1. Le Malaki 3:16 ƒe nya nua, agbalẽ ka ŋlɔm Yehowa le, eye nu kawoe le eme?

 ƑE AKPE geɖee nye esia Yehowa le agbalẽ tɔxɛ aɖe ŋlɔm. Amewo ƒe ŋkɔwoe le agbalẽa me, eye nuteƒewɔla Abel ye nye ame gbãtɔ si ƒe ŋkɔ wòŋlɔ ɖe eme. * (Luka 11:50, 51) Tso ema dzia, Yehowa tsɔ ŋkɔ bubuwo kpee. Egbea, ame miliɔn geɖe ƒe ŋkɔwo le eme. Biblia yɔ agbalẽ ma be “ŋkuɖodzigbalẽ” alo “agbegbalẽ.” Le nyati sia mea, míayɔe be “agbegbalẽ.”—Xlẽ Malaki 3:16; Nyaɖ. 3:5; 17:8.

2. Ame kawo ƒe ŋkɔe woŋlɔ ɖe agbegbalẽa me, eye nu kae míate ŋu awɔ be míaƒe ŋkɔ nanɔ eme?

² Ame siwo katã vɔ̃a Yehowa, wosubɔnɛ eye wodea asixɔxɔ eƒe ŋkɔ ŋua ƒe ŋkɔwo le agbalẽ tɔxɛ sia me. Mɔnukpɔkpɔ asu wo si be woakpɔ agbe mavɔ. Woate ŋu aŋlɔ míawo hã ƒe ŋkɔ ɖe agbalẽ ma me ne míexɔ Yesu Kristo ƒe tafevɔsaa dzi se eye ƒomedodo nyui le mía kple Yehowa dome. (Yoh. 3:16, 36) Míeɖale mɔ kpɔm be míayi dziƒo alo anɔ anyigba dzi o, mí katã míedzea agbagba be míaƒe ŋkɔ nanɔ agbalẽ ma me.

3-4. (a) Ne míaƒe ŋkɔ le agbegbalẽa me fifiaa, ɖe wòfia be míava nɔ agbe tegbeea? Ðe eme. (b) Nu ka mee míadzro le nyati sia kple esi kplɔe ɖo me?

³ Ðe wòfia be ame siwo katã ƒe ŋkɔ woŋlɔ ɖe agbalẽ sia mea akpɔ agbe mavɔ godooa? Míakpɔ biabia sia ƒe ŋuɖoɖo  le 2 Mose 32:33. Yehowa gblɔ na Mose be: “Ame si wɔ nu vɔ̃ ɖe ŋunye la, eya ƒe ŋkɔe matutu ɖa le nye agbalẽ me.” Eya ta woate ŋu atutu ame ƒe ŋkɔ ɖa le agbalẽa me. Ðeko wòle abe Yehowa ŋlɔ ŋkɔawo kple nuŋlɔti si ƒe nuŋɔŋlɔ woate ŋu atutu bɔbɔe ene. (Nyaɖ. 3:5.) Ele be míadze agbagba be míaƒe ŋkɔwo nakpɔtɔ anɔ agbegbalẽa me va se ɖe esime woŋlɔe kple nuŋlɔti si ƒe nuŋɔŋlɔ mate ŋu atutu o.

⁴ Esia fɔ biabia aɖewo ɖe te. Le kpɔɖeŋu me, nya kae Biblia gblɔ tso ame siwo ƒe ŋkɔwo le agbegbalẽa me kple ame siwo ƒe ŋkɔwo mele eme o ŋu? Ɣekaɣie ame siwo ƒe ŋkɔwo le agbalẽa me akpɔ agbe mavɔ? Ke ame siwo ku evɔ mɔnukpɔkpɔ mesu wo si wonya Yehowa hafi o ya ɖe? Ðe mɔnukpɔkpɔ asu woawo hã si be woaŋlɔ woƒe ŋkɔ ɖe agbegbalẽa mea? Míakpɔ biabia siawo ƒe ŋuɖoɖowo le nyati sia kple esi kplɔe ɖo me.

AME KAWO ƑE ŊKƆWOE LE AGBEGBALẼA ME?

5-6. (a) Abe ale si Filipitɔwo 4:3 ɖee fia enea, ame kawo ƒe ŋkɔwoe le agbegbalẽa me? (b) Ɣekaɣie woaŋlɔ woƒe ŋkɔwo ɖe agbegbalẽa me tegbee?

⁵ Ame kawo ƒe ŋkɔwoe le agbegbalẽa me? Be míaɖo biabia ma ŋua, míaƒo nu tso ame hatsotso vovovo atɔ̃ ŋu. Woŋlɔ wo dometɔ aɖewo ƒe ŋkɔwo ɖe agbegbalẽa me, gake ɖewo ya ƒe ŋkɔwo mele eme o.

⁶ Hatsotso gbãtɔe nye ame siwo wotia be woava ɖu fia kple Yesu le dziƒo. Ðe woƒe ŋkɔwo le agbegbalẽa me fifia? Ɛ̃. Nya si apostolo Paulo gblɔ na eƒe “hadɔwɔla” siwo nɔ Filipi la ɖee fia be ame siwo wosi ami na be woaɖu fia kple Yesu la ƒe ŋkɔwo le agbegbalẽa me fifia.  (Xlẽ Filipitɔwo 4:3.) Gake ele be woayi edzi awɔ nuteƒe hafi woƒe ŋkɔ nakpɔtɔ anɔ agbalẽa me. Woatre ame siawo nu zi mamlɛa do ŋgɔ teti na woƒe ku alo hafi xaxa gãa nadze egɔme. Ekema woaŋlɔ woƒe ŋkɔwo ɖe agbegbalẽa me tegbee.—Nyaɖ. 7:3.

7. Ɣekaɣie woaŋlɔ ameha gãa me tɔwo ƒe ŋkɔwo ɖe agbegbalẽa me tegbee? (Nyaɖeɖefia 7:16, 17)

⁷ Hatsotso eveliae nye alẽ bubuawo ƒe ameha gãa. Ðe woŋlɔ woƒe ŋkɔwo ɖe agbegbalẽa me fifia? Ɛ̃. Ðe woƒe ŋkɔwo akpɔtɔ anɔ agbegbalẽa me le Armagedon-ʋaa megbea? Ɛ̃. (Nyaɖ. 7:14) Yesu tsɔ ame siawo sɔ kple alẽwo eye wògblɔ be woayi “ɖe agbe mavɔ me.” (Mat. 25:46) Gake ameha gã sia si atsi agbe le Armagedon-ʋaa mea makpɔ agbe mavɔ enumake o. Togbɔ be woƒe ŋkɔwo akpɔtɔ anɔ agbegbalẽa me hãa, ɖeko wòle abe nuŋlɔti si ƒe nuŋɔŋlɔ woate ŋu atutu bɔbɔe ye wotsɔ ŋlɔ woe ene. Le Ƒe Akpe Ðeka Dziɖuɖua mea, Yesu “akplɔ wo, eye wòafia mɔ wo ayi agbetsidzidziwo gbɔ.” Woaŋlɔ ame siwo aɖo to Kristo ƒe mɔfiame, siwo woadrɔ̃ ʋɔnu ɣemaɣi be wowɔ nuteƒe na Yehowa, ƒe ŋkɔwo ɖe agbegbalẽa me tegbee.—Xlẽ Nyaɖeɖefia 7:16, 17.

8. Ame kawo ƒe ŋkɔwoe mele agbegbalẽa me o, eye nu kae adzɔ ɖe wo dzi?

⁸ Hatsotso etɔ̃liae nye ame siwo Yesu tsɔ sɔ kple gbɔ̃wo, siwo woatsrɔ̃ le Armagedon-ʋaa me. Womeŋlɔ woƒe ŋkɔwo ɖe agbegbalẽa me o. Yesu gblɔ be woayi “ɖe tsɔtsrɔ̃ mavɔ me.” (Mat. 25:46) Mawu ƒe gbɔgbɔ ʋã Paulo wògblɔ be “ame siawo akpɔ tsɔtsrɔ̃ mavɔ ƒe tohehe.” (2 Tes. 1:9; 2 Pet. 2:9) Nu sia kee adzɔ ɖe ame siwo katã ɖoe koŋ wɔ nu vɔ̃ ɖe gbɔgbɔ kɔkɔea ŋu hã dzi. Woatsrɔ̃ ɖikaa; womakpɔ agbe mavɔ o. Eya ta edze ƒãa be womafɔ wo ɖe tsitre o. (Mat. 12:32; Marko 3:28, 29; Heb. 6:4-6) Azɔ míaƒo nu tso ame hatsotso eve susɔeawo, siwo woafɔ ɖe tsitre be woanɔ anyigba dzi ŋu.

AME SIWO WOAFƆ ÐE TSITRE

9. Abe ale si wòdze le Dɔwɔwɔwo 24:15 enea, amewo ƒe hatsotso eve kawoe woafɔ ɖe tsitre, eye vovototo kae le wo dome?

⁹ Biblia gaƒo nu tso amewo ƒe hatsotso eve siwo woafɔ ɖe tsitre woava nɔ agbe tegbee le anyigba dzi ŋu. Woawoe nye “ame dzɔdzɔewo” kple “ame madzɔmadzɔwo.” (Xlẽ Dɔwɔwɔwo 24:15.) ‘Ame dzɔdzɔeawoe’ nye ame siwo subɔ Yehowa eye wowɔ nuteƒe nɛ esime wonɔ agbe. ‘Ame madzɔmadzɔawoe’ nye ame siwo mesubɔ Yehowa o. Le nyateƒe mea, wo dometɔ akpa gãtɔ mewɔ nu si le dzɔdzɔe le Yehowa ŋkume kura o. Esi woafɔ hatsotso evea siaa ɖe tsitre taa, ɖe míate ŋu agblɔ be woŋlɔ woƒe ŋkɔwo ɖe agbegbalẽa mea? Be míaɖo biabia sia ŋua, na míaƒo nu tso wo ŋu ɖekaɖeka.

10. Nu ka tae woafɔ “ame dzɔdzɔewo” ɖe tsitre, eye dɔ kae woade wo si? (Kpɔ “Nyabiabia Siwo Tso Exlẽlawo Gbɔ,” si dze le Gbetakpɔxɔ sia me ku ɖe ame siwo woafɔ ɖe tsitre be woanɔ anyigba dzi ŋu.)

¹⁰ Hatsotso eneliae nye “ame dzɔdzɔewo.” Ame siawo ƒe ŋkɔwo nɔ agbegbalẽa me hafi woku. Ke ɖe wotutu woƒe ŋkɔwo ɖa esi wokua? Ao, elabe Yehowa ɖoa ŋku wo dzi abe ɖe wokpɔtɔ le agbe ene. Biblia gblɔ be: “Menye ame kukuwo ƒe Mawue [Yehowa nye] o, ke boŋ agbagbeawo tɔe, elabena wo katã wole agbe nɛ.” (Luka 20:38) Esia fia be ne wofɔ ame dzɔdzɔewo ɖe tsitrea, woƒe ŋkɔwo  akpɔtɔ anɔ agbegbalẽa me. Gake mefia kokoko be anɔ eme ɖaa o. (Luka 14:14) Ðikeke mele eme o be, woade dɔ asi na wo dometɔ aɖewo be woanye ‘amegãwo ɖe anyigba bliboa dzi.’—Ps. 45:16.

11. Nu kae wòahiã be “ame madzɔmadzɔwo” nasrɔ̃ hafi woadze be woaŋlɔ woƒe ŋkɔwo ɖe agbegbalẽa me?

¹¹ Hatsotso atɔ̃liae nye “ame madzɔmadzɔwo.” Ame siawo mewɔ nu dzɔdzɔe hafi ku o, ɖewohĩ le esi womenya Yehowa ƒe nudidiwo o ta. Eya ta woƒe ŋkɔwo mele agbegbalẽa me o. Gake Mawu afɔ wo ɖe tsitre ale be mɔnukpɔkpɔ nasu wo si be woawɔ nu siwo ana woaŋlɔ woƒe ŋkɔwo ɖe agbegbalẽa me. ‘Ame madzɔmadzɔ’ siawo nɔ agbe vlowo va yi. Eya ta ahiã be woakpe ɖe wo ŋu woaɖe asi le woƒe tsãgbenɔnɔ ŋu, eye woafia wo ale si woanɔ agbe ɖe Yehowa ƒe nudidi dzɔdzɔeawo nu. Esiae anye nufiafiadɔ gãtɔ kekeake si Mawu Fiaɖuƒea ana woawɔ le anyigba dzi.

12. (a) Ame kawoe afia nu ame madzɔmadzɔawo? (b) Nu kae adzɔ ɖe ame siwo agbe toɖoɖo la dzi?

¹² Ame kawoe afia nu ame madzɔmadzɔawo? Ameha gãa kple ame dzɔdzɔe siwo woafɔ ɖe tsitre ye. Hafi woate ŋu aŋlɔ ame madzɔmadzɔawo ƒe ŋkɔwo ɖe agbegbalẽa mea, ehiã be woadze agbagba be wo kple Yehowa dome nanɔ nyuie eye woatsɔ wo ɖokuiwo aɖe adzɔgbe nɛ. Yesu Kristo kple amesiaminawo anɔ ŋku lém ɖe ame madzɔmadzɔawo dometɔ ɖe sia ɖe ŋu akpɔ ale si wòle wɔwɔm ɖe nu si fiam wole wo dzi. (Nyaɖ. 20:4) Woaɖe ame sia ame si agbe be yemawɔ ɖe mɔfiamewo dzi o la ɖa, ne exɔ ƒe alafa ɖeka gɔ̃ hã. (Yes. 65:20) Yehowa kple Yesu ate ŋu akpɔ nu si le amewo ƒe dzi me eye womaɖe mɔ na ame aɖeke be wòagblẽ ŋutifafa si le xexe yeyea me la me o.—Yes. 11:9; 60:18; 65:25; Yoh. 2:25.

 AGBE ƑE TSITRETSITSI KPLE ƲƆNUDƆDRƆ̃ ƑE TSITRETSITSI

13-14. (a) Aleke míese Yesu ƒe nya siwo dze le Yohanes 5:29 la gɔmee tsã? (b) Nu kae wòle be míade dzesi le Yesu ƒe nyawo ŋu?

¹³ Yesu hã ƒo nu tso ame siwo woafɔ ɖe tsitre be woanɔ anyigba dzi ŋu. Le kpɔɖeŋu me, egblɔ be: “Gaƒoƒo la gbɔna, esime ame siwo katã le ŋkuɖodziyɔdowo me la ase eƒe gbe, eye woado go, ame siwo wɔ nu nyuiwo la, hena agbe ƒe tsitretsitsi, eye ame siwo wɔ nu vlowo la, hena ʋɔnudɔdrɔ̃ ƒe tsitretsitsi.” (Yoh. 5:28, 29) Yesu ƒe nyawo gɔme ɖe?

¹⁴ Tsãa, míese Yesu ƒe nyawo gɔme be woku ɖe nu si ame siwo woafɔ ɖe tsitre awɔ le woƒe tsitretsitsi megbe ŋu; si fia be ame siwo woafɔ ɖe tsitre dometɔ aɖewo awɔ nu nyuiwo eye wo dometɔ aɖewo awɔ nu vlowo. Gake de dzesii be Yesu megblɔ be ame siwo woafɔ ɖe tsitre awɔ nu nyuiwo alo awɔ nu vlowo o. Ke boŋ egblɔ be wo dometɔ aɖewo “wɔ nu nyuiwo” eye ɖewo hã “wɔ nu vlowo.” Esia fia be wowɔ nu siawo va yi. Susu le esia me, elabe womaɖe mɔ ame aɖeke nawɔ nu vlowo le xexe yeyea me o. Edze ƒãa be ame madzɔmadzɔawo wɔ nu vlo mawo hafi ku. Ke aleke wòle be míase nya siwo Yesu gblɔ tso “agbe ƒe tsitretsitsi” kple “ʋɔnudɔdrɔ̃ ƒe tsitretsitsi” ŋu la gɔme?

15. Ame kawoe woafɔ hena “agbe ƒe tsitretsitsi,” eye nu ka tae?

¹⁵ Woafɔ ame dzɔdzɔeawo, siwo nye ame siwo wɔ nu nyuiwo hafi ku la, hena “agbe ƒe tsitretsitsi,” elabe woƒe ŋkɔwo le agbegbalẽa me xoxo. Esia fia be ame siwo woyɔ le Yohanes 5:29 be “ame siwo wɔ nu nyuiwo” la kee woyɔ le Dɔwɔwɔwo 24:15 be “ame dzɔdzɔewo.” Gɔmesese sia wɔ ɖeka kple nya si le Romatɔwo 6:7, si gblɔ be: “Ame si ku la, wotso afia nɛ ɖee tso eƒe nu vɔ̃ me.” Eya ta, ne ame dzɔdzɔe kua, Yehowa tea fli ɖe eƒe nu vɔ̃wo me, gake egakpɔtɔ ɖoa ŋku eƒe nuteƒewɔwɔ ya dzi. (Heb. 6:10) Togbɔ be ele alea hãa, ahiã be ame dzɔdzɔe siawo nayi edzi awɔ nuteƒe na Yehowa be woƒe ŋkɔ nakpɔtɔ anɔ agbegbalẽa me.

16. Nu kae “ʋɔnudɔdrɔ̃ ƒe tsitretsitsi” fia?

¹⁶ Ke ame siwo wɔ nu vlowo hafi ku ya ɖe? Yehowa te fli ɖe woƒe nu vɔ̃wo me esime woku. Gake esi womesubɔ Yehowa hafi ku o taa, woƒe ŋkɔwo mele agbegbalẽa me o. Eya ta ame siwo woyɔ le Yohanes 5:29 be “ame siwo wɔ nu vlowo” la kee woyɔ le Dɔwɔwɔwo 24:15 be “ame madzɔmadzɔwo.” Woafɔ wo ɖe tsitre hena “ʋɔnudɔdrɔ̃ ƒe tsitretsitsi.” * Yesu adrɔ̃ ʋɔnu ame madzɔmadzɔawo le mɔ sia nu be alé ŋku ɖe wo ŋu akpɔe ɖa be wodze be woaŋlɔ woƒe ŋkɔ ɖe agbegbalẽa me hã. (Luka 22:30) Esia abia ɣeyiɣi geɖe. Ne ame madzɔmadzɔ siawo trɔ agbenɔnɔ eye wotsɔ wo ɖokui ɖe adzɔgbe na Yehowa ko hafi woaŋlɔ woƒe ŋkɔwo ɖe agbegbalẽa me.

17-18. Nu kae wòahiã be ame siwo katã woafɔ ɖe tsitre la nawɔ? Nu kae “dɔwɔwɔwo,” si wozã le Nyaɖeɖefia 20:12, 13 la fia?

¹⁷ Ahiã be ame dzɔdzɔe kple ame madzɔmadzɔ siwo woafɔ ɖe tsitre la siaa nawɔ ɖe agbalẽ yeye siwo woaʋu le ƒe akpe ɖekaa me la me nyawo dzi. Apostolo  Yohanes gblɔ be: “Mekpɔ ame kukuwo, ame tsɛwo kple ame ŋkutawo siaa, le tsitre ɖe fiazikpui la ŋgɔ, eye woʋu agbalẽwo. Eye woʋu agbalẽ bubu aɖe; eyae nye agbegbalẽ la. Eye wodrɔ̃ ʋɔnu ame kukuawo ɖe nu siwo woŋlɔ ɖe agbalẽawo me le woƒe dɔwɔwɔwo ŋuti la nu.”—Nyaɖ. 20:12, 13.

¹⁸ Ame siwo woadrɔ̃ ʋɔnu la ƒe ‘dɔwɔwɔ’ kawo dzie woanɔ te ɖo adrɔ̃ ʋɔnu wo? Esiwo wowɔ hafi ku yea? Ao! Ðo ŋku edzi be wote fli ɖe nu vɔ̃ siwo wowɔ hafi kua me. Eya ta woƒe “dɔwɔwɔwo,” si ŋu Yohanes ƒo nu tsoe mate ŋu afia nu siwo wowɔ hafi ku o. Ke boŋ efia ale si woawɔ nu ɖe hehe si woaxɔ le xexe yeyea me ŋu. Ahiã be nuteƒewɔlawo abe Noa, Samuel, David, kple Daniel ene gɔ̃ hã nasrɔ̃ nu tso Yesu Kristo ŋu eye woaxɔ eƒe vɔsaa dzi ase. Ne nu geɖe li wòhiã be ame dzɔdzɔe siawo gɔ̃ hã nasrɔ̃a, ke efia be nu gbogbo aɖewo li wòahiã be ame madzɔmadzɔawo nasrɔ̃!

19. Nu kae adzɔ ɖe ame siwo mawɔ mɔnukpɔkpɔ si asu wo si ŋu dɔ o dzi?

¹⁹ Nu kae adzɔ ɖe ame siwo mawɔ mɔnukpɔkpɔ tɔxɛ si asu wo si ŋu dɔ o la dzi? Nyaɖeɖefia 20:15 gblɔ nu si adzɔ ɖe wo dzi mlɔeba. Egblɔ be: “Wotsɔ ame sia ame si ƒe ŋkɔ womekpɔ le agbegbalẽa me o la ƒu gbe ɖe dzota la me.” Ɛ̃, woatsrɔ̃ wo ɖa keŋkeŋ. Eya ta ele be míaku kutri vevie be woaŋlɔ míaƒe ŋkɔ ɖe agbegbalẽa me eye wòakpɔtɔ anɔ eme.

20. Dɔ vevi kae míawɔ le Ƒe Akpe Ðeka Dziɖuɖua me? (Kpɔ nɔnɔmetata si le akpaa dzi.)

²⁰ Ƒe Akpe Ðeka Dziɖuɖua anye ɣeyiɣi dodzidzɔname aɖe ŋutɔ! Ɣemaɣia, Mawu ƒe amewo awɔ nufiafiadɔ gãtɔ kekeake si ɖeke mesɔ kplii o. Eye Yesu alé ŋku ɖe ame dzɔdzɔewo kple ame madzɔmadzɔwo siaa ƒe nuwɔna kple nɔnɔme ŋu. (Yes. 26:9; Dɔw. 17:31) Aleke nufiafiadɔ sia anɔ? Nyati si kplɔe ɖo akpe ɖe mía ŋu míanya nu geɖe tso nufiafiadɔ tɔxɛ sia ŋu eye míade asixɔxɔ eŋu.