1-2. Nu kae nana mawusubɔlawo kpɔa dzidzɔ? (Yakobo 1:​22-25)

 YEHOWA kple Via malɔ̃nugbɔa di be míakpɔ dzidzɔ. Hakpalaa gblɔ le Psalmo 119:2 be: “Dzidzɔtɔwoe nye ame siwo léa eƒe ŋkuɖodzinyawo me ɖe asi, ame siwo dinɛ tso dzi blibo me.” Yesu hã ɖo kpe nya ma dzi gblɔ be: “Dzidzɔtɔwoe nye ame siwo le Mawu ƒe nya la sem, eye wole edzi wɔm!”—Luka 11:28.

² Mí Yehowa subɔlawo míekpɔa dzidzɔ. Nu ka tae? Susu geɖewo tae. Ðekae nye be míexlẽa Mawu ƒe Nyaa edziedzi eye míedzea agbagba wɔna ɖe nu siwo míesrɔ̃ la dzi.—Xlẽ Yakobo 1:​22-25.

3. Ne míexlẽa Mawu ƒe Nyaa eye míewɔna ɖe edzi la, vi kae wòɖena na mí?

³ Ne míewɔna ɖe Mawu ƒe Nyaa dzi la, eɖea vi geɖe na mí. Le kpɔɖeŋu me, ewɔnɛ be míaƒe nu dzea Yehowa ŋu eye esia nana míekpɔa dzidzɔ. (Nyagb. 12:13) Nuwo yina nyuie le míaƒe ƒomea me, eye mía kple nɔvi siwo le hamea me hã dome nɔna kplikplikpli. Anɔ eme be wò ŋutɔ hã eɖe vi na wò le mɔ siawo nu. Mawu ƒe Nyaa kpena ɖe mía ŋu hã be míeƒoa asa na kuxi geɖe siwo ɖea fu na ame siwo mesubɔa Yehowa o. Le ha aɖe si Fia David kpa me la, eƒo nu tso Yehowa ƒe sewo, ɖoɖowo kple ʋɔnudɔdrɔ̃wo ŋu, eye wògblɔ be: “Fetu gã le wo me léle ɖe asi me.” Nya siawo sɔ ŋutɔ!—Ps. 19:​7-11.

4. Nu kae ate ŋu ana wòasesẽ na mí be míawɔ ɖe Mawu ƒe Nyaa dzi?

 ⁴ Be míate ŋu awɔ ɖe Mawu ƒe Nyaa dzi la, ele míanɔ exlẽm ale be míase nu si Yehowa di tso mía si la gɔme. Gake esia wɔwɔ menɔa bɔbɔe ɣesiaɣi o le esi vovo menɔa mía ŋu o ta. Ke hã, ele be míadi ɣeyiɣi anɔ exlẽm. Na míadzro aɖaŋuɖoɖo siwo akpe ɖe mía ŋu míanɔ Biblia xlẽm edziedzi la dometɔ aɖewo me. Eyome míakpɔ nu bubu siwo akpe ɖe mía ŋu míade ŋugble le nu siwo míexlẽ la ŋu. Mlɔeba la, míakpɔ mɔ siwo nu míate ŋu awɔ wo ŋu dɔ le le míaƒe agbe me.

ÐO ƔEYIƔI AÐE KOŊ NÀNƆ MAWU ƑE NYAA XLẼM

5. Nu kawoe xɔa míaƒe ɣeyiɣi akpa gãtɔ?

⁵ Vovo menɔa mí Yehowa subɔlawo ŋu kura o. Míezãa ɣeyiɣi geɖe ɖe nu vevi siwo gbɔ wòle be míakpɔ le Ŋɔŋlɔawo nu la ŋu. Míewɔa dɔ kpɔa mía ŋutɔwo kple míaƒe ƒomea ƒe nuhiahiãwo gbɔ. (1 Tim. 5:8) Nɔvi geɖe le wo dzila tsitsiwo alo esiwo dze dɔ la dzi kpɔm. Eye ehiã be míalé be na mía ɖokui ale be míanɔ lãmesẽ me. Esiawo katã xɔa ɣeyiɣi. Gake mese ɖe afi ma o, hamea ƒe dɔwo hã le mía dzi. Míaƒe agbanɔamedzi vevi hãe nye be míado vevie gbeƒãɖeɖedɔa. Ne èbu dɔ siwo gbegbe le dziwò ŋua, aleke nàwɔ akpɔ ɣeyiɣi anɔ Biblia xlẽm edziedzi, anɔ ŋugble dem le nu siwo nèsrɔ̃ la ŋu ahawɔ ɖe wo dzi?

6. Nu kae nàwɔ be nàte ŋu anɔ Biblia xlẽm gbe sia gbe? (Kpɔ fotoa hã.)

⁶ Biblia xexlẽ ye nye “nu siwo le vevie wu” la dometɔ ɖeka na mí Kristotɔwo. Eya ta mele be wòato mía ŋu o. (Flp. 1:10) Psalmo 1:​1, 2 gblɔ be, dzidzɔtɔe nye ame si kpɔa “dzidzɔ ɖe Yehowa ƒe se la ŋu, eye wòxlẽa eƒe se la kple gbe blewu zã kple keli.” Ŋɔŋlɔ sia na eme kɔ be ele be míaɖo ɣeyiɣi ɖi koŋ na nusɔsrɔ̃. Ɣekaɣie nye ɣeyiɣi nyuitɔ si wòle be míaxlẽ Biblia? Ame sia ame kple ɣeyiɣi si asɔ nɛ. Kpuie ko la, ele be wòanye ɣeyiɣi si nàte ŋu anɔ ewɔm edziedzi. Nɔviŋutsu Victor  gblɔ be: “Mexlẽa Biblia le ŋdi me. Togbɔ be nyemelɔ̃na fɔna kaba le aba dzi o hã la, meva kpɔe be ɣemaɣie susuhenuwo dzi ɖena kpɔtɔna. Nye susu me kɔna eye wònɔa nu siwo xlẽm mele la ŋu.” Nenemae wòle na wò hã? Bia ɖokuiwò be, ‘Ɣeyiɣi kae asɔ nam be maxlẽ Biblia?’

DE ŊUGBLE LE NU SIWO NÈXLẼ ŊU

7-8. Nu ka gbɔe wòate ŋu atso be Biblia xexlẽ maɖe vi na mí o? Gblɔ eƒe kpɔɖeŋu.

⁷ Edzɔna zi geɖe be míexlẽa nu gbogbo aɖewo, gake metsia susu me na mí o. Ðe wòdzɔ ɖe dziwò kpɔ be èxlẽ nane gake le ɣeyiɣi kpui aɖe ko megbea, wòsesẽ na wò be nàɖo ŋku edzia? Edzɔna ɖe mí katã dzi. Ne míekpɔ nyuie o la, nenemae míaƒe Biblia xexlẽ hã anɔ. Ðewohĩ èɖoe be yeaxlẽ eƒe ta aɖewo gbe sia gbe. Èwɔe nyuie. Enyo be ɖoɖo nyuiwo nanɔ mía si eye míadze agbagba azɔ ɖe wo dzi. (1 Kor. 9:26) Gake ne míedi be Biblia naɖe vi na mí bliboe la, exexlẽ ɖeɖe dzaa mesu o.

⁸ Bu kpɔɖeŋu sia ŋu kpɔ. Nukuwo hiã tsi be woawɔ nyuie, gake ne tsi dza sɔgbɔ le ɣeyiɣi kpui aɖe me la, axa ɖe anyigba. Ne edzɔ alea eye tsia yi edzi le dzadzam la, maɖe vi na nukuawo o. Ehiã ɣeyiɣi be tsia naɖo anyigba me vivivi ale be wòaɖe vi na nukuawo. Nenema kee mele be míatsɔ dzitsitsi anɔ Biblia xlẽm o elabe ne míewɔe nenema la, mímate ŋu aɖo ŋku emenyawo dzi, ade ŋugble le wo ŋu kaka ahayi wo dzi wɔ ge o.—Yak. 1:24.

9. Nu kae wòle be nàwɔ ne ède dzesii be yetsɔa dzitsitsi xlẽa Bibliae?

⁹ Ðe nètsɔ dzitsitsi xlẽ Biblia kpɔa? Aleke nàwɔe wòaɖe vi wu? Eyae nye be nàgbɔ dzi ɖi ɖe exexlẽ ŋu ale be nàte ŋu anɔ ŋugble dem. Esia wɔwɔ mesesẽ akpa o. Àte ŋu atiae be yeadidi nusɔsrɔ̃a ƒe ɣeyiɣia ɖe edzi vie ale be nàkpɔ ɣeyiɣi ade ŋugble le nu siwo nèxlẽ la ŋu. Àgate ŋu atiae be yeaxlẽ kpukpui ʋɛ aɖewo ale be nàzã ɣeyiɣi susɔea atsɔ ade ŋugble le wo ŋu. Victor si ŋu míeƒo nu tsoe va yi la gblɔ be: “Biblia ƒe akpa ʋɛ aɖewo koe  mexlẽna, ɣeaɖewoɣi la, ta ɖeka ko. Esi mexlẽnɛ ŋdi me ta la, metea ŋu dea ŋugble le eŋu ŋkeke bliboa.” Mɔnu ka kee nàzã o, nu vevitɔe nye be nàgbɔ dzi ɖi ɖe exexlẽ ŋu ale be nàte ŋu anɔ nu siwo xlẽm nèlea ŋu bum be wòaɖe vi na wò.—Ps. 119:97; kpɔ aɖaka si nye “ Biabia Siwo Ŋu Nàde Ŋugble Le.”

10. Aleke nàwɔ be nàte ŋu awɔ ɖe nu siwo srɔ̃m nèle la dzi? Wɔ eƒe kpɔɖeŋu. (1 Tesalonikatɔwo 5:​17, 18)

¹⁰ Ne ètia ɣeyiɣi si sɔ kple nu agbɔsɔsɔ si nàxlẽ vɔ la, nu vevitɔe nye be nàdi mɔ siwo dzi nàto awɔ ɖe nu siwo nèsrɔ̃ la dzi. Ne èxlẽ mawunyakpukpui aɖe vɔ la, bu ale si nàwɔ eŋu dɔ le wò agbe me ŋu. Bia ɖokuiwò be, ‘Aleke mate ŋu awɔ nya sia ŋu dɔ fifia alo le ŋkeke siwo gbɔna me?’ Le kpɔɖeŋu me, tsɔe be èle 1 Tesalonikatɔwo 5:​17, 18 xlẽm. (Xlẽe.) Ne exlẽe vɔ la, àte ŋu atɔ sẽe abia ɖokuiwò be: Ðe medoa gbe ɖa edziedzia? Ðe nye gbedodoɖawo dea toa? Azɔ de ŋugble le nu siwo Yehowa wɔ na wò siwo dzɔa dzi na wò ŋu. Àte ŋu ada akpe nɛ ɖe wo dometɔ etɔ̃ ta. Ne miniti ʋɛ aɖewo koe nètsɔna dea ŋugble le Mawu ƒe Nyaa ŋu gɔ̃ hã la, àse egɔme eye anɔ bɔbɔe be nàwɔ ɖe edzi. Kpɔ ale si gbegbe wòaɖe vi na wòe ne èwɔa esia le wò Biblia xexlẽ me gbe sia gbe ɖa! Akpe ɖe ŋuwò be ʋɛʋɛʋɛ la, àva nye ame si wɔna ɖe Mawu ƒe Nyaa dzi bliboe. Ke nu kae nàwɔ ne ède dzesii be tɔtrɔ siwo wòle be yeawɔ la sɔ gbɔ?

TAÐODZINU SIWO GBƆ NÀTE ŊU AÐO

11. Nu kae ate ŋu ana dzi naɖe le ƒowò ɣeaɖewoɣi? Gblɔ eƒe kpɔɖeŋu.

¹¹ Ne èxlẽa Biblia eye nèdea ŋugble le ale si nàwɔ ɖe eƒe mɔfiamewo dzi ŋu la, ɖewohĩ àde dzesi nu gbogbo aɖewo siwo ŋu wòle be nàtrɔ asi le. Esia ate ŋu ana dzi naɖe le ƒowò. Le kpɔɖeŋu me, tsɔe be esi nèxlẽ Biblia Dzoɖagbea, eƒo nu tsi tre ɖe ameŋkumekpɔkpɔ ŋu. (Yak. 2:​1-8) Èkpɔe be ele be yeawɔ tɔtrɔ aɖewo ale be yeawɔ nu ɖe amewo katã ŋu nyuie. Enyo ŋutɔ! Ke esi ŋu ke Braɖagbe eye nègaxlẽ Biblia ƒe akpa bubu la, eƒo nu tso ale si wòle be míakpɔ míaƒe aɖe dzi nyuie ŋu. (Yak. 3:​1-12) Ède ŋugble tso eŋu eye nèkpɔe be ɣeaɖewoɣi la, yeƒe nuƒoƒo medea dzi ƒo tututu o. Eya ta èɖoe be yeawɔ tɔtrɔ ale be yeƒe nyawo nade dzi ƒo ahatu ame ɖo. Le Kuɖagbea, èsrɔ̃e be mele be yeanye xexea xɔlɔ̃ o. (Yak. 4:​4-12) Eya ta èɖoe be yealé ŋku ɖe nu siwo yetsɔna ɖea modzakae ŋu. Kaka Yawoɖagbe naɖo la, dzi ate ŋu aɖe le ƒowò elabe nu siwo ŋu nàwɔ dɔ tsoe la sɔ gbɔ.

12. Ne ède dzesii le wò Biblia xexlẽ me be tɔtrɔ aɖewo li wòle be yeawɔ la, nu ka tae mele be dzi naɖe le ƒowò o? (Kpɔ etenuŋɔŋlɔa hã.)

 ¹² Ne ède dzesii be ehiã be yeawɔ tɔtrɔ aɖewo la, dzi megaɖe le ƒowò o. Esia ɖo kpe edzi be dzi ƒe nɔnɔme nyui le asiwò. Ame si bɔbɔa eɖokui eye wòɖia anukware le dzi me la xlẽa Ŋɔŋlɔawo kple susu be yeade dzesi tɔtrɔ siwo wòle be yeawɔ. a Ðo ŋku edzi be ele be míayi edzi anɔ “amenyenye yeyea” dom, menye ŋkeke ɖeka ƒe nu koe wònye o. (Kol. 3:10) Nu kae akpe ɖe ŋuwò be nàyi edzi anɔ Mawu ƒe Nyaa dzi wɔm?

13. Mɔnu kae akpe ɖe ŋuwò be nàwɔ tɔtrɔ siwo nède dzesii? (Kpɔ fotoa hã.)

¹³ Mègatsi dzi be yeawɔ tɔtrɔawo katã zi ɖeka o. Àte ŋu atiae be yeatsɔ wo ɖekaɖeka. (Lod. 11:2) Te mɔnu sia kpɔ: Ŋlɔ nu siwo ŋu nèdi be yeawɔ dɔ tsoe la ɖi. Eyome tia wo dometɔ ɖeka alo eve siwo ŋu nàwɔ dɔ tsoe gbã. Ne èwɔ dɔ tso gbãtɔawo ŋu vɔ la, trɔ ɖe susɔeawo ŋu. Ke aleke nàwɔ anya esi nàtsɔ gbã?

14. Nu kawo ŋue nàwɔ dɔ tsoe gbã?

¹⁴ Àte ŋu adze egɔme kple tɔtrɔ siwo wɔwɔ anɔ bɔbɔe na wò wu. Alo àte ŋu atiae be yeawɔ dɔ tso esi nèkpɔ be ehiã ye vevie ŋutɔ la ŋu gbã. Ne ènya de dzesi esi ŋu nèdi be yeawɔ dɔ tsoe ko la, ku nu me tso eŋu le míaƒe agbalẽwo me. Àte ŋu azã Gbetakpɔxɔ Internet Dzi Agbalẽdzraɖoƒea alo Numekuku Ŋuti Mɔfiagbalẽ Na Yehowa Ðasefowo. Do gbe ɖa na Yehowa tso tɔtrɔ si nèɖo be yeawɔ ŋu eye nàbiae be wòana “didia kple ŋusẽ la” wò be nàte ŋu awɔe. (Flp. 2:13) Eyome wɔ ɖe nu si nèsrɔ̃ la dzi. Ne èyi ŋgɔ le nu gbãtɔ  si nèɖo be yeawɔ me la, esia aʋã wò be nàwɔ dɔ tso bubuawo hã ŋu. Zi ale si Kristotɔwo ƒe nɔnɔme nyui siwo le asiwò le nyonyom ɖe edzi la, zi nenemae wòanɔ bɔbɔe na wò be nàwɔ tɔtrɔ bubuawo hã.

NA MAWU ƑE NYAA ‘NANƆ DƆ DZI LE MEWÒ’

15. Aleke Yehowa subɔlawo to vovo na ame geɖe siwo xlẽa Biblia? (1 Tesalonikatɔwo 2:13)

¹⁵ Ame aɖewo ƒoa adegbe be yewoxlẽ Biblia bliboa zi gbɔ zi geɖe. Gake ɖe woxɔ nu si Biblia fia dzi se ŋutɔŋutɔa? Ðe wowɔna ɖe emenyawo dzi alo nana wòkpɔa ŋusẽ ɖe woƒe agbe dzia? Nublanuitɔe la, womewɔnɛ nenema o. Gake Yehowa ƒe amewo ya to vovo kura! Míele abe Kristotɔ siwo nɔ anyi le ƒe alafa gbãtɔ me ene. Míexɔ Biblia abe “Mawu ƒe nya ene, abe ale si tututu wòle hã ene.” Azɔ hã, míedzea agbagba ɖe sia ɖe be míawɔ ɖe Biblia ƒe aɖaŋuɖoɖowo dzi gbe sia gbe.—Xlẽ 1 Tesalonikatɔwo 2:13.

16. Nu kae akpe ɖe mía ŋu míanye Mawu ƒe Nyaa dzi wɔlawo?

¹⁶ Menye ɣesiaɣie wòle bɔbɔe be míaxlẽ Biblia ahawɔ ɖe emenyawo dzi o. Ðewohĩ ele sesẽm be míakpɔ ɣeyiɣi axlẽe. Alo míexlẽnɛ dzitsitsitɔe si wɔnɛ be míetea ŋu dea ŋugble le eŋu o. Alo ɖewohĩ tɔtrɔ geɖe siwo wòle be míawɔ la na dzi ɖe le mía ƒo. Aleke kee wòɖale o, Yehowa ate ŋu akpe ɖe ŋuwò. Mina míalɔ̃ faa Yehowa nakpe ɖe mía ŋu be míanye nyadziwɔlawo, ke menye nyasela siwo ŋlɔa nu be o. Ðikeke mele eme o be, zi ale si míeyi edzi le Mawu ƒe Nyaa xlẽm hele edzi wɔm la, zi nenemae míakpɔ dzidzɔ le agbe me.—Yak. 1:25.