NUSƆSRƆ̃NYATI 43
HADZIDZI 90 Mide Dzi Ƒo Na Mia Nɔewo
Nu Si Akpe Ðe Ŋuwò Ne Nuŋububu Aɖewo Nana Dzi Ðena Le Ƒowò
“Mido nuwo katã kpɔ.”—1 TES. 5:21.
TAÐODZINUA
Nyati sia akpe ɖe mía ŋu míakpɔ nya siwo ɖea fu na mí siwo ate ŋu agblẽ mía kple Yehowa dome la gbɔ.
1-2. (a) Nu kawoe ate ŋu aɖe fu na Yehowa subɔlawo ɣeaɖewoɣi? (b) Nu ka mee míadzro le nyati sia me?
MÍEÐANYE ɖevi alo ame tsitsi o, nuŋububu aɖewo wɔnɛ be dzi ɖena le mía ƒo ɣeaɖewoɣi. Esiawo va nyea ɖikeke a siwo ɖea fu na mí. Le kpɔɖeŋu me, sɔhɛ aɖe ate ŋu ase le eɖokui me be yemele vevie na Yehowa o, eye wòasesẽ nɛ be wòaɖe adzɔgbe axɔ nyɔnyrɔ. Alo nɔviŋutsu aɖe si le eƒe ƒe 40-awo me fifia ɖe asi le mɔnukpɔkpɔ aɖewo ŋu le eƒe sɔhɛ me kple susu be yeawɔ geɖe na Yehowa. Fifia srɔ̃ kple viwo le esi. Eye ga si woatsɔ akpɔ ƒomea ƒe nuhiahiãwo gbɔ koe li. Esia ate ŋu ana wòanɔ eɖokui biam be, ‘Ðe ale si metso nya me va yia sɔa?’ Nɔvinyɔnu tsitsi aɖe hãe nye ema. Ŋusẽ megale eŋu wòawɔ nu siwo wòwɔna tsã o. Esia ate ŋu ana dzi naɖe le eƒo. Ðewohĩ èbia nya siawo tɔgbi ɖokuiwò kpɔ: ‘Ðe Yehowa dea asixɔxɔ ŋunyea? Ðe nu siwo metsɔ sa vɔ le esubɔsubɔ ta ɖe via? Ðe viɖe gakpɔtɔ le ŋunye le Yehowa ŋkumea?’
2 Ele vevie ŋutɔ be míadze agbagba akpɔ nya mawo siwo ɖea fu na mí la gbɔ. Ne míewɔe nenema o la, ate ŋu ana míaƒe xɔse me nagbɔdzɔ eye mlɔeba míava dzudzɔ Yehowa subɔsubɔ gɔ̃ hã. Nyati sia akpe ɖe mía ŋu míade dzesi Biblia me gɔmeɖose siwo akpe ɖe mía ŋu (1) ne ewɔna na mí be Yehowa medea asixɔxɔ mía ŋu o, (2) ne ewɔna na mí be nu siwo míetsɔ sa vɔ le Yehowa subɔsubɔ ta meɖe vi o, eye (3) ne ewɔna na mí be viɖe megale mía ŋu le Yehowa ŋkume o.
ALE SI MÍAKPƆ NYA SIWO ÐEA FU NA MÍ LA GBƆ
3. Aleke míawɔ akpɔ nya siwo ɖea fu na mí la gbɔ?
3 Mɔ aɖe si dzi míato akpɔ nya siwo ɖea fu na mí gbɔe nye be míadi woƒe ŋuɖoɖowo le Biblia me. Ne míewɔe alea la, ado ŋusẽ míaƒe xɔse, mía kple Yehowa dome anɔ kplikplikpli, eye esia akpe ɖe mía ŋu be ‘míanɔ tsitre sesĩe le xɔse la me.’—1 Kor. 16:13.
4. Aleke míawɔ ‘ado nuwo katã kpɔ’? (1 Tesalonikatɔwo 5:21)
4 Xlẽ 1 Tesalonikatɔwo 5:21. Biblia de dzi ƒo na mí be ‘míado nuwo katã kpɔ.’ Aleke míawɔ esia? Ale si míawɔe nye be hafi míaka ɖe nane dzi la, ele be míatsɔe asɔ kple nya si Biblia gblɔ tso eŋu. Le kpɔɖeŋu me, bu sɔhɛ si susu be yemele vevie le Mawu ŋkume o la ŋu kpɔ. Ðe wòle be wòasusui be esi wònye nenemae yele sesem le ye ɖokui me ta, ke nyateƒe wònyea? Ao. Ele be ‘wòado nya ma kpɔ’ le mɔ sia nu be wòakpɔ Yehowa ƒe susu le nyaa ŋu.
5. Aleke míawɔ akpɔ Yehowa ƒe susu le nya siwo ɖea fu na mí ŋu?
5 Ne míele Mawu ƒe Nyaa xlẽm la, ɖeko wòle abe Yehowa le nu ƒom na mí ene. Gake ne míedi be míakpɔ Yehowa ƒe susu le nya aɖe si le fu ɖem na mí ŋu la, Biblia xexlẽ ɖeɖe dzaa mesu o. Ele be míaku nu me tso eŋu le dɔwɔnu siwo Yehowa ƒe habɔbɔa na mí la me. (Lod. 2:3-6) Hafi míawɔ esiawo la, anyo be míado gbe ɖa be Yehowa nakpe ɖe mía ŋu míakpɔ eƒe susu le nya si le fu ɖem na mí la ŋu. Eyome míadi Biblia ƒe mɔfiame kple aɖaŋuɖoɖo siwo ate ŋu akpe ɖe mía ŋu. Azɔ hã míate ŋu axlẽ nu tso Bibliameme siwo hã se le wo ɖokui me abe míawo ke ene la ƒe ŋutinya.
6. Aleke kpekpeawo ate ŋu akpe ɖe mía ŋu?
6 Yehowa fiaa nu mí le míaƒe kpekpewo hã me. Ne míedea kpekpeawo edziedzi la, ame aɖe ƒe nyaŋuɖoɖo, alo nuƒo aɖe si míase ate ŋu akpɔ nu si tututu le fu ɖem na mí la gbɔ. (Lod. 27:17) Azɔ na míadzro nu siwo akpe ɖe mía ŋu míakpɔ ŋuɖoɖo nya siwo ɖea fu na mí la dometɔ aɖewo me.
NE ÈSENA LE ÐOKUIWÒ ME BE YEHOWA MEDEA ASIXƆXƆ YE ŊU O
7. Biabia kae ate ŋu aɖe fu na ame aɖewo?
7 Ðe nèbia ɖokuiwò kpɔ be, ‘Yehowa dea dzesi nye hã?’ Ne èsena le ɖokuiwò me be yemele ɖeke me o la, awɔ na wò be manya wɔ kura be yeadze xɔlɔ̃ xexe bliboa Wɔla o. Fia David hã anya susui alea kpɔ. Ewɔ nuku nɛ ŋutɔ be Yehowa dea dzesi mí amegbetɔ tsɛwo eye wòbia be: “Oo Yehowa, nu kae amegbetɔ nye, be nètsɔa ɖe le eme nɛ, alo amegbetɔvi si kuna, be nèbua eŋu?” (Ps. 144:3) Aleke míawɔ akpɔ ŋuɖoɖo na nyabiase sia?
8. Le 1 Samuel 16:6, 7, 10-12 ƒe nya nu la, nu kae Yehowa dea dzesi le ame ŋu?
8 Biblia na míekpɔe be Yehowa dea asixɔxɔ ame siwo amewo mebuna ɖe ɖeke me o la ŋu. Le kpɔɖeŋu me, Yehowa dɔ Samuel ɖe Isai ƒe me be wòavae si ami na viaŋutsuawo dometɔ ɖeka ale be wòava zu Israel-fia. Togbɔ be viŋutsu enyie le Isai si hã, ekplɔ wo ame adre vɛ hegblẽ ɖevitɔ si nye David ya ɖi. b Ke hã, David boŋue Yehowa tia. (Xlẽ 1 Samuel 16:6, 7, 10-12.) Yehowa nya David ƒe dzi me; enya be elɔ̃ ye vevie.
9. Nu ka tae nàte ŋu aka ɖe edzi be yele vevie na Yehowa? (Kpɔ fotoa hã.)
9 Wò ya bu nu siwo ɖo kpe edzi be Yehowa nya wò nyuie dometɔ aɖewo ŋu kpɔ. Eɖoa aɖaŋu nyui siwo tututu nèhiã na wò. (Ps. 32:8) Ne ɖe menya wò nyuie o ɖe, ate ŋu aɖo aɖaŋu mawo na wòa? (Ps. 139:1) Ne èwɔ ɖe aɖaŋu siwo Yehowa ɖo dzi eye nèkpɔe be wole vi ɖem na ye la, esia ana nàka ɖe edzi be Yehowa tsɔ ɖe le eme na ye. (1 Kron. 28:9; Dɔw. 17:26, 27) Yehowa kpɔa agbagba siwo katã dzem nèle hafi te ŋu le esubɔm hele to ɖomee la nyuie. Edea dzesi nɔnɔme nyui siwo le asiwò eye wòdi be yeanye Xɔ̃wò. (Yer. 17:10) Eye adzɔ dzi nɛ ŋutɔ ne wò hã èlɔ̃ dze xɔ̃e.—1 Yoh. 4:19.
“Ne èdi [Yehowa] la, ekema ana nàke ɖe eŋu.”—1 Kron. 28:9 (Kpɔ memama 9) c
NE ÈSENA LE ÐOKUIWÒ ME BE NU SIWO YETSƆ SA VƆE MEÐE VI O
10. Ne míebu ale si míetso nya me va yi ŋu la, biabia kawoe ate ŋu afɔ ɖe te?
10 Nɔvi aɖewo tso nya me va yi, gake emegbe wova le esusum be yewometso nya me nyuie o. Ðewohĩ woɖe asi le mɔnukpɔkpɔ si su wo si be woawɔ dɔ gã akpɔ ga geɖe ŋu alo wotiae be yewomawɔ dɔ aɖewo o ale be yewoavo awɔ geɖe na Yehowa. Azɔ esi ƒeawo va le yiyim la, wova kpɔe be nuwo le edzi dzem na ame nyanyɛ kple xɔlɔ̃ siwo ti taɖodzinu mawo yome eye ganyawo de wo dzi. Ne edzɔ alea la, ate ŋu ana woava nɔ wo ɖokuiwo biam be: ‘Ðe nyametsotso ma si mewɔ le Yehowa subɔsubɔ ta ɖe via? Alo ɖe wòna mɔnukpɔkpɔ bubuwo to ŋunye le agbe mea?’
11. Nu kae ɖe fu na Psalmo 73 lia ŋlɔla?
11 Ne nya siawo tɔgbi ɖea fu na wò la, ekema bu Psalmo 73 lia ŋlɔla ŋu kpɔ. Ekpɔe be nu nɔ edzi dzem na ame siwo mesubɔa Yehowa o, wonɔ lãmesẽ me eye naneke meɖea fu na wo o. (Ps. 73:3-5, 12) Esi wòkpɔ ale si wòdze be nuwo le yiyim na wo nyuie la, ese le eɖokui me be agbagba siwo dzem yele be yeasubɔ Yehowa nye dzodzro. Nuwo ŋu bubu alea nana ‘wòxaa nu ŋkekeawo katã.’ (Ps. 73:13, 14) Aleke wòwɔ va ɖu seselelãme mawo dzi?
12. Le Psalmo 73:16-18 ƒe nya nu la, aleke hakpalaa wɔ ɖu nu siwo nɔ fu ɖem nɛ la dzi?
12 Xlẽ Psalmo 73:16-18. Hakpala sia yi ɖe Yehowa ƒe kɔkɔeƒe la, si nye Mawu ƒe amewo dome. Le afi maa, ete ŋu bu nuwo ŋu nyuie. Eva de dzesii be togbɔ be edze be nuwo le edzi dzem na ame aɖewo hã la, etsɔme nyui aɖeke mele wo si o. Esi wòva se nuwo gɔme alea, eƒe susu me va dze akɔ anyi eye wòva ka ɖe edzi be nyametsotso nyuitɔe nye ema yewɔ be yetsɔ Yehowa subɔsubɔ ɖo nɔƒe gbãtɔ. Esia na wògaɖoe kplikpaa wu tsã be yeayi edzi asubɔ Yehowa.—Ps. 73:23-28.
13. Ne etena ɖe dziwò ɣeaɖewoɣi be yetsɔ nanewo sa vɔe la, nu kae nàwɔ be wò susu me nadze akɔ anyi? (Kpɔ fotoa hã.)
13 Wò hã àte ŋu awɔ nu si hakpalaa wɔ be wò susu me nadze akɔ anyi. Aleke nàwɔe? Bu yayra siwo su asiwò xoxo kple esiwo nàva kpɔ le etsɔme le Yehowa subɔsubɔ ta ŋu kpɔ. Azɔ tsɔe sɔ kple ale si nuwo ava wu enu na ame siwo mesubɔa Yehowa o. Woawo ya woƒe mɔkpɔkpɔa katã koe nye nu si asu wo si le xexe sia me, eya ta nu mawo ŋue woɖoa ŋu ɖo. Gake wò ya mɔkpɔkpɔ vavãe le asiwò. Yehowa do ŋugbe na wò be le etsɔmea, yeana nànɔ agbe tegbee eye naneke mahiã wò o. (Ps. 145:16) Azɔ bu nya sia hã ŋu kpɔ: Ne ɖe mètsɔ nu mawo sa vɔe oa, aleke nèsusu be nuwo anɔ na ye fifia? Nyateƒenya si ŋu kakaɖedzi lee nye esi: Ame siwo lɔ̃ faa tsɔ nanewo sa vɔe le esi wolɔ̃ Mawu kple wo haviwo ta la, nu nyui aɖeke mato wo ŋu gbeɖe o.
Nɔ ŋugble dem le nu nyui siwo Yehowa awɔ na wò le etsɔmea ŋu (Kpɔ memama 13) d
NE ÈSENA LE ÐOKUIWÒ ME BE VIÐE MEGALE YE ŊU LE YEHOWA ŊKUME O
14. Nɔnɔme kawo me tom Yehowa subɔla aɖewo le, eye nya kae woate ŋu anɔ wo ɖokui biam?
14 Tsitsimekuxiwo le fu ɖem na Yehowa subɔla aɖewo, ɖewo le dɔ lém eye ɖewo hã nye nuwɔametɔwo, si wɔe be womegatea ŋu wɔa geɖe abe ale si wodii ene o. Esia ate ŋu ana woasusu be yewomele vevie na Yehowa o eye woanɔ wo ɖokui biam be, ‘Ðe viɖe gale ŋunye na Yehowa?’
15. Nu ka dzie Psalmo 71 lia ŋlɔla ka ɖo?
15 Psalmo 71 lia ŋlɔla hã se le eɖokui me nenema kpɔ. Edo gbe ɖa be: “Mègagblẽm ɖi ne ŋusẽ vɔ le ŋunye o.” (Ps. 71:9, 18) Togbɔ be ele alea hã, hakpala sia ka ɖe edzi be ne yeyi edzi wɔ nuteƒe na Yehowa la, afia mɔ ye eye wòakpe ɖe ye ŋu. Esrɔ̃e be Yehowa kpɔa ŋudzedze ɖe ame siwo wɔa woƒe ŋutete katã subɔnɛ la ŋu, ne woƒe nɔnɔmewo meɖe mɔ be woawɔ geɖe o hã.—Ps. 37:23-25.
16. Mɔ kawo nue nɔvi siwo tsi le ƒe me la ate ŋu anɔ ku tsem le Yehowa subɔsubɔ me le? (Psalmo 92:12-15)
16 Mía nɔvi lɔlɔ̃a siwo tsi le ƒe me, míeɖe kuku miaƒe susu nenɔ ale si Yehowa bua mii ŋu. (Xlẽ Psalmo 92:12-15.) Ate ŋu akpe ɖe mia ŋu miayi edzi anɔ ŋu sẽm le xɔse me, togbɔ be miaƒe ŋutilãwo le gbɔdzɔgbɔdzɔm hã. Miaƒe susu meganɔ nu siwo miegate ŋu le wɔwɔm o la ŋu o, ke boŋ miaƒe susu nenɔ nu siwo miate ŋu awɔ la ŋu. Le kpɔɖeŋu me, miate ŋu ato kpɔɖeŋu nyui siwo mieɖona kple ɖetsɔleme vavã si mieɖena fiana amewo la dzi ade dzi ƒo na wo. Àte ŋu aƒo nu tso ale si Yehowa lé wò ɖe te le ƒe siwo katã va yia me kple eƒe ŋugbedodo siwo nèle mɔ kpɔm na le etsɔmea ŋu na amewo. Mègaŋlɔ be o hã be gbe siwo nèdona ɖe amewo ta ate ŋu aɖe vi na wo ŋutɔ. (1 Pet. 3:12) Nɔnɔme ka ke mee míeɖale o, nane le mí katã si míate ŋu ana Yehowa kple amewo siaa.
17. Nu ka tae mele be míatsɔ mía ɖokui anɔ sɔsɔm kple ame bubuwo o?
17 Ne etena ɖe dziwò be yemegate ŋu le geɖe wɔm le Yehowa subɔsubɔ me o la, ka ɖe edzi be esi nèle wò ŋutete katã wɔm nɛ ko la, edzea eŋu. Ate ŋu adzro wò be nàtsɔ nu siwo nète ŋu le wɔwɔm la asɔ kple ame bubuwo tɔ. Gake mègawɔe nenema o! Nu ka tae? Elabe Yehowa metsɔa mí sɔna kple ame bubuwo o. (Gal. 6:4) Le kpɔɖeŋu me, Maria kɔ ami ʋeʋĩ xɔasi aɖe ɖe Yesu ƒe afɔwo dzi. (Yoh. 12:3-5) Gake ahosi dahea ya, gaku sue eve siwo ƒe home le sue ŋutɔe wòdzɔ ɖe aɖakawo me le gbedoxɔa me. (Luka 21:1-4) Ke hã, Yesu kpɔe be wo ame evea siaa ƒe nunana ɖe xɔse si le wo si la fia. Esi wònye be Yesu srɔ̃a Fofoa pɛpɛpɛ ta la, àte ŋu aka ɖe edzi be Yehowa kpɔa nu siwo katã nèwɔna le esi nèlɔ̃e eye nèxɔ edzi se ta. Edea asixɔxɔ wo ŋu vevie, ne wò ya èkpɔe be wole sue gɔ̃ hã.
18. Nu kae akpe ɖe mía ŋu míaɖu nya siwo ɖea fu na mí la dzi? (Kpɔ aɖaka si nye “ Yehowa Ƒe Nya Ate Ŋu Akpe Ðe Ŋuwò Nàɖu Seselelãme Siwo Ðea Fu Na Wò La Dzi” hã.)
18 Ele eme be ewɔna na mí katã ɣeaɖewoɣi be míele vevie na Yehowa o, asixɔxɔ mele mía ŋu le Yehowa ŋkume o alo nu siwo míetsɔ sa vɔe le Yehowa subɔsubɔ ta meɖe vi o. Gake míeva kpɔe be Mawu ƒe Nya, Biblia, si ŋu kakaɖedzi le ate ŋu akpe ɖe mía ŋu míaƒe dzi nadze eme. Eya ta dze agbagba nàwɔ nane tso seselelãme siwo ɖea fu na wò la ŋu. Ne èwɔe alea la, dzi maɖe le ƒowò o, ke boŋ dzi aɖo ƒowò. Ka ɖe edzi bliboe be yele vevie na Yehowa. Edea asixɔxɔ nu siwo katã nètsɔna saa vɔe le esubɔsubɔ ta la ŋu vevie eye aɖo eteƒe na wò godoo. Ðo ŋku edzi be Yehowa lɔ̃ esubɔla wɔnuteƒewo dometɔ ɖe sia ɖe eye wòléa be na wo.
HADZIDZI 111 Nu Si Ta Míekpɔa Dzidzɔ Ðo
a NYAMEÐEÐE: Le nyati sia mea, míade dzesi ɖikeke siwo nana míesena le mía ɖokui me be míele vevie na Yehowa o alo be nyametsotso siwo míewɔ va yi la meɖe vi o. Menye ɖikeke siwo ŋu Biblia ƒo nu tsoe be woɖee fia be ame mexɔ Yehowa kple ƒe ŋugbedodowo dzi se o la ŋue nyati sia ku ɖo o.
b Togbɔ be Biblia megblɔ ƒe si tututu David xɔ esime Yehowa tiae o hã, anɔ eme be ƒewuivi ko wònye ɣemaɣi.—Kpɔ September 1, 2011 ƒe Gbetakpɔxɔ, axa 29, memama 2.
