1. Dɔ gã kae wode Yehoas, Uziya, kple Yosiya si?

 TSƆE be wotsɔ wò ɖo fiae ɖe Mawu ƒe dukɔa nu esime nènye ɖevi dzaa alo sɔhɛ ko! Aleke nàzã ŋusẽ ma si su asiwò? Biblia ƒo nu tso ame siwo wotsɔ ɖo fia le Yuda esime wonye ɖevi dzaa ko dometɔ aɖewo ŋu. Le kpɔɖeŋu me, Yehoas xɔ ƒe 7 esime wòzu fia, Uziya xɔ ƒe 16 esime wòzu fia, eye Yosiya xɔ ƒe 8 esime wòzu fia. Mèkpɔe be dɔ gã aɖe ŋutɔe nye ema oa? Togbɔ be menɔ bɔbɔe na wo o hãa, Yehowa kple ame bubuwo kpe ɖe wo ŋu wote ŋu wɔ nu nyui geɖe.

2. Nu ka tae wòle be míasrɔ̃ nu tso Yehoas, Uziya, kple Yosiya ŋu?

² Míawo ya míenye fiawo alo fianyɔnuwo o, gake míate ŋu asrɔ̃ nu geɖe tso ame etɔ̃ siawo ƒe ŋutinyawo me. Wowɔ nu nyuiwo, gake wowɔ nu gbegblẽwo hã. Woƒe ŋutinyawo ate ŋu akpe ɖe mía ŋu míatia xɔlɔ̃ nyuiwo, míabɔbɔ mía ɖokui, eye míayi edzi ate ɖe Yehowa ŋu.

3. Aleke Fia Yehoas wɔ nui esi Nunɔlagã Yehoyada fia nui?

³ Srɔ̃ nu tso nu nyui siwo Yehoas wɔa me. Esi Fia Yehoas nye ɖevia, eɖoa to. Fofoa ku, ta Nunɔlagã Yehoyada tsɔe abe eya ŋutɔ via ene eye wòfiaa nui heɖoa aɖaŋu nɛ. Yehoas bɔbɔ eɖokui eye wòwɔna ɖe aɖaŋuɖoɖo mawo dzi. Esia wɔe be Yehoas ɖoe be yeasubɔ Yehowa eye wòkpe ɖe dukɔa ŋu be woawo hã woasubɔ Yehowa. Ena wodzra Yehowa ƒe gbedoxɔa gɔ̃ hã ɖo.—2 Kron. 24:​1, 2, 4, 13, 14.

4. Ne míelɔ̃ Yehowa ƒe sewo eye míewɔna ɖe wo dzia, aleke wòaɖe vi na mí? (Lododowo 2:​1, 10-12)

 ⁴ Ne dziwòlawo alo ame bubu aɖe le nu fiam wò be nàlɔ̃ Yehowa eye nàwɔ eƒe sewo dzia, ke nu nyui aɖe ŋutɔe nye ema wɔm wole na wò. (Xlẽ Lododowo 2:​1, 10-12.) Dziwòlawo ate ŋu ato mɔ vovovowo dzi afia nu wò. Kpɔ ale si nɔvinyɔnu Katya fofo kpe ɖe eŋu wòtso nya me nyuie ɖa. Ne fofoa kplɔe yina ɖe sukua, edzroa Ŋɔŋlɔawo me kplii. Katya gblɔ be: “Nu siwo fofonye fianam la kpena ɖe ŋunye mewɔa nu nyui ne tetekpɔ va dzinye le ŋkekea me.” Aleke nèsena le ɖokuiwò me ne dziwòlawo zã Biblia ƒe mɔfiamewo tsɔ de sewo na wò? Ðe nèsena le ɖokuiwò me be woxaxa ye ɖoa? Nu kae akpe ɖe ŋuwò nàwɔ ɖe wo dzi? Nɔvinyɔnu aɖe si ŋkɔe nye Anastasia gblɔ be ye dzilawo gbɔa dzi ɖi ɖea nu si tae wode se aɖewo na yea me. Egblɔ be: “Esia na mekpɔe be wolɔ̃m eye wodi be yewoakpɔ tanye, ke menye be ɖe wodi be yewoana maxaxa le ɖokuinye me o.”

5. Ne èɖoa toa, ame kawoe akpɔ dzidzɔ? (Lododowo 22:6; 23:​15, 24, 25)

⁵ Ne dziwòlawo zã Biblia tsɔ fia nu wò eye nèɖo to wɔ ɖe edzia, woakpɔ dzidzɔ ŋutɔ. Vevietɔ wua, Mawu akpɔ dzidzɔ ɖe ŋuwò eye wò kplii mianye xɔlɔ̃ veviwo. (Xlẽ Lododowo 22:6; 23:​15, 24, 25.) Esia tae wòle vevie be nàsrɔ̃ kpɔɖeŋu nyui si Yehoas ɖo le eƒe ɖevime.

6. Esi Yehoyada kua, ame kawoe Yehoas va nɔ to ɖomee, eye nu kae do tso eme? (2 Kronika 24:​17, 18)

⁶ Srɔ̃ nu tso nu gbegblẽ siwo Yehoas wɔa me. Esi Yehoyada kua, Yehoas va nɔ ha gbegblẽwo dem. (Xlẽ 2 Kronika 24:​17, 18.) Eva nɔ ha dem kple Yuda-megã siwo melɔ̃ Yehowa o eye wòɖoa to wo. Le nyateƒe mea, mele be Yehoas nanɔ ha dem kple ame mawo hafi o. (Lod. 1:10) Ewɔ ɖe aɖaŋu gbegblẽ si woɖo nɛ dzi. Esi tasia ƒe vi Zakariya nɔ agbagba dzem be yeaɖɔe ɖoa, ena wowui. (2 Kron. 24:​20, 21; Mat. 23:35) Ewɔ nublanui ŋutɔ! Medze agbagba kura o. Yehoas si wɔ nu nyui le gɔmedzedzea, va zu xɔsegbela kple amewula. Mlɔebaa, eya ŋutɔ ƒe subɔviwo wui. (2 Kron. 24:​22-25) Ne ɖe wòɖo to Yehowa eye wòwɔ ɖe ame siwo lɔ̃ Yehowa ƒe aɖaŋuɖoɖowo dzia, anye ne nuwo meva yi nɛ nenema o! Nu kae nèsrɔ̃ tso nu gbegblẽ siwo Yehoas wɔa me?

7. Ame kawoe wòle be nàdze xɔlɔ̃e? (Kpɔ fotoa hã.)

 ⁷ Nu vevi aɖe si míate ŋu asrɔ̃ tso Yehoas ƒe ŋutinyaa mee nye be ele be míadze xɔlɔ̃ ame siwo lɔ̃ Yehowa eye wowɔa nu si wòdi, elabe woakpe ɖe mía ŋu míawɔ nu nyui. Menye mía hatiwo ɖeɖe koe míade ha kple o, ke ele be míalɔ̃ faa adze xɔlɔ̃ ame siwo tsi wu mí alo ame siwo míetsi wu hã. Ðo ŋku edzi be Yehoyada dze xɔ̃ Yehoas eye wòkpe ɖe eŋu wòlɔ̃ Yehowa togbɔ be etsi wui sãsãsã gɔ̃ hã. Bia ɖokuiwò be, ‘Ðe ame siwo nye xɔ̃nyewo kpena ɖe ŋunye be malɔ̃ Yehowa ɖe edzia? Ðe wodea dzi ƒo nam be mawɔ Mawu ƒe sewo dzia? Ðe woɖoa dze tso Yehowa kple nu si wosrɔ̃ le Biblia me ŋua? Ðe wowɔna ɖe Mawu ƒe sewo dzia? Ne mewɔ nane si mesɔ oa, ɖe woɖoa aɖaŋu nama?’ (Lod. 27:​5, 6, 17) Le nyateƒe mea, ne xɔ̃wòwo melɔ̃ Yehowa oa, ke mègade ha kpli wo o. Gake ne xɔ̃wòwo lɔ̃ Yehowa la, ke ku ɖe wo ŋu, elabe woakpe ɖe ŋuwò.—Lod. 13:20.

8. Ne èzãa Internet dzi hahoo kadodo ƒe mɔnu aɖea, nya kawoe wòle be nàbia ɖokuiwò?

⁸ Egbea, míetea ŋu toa Internet dzi doa ka kple míaƒe ƒometɔwo kple xɔlɔ̃wo. Gake ame geɖe dana nu yeye siwo woƒle alo nu siwo wote ŋu wɔ ƒe foto alo video ɖe hahoo kadoƒewo be amewo nakpɔ. Ne èzãa Internet dzi hahoo kadodowoa, bia ɖokuiwò be: ‘Ðe medaa nu mawo tɔgbi ɖi be amewo nakpɔa? Ðe medaa nuwo ɖi be matsɔ ade dzi ƒo na amewoa, alo ɖe medi be woakpɔe akafum? Ðe meɖe mɔ ame siwo le kadoƒea le ŋusẽ gbegblẽ kpɔm ɖe nye nuŋububu, nuƒoƒo kple nuwɔnawo dzia?’ Nɔviŋutsu Nathan Knorr, si nye Dɔdzikpɔhaa me tɔ va yi gblɔ be: “Mègawɔ nu be nàdze amegbetɔ ŋu o. Elabe mlɔebaa, màva dze ame aɖeke ŋu o. Dze Yehowa ŋu, eye àdze ame siwo katã lɔ̃ Yehowa hã ŋu.”

9. Nu kae Yehowa kpe ɖe Uziya ŋu wòte ŋu wɔ? (2 Kronika 26:​1-5)

⁹ Srɔ̃ nu tso nu nyui siwo Uziya wɔa me. Le Fia Uziya ƒe ɖevimea, ebɔbɔ eɖokui. Esrɔ̃ ‘ale si wòavɔ̃ Mawu vavã la.’ Eye Yehowa yrae le nu geɖe me le ƒe 68 siwo wònɔ agbe la me. (Xlẽ 2 Kronika 26:​1-5.) Uziya ɖu dukɔa ƒe futɔ geɖewo dzi eye wòwɔ nu geɖe tsɔ kpɔ Yerusalem dua ta. (2 Kron. 26:​6-15) Ðikeke mele eme o be ekpɔ dzidzɔ ɖe nu siwo katã Mawu kpe ɖe eŋu wòte ŋu wɔa ŋu.—Nyagb. 3:​12, 13.

10. Nu kae dzɔ ɖe Uziya dzi?

¹⁰ Srɔ̃ nu tso nu gbegblẽ siwo Uziya wɔa me. Esi Uziya nye fia taa, eyae ɖea gbe na amewo. Ðe esia na wòsusui be yeate ŋu awɔ nu sia nu si dze ye ŋua? Gbe ɖekaa, Uziya ge ɖe Yehowa ƒe gbedoxɔa me eye wòtee kpɔ dadatɔe be yeado dzudzɔ ʋeʋĩ le vɔsamlekpuia dzi na Yehowa, evɔ womeɖe mɔ na fiawo be woawɔ nu ma o. (2 Kron. 26:​16-18) Nunɔlagã Azariya dze agbagba be yeaxlɔ̃ nui, gake Uziya do dziku vevie. Nublanuitɔea, Uziya meyi edzi wɔ nuteƒe na Yehowa o, eye Yehowa he to nɛ. (2 Kron. 26:​19-21) Ne ɖe Uziya yi edzi ɖo to Yehowa, anye ne nuwo meyi nɛ nenema o!

11. Nu kae akpe ɖe mía ŋu míayi edzi abɔbɔ mía ɖokui? (Kpɔ fotoa hã.)

¹¹ Esi nu dze edzi na Uziya la, eva ŋlɔ Yehowa, ame si na ŋusẽ ɖo eŋu eye nu dze edzi nɛa be. Nu kae míesrɔ̃? Ele be míaɖo ŋku edzi be Yehowa gbɔe subɔsubɔmɔnukpɔkpɔ siwo su mía si kple nu  siwo katã le mía si le agbe mea tso. Eya ta mele be míatsɔ nu siwo míete ŋu wɔ anɔ adegbe ƒom o, ke boŋ míatsɔ wo ŋuti kafukafua katã ana Yehowa. b (1 Kor. 4:7) Ele be míabɔbɔ mía ɖokui alɔ̃ ɖe edzi be míede blibo o, eye míehiã na ɖɔɖɔɖo. Nɔviŋutsu aɖe si le eƒe ƒe 60-awo me gblɔ be: “Medzea agbagba be magado dziku alo ana dzi naɖe le ƒonye ne amewo de dzesi nye vodadawo o. Ne mewɔ nane si mesɔ o eye woɖɔm ɖoa, mewɔa tɔtrɔ siwo hiã be nye nu nadze Yehowa ŋu.” Nya lae nye be ne míebɔbɔa mía ɖokui eye míeɖoa to Yehowa la, eme anyo na mí.—Lod. 22:4.

12. Esi Yosiya nɔ eƒe ƒewuiwo mea, aleke wòdi Yehowae? (2 Kronika 34:​1-3)

¹² Srɔ̃ nu tso nu nyui siwo Yosiya wɔa me. Esi Yosiya nɔ eƒe ƒewuiwo mea, edi Yehowa. Esrɔ̃ nu tso Yehowa ŋu eye wòdze agbagba be yeawɔ eƒe lɔlɔ̃nu. Gake menɔ bɔbɔe nɛ kura o, elabe ɣemaɣia, amewo nɔ trɔ̃wo subɔm. Eya ta ehiã be dzi nanɔ eƒo be wòana amewo nadzudzɔ trɔ̃subɔsubɔ. Eye dzi nɔ eƒo wòwɔe hã! Edze trɔ̃subɔsubɔ ɖeɖe ɖa le dukɔa me hafi xɔ ƒe 20 gɔ̃ hã.—Xlẽ 2 Kronika 34:​1-3.

13. Ne èɖe adzɔgbe na Yehowa la, aleke wòaɖe vi na wò?

¹³ Ne ɖevi sue ko nènye hãa, àte ŋu asrɔ̃ Yosiya. Aleke nàwɔe? Srɔ̃ nu tso Yehowa ŋu eye nànya nɔnɔme nyui siwo le esi. Ne èwɔe alea, esia aʋã wò be nàtsɔ ɖokuiwò aɖe adzɔgbe nɛ. Viɖe kae ado tso eme na wò? Luke si xɔ nyɔnyrɔ esime wòxɔ ƒe 14 gblɔ be: “Tso fifia dzi yinaa, mana Yehowa subɔsubɔ nanye nu vevitɔ nam eye madze agbagba awɔ nu siwo ado dzidzɔ nɛ.” (Marko 12:30) Ne wò hã èwɔe nenemaa, Yehowa ayra wò ŋutɔ!

14. Aleke sɔhɛ geɖe srɔ̃ Fia Yosiya? Gblɔ eƒe kpɔɖeŋu.

¹⁴ Kuxi kawo me tom nèle? Sɔhɛ aɖewo gblɔ nu si me woto. Johan, si xɔ nyɔnyrɔ esi wòxɔ ƒe 12 gblɔ be yeƒe sukuhatiwo  ƒonɛ ɖe ye nu be yeano atama ƒomevi aɖe (vaping alo vapoter). Nu si kpe ɖe Johan ŋu wònɔ te ɖe enue nye be enɔa susu me nɛ be nu ma nono awɔe be yeƒe nu magadze Yehowa ŋu o eye ate ŋu ana yeadze dɔ gɔ̃ hã. Rachel, si xɔ nyɔnyrɔ esi wòxɔ ƒe 14, hã gblɔ nu si kpe ɖe eŋu wòte ŋu ɖu kuxi siwo va edzi le sukua dzi. Egblɔ be: “Medzea agbagba be matsɔ susu aɖo nu siwo ana manɔ Yehowa ŋu bum la ŋu. Le kpɔɖeŋu me, ne wole nu fiam mí tso ŋutinya aɖe ŋu le sukua, meɖoa ŋku Biblia me nudzɔdzɔ alo nyagblɔɖi aɖe dzi. Alo ne nye kple nye sukuhati aɖe le dze ɖomaa, medea ŋugble le mawunyakpukpui aɖe si mate ŋu axlẽ nɛ ŋu.” Ðewohĩ kuxi siwo ava dziwò ato vovo na Fia Yosiya tɔ, gake àte ŋu awɔ nu le nunya me abe eya ene awɔ nuteƒe na Yehowa. Ne ète ŋu nɔ te ɖe kuxi siwo vaa dziwò fifia nua, ado ŋusẽ wò nànɔ te sesĩe le esiwo ava dziwò le etsɔmea me.

15. Nu kae kpe ɖe Yosiya ŋu wòwɔ nuteƒe na Yehowa? (2 Kronika 34:​14, 18-21)

¹⁵ Esi Fia Yosiya xɔ ƒe 26 la, ena wodze gbedoxɔa dzadzraɖo gɔme. Esi wonɔ dɔa wɔmaa, wova ke ɖe “Yehowa ƒe Segbalẽ si wòna to Mose dzi la” ŋu. Esi fia la se agbalẽa me nyawoa, eʋãe wòɖe afɔ enumake be yeawɔ ɖe edzi. (Xlẽ 2 Kronika 34:​14, 18-21.) Ðe nàdi be yeanɔ Biblia xlẽm gbe sia gbea? Ne èdze egɔme xoxoa, ke aleke wòle yiyimee? Ðe nèdea dzesi mawunyakpukpui siwo ate ŋu aɖe vi na wòa? Luke si ŋu míeƒo nu tsoe va yia ŋlɔa mawunyakpukpui siwo wòde dzesii le eƒe Biblia xexlẽ mea ɖe agbalẽ me. Ne wò hã èwɔnɛ nenemaa, akpe ɖe ŋuwò be nàɖo ŋku mawunyakpukpui veviwo kple nu siwo nèsrɔ̃ tso wo mea dzi. Ne èyi edzi le Biblia srɔ̃maa, esia ana nàdi vevie be yeasubɔ Yehowa. Ale si ko Mawu ƒe Nyaa kpe ɖe Fia Yosiya ŋu wòwɔ nu si dze Yehowa ŋua, akpe ɖe wò hã ŋuwò nàwɔe nenema.

16. Nu kae na Yosiya wɔ vodada gã aɖe, eye nu kae míesrɔ̃ tso eme?

 ¹⁶ Srɔ̃ nu tso nu gbegblẽ siwo Yosiya wɔa me. Esi Yosiya xɔ ƒe 39 la, woɖo aɖaŋu nɛ gake meɖo to o, eye esia na wòku. Eka ɖe eɖokui dzi eye mebia Yehowa ƒe mɔfiame o. (2 Kron. 35:​20-25) Nufiameae nye esi: Míeɖale Yehowa subɔm ɣeyiɣi didi aɖee enye esia alo nyitsɔ laa koe míedze egɔme o, ele be míayi edzi anɔ Yehowa dim. Esia fia be míanɔ gbe dom ɖa edziedzi be Yehowa nafia mɔ mí, míanɔ eƒe Nyaa srɔ̃m, eye míalɔ̃ faa nɔvi siwo tsi le xɔse me naɖo aɖaŋu na mí. Ne míewɔe alea, míaƒo asa na vodada gãwo wɔwɔ eye míakpɔ dzidzɔ.—Yak. 1:25.

17. Nu vevi kawoe míesrɔ̃ tso Yuda-fia etɔ̃awo ƒe ŋutinyawo me?

¹⁷ Sɔhɛwo, nu nyui geɖe li miate ŋu awɔ fifia. Yehoas, Uziya kple Yosiya ƒe ŋutinya siwo me míedzroa na míekpɔe be sɔhɛwo ate ŋu awɔ tiatia nyuiwo eye woawɔ nu wòadze Yehowa ŋu. Nyateƒee, wowɔ nu gbegblẽ siwo wɔe be vɔ̃ do tso eme na wo. Gake ne èsrɔ̃ woƒe kpɔɖeŋu nyuiawo eye nèƒo asa na vodada siwo wowɔa, ke àkpɔ dzidzɔ le agbe me.

18. Biblia me me kawo ƒe ŋutinyawoe ɖee fia be àte ŋu akpɔ dzidzɔ le agbe me? (Kpɔ nɔnɔmetataa hã.)

¹⁸ Biblia ƒo nu tso sɔhɛ bubu siwo wɔ nuteƒe na Yehowa ŋu. Woyi edzi di Yehowa, si wɔe be woƒe nu dze eŋu eye nu dze edzi na wo le agbe me. Wo dometɔ ɖekae nye David. Tso eƒe ɖevime kee wòtiae be yeanye Mawu xɔlɔ̃, eye emegbe eva zu fia si wɔ nuteƒe. Togbɔ be eda vo ɣeaɖewoɣi hãa, eƒe nu dze Mawu ŋu. (1 Fia. 3:6; 9:​4, 5; 14:8) Ne èsrɔ̃ nu tso David ŋua, eƒe kpɔɖeŋua aʋã wò nàyi edzi awɔ nuteƒe na Yehowa. Àte ŋu asrɔ̃ nu tso Marko alo Timoteo hã ŋu. Wodze Yehowa subɔsubɔ gɔme tso woƒe ɖevime ke eye woyi edzi wɔ nuteƒe nɛ. Esia wɔe be woƒe nu dze Mawu ŋu eye wokpɔ dzidzɔ.

19. Nu kae ana nàkpɔ dzidzɔ le agbe me?

¹⁹ Nu siwo wɔm nèle fifiae ana nànya ale si nuwo ava nɔ na wò le etsɔme. Ne èɖoa ŋu ɖe Yehowa ŋu, ke menye ɖe wò ŋutɔ ɖokuiwò ŋu oa, ke akpe ɖe ŋuwò nàtso nya me nyuie. (Lod. 20:24) Àte ŋu akpɔ dzidzɔ le agbe me eye wò dzi nadze eme. Ðo ŋku edzi be Yehowa kpɔa dzidzɔ ɖe nu siwo nèwɔna nɛ ŋu. Naneke megale vevie wu be nàtsɔ wò agbe asubɔ mía Fofo lɔ̃ame si le dziƒo la o.