Wodzim le ƒe 1934 me. Dzinyelawo tso to Switzerland eye woʋu va nɔ Timmins, si le sikakudu si nye Ontario me, le Canada. Le ƒe 1939 me lɔƒoa, nɔnye dze Gbetakpɔxɔ magazinea xexlẽ eye wòte Yehowa Ðasefowo ƒe kpekpewo dede. Ekplɔa nye kple nɔvinye adeawo katã yia kpekpeawo. Eteƒe medidi o, eva zu Yehowa Ðasefo.

Esia medzɔ dzi na Papa kura o, gake Dada ɖoe kplikpaa be yeasubɔ Yehowa. Eyi edzi wɔ nuteƒe esi woxe mɔ ɖe Yehowa Ðasefowo ƒe dɔa nu le ƒe 1940-awo me le Canada. Togbɔ be Papa dzua Dada hegblɔa nya veamewo ɖe eŋu hã la, Dada wɔa nu ɖe eŋu nyuie eye wòdea bubu eŋu. Kpɔɖeŋu nyui si wòɖo la kpe ɖe nye kple nɔvinyewo ŋu míeva subɔ Yehowa. Dzidzɔnyae nye be Papa ƒe nɔnɔme va trɔ eye wòwɔa nu ɖe mía ŋu nyuie le ƒomea me.

Le ƒe 1950 ƒe dzomeŋɔlia, mede Teokrasi Ƒe Dzidziɖedzi Takpekpe le New York City. Le takpekpe ma me la, medo go nɔvi siwo tso xexea ƒe akpa vovovowo eye mese Gilead sukunuwulawo ƒe nuteƒekpɔkpɔ wɔdɔɖeamedziwo. Esia ʋãm be mawɔ geɖe le Yehowa subɔsubɔ me! Meɖoe kplikpaa wu tsã be mawɔ ɣeyiɣiawo katã ƒe subɔsubɔdɔa. Esi meva ɖo aƒe me ko la, mede asi agbalẽ te be mawɔ gbesiagbe mɔɖeɖedɔa. Canada alɔdzedɔwɔƒea ŋlɔ agbalẽ nam gblɔ be anyo be maxɔ nyɔnyrɔ gbã. Eya ta mexɔ nyɔnyrɔ le October 1, 1950 dzi. Le ɣleti ɖeka megbe la, mezu gbesiagbe mɔɖela eye woɖom ɖe Kapuskasing. Afi ma didi boo tso afi si míenɔ.

 Le ƒe 1951 ƒe adame la, alɔdzedɔwɔƒea mia asi Ðasefo siwo doa Fransegbe be woabu eŋu kpɔ be woate ŋu aʋu ayi Quebec, afi si Fransegbedolawo le koŋ hã. Hiahiã geɖe nɔ afi ma ŋutɔ. Esi medoa Fransegbe kple Eŋlisigbea taa, mewɔ ɖe amekpekpea dzi eye woɖom ɖe Rouyn. Nyemenya ame aɖeke le afi ma o. Adrɛs koe nɔ asinye abe ale si megblɔe va yi ene. Nu sia nu yi nyuie. Nye kple Marcel míeva zu xɔlɔ̃ nyuiwo. Mewɔ mɔɖeɖedɔa ƒe ene sɔŋ kple dzidzɔ eye emegbe meva zu mɔɖela vevi.

Esime menɔ Quebec la, wokpem be mava de Gilead Suku ƒe klas 26 lia le South Lansing, New York. Dzi dzɔm ŋutɔ. Míewɔ sukunuwuwu ƒe wɔnaa le February 12, 1956 dzi, eye woɖom ɖe Ghana, b le Ɣetoɖoƒe Afrika. Gake hafi mayi la, ehiã be matrɔ ayi Canada kwasiɖa ʋɛ aɖewo va se ɖe esime nye mɔzɔgbalẽwo sɔ gbe.

Melala ɣleti adre sɔŋ le Toronto eye bebli hafi mɔzɔgbalẽawo va ka asinye. Esi menɔ lalam la, Cripps ƒomea xɔm ɖe wo ƒe me eye meva nya wo vinyɔnu Sheila nyuie. Míaƒe nu lé dzi na mía nɔewo vevie. Esi menɔ ɖoɖo wɔm be mado ŋugbe nɛ ko la, nye visa va ɖo. Nye kple Sheila míedo gbe ɖa tso nyaa ŋu eye míetso nya me be mayi aɖawɔ dɔ si wode asinye la. Míeɖoe hã be míanɔ lɛta ŋlɔm na mía nɔewo be míakpɔe ɖa be anya wɔ be míaɖe srɔ̃ le etsɔme hã. Esia menɔ bɔbɔe na mí kura o, gake emegbe míeva kpɔe be míetso nya me nyuie.

Ɣleti ɖeka sɔŋ metsɔ zɔ mɔe. Meɖo keteke, meva ɖo agbatsɔtɔdziʋu hã, emegbe meɖo yameʋu hafi va ɖo Accra, le Ghana. Esi meva ɖoa, wode dɔ asi nam be manye nutome gã dzikpɔla. Nye dɔa bia be mazɔ mɔ le Ghana bliboa, Ivory Coast (si woyɔna fifia be Côte d’Ivoire) kple Togoland (si woyɔna fifia be Togo). Alɔdzedɔwɔƒea na ʋu aɖem si metsɔ zɔa mɔe, eye zi geɖea nye ɖeka koe yina. Mɔzɔzɔa vivia nunye ko!

 Le kwasiɖanuwuwuwo la, dɔdeasiwo nɔa asinye le takpekpe suewo me. Takpexɔwo menɔ anyi ɣemaɣi o. Eya ta nɔviawo tsoa pampro kple deʋayawo tsɔ wɔa agbadɔ be míanɔ wo te. Esi nufamɔ̃wo menɔ kafteria woawu lãwo ade wo me o ta la, wokplɔa lãwo vana afi ma agbagbee va wuna tsɔ ɖaa nu na vavalawo.

Nu ɖikokoe aɖewo hã dzɔ le takpekpe mawo me. Gbe ɖeka Nɔviŋutsu Herb Jennings, c si hã nye dutanyanyuigblɔla la nɔ nu ƒom le kplɔ̃ta esime nyi aɖe si woƒle be woawu le kafteria tso ka eye wòƒu du to kplɔ̃ta va do ɖe nɔviawo dome. Herb tɔ te nuƒoa. Nyia tɔtɔ henɔ mo tsam kpaɖakpaɖa. Gake nɔviŋutsu ene aɖewo te ŋu kpe edzi eye wolée hekɔe segesege yi kafteria. Ale dzi dzɔ nɔviawo eye ame sia ame gli kple nukoko.

Le kwasiɖaa mea, meɖea video si nye The New World Society in Action (La Société du Monde Nouveau en action) le kɔƒenutowo me. Ale si mewɔnɛ ye nye be mesaa avɔ ɣi ɖe ati eve dome ale be videoa nate ŋu adze le edzi. Videoa dzɔa dzi na amewo ŋutɔ! Emae nye video gbãtɔ si wo dometɔ geɖe kpɔ kpɔ. Ne videoa ɖo akpa si amewo xɔ nyɔnyrɔ lea, wotsɔa dzidzɔ ƒoa asikpe kplokplokplo. Video ma kpe ɖe ame geɖe ŋu wokpɔe be xexea me godoo ƒe habɔbɔe Yehowa Ðasefowo nye eye míewɔ ɖeka.

Esi mesubɔ le Afrika ƒe eve megbe la, dzidzɔm ŋutɔ esi mede dukɔwo dome takpekpe le New York City le ƒe 1958 me. Dzi dzɔm wu gbɔgblɔ esi mekpɔ Sheila, si hã va takpekpea. Enye mɔɖela vevi nɔ subɔsubɔm le Quebec. Lɛta koe míeŋlɔna na mía nɔewo, ta esi míedo go ŋkume kple ŋkume akea, megblɔ nɛ be medi be maɖee eye wòlɔ̃ nam. Meŋlɔ lɛta na Nɔviŋutsu Knorr d be ne anya wɔa, wòana Sheila hã nade Gilead Sukua ne wòava wɔ ɖeka kplim míasubɔ le Afrika, eye wòlɔ̃. Mlɔeba Sheila va ɖo Ghana. Míeɖe srɔ̃ le October 3, 1959 dzi, le Accra. Míekpɔe be Yehowa yra mí le esi míetsɔ Fiaɖuƒea ƒe dɔwo ɖo nɔƒe gbãtɔ ta.

Le ƒe 1961 mea, woɖo mí ɖe Cameroon. Wobia tso asinye be makpe asi ɖe eŋu  woaɖo alɔdzedɔwɔƒe yeye ɖe afi ma, ta vovo menɔ ŋunye kura o. Esi wònye alɔdzea dzikpɔkpɔ kpɔ ŋkunyeme ta la, nu geɖe li wòle be masrɔ̃. Le ƒe 1965 mea, míeva nya be Sheila fɔ fu. Míenɔ mɔ kpɔm be míava nye dzilawo o, ta menɔ bɔbɔe na mí kura o. Gake esi míeva nɔ dzidzɔ kpɔm ɖe agbanɔamedzi yeye sia ŋu eye míenɔ ɖoɖo wɔm be míatrɔ ayi Canada la, nya vɔ̃ aɖe dzɔ.

Nublanuitɔe la, fua ge. Ðɔktaa gblɔ na mí be ŋutsuvie ɖevia nye hafi. Ƒe 50 sɔŋue nye esia, gake míeŋlɔ nudzɔdzɔ ma be o. Togbɔ be nu si dzɔ la na míelé blanui vevie hã, míeyi subɔsubɔdɔ si wode mía si la dzi, elabe míelɔ̃ dɔa hã vevie.

Woti mía nɔvi siwo le Cameroon la yome zi geɖe le esi womedea akpa aɖeke dzi le dunyahenyawo me o ta. Nɔnɔmea doa fievo ɖe edzi vevietɔ le akɔdaɣiwo. Le May 13, 1970 dzia, nu si vɔ̃m míenɔ lae va dzɔ. Woɖo asi Yehowa Ðasefowo ƒe dɔa dzi. Dziɖuɖua xɔ alɔdzedɔwɔƒe yeye si míetu eye míeʋu yi eme ɣleti atɔ̃ koe ma la le mía si. Le kwasiɖa ɖeka ko me la, wonya dutanyanyuigblɔlawo katã le dukɔa me, nye kple Sheila hã le eme. Menɔ bɔbɔe na mí be míadzo le nɔviawo gbɔ o elabe míelɔ̃ wo vevie eye míetsi dzi ɖe ale si nuwo ava nɔ na wo le ŋgɔgbea hã ŋu.

Le ɣleti ade siwo kplɔe ɖo me la, míenɔ France alɔdzedɔwɔƒea. Menɔ tɔnye sinua wɔm le afi ma be makpɔ nɔvi siwo le Cameroon la ƒe nuhiahiãwo gbɔ na wo. Le ƒe ma ke ƒe December mea, woɖo mí ɖe Nigeria alɔdzedɔwɔƒe, si va nɔ dɔa dzi kpɔm le Cameroon ɣemaɣi. Nigeria nɔviwo xɔ mí nyuie ŋutɔ eye míesubɔ le afi ma kple dzidzɔ ƒe geɖe.

Le ƒe 1973 mea, eva hiã be míatso nya me le nya vevi aɖe ŋu. Sheila ƒe lãme va gblẽ vevie. Esi míeyi New York na takpekpe aɖe la, nua te eŋu ŋutɔ eye wògblɔ nam be: “Nyemagate ŋu ayi dɔa dzi o! Ŋusẽ vɔ le ŋunye, nyemegatea ŋu wɔa naneke fifia.” Ƒe 14 kple edzivɔe nye ema nye kplii míesubɔ le Ɣetoɖoƒe Afrika. Ale si wòdo vevie nu kpe asi ɖe ŋunye le ɣeyiɣi mawo katã me la dzea ŋunye ŋutɔ. Gake fifia ehiã be míawɔ tɔtrɔ aɖewo. Míeɖo dze tso nɔnɔmea ŋu eye esi míedo gbe ɖa tso eŋu vevie vɔ la, míetso nya me be míatrɔ ayi Canada, ale be woate ŋu akpɔ eƒe lãmesẽnyawo gbɔ nyuie. Asiɖeɖe le dutanyanyuigbɔgblɔdɔa kple ɣeyiɣiawo katã ƒe subɔsubɔdɔa ŋu nye nyametsotso sesẽ aɖe na mí eye wògbã dzi na mí ŋutɔ.

Esi míeva ɖo Canada la, mekpɔ dɔ le xɔ̃nye xoxo aɖe si nye ʋudzrala le Toronto ƒe dziehedu aɖe me la gbɔ. Míekpɔ xɔ kpokploe aɖe haya eye míeƒle xɔmenu siwo wozã kpɔ, evɔ wole nɔnɔme nyui me, si wɔe be míenyi fe o. Míeɖoe be míanɔ agbe tsɛ ale be gbe ɖekaa, míagate ŋu aƒo ta ɖe ɣeyiɣiawo katã ƒe subɔsubɔdɔa me. Nukutɔe la, mɔnukpɔkpɔa gaʋu ɖi kaba wu ale si míekpɔ mɔe.

 Meva nɔ asi kpem ɖe Takpexɔ aɖe tutu ŋu le Norval, Ontario le Memleɖagbewo. Le ɣeyiɣi aɖe megbea, wobia tso asinye be manye Takpexɔa dzikpɔla. Sheila ƒe lãmea hã nɔ kakam ɖe eme ta míekpɔe be míate ŋu axɔ dɔdeasi yeye sia. Eya ta le June 1974 mea, míeʋu yi takpekpewɔƒea. Dzi dzɔ mí ŋutɔ be míegava le ɣeyiɣiawo katã ƒe subɔsubɔdɔa wɔm!

Dzidzɔnyae nye be Sheila ƒe lãmea nɔ nyonyom ɖe edzi. Ƒe eve megbea, míedze nutome sue dzikpɔkpɔdɔa gɔme. Canada ƒe nuto si woyɔna be Manitoba si fana miamiamia mee míesubɔ le. Gake dzo si nɔ nɔviawo me ɖe subɔsubɔdɔa ŋu kple lɔlɔ̃ si woɖe fia mí la na wo dome nɔnɔ vivi mía nu. Nu si míesrɔ̃e nye be menye afi si míele subɔsubɔm lee nye nyaa o, ke boŋ nu vevitɔe nye be afi ka kee míeɖale o, míayi edzi asubɔ Yehowa.

Esi míewɔ nutome sue dzikpɔkpɔdɔa ƒe geɖe megbe la, wokpe mí be míava subɔ le Canada Betel le ƒe 1978 me. Eteƒe medidi o nane dzɔ si te ɖe dzinye ŋutɔ, gake mesrɔ̃ nu vevi aɖe tso eme. Edzɔ be wode gaƒoƒo ɖeka kple afã ƒe nuƒo aɖe asi nam be maƒo le Fransegbe me le kpekpe tɔxɛ aɖe me le Montreal. Nublanuitɔea, nye nuƒoa nɔ yaa ale gbegbe be mewɔ dɔ ɖe nyaselawo dzi o eye nɔviŋutsu aɖe si wɔa dɔ le Subɔsubɔdɔ Dzikpɔƒea ɖo aɖaŋu nam tso eŋu. Le nyateƒe mea, ɖe wòle be made dzesii ɣemaɣi abe ale si mede dzesii fifia ene be nyemebi le nuƒoƒo me nenema gbegbe o hafi. Gake nyemelɔ̃ xɔ eƒe aɖaŋuɖoɖoa o. Medo dziku ɖe eŋu eye mehe nya kplii elabe mesusui be ɖeko wònɔ vodada dim le ŋunye eye mekpɔe be meƒo nu nam nyuie kura o. Nye susu nɔ ame si nɔ aɖaŋua ɖom nam kple ale si wòɖo aɖaŋuae ŋu.

Le ŋkeke aɖewo megbe la, Alɔdzekɔmitia me tɔ aɖe yɔm ɖe nya sia dzi. Melɔ̃ ɖe edzi nyemexɔ aɖaŋu si nɔvia ɖo nam la nyuie o, ta meɖe kuku ɖe nye nuwɔna ma ta. Eyome meƒo nu kple nɔvi si ɖo aɖaŋua nam ɖe kuku nɛ. Elɔ̃ faa xɔ nye kukuɖeɖea. Mesrɔ̃ nu vevi aɖe tso nu si dzɔ la me si nyemaŋlɔ be akpɔ o. (Lod. 16:18) Eyae nye be ele be mabɔbɔ ɖokuinye. Medo gbe ɖa na Yehowa zi geɖe tso eŋu eye meɖoe kplikpaa be nyemagawɔ nu ɖe aɖaŋuɖoɖo ŋu alea azɔ o.

Mele subɔsubɔm le Canada alɔdzedɔwɔƒea ƒe 40 kple edzivɔe nye esia, eye tso ƒe 1985 mea, mɔnukpɔkpɔ su asinye mezu Alɔdzekɔmitia me tɔ. Le February 2021 mea, srɔ̃nye lɔlɔ̃a Sheila dɔ alɔ̃ le ku me. Sheila ƒe kua na mexa nu vevie, mesusunɛ ŋutɔ. Lãmesẽnyawo hã mele dzinye dem o. Gake esi mebiã ŋku ɖe Yehowa ƒe dɔwo ŋu ta la, mekpɔa dzidzɔ eye ‘ƒãa hafi mebua ŋkekeawo ƒe yiyi ŋu.’ (Nyagb. 5:20) Togbɔ be meto nu geɖe me le agbe me hã, dzidzɔ si mekpɔna la ƒo wo ta sãsãsã. Yehowa subɔsubɔ tsɔtsɔ ɖo nɔƒe gbãtɔ kple ƒe 70 siwo metsɔ le ɣeyiɣiawo katã ƒe subɔsubɔdɔa wɔm la na mese vivi le agbe me. Nye gbedodoɖae nye be ɖekakpuiwo kple ɖetugbiwo katã natsɔ Yehowa subɔsubɔ aɖo nɔƒe gbãtɔ le agbe me elabe meka ɖe edzi be Yehowa subɔsubɔ koe ana woase vivi le agbe me ŋutɔŋutɔ.