1. Nu kae Yehowa kpe esubɔlawo katã be woawɔ? (Kpɔ fotoawo hã.)

 AME ka ŋue míate ŋu atrɔ ɖo be wòafia mɔ mí eye wòafa akɔ na mí? Míenya ŋuɖoɖoa xoxo; eyae nye Yehowa Mawu. Le nyateƒe mea, eya ŋutɔ kpe mí be míado gbe ɖa na ye. Ɛ̃, edi be míanɔ “gbedodoɖa dzi ɣeawokatãɣi.” (1 Tes. 5:17) Míate ŋu ado gbe ɖa na Yehowa faa abiae be wòafia mɔ mí le míaƒe agbenɔnɔ ƒe akpa sia akpa. (Lod. 3:5, 6) Esi Yehowa lɔ̃ mí taa, edi be míado gbe ɖa na ye zi gbɔ zi ale si míedi.

2. Nu kawo mee míadzro le nyati sia me?

² Míedea asixɔxɔ gbedodoɖa ƒe mɔnukpɔkpɔa ŋu. Gake gbe sia gbe ƒe hloloetsotsowo tea ŋu wɔnɛ be wòsesẽna be míakpɔ ɣeyiɣi ado gbe ɖa. Ɣeaɖewoɣi hãa, míesena le mía ɖokui me be ahiã be míana míaƒe gbedodoɖawo naganyo ɖe edzi. Dzidzɔnyae nye be, Biblia ate ŋu akpe ɖe mía ŋu. Le nyati sia mea, míadzro ale si Yesu ƒe kpɔɖeŋua ate ŋu akpe ɖe mía ŋu míadi ɣeyiɣi anɔ gbe dom ɖa me. Eye míade dzesi nu vevi atɔ̃ siwo ŋu míate ŋu ado gbe ɖa tsoe be míaƒe gbedodoɖawo naganyo ɖe edzi.

3. Nu kae Yesu nya tso gbedodoɖa ŋu?

³ Yesu nya be Yehowa dea asixɔxɔ esubɔlawo ƒe gbedodoɖawo ŋu. Ƒe geɖe hafi Yesu nava anyigba dzia, ekpɔ ale si Fofoa ɖo esubɔla wɔnuteƒe siwo nye Hana, David, Eliya, kple bubuawo ƒe gbedodoɖawo ŋu. (1 Sam. 1:10,  11, 20; 1 Fia. 19:4-6; Ps. 32:5) Esia taa, Yesu fia eƒe nusrɔ̃lawo be woanɔ gbe dom ɖa edziedzi eye woaka ɖe edzi be Yehowa asee!—Mat. 7:7-11.

4. Nu kae míesrɔ̃ tso Yesu gbɔ?

⁴ Yesu ŋutɔ hã doa gbe ɖa na Yehowa, eye esia nye kpɔɖeŋu si wòɖo ɖi na eƒe nusrɔ̃lawo. Le Yesu ƒe anyigbadzisubɔsubɔdɔa mea, edo gbe ɖa edziedzi. Zi geɖea, vovo menɔa eŋu kura o elabe ame geɖewo yia egbɔ be wòakpe ɖe yewo ŋu, eya ta ehiã be wòadi ɣeyiɣi ado gbe ɖa. (Marko 6:31, 45, 46) Gbe ɖekaa, efɔ ŋdi kanya ale be yeakpɔ ɣeyiɣi ado gbe ɖa. (Marko 1:35) Edzɔ zi ɖeka ya teti be wòdo gbe ɖa zã bliboa hafi tso nya me le nu vevi aɖe ŋu. (Luka 6:12, 13) Eye le zã si do ŋgɔ na eƒe ku mea, edo gbe ɖa enuenu ale be yeate ŋu ado dzi awɔ nuteƒe va se ɖe nuwuwu.—Mat. 26:39, 42, 44.

5. Aleke míate ŋu asrɔ̃ Yesu ne míele gbe dom ɖa?

⁵ Míesrɔ̃e le Yesu ƒe kpɔɖeŋua me be aleke kee míexaxae o, ele be míadi ɣeyiɣi ado gbe ɖa. Ele be míawɔ ɖoɖo ɖe gbedodoɖa ŋu. Míate ŋu afɔ ŋdi kanya alo adi ɣeyiɣi le fiẽ me ado gbe ɖa, abe ale si Yesu wɔe ene. Ne míewɔe nenemaa, míaɖee afia Yehowa be míekpɔ ŋudzedze ɖe gbedodoɖa ƒe nunanaa ŋu. Nɔvinyɔnu Lynne ɖo ŋku zi gbãtɔ si wòsrɔ̃ nu tso gbedodoɖa ŋua dzi. Egblɔ be: “Esi meva nyae be mate ŋu ado gbe ɖa na Yehowa ɣesiaɣia, esia kpe ɖe ŋunye meva bu eyama be enye Xɔ̃nye vevi, eye medi be mana nye gbedodoɖa nanyo ɖe edzi.” Ðikeke mele eme o be, míawo hã míedi be míana míaƒe gbedodoɖa nanyo ɖe edzi. Eya ta na míadzro nu atɔ̃ siwo ana míaƒe gbedodoɖa naganyo ɖe edzia me.

6. Le Nyaɖeɖefia 4:10, 11 ƒe nya nua, nu kae Yehowa dze na?

⁶ Kafu Yehowa. Gbɔgbɔ ʋã apostolo Yohanes wòkpɔ ŋutega aɖe. Le ŋutegaa mea, ekpɔ ametsitsi 24 wonɔ ta dem agu na Yehowa le dziƒo. Wonɔ Yehowa kafum nɔ gbɔgblɔm be, “wòe dze be nàxɔ ŋutikɔkɔe, bubu kple ŋusẽ.” (Xlẽ Nyaɖeɖefia 4:10, 11.) Mawudɔla wɔnuteƒewo hã  kafua Yehowa elabe wole egbɔ le dziƒo eye wonyae nyuie. Wodea dzesi eƒe nɔnɔme nyoameŋuawo le nu siwo wòwɔna me, eye esia ʋãa wo be woakafui.—Hiob 38:4-7.

7. Nu kawo ŋue míate ŋu aƒo nu tsoe atsɔ akafu Yehowa le míaƒe gbedodoɖawo me?

⁷ Ele be míawo hã míakafu Yehowa le míaƒe gbedodoɖawo me. Míate ŋu awɔ esia ne míegblɔa nu si tae míelɔ̃e la nɛ. Ne èle Biblia srɔ̃maa, dze agbagba nàde dzesi Yehowa ƒe nɔnɔme siwo léa dzi na wò, eye nàdo gbe ɖa agblɔ ale si nèse le ɖokuiwò me tso nɔnɔme mawo ŋu nɛ. (Hiob 37:23; Rom. 11:33) Míate ŋu akafui hã ɖe ale si wòkpena ɖe mía kple mía nɔvi Kristotɔwo katã ŋu ta. Yehowa dze na kafukafu elabe ekpɔa mía ta eye wòléa be na mí ɣesiaɣi.—1 Sam. 1:27; 2:1, 2.

8. Susu siwo tae míate ŋu ada akpe na Yehowa dometɔ aɖewo ɖe? (1 Tesalonikatɔwo 5:18)

⁸ Da akpe na Yehowa. Susu geɖewo li si tae wòle be míada akpe na Yehowa le míaƒe gbedodoɖawo me. (Xlẽ 1 Tesalonikatɔwo 5:18.) Míate ŋu ada akpe nɛ ɖe nu nyui siwo katã le mía si ta, elabe nunana nyuiwo katã tso egbɔ. (Yak. 1:17) Le kpɔɖeŋu me, míate ŋu ada akpe nɛ ɖe ale si wòwɔ anyigba kple edzinuwo wonya kpɔ hewɔ nukui ta. Míate ŋu ada akpe ɖe míaƒe agbe, míaƒe ƒomea, mía xɔlɔ̃wo, kple míaƒe mɔkpɔkpɔa hã ta. Eye míate ŋu ada akpe nɛ ɖe mɔnukpɔkpɔ si wòna mí be míazu ye xɔlɔ̃ veviwo ta.

9. Nu ka tae wòhiã be míasrɔ̃ ale si míakpɔ ŋudzedze ɖe nu ŋu?

⁹ Ɣeaɖewoɣia, ahiã be míade ŋugble vevie be míate ŋu ade dzesi nu siwo Yehowa wɔ na mí siwo ta wòle be míada akpe ɖo. Le xexe sia mea, ame akpa gãtɔ nye akpemadalawo. Wotsia dzi ɖe ale si woawɔ be woƒe asi nasu nu si wodi dzi, tsɔ wu be woada akpe ɖe nu si le wo si ta. Ne míekpɔ nyuie oa, míava nɔ nu wɔm abe woawo ene, eye míaƒe gbedodoɖawo ava nye nubiabia ɣesiaɣi. Be esia nagadzɔ oa, ele be míasrɔ̃ ale si míakpɔ ŋudzedze ɖe nu ŋu eye míanɔ akpe dam na Yehowa ɖe nu siwo katã wòwɔna na mía ta.—Luka 6:45.

10. Esi nɔvinyɔnu aɖe kpɔ ŋudzedze ɖe nu siwo Yehowa wɔ nɛ ŋua, aleke esia kpe ɖe eŋu wòdo dzi? (Kpɔ fotoawo hã.)

¹⁰ Ne míekpɔa ŋudzedze ɖe nu ŋua, akpe ɖe mía ŋu míado dzi le nɔnɔme sesẽwo me. Bu Nɔvinyɔnu Kyung-sook si ƒe kpɔɖeŋu dze le January 15, 2015 ƒe Gbetakpɔxɔ me ŋu kpɔ. Wokpɔ dzitodzito me kansa sesẽ aɖe le eŋu. Egblɔ be: “Dɔléle sia te ɖe dzinye vevie. Mese le ɖokuinye me be evɔ nam, eye vɔvɔ̃ ɖom ŋutɔ.” Nu kae kpe ɖe eŋu wòdo dzi? Egblɔ be zã sia zã hafi yeamlɔ anyia, yeyia yewoƒe xɔta eye yekɔa gbe dzi doa  gbe ɖa na Yehowa hedaa akpe ɖe nu atɔ̃ siwo ŋu yekpɔ ŋudzedze ɖo le ŋkekea me ta. Esia nana yeƒe dzi dzea eme, eye yegblɔa ale si gbegbe yelɔ̃ea nɛ. Eva kpɔe dze sii be Yehowa léa esubɔla wɔnuteƒewo ɖe te le xaxaɣiwo eye míaƒe yayrawo sɔ gbɔ sãsãsã wu míaƒe xaxawo. Abe mía nɔvinyɔnua enea, ne míele nɔnɔme sesẽwo me tom hãa, susu geɖewo li siwo ta míada akpe na Yehowa ɖo. Ne míedaa akpe na Yehowa le míaƒe gbedodoɖawo mea, esia akpe ɖe mía ŋu míado dzi eye míayi edzi akpɔ dzidzɔ.

11. Nu ka tae wòhiã be dzi nanɔ Yesu ƒe nusrɔ̃lawo ƒo esime wòtrɔ yi dziƒo?

¹¹ Bia Yehowa be wòana dzi nanɔ ƒowò le gbeƒãɖeɖedɔa me. Do ŋgɔ teti hafi Yesu nayi dziƒoa, eɖo ŋku edzi na eƒe nusrɔ̃lawo be ele be woaɖi ɖase tso ye ŋu “le Yerusalem kple Yudea blibo la katã kple Samaria, va se ɖe anyigba ƒe seƒe ke.” (Dɔw. 1:8; Luka 24:46-48) Esia megbe kpuiea, Yuda subɔsubɔhakplɔlawo lé apostolo Petro kple Yohanes eye wokplɔ wo va Sanhedrin la ŋkume. Wode se na wo be woadzudzɔ gbeƒãɖeɖe eye wodo ŋɔdzi na wo be yewoawu wo gɔ̃ hã. (Dɔw. 4:18, 21) Aleke Petro kple Yohanes wɔ nui?

12. Le Dɔwɔwɔwo 4:29, 31 ƒe nya nua, nu kae Yesu ƒe nusrɔ̃lawo wɔ?

¹² Petro kple Yohanes ɖo eŋu na Yuda subɔsubɔhakplɔlawo be: “Ne edzɔ le Mawu ŋkume be míaɖo to miawo wu Mawu la, miawo ŋutɔwo mibu eŋu kpɔ. Ke míawo ya míate ŋu adzudzɔ nuƒoƒo le nu siwo míekpɔ kple nu siwo míese la ŋu o.” (Dɔw. 4:19, 20) Esi woɖe asi le Petro kple Yohanes ŋua, wo kple nusrɔ̃la bubuawo do gbe ɖa na Yehowa be wòado ŋusẽ yewo yewoawɔ eƒe lɔlɔ̃nu. Wogblɔ be: ‘Na wò kluviwo nayi edzi agblɔ wò nya la kple dzideƒo geɖe.’ Yehowa ɖo gbedodoɖa ma ŋu.—Xlẽ Dɔwɔwɔwo 4:29, 31.

13. Nu kae míate ŋu asrɔ̃ tso Jin-hyuk ƒe kpɔɖeŋua me?

¹³ Míate ŋu asrɔ̃ Yesu ƒe nusrɔ̃lawo ƒe kpɔɖeŋua ayi gbeƒãɖeɖedɔa dzi ne dziɖuɖua de se be míadzudzɔ gɔ̃ hã. Bu Nɔviŋutsu Jin-hyuk ƒe kpɔɖeŋua ŋu kpɔ. Wodee gaxɔ me le esi wògbe be yemawɔ asrafodɔ o ta. Le gaxɔa mea, wode dɔ asi nɛ be wòakpɔ gamenɔla siwo le ameɖekɛgaxɔwo mea gbɔ. Gake womeɖe mɔ nɛ be wòaƒo nu tso Biblia alo nu bubu aɖeke ŋu o, negbe nu siwo ku ɖe eƒe dɔdeasia ŋu ko. Edo gbe ɖa be Yehowa nana dzi nanɔ ye ƒo eye yeadze aɖaŋu ale be yeate ŋu awɔ mɔnukpɔkpɔ ɖe sia ɖe si aʋu ɖi ŋu dɔ aɖi ɖase. (Dɔw. 5:29) Egblɔ be: “Yehowa ɖo nye gbedodoɖawo ŋu. Ena dzi ɖo ƒonye eye wòna nunyam be mete ŋu zã miniti atɔ̃-atɔ̃ tsɔ srɔ̃ Biblia kple gamenɔla geɖe le woƒe gaxɔmɔnu. Eye le zã mea, meŋlɔa lɛta siwo matsɔ ana wo le ŋufɔke.” Míawo hã míate ŋu aka ɖe edzi be Yehowa akpe ɖe mía ŋu míawɔ míaƒe subɔsubɔdɔa ade goe. Abe Jin-hyuk enea, míate ŋu ado gbe ɖa na Yehowa be wòana dzinɔameƒo kple nunya mí.

14. Nu kae akpe ɖe mía ŋu ne míele nɔnɔme sesẽwo me tom? (Psalmo 37:3, 5)

¹⁴ Bia Yehowa be wòakpe ɖe ŋuwò nàdo dzi le xaxawo me. Mía dometɔ geɖe le nɔnɔme sesẽwo, abe lãmegbegblẽ, ame vevi aɖe ƒe ku, ƒomekuxiwo, kple yometiti ene, me tom. Eye dɔ vɔ̃ siwo le kakam kple aʋa siwo le edzi yim wɔe be  nɔnɔmewo gava sesẽ ɖe edzi. Nu kae akpe ɖe mía ŋu míado dzi? Do gbe ɖa nàgblɔ wò dzimenyawo na Yehowa abe ale si nàgblɔ wò dzimenya na xɔ̃wò vevi ene. Ka ɖe edzi be Yehowa “awɔe na wò.”—Xlẽ Psalmo 37:3, 5.

15. Aleke gbedodoɖa ate ŋu akpe ɖe mía ŋu be ‘míado dzi le xaxa me’? Gblɔ eƒe kpɔɖeŋu.

¹⁵ Ne míedoa gbe ɖa na Yehowa edziedzia, esia akpe ɖe mía ŋu ‘míado dzi le xaxa me.’ (Rom. 12:12) Yehowa nya nɔnɔme sesẽ siwo me tom esubɔlawo le eye ‘esea woƒe ɣlidodowo.’ (Ps. 145:18, 19) Nɔvinyɔnu mɔɖela Kristie si xɔ ƒe 29 kpɔ esia ƒe nyateƒenyenye dze sii. Gbe ɖeka kple eƒe zãdodo koa, eva dze dɔ sesẽ aɖe. Esia wɔe be wòva lé blanui vevie. Emegbe wokpɔ dɔmavɔleameŋu aɖe le nɔa ŋu. Kristie gblɔ be: “Medo gbe ɖa na Yehowa vevie be wòana ŋusẽ si mehiã be manɔ te ɖe nɔnɔmea nu gbe sia gbe lam. Medzea agbagba be made kpekpeawo ɣesiaɣi eye mawɔ ɖokuisinusɔsrɔ̃.” Egblɔ kpee be: “Gbedodoɖa kpe ɖe ŋunye mete ŋu do dzi le ɣeyiɣi sesẽ mawo me. Menya be Yehowa li kplim ɣesiaɣi, eye esia faa akɔ nam. Yehowa ɖo nye gbedodoɖawo ŋu eye wòna nye dzi dze eme togbɔ be nye kuxiawo nu meyi enumake o hã.” Ðo ŋku edzi ɣesiaɣi be ‘Yehowa nya ale si wòaɖe ame siwo tsɔ wo ɖokui nɛ la tso tetekpɔ me.’—2 Pet. 2:9.

16. Nu ka tae míehiã Yehowa ƒe kpekpeɖeŋu be míate ŋu aɖu tetekpɔ dzi?

¹⁶ Bia Yehowa be wòakpe ɖe ŋuwò nàɖu tetekpɔ dzi. Esi míede blibo o taa, ele be míaku kutri vevie ɣesiaɣi be míaɖu didi si nɔa mía me be míawɔ nu si mesɔ oa dzi. Gake vɔ̃ɖitɔea, Satana le agbagba dzem be esia wɔwɔ nasesẽ na mí. Edzea agbagba be yeato modzakaɖeɖe siwo mesɔ o dzi be yeakpɔ ŋusẽ ɖe míaƒe nuŋububu dzi. Modzakaɖeɖe mawo ate ŋu ana míaƒo ɖi le Yehowa ŋkume  eye woate ŋu awɔe hã be míawɔ nu vɔ̃ siwo nye ŋkubiãnya gɔ̃ hã.—Marko 7:21-23; Yak. 1:14, 15.

17. Ne míedo gbe ɖa be Yehowa nakpe ɖe mía ŋua, nu kae wòle be míawɔ? (Kpɔ fotoawo hã.)

¹⁷ Hafi míate ŋu aɖu tetekpɔ dzia, míehiã na Yehowa ƒe kpekpeɖeŋu. Yesu fia eƒe nusrɔ̃lawo be woado gbe ɖa be: “Mègakplɔ mí yi tetekpɔ me o, ke ɖe mí tso vɔ̃ɖitɔ la si me.” (Mat. 6:13) Togbɔ be Yehowa di vevie be yeakpe ɖe mía ŋu hãa, ehiã be míawo ŋutɔwo míabiae. Eyome, ele be míaƒo asa na nu siwo akplɔ mí ade nu vɔ̃ wɔwɔ me. Azɔ hã ele be míaku kutri vevie aƒo asa na ha siwo doa nuŋububu gbegblẽwo ɖe ŋgɔa sese kple film siwo me woɖea gbɔdɔdɔ manɔsenu ƒe nuwɔnawo lea kpɔkpɔ. (Ps. 97:10) Ke boŋ míalé fɔ ɖe Biblia sɔsrɔ̃ ŋu ale be míanɔ nu siwo sɔa ŋu bum. Kpekpeawo kple gbeadzi dede hã ate ŋu akpe ɖe mía ŋu míadzɔ míaƒe susu ŋu. Azɔ hã Yehowa do ŋugbe be yemaɖe mɔ woate mí akpɔ wu esi nu míate ŋu anɔ te ɖo o.—1 Kor. 10:12, 13.

18. Nu kae wòle be mía dometɔ ɖe sia ɖe nawɔ?

¹⁸ Le ŋkeke mamlɛ sesẽ siawo mea, ehiã vevie be mía dometɔ ɖe sia ɖe nado vevie gbedodoɖa ale be míate ŋu ayi edzi awɔ nuteƒe na Yehowa. Di ɣeyiɣi nànɔ gbe dom ɖa edziedzi. Yehowa di be míagblɔ míaƒe dzimenyawo na ye. (Ps. 62:8) Kafu Yehowa eye nàda akpe nɛ ɖe nu siwo wòwɔna ta. Biae be wòakpe ɖe ŋuwò be dzi nanɔ ƒowò le gbeƒãɖeɖedɔa me. Do gbe ɖa nɛ be wòakpe ɖe ŋuwò be nàdo dzi le nɔnɔme sesẽ siwo me tom nèlea me, eye nàɖe kuku nɛ be wòakpe ɖe ŋuwò nàɖu tetekpɔ siwo ava dziwòa dzi. Mègaɖe mɔ ame aɖeke alo naneke naxe mɔ na wò be nàgado gbe ɖa na Yehowa edziedzi o. Ke aleke Yehowa ɖoa míaƒe gbedodoɖa ŋui? Míaɖo biabia sia ŋu le nyati si kplɔ esia ɖo me.