1. Nu ka tae wòate ŋu asesẽ na mí be míaɖo to?

 ÐE WÒSESẼNA na wò ɣeaɖewoɣi be nàɖo toa? Ne esesẽna na wòa, ke menye wò ɖeka koe o. Edzɔ ɖe Fia David hã dzi kpɔ, eya ta edo gbe ɖa na Mawu be: “Tsɔ wò gbɔgbɔ do ŋusẽm ne maɖo to wò tso dzi me.” (Ps. 51:12; etenuŋɔŋlɔ) David lɔ̃ Yehowa vevie. Gake esesẽ nɛ ɣeaɖewoɣi be wòaɖo to, eye nenemae wòle le míawo hã gome. Nu ka tae? Nu si tae nye be gbãa, nu vɔ̃ si dome míenyi wɔe be míedina be míaɖo to o. Evelia, Satana dzea agbagba be yeana míadze aglã ɖe Yehowa ŋu, abe ye ke ene. (2 Kor. 11:3) Etɔ̃lia, aglãdzedze ƒe “gbɔgbɔ si le dɔ wɔm le vi sẽtowo me fifia” lae xɔ aƒe ɖe xexea me. (Ef. 2:2) Esi míele avu wɔm be míaɖu mía ɖokui dzi be míagawɔ nu vɔ̃ oa, ele hã be míadze agbagba be míagasrɔ̃ Satana kple xexea ƒe tomaɖomaɖo o. Azɔ hã, ele be míaku kutri vevie be míaɖo to Yehowa kple ame siwo wòɖe mɔ wole ŋusẽnɔƒewo.

2. Nu kae wòfia be ‘míalɔ̃ faa aɖo to’? (Yakobo 3:17)

² Xlẽ Yakobo 3:17. Mawu ƒe gbɔgbɔ ʋã Yakobo wògblɔ be ame siwo si dziƒonunya lea ‘lɔ̃na faa ɖoa to.’ Nu si nya ma fiae nye be míanɔ klalo aɖo to ame siwo Yehowa ɖe mɔ wole ŋusẽnɔƒewo. Gake esia mefia be Yehowa di be míaɖo to ne ame aɖe di be míada le yeƒe sewo dzi o.—Dɔw. 4:​18-20.

3. Nu ka tae Yehowa di be míaɖo to ame siwo le ŋusẽnɔƒewo?

 ³ Ate ŋu anɔ bɔbɔe na mí be míaɖo to Yehowa wu amegbetɔwo, elabena Yehowa ƒe mɔfiamewo le eteƒe ɣesiaɣi. (Ps. 19:7) Gake amegbetɔwo ya mede blibo o. Togbɔ be ele alea hãa, mía Fofo si le dziƒo na ŋusẽ aɖe si nu dzilawo, dziɖuɖumegãwo kple hamemetsitsiwo. (Lod. 6:20; 1 Tes. 5:12; 1 Pet. 2:​13, 14) Eya ta ne míeɖo to woa, ke Yehowae nye ema míele to ɖomee. Aleke míawɔ aɖo to ame siwo Yehowa ɖe mɔ wole ŋusẽnɔƒewo, togbɔ be ɣeaɖewoɣi ate ŋu asesẽ na mí be míalɔ̃ ɖe nu siwo wobia tso mía si dzi alo awɔ ɖe wo dzi gɔ̃ hã? Mina míakpɔe ɖa.

4. Nu ka tae ɖevi geɖe meɖoa to wo dzilawo o?

⁴ Sɔhɛ kple ɖevi geɖe ‘meɖoa to wo dzilawo o.’ (2 Tim. 3:​1, 2) Nu ka tae? Elabe ɖeviawo kpɔnɛ be yewo dzilawo ŋutɔwo mewɔa nu siwo wofiaa yewo o. Ðevi aɖewo bua wo dzilawo ƒe nyawo be wonye blemanyawo, womeɖea vi o eye wole kpaɖii akpa. Ne sɔhɛe nènyea, ɖe wò hã nèsena le ɖokuiwò me nenema? Menɔa bɔbɔe na ame geɖe be woawɔ ɖe se si Yehowa de be, “Miɖo to mia dzilawo le Aƒetɔ la me, elabena esia le eteƒe” la dzi o. (Ef. 6:1) Nu kae ate ŋu akpe ɖe ŋuwò be nàwɔ ɖe se sia dzi?

5. Nu ka tae wòɖe dzesi ŋutɔ be Yesu ɖo to edzilawo abe ale si wòdze le Luka 2:​46-52 ene?

⁵ Yesu ɖo toɖoɖo ƒe kpɔɖeŋu nyui si miate ŋu asrɔ̃. (1 Pet. 2:​21-24) Yesu de blibo, gake edzilawo ya mede blibo o. Ke hã ede bubu wo ŋu togbɔ be wodaa vo alo womesea nu gɔme nɛ ɣeaɖewoɣi o gɔ̃ hã. (2 Mose 20:12) Bu nu si dzɔ esime wòxɔ ƒe 12 ŋu kpɔ. (Xlẽ Luka 2:​46-52.) Esi eya kple edzilawo yi ŋkekenyuia ɖuƒe le Yerusalem la, womede dzesii be menɔ yewo ŋu o, ale wodzo le egbɔ. Ðe wòle be Yosef kple Maria nakpɔ egbɔ be yewo viwo katã le yewo ŋu esime wotrɔ yina aƒe me hafi. Gake esi wova ke ɖe eŋu mlɔebaa, Maria bu fɔe ɖe fu siwo wokpe hafi ke ɖe eŋu ta! Ðe Yesu na wonya be mesɔ be woabu fɔ ye oa? Ao, mewɔe nenema o. Ke boŋ eɖo nya ŋu na wo bubutɔe, evɔ “womese nya si wògblɔ na wo la gɔme o.” Togbɔ be ele alea hãa, “[Yesu] yi edzi bɔbɔ eɖokui na wo.”

6-7. Nu kae akpe ɖe sɔhɛwo ŋu be woaɖo to wo dzilawo?

⁶ Sɔhɛwo, ɖe wòsesẽna na mi ɣeaɖewoɣi be miaɖo to mia dzilawo ne woda vo alo womese nu gɔme na mi oa? Nu kae ate ŋu akpe ɖe mia ŋu? Gbã, mibu ale si Yehowa ase le eɖokui mea ŋu. Biblia gblɔ be ne mieɖo to mia dzilawoa, “esia dzea Aƒetɔ la ŋu nyuie.” (Kol. 3:20) Ne edzɔ be mia dzilawo mese nu gɔme na mi tututu o, alo be woƒe se aɖewo dzi wɔwɔ sesẽ na mi la, esia nɔa nyanya na Yehowa. Gake ne mielɔ̃na faa ɖoa to woa, Yehowa kpɔa dzidzɔ.

⁷ Evelia, bu ale si dziwòlawo ase le wo ɖokui me ŋu. Ne èɖoa to woa, woakpɔ dzidzɔ eye woaka ɖe dziwò. (Lod. 23:​22-25) Wò kpli wo dome hã anɔ kplikplikpli. Nɔviŋutsu Alexandre si le Belgium gblɔ be, “Esi meva nɔ to ɖom dzinyelawo geɖe wua, nye kpli wo dome va nyo ɖe edzi eye míekpɔ dzidzɔ geɖe.” b Etɔ̃lia, bu ale si toɖoɖo dziwòlawo fifia akpe ɖe ŋuwò le  etsɔme ŋu. Sɔhɛ aɖe si ŋkɔe nye Paulo si le Brazil gblɔ be: “Toɖoɖo dzinyelawo kpe ɖe ŋunye mesrɔ̃ ale si maɖo to Yehowa kple ame siwo le ŋusẽnɔƒewo.” Mawu ƒe Nyaa gblɔ susu vevi aɖe si tae wòle be nàɖo to dziwòlawo. Egblɔ be: “Ne eme nanyo na wò, eye nànɔ anyigba la dzi eteƒe nadidi.”—Ef. 6:​2, 3.

8. Nu ka tae sɔhɛ geɖe lɔ̃na faa ɖoa to wo dzilawo?

⁸ Sɔhɛ geɖewo kpɔe be eɖea vi ne yewoɖo to yewo dzilawo. Bu Luiza si hã tso Brazil ŋu kpɔ. Tsãa, esesẽ nɛ be wòase susu si tae edzilawo meɖe mɔ nɛ be wòazã asitelefon o la gɔme. Elabe ehati geɖe zãa fon ɣemaɣi. Gake emegbea, eva kpɔe be ɖe ye dzilawo nɔ ye ta kpɔm. Fifia egblɔ be, “Nyemegabua dzinyelawo ƒe sewo be woxaxam ɖo o, ke boŋ be wonye takpɔkpɔ nam.” Bu Elizabeth si nye sɔhɛ aɖe si tso Amerika ŋu kpɔ. Togbɔ be menɔa bɔbɔe nɛ ɣesiaɣi be wòaɖo to edzilawo o hãa, egblɔ be: “Ne nyemese nu si tae dzinyelawo de se aɖe nam gɔme oa, meɖoa ŋku ɣeyiɣi siwo me woƒe sewo dzi wɔwɔ kpɔ tanyea dzi.” Monica si le Armenia gblɔ be ne yeɖo to ye dzilawoa, nuwo dzea edzi na ye wu ne yemeɖo to wo o.

9. Aleke ame geɖe bua toɖoɖo dziɖuɖuwoe?

⁹ Biblia yɔ dziɖuɖuwo be “ŋusẽtɔwo.” (Rom. 13:1) Ame geɖe lɔ̃ ɖe edzi be míehiã na dziɖuɖuwo eye ele be míawɔ ɖe woƒe se aɖewo ya teti dzi. Gake ne dziɖuɖua de se aɖe si medzɔ dzi na wo o alo bia nu geɖe tso wo sia, wogbea edzi wɔwɔ. Le kpɔɖeŋu me, bu adzɔxexe ŋu kpɔ. Le Europa dukɔ aɖe mea, ame geɖe ƒe susue nye be “esɔ be nàgbe adzɔ aɖe xexe ne èkpɔe be wole ye tafam.” Eya ta mewɔ nuku o be le dukɔ ma mea, dukɔmeviawo melɔ̃na xea adzɔ siwo katã dziɖuɖua bia tso wo si o.

10. Nu ka tae míewɔna ɖe dziɖuɖua ƒe se siwo medzɔ dzi na mí o gɔ̃ hã dzi?

¹⁰ Biblia na eme kɔ be amegbetɔwo ƒe dziɖuɖuwo nana amewo kpea fu, wole Satana ƒe ŋusẽ te eye Mawu ava tsrɔ̃ wo kpuie. (Ps. 110:​5, 6; Nyagb. 8:9; Luka 4:​5, 6) Egblɔ hã be “ame si tsia tsitre ɖe ŋusẽtɔ ŋu la, etsia tsitre ɖe Mawu ƒe ɖoɖo ŋu.” Yehowa ɖe mɔ dziɖuɖuwo li ale be nuwo nanɔ ɖoɖo nu, eye edi be míaɖo to wo. Eya ta ele be míatsɔ “nu si ame sia ame dze na la anɛ.” Esia bia be míade bubu wo ŋu, aɖo to wo eye míaxe adzɔ na wo. (Rom. 13:​1-7) Ðewohĩ awɔ na mí be woƒe se aɖewo dzi wɔwɔ made mía dzi o alo be ana ganyawo nasesẽ na mí. Ke hã, míeɖoa to Yehowa wɔna ɖe dziɖuɖuwo ƒe sewo dzi. Gake Yehowa medi be míaɖo to dziɖuɖuwo ne wobia  tso mía si be míada le yeƒe sewo dzi o.—Dɔw. 5:29.

11-12. Agbagba kae Yosef kple Maria dze hafi te ŋu wɔ ɖe se aɖe dzi togbɔ be nɔnɔmea mede wo dzi o hã, eye nu kae do tso eme? (Luka 2:​1-6) (Kpɔ nɔnɔmetata kple fotoawo.)

¹¹ Togbɔ be nɔnɔmea mede Yosef kple Maria dzi o hãa, woɖo to ŋusẽtɔwo eye míawo hã míate ŋu asrɔ̃ woƒe kpɔɖeŋua. (Xlẽ Luka 2:​1-6.) Ɣleti asieke ƒe fu nɔ Maria ƒo esime dziɖuɖua bia tso dukɔmeviwo si be woawɔ nane si ate ŋu asesẽ na Maria kple Yosef. Roma Fiagã Augusto de se be dukɔa me viwo nayi wo de ava ŋlɔ ŋkɔ, eya ta ahiã be Yosef kple Maria nazɔ mɔ kilometa 150 ato tonutowo me ayi ɖe Betlehem. Esia manɔ bɔbɔe na Maria kura o. Wo ame evea woanya tsi dzi ɖe vi si le dɔme nɛa ƒe dedienɔnɔ ŋu vevie. Ke ne fua va le eɖum le mɔa dzi ɖe? Esi wònye Mesia si ŋugbe wodoe nye ema le dɔme nɛ taa, ɖe woatsɔ ema ado taflatsɛ agbe dziɖuɖua ƒe sea dzi wɔwɔa?

¹² Togbɔ be Yosef kple Maria anya tsi dzi ɖe nanewo ŋu hãa, wometsɔ esia do taflatsɛ gbe sea dzi wɔwɔ o. Yehowa yra wo le esi woɖo to ta. Wova ɖo Betlehem dedie, Maria dzi vi si le lãmesẽ me eye esia na Biblia me nyagblɔɖi aɖe va eme!—Mika 5:2.

13. Ne míeɖoa toa, aleke wòaɖe vi na mía nɔvi bubuwoe?

¹³ Ne míeɖoa to dziɖuɖuwoa, aɖe vi na míawo ŋutɔ kple ame bubuwo. Le mɔ ka nu? Gbãa, míaƒo asa na tohehe si li na sedzimawɔlawo. (Rom. 13:4) Ne mía dometɔ ɖe sia ɖe ɖoa to ame siwo le ŋusẽnɔƒewoa, woakpɔe be Yehowa Ðasefowo nye sedziwɔlawo. Le kpɔɖeŋu me, ƒe geɖe va yi le Nigeria la, asrafowo ge ɖe Fiaɖuƒe Akpata aɖe me esime nɔviwo le kpekpe. Asrafoawo nɔ aglãdzela siwo nɔ eƒom ɖe amewo nu be woagbe adzɔxexea dim. Gake ame si le asrafoawo nua gblɔ na wo be woatrɔ adzo hegblɔ  be: “Míenya Yehowa Ðasefowo be woxea adzɔ ɣesiaɣi.” Ne èwɔna ɖe dziɖuɖua ƒe sewo dzia, èle asi kpem ɖe eŋu be ŋkɔ nyui nakpɔtɔ anɔ Yehowa ƒe amewo ŋu, eye ŋkɔ nyui ma ate ŋu akpɔ mía nɔviwo ta gbe ɖeka.—Mat. 5:16.

14. Nu kae kpe ɖe nɔvinyɔnu aɖe ŋu wòva ‘lɔ̃na faa ɖoa to’ ame siwo le ŋusẽnɔƒewo?

¹⁴ Ate ŋu asesẽ na mí ɣeaɖewoɣi be míaɖo to dziɖuɖuwo. Nɔvinyɔnu Joanna si le Amerika gblɔ be: “Esesẽna nam be maɖo to dziɖuɖua elabe wowɔ nu madzɔmadzɔ ɖe nye ƒometɔ aɖewo ŋu.” Gake Joanna dze agbagba trɔ asi le ale si wòbua dziɖuɖuae ŋu. Nu gbãtɔ si wòwɔe nye be edzudzɔ nya gbegblẽ si amewo gblɔna tso dziɖuɖua ŋu siwo wodana ɖe Internet dzi la xexlẽ. (Lod. 20:3) Evelia, edo gbe ɖa na Yehowa be wòakpe ɖe ye ŋu yeaka ɖe eyama dzi, tsɔ wu be yeadi be woaɖɔ li dziɖuɖua. (Ps. 9:​9, 10) Etɔ̃lia, exlẽ nyati aɖewo le míaƒe agbalẽwo me ku ɖe ale si mele be míade akpa aɖeke dzi o ŋu. (Yoh. 17:16) Joanna gblɔ be fifia esi yedea bubu dziɖuɖua ŋu heɖoa toa, ena yekpɔ ŋutifafa.

15. Nu ka tae wòate ŋu asesẽ na mí be míawɔ ɖe mɔfiame si tso Yehowa ƒe habɔbɔa gbɔa dzi?

¹⁵ Yehowa di tso mía si be ‘míaɖo to ame siwo le ŋgɔ xɔm’ le hamea me. (Heb. 13:17) Togbɔ be mía Kplɔla, Yesu de blibo hãa, ame siwo zãm wòle be woaxɔ ŋgɔ na mí le anyigba dzi ya mede blibo o. Ate ŋu asesẽ na mí be míaɖo to wo, vevietɔ ne wobia tso mía si be míawɔ nane si míekpɔ be mesɔ na mí o. Ɣeaɖeɣi wona mɔfiame aɖe apostolo Petro, gake medi be yeawɔ ɖe edzi o. Mawudɔla aɖe bia tso Petro si be wòaɖu lã aɖe si wobua lã makɔmakɔ le Mose ƒe Sea te, gake Petro gbe, menye zi ɖeka o, ke boŋ zi etɔ̃ sɔŋ! (Dɔw. 10:​9-16) Nu ka tae? Esusui be mɔfiame yeyea mesɔ o. Ale si nuwo nɔ tsãa sɔ nɛ wu. Ne esesẽ na Petro be wòawɔ ɖe mawudɔla deblibo ƒe mɔfiafia dzia, ke manɔ bɔbɔe na mí be míawɔ ɖe amegbetɔ madeblibowo ƒe mɔfiamewo dzi o.

16. Togbɔ be apostolo Paulo ate ŋu abu mɔfiame si wonae be mesɔ o hãa, nu kae wòwɔ? (Dɔwɔwɔwo 21:​23, 24, 26)

¹⁶ Apostolo Paulo ‘lɔ̃ faa ɖo to’ togbɔ be anya se le eɖokui me be mɔfiame aɖe si wona ye la mesɔ o hã. Yudatɔ Kristotɔ aɖewo se wobewobewo tso Paulo ŋu be enɔ gbɔgblɔm na amewo be “woagbe nu le Mose ƒe Se la gbɔ,” eye be nuwɔna sia nye bubu mademade Mose ƒe Sea ŋu. (Dɔw. 21:21) Kristotɔ tsitsi siwo le Yerusalem bia tso Paulo si be wòakplɔ ŋutsu ene ne woayi gbedoxɔa me aɖakɔ wo ɖokuiwo ŋu wòafia be ele wɔwɔm ɖe Mose ƒe Sea dzi. Paulo medze agɔ aɖeke o elabe enyae be Kristotɔwo megale Mose ƒe Sea te o. Ke hã elɔ̃ faa wɔ ɖe mɔfiamea dzi. “Esi ŋu ke la, Paulo kplɔ ŋutsuawo kpe ɖe eɖokui ŋu, eye eya kpli wo wokɔ wo ɖokuiwo ŋu le kɔa nu.” (Xlẽ Dɔwɔwɔwo 21:​23, 24, 26.) Paulo ƒe toɖoɖoa na nɔviawo gawɔ ɖeka ɖe edzi.—Rom. 14:​19, 21.

17. Nu kae nèsrɔ̃ tso Stephanie ƒe nuteƒekpɔkpɔa me?

¹⁷ Esesẽ na nɔvinyɔnu Stephanie be wòawɔ ɖe mɔfiame si tso alɔdzedɔwɔƒea gbɔ la dzi. Eya kple srɔ̃aŋutsu wonɔ subɔsubɔm dzidzɔtɔe le dutagbedolawo ƒe ƒuƒoƒo aɖe me. Gake emegbea, alɔdzedɔwɔƒea tsɔ woƒe ƒuƒoƒoa kpe ɖe hame bubu ŋu, eye wogaɖo wo ɖe hame si  me wodoa wo degbea le me. Stephanie gblɔ be: “Esia medzɔ dzi nam kura o. Elabe nyemeka ɖe edzi be hiahiã geɖe le mía degbe hamea me o.” Togbɔ be ele alea hãa, ewɔ ɖe mɔfiame yeyea dzi. Egblɔ be: “Emegbea, meva kpɔe be mɔfiamea sɔ. Míeva zu dzilawo na nɔvi geɖe le míaƒe hamea me siwo ƒe ƒometɔwo mele nyateƒea me o. Meva nɔ nu srɔ̃m kple nɔvinyɔnu aɖe si wogbugbɔxɔ eye fifia, mekpɔa ɣeyiɣi geɖe srɔ̃a nu le ɖokuinye si. Esi medze agbagba wɔ ɖe mɔfiamea dzi taa, nye dzitsinya ŋu kɔ.”

18. Ne míeɖoa toa, viɖe kawoe míakpɔ?

¹⁸ Míate ŋu asrɔ̃ toɖoɖo. Yesu srɔ̃ toɖoɖo, menye le esi nɔnɔmeawo de edzi ta o, ke boŋ “esrɔ̃ toɖoɖo le fu siwo wòkpe la me.” (Heb. 5:8) Abe Yesu enea, míawo hã míesrɔ̃a toɖoɖo le nɔnɔme madeamedziwo me. Le kpɔɖeŋu me, esi corona dɔvɔ̃a do eye wobia tso mía si be míagayi kpekpewo le Fiaɖuƒe Akpataa me o eye míadzudzɔ gbeƒãɖeɖe tso aƒe me yi aƒe mea, ɖe wòsesẽ na wò be nàɖo toa? Ke hã esi nèɖo toa, ekpɔ tawò, ena nèwɔ ɖeka kple nɔviwo, eye wòhe kafukafu vɛ na Yehowa. Mí katã míele dzadzraɖoɖi fifia wu be míawɔ ɖe mɔfiame ɖe sia ɖe si míaxɔ le xaxa gãa mea dzi. Míaƒe agbetsitsi nɔ te ɖe esia dzi!—Hiob 36:11.

19. Nu ka tae nèɖoe be yeanye toɖola?

¹⁹ Míeva srɔ̃e be toɖoɖo hea yayra geɖe vanɛ. Gake nu si tae míeɖoa to Yehowa ye nye be míelɔ̃e eye míedi be míawɔ nu si adze eŋu. (1 Yoh. 5:3) Míate ŋu aɖo nu nyui siwo katã Yehowa wɔ na mí la teƒe nɛ o. (Ps. 116:12) Gake míate ŋu aɖo to eyama kple ame siwo katã te wòle be míabɔbɔ ɖo. Ne míenye toɖolawoa, efia be míedze nunya. Eye ame siwo dze nunya la doa dzidzɔ na Yehowa ƒe dzi.—Lod. 27:11.