Esi gbeƒãɖeɖedɔa nɔ ta kekemaa, nɔviawo va hiã agbalẽ geɖe be woatsɔ awɔ dɔa. Togbɔ be nɔvi siwo nɔ Brooklyn Betel ye taa míaƒe magazinewo hãa, dɔwɔƒe bubuwoe wohayana be woata míaƒe agbalẽ siwo ƒe akpa tri. Esi ɣleti geɖe dɔwɔƒe mawo mete ŋu ta agbalẽ agbɔsɔsɔ si míehiã na gbeƒãɖeɖedɔa o taa, Nɔviŋutsu Rutherford bia Robert Martin, si nye agbalẽtaƒea dzi kpɔla, be ɖe míawo ŋutɔwo míate ŋu ata míaƒe agbalẽwo hã.

Nɔviŋutsu Martin gblɔ be, esi wòbia nya mam la, “mekpɔe be susua nyo ale gbegbe, elabe esia abia be míaʋu dɔwɔƒe eye míaƒle mɔ̃ siwo míatsɔ ata agbalẽawo.” Nɔviawo haya teƒe le 18 Concord Street le Brooklyn, eye woƒle agbalẽtamɔ̃awo.

Gake menye ame sia amee wòdzɔ dzi na be nɔviawo ŋutɔwo nata woƒe agbalẽwo o. Dɔwɔƒe aɖe si nɔ míaƒe agbalẽwo tam na nɔviawo la ƒe tatɔ va kpɔ agbalẽtaƒe yeyea. Egblɔ be: “Oo miaƒe mɔ̃awo nyo ŋutɔ, gake ame aɖeke mele afi sia si nya wo zazã o. Ɣleti ade pɛ ko mea, wo dome agblẽ.”

Nɔviŋutsu Martin gblɔ be: “Edze abe susu nɔ nya mawo me ya, gake esusɔ nu ɖeka; ye nye akpa si Aƒetɔ la awɔ. Míeka ɖe edzi be akpe ɖe mía ŋu.” Nyateƒee Nɔviŋutsu Martin to, elabe eteƒe medidi o, agbalẽtaƒe yeyea nɔ agbalẽ 2,000 sɔŋ tam gbe sia gbe.

Tsɔ kpe ɖe agbalẽwo tata ŋua, Yehowa ƒe amewo va te mɔnu yeye aɖe zazã be yewoatsɔ akaka nya nyuia; eyae nye radio. Le Kwasiɖa, February 26, 1922 ƒe ŋdɔ mea, Nɔviŋutsu Rutherford ƒo nuƒo le  radio dzi zi gbãtɔ. Eƒo nuƒo ma si ƒe tanyae nye “Ame Miliɔnwo Le Agbe Fifia Siwo Maku Akpɔ O” le KOG radiodɔwɔƒe le Los Angeles, California, le Amerika.

Ame abe 25,000 ene ye se nuƒo ma. Wo dometɔ aɖewo ŋlɔ lɛta tsɔ da akpe ɖe nuƒoa ta. Willard Ashford, si tso Santa Ana, California hã le wo dome. Ekafu Nɔviŋutsu Rutherford be eƒe nuƒoa “nya se eye wòdo dzidzɔ na ame.” Egblɔ kpee be: “Dɔnɔ etɔ̃ siwo tsi teƒe ɖeka le nye aƒe me, ta ne ɖe nèva ƒo nuƒoa le míaƒe kɔa me gɔ̃ hãa, anye ne míate ŋu ava see o.”

Le kwasiɖa siwo kplɔe ɖo mea, wogaƒo nuƒo bubuwo le radio dzi. Kaka ƒea nawu enua, Gbetakpɔxɔa ka nya ta be “ame 300,000 ya teti se gbedeasia to radio dzi.”

Ale si amewo kpɔ dzidzɔ ɖe gbedeasia ŋu de dzo Biblia Nusrɔ̃viawo me be woawo ŋutɔwo woatu woƒe radiodɔwɔƒe le Staten Island, si te ɖe Brooklyn Betel ŋu. Le ƒe siwo kplɔe ɖo mea, Biblia Nusrɔ̃viawo zã radiodɔwɔƒe ma si woyɔ be WBBR la tsɔ kaka nya nyuia yi teƒe geɖewo.

Woɖe gbeƒã le June 15, 1922 dzi be woawɔ takpekpe aɖe le Cedar Point, Ohio, tso September 5 va se ɖe 13, 1922 dzi. Biblia Nusrɔ̃viawo nɔ dzidzɔ kpɔm esi wova ɖo takpekpewɔƒea.

Esi Nɔviŋutsu Rutherford nɔ eƒe nuƒo gbãtɔ ƒomaa, egblɔ na vavalawo be: “Meka ɖe edzi bliboe be Aƒetɔ la ayra ɖe takpekpe sia dzi eye wòato takpekpe sia dzi ana gbedeasia naɖo ame geɖe gbɔ le anyigba dzi wu ɣeyiɣi bubu ɖe sia ɖe.” Nuƒolawo de dzi ƒo na vavalawo enuenu be woawɔ gbeƒãɖeɖedɔa.

Ke le Fiɖa, September 8, dzia, ame 8,000 ye va takpekpewɔƒea eye wonɔ mɔ kpɔ kpɔm vevie be yewoase Nɔviŋutsu Rutherford ƒe nuƒo. Wonɔ mɔ kpɔm be aɖe nuŋɔŋlɔ si nye “ADV,” si wota ɖe amekpegbalẽvia dzia me na yewo. Ðikeke mele eme o be, wo dometɔ geɖe de dzesi avɔ aɖe si woxatsa le nuƒolanɔƒea tame ɖaa. Arthur Claus, si zɔ mɔ tso Tulsa,  Oklahoma, le Amerika va takpekpea, di teƒe le afi si yeate ŋu ase nyawo nyuie le. Elabe ɣemaɣia, nuƒomɔ̃ kple nyasemɔ̃ siwo ana nyawo naɖi sesĩea menɔ anyi o.

Be toɣliɖeɖe aɖeke nagayi edzi o taa, zimenɔlaa ɖe gbeƒã be womaɖe mɔ na ame siwo tsi megbe be woage ɖe takpexɔa me ne Nɔviŋutsu Rutherford dze eƒe nuƒoa gɔme o. Esi wòƒo ŋdi ga 9:30 la, Nɔviŋutsu Rutherford gblɔ Yesu ƒe nya siwo dze le Mateo 4:17 tsɔ dze eƒe nuƒoa gɔme. Egblɔ be: “Dziƒofiaɖuƒe la ɖo vɔ.” (Eʋegbe Biblia) Esi wònɔ ale si amewo awɔ ase Fiaɖuƒea ŋu nya me dzromaa, egblɔ be: “Yesu ŋutɔ gblɔe ɖi be le yeƒe anyinɔɣia, yeawɔ nuŋeŋedɔ aɖe si awɔe be yeaƒo nuteƒewɔlawo nu ƒu va ye ɖokui gbɔ.”

Nɔviŋutsu Arthur Claus si hã nɔ takpexɔa mea gblɔ be: “Míenɔ to ɖom vevie.” Gake eva dze dɔ kpata si na wòva hiã be wòado le xɔa me. Esia te ɖe edzi ŋutɔ elabe enyae be womagaɖe mɔ na ye yeage ɖe takpexɔa me o.

Gake le miniti ʋɛ aɖewo mea, eƒe lãme gasẽ. Egblɔ be esi yetrɔ ɖo ta takpexɔa gbɔa, yese asikpeƒoƒo gã aɖe si na dzo gaɖo lãme na ye. Ta eɖoe be ne takpexɔa tamee yealia hafi ase nya hã, yealiae. Ɣemaɣia, ƒe 23 ye Nɔviŋutsu Claus xɔ, ta ete ŋu lia yi xɔa ta. Fesre siwo nɔ xɔa ta nɔ ʋuʋu ɖi eye esi wòɖo wo gbɔa, ekpɔe be nyawo nɔ ɖiɖim nyuie ŋutɔ le afi ma.

Sigbeɖe menye Arthur ɖekae nɔ xɔa ta o, exɔlɔ̃ aɖewo hã nɔ afi ma. Wo dometɔ ɖeka si ŋkɔe nye Frank Johnson te ɖe eŋu biae be, “Hɛ sue aɖe le kotoku me na wòa?”

Arthur ɖo eŋu be, “Ɛ̃.”

Frank ɖo eŋu be: “Ema ƒe gbe ko dom míele ɖa le afi sia. Èkpɔ avɔ si woxatsa ɖe afi ma? Ðe wotsɔ ka tsii ɖe gatagbadzɛ  aɖewo ŋu. Lé to ɖe Ʋɔnudrɔ̃la Rutherford ƒe nyawo ŋu nyuie. * Ne enya gblɔ be, ‘eye miɖe gbeƒã, miɖe gbeƒã’ koa, nàlã kaawo.”

Taa Arthur lé hɛa ɖe asi eye eya kple exɔlɔ̃awo nɔ lalam be yewoase nya siwo anye dzesi be yewoalã kaa. Medidi o, Nɔviŋutsu Rutherford ɖo eƒe nuƒoa ƒe ami me. Ekɔ gbe dzi eye wòtsɔ dzonɔameme gblɔ be: “Minye Aƒetɔ la ƒe ɖasefo nuteƒewɔla vavãwo. Miyi edzi miawɔ aʋa la va se ɖe esime Babilon ƒe akpa sia akpa nazu aƒedo keŋkeŋ. Mikaka gbedeasia ɖe didiƒe kple kpuiƒe. Ele be xexea me nanyae be Yehowae nye Mawu eye be Yesu Kristo ye nye fiawo dzi Fia kple aƒetɔwo dzi Aƒetɔ. Ŋkeke siae nye esi ƒo ɖe sia ɖe ta. Mikpɔ ɖa, Fia la le dzi ɖum! Miawoe nye eƒe nyakakalawo. Eya ta miɖe gbeƒã, miɖe gbeƒã, miɖe gbeƒã Fia la kple eƒe Fiaɖuƒe la.”

Arthur gblɔ be yewolã kawo eye esi avɔa mlo va anyia, nuŋɔŋlɔ si nye “Miɖe Gbeƒã Fia La Kple Eƒe Fiaɖuƒe La” nɔ edzi amewo kpɔ. Nuŋɔŋlɔ “ADV” si dze le amekpegbalẽvia dzia gɔmee nye ema. “ADV” nye yevugbe me nya ‘Advertise’ si woŋlɔ kpuie, eye egɔmee nye “Miɖe gbeƒã.”

Takpekpe si wowɔ le Cedar Point la kpe ɖe nɔviwo ŋu wodo vevie gbeƒãɖeɖedɔa, eye ame siwo ƒe dzi ʋã woa ɖoe be yewoawɔ geɖe. Nɔvi aɖe si nye nyanyuikakala (alo mɔɖela) si tso Oklahoma, Amerika gblɔ be: “Ame siwo nɔ nuto si me míeɖe gbeƒã lea nye tomekakulawo eye woda ahe ŋutɔ.” Egblɔ hã be zi geɖe ne amewo se nya siwo le Nunyonameɣi magazinea mea, “ɖeko wowóa avi.” Eƒo eƒe nyawo ta be, “Enye dzidzɔ na mí be míetea ŋu faa akɔ na wo.”

Biblia Nusrɔ̃viawo kpɔ ale si gbegbe Yesu ƒe nya siwo le Luka 10:2 la le vevie. Afi ma gblɔ be: “Nuŋeŋe la sɔ gbɔ, ke dɔwɔlawo ya mede ha o.” Kaka ƒea nawu enua, dzo yeye gaɖo wo me be woaɖe gbeƒã Fiaɖuƒe gbedeasia le afi sia afi.