo mee wòdo tso,” eye woawo gbɔe wòxɔ eƒe ŋusẽ tsoe.—Kpɔ jw.org nyati si nye “Nu Kae Lã Wɔadã Si Biã Helĩhelĩ Si Ŋuti Woƒo Nu Tsoe Le Nyaɖeɖefia Ta 17 La Nye?”
