1-2. Ŋutete kae Yehowa na mí, eye aleke wòɖea vi na mí?

 ESI Yehowa wɔ mí amegbetɔwo la, ena ŋutete tɔxɛ mí be míakpɔ dzidzɔ geɖe si dona tsoa nunana me wu esi dona tsoa nuxɔxɔ me. (Dɔw. 20:35) Ðe esia fia be míekpɔa dzidzɔ ne wona nu mí oa? Ao, mefia nenema o. Le dzɔdzɔme nu la, mí katã míekpɔa dzidzɔ ne wona nu mí. Ke hã míekpɔa dzidzɔ wu ne míena nu amewo. Le nyateƒe mea, míaƒe nyonyo tae Yehowa wɔ mí alea. Nu ka tae?

² Esi Yehowa wɔ mí alea ta la, míate ŋu awɔ nu siwo ana dzi nadzɔ mí. Míate ŋu adzi míaƒe dzidzɔkpɔkpɔ ɖe edzi ne míedia mɔ vovovo siwo dzi míato ana nu amewo. Ðe menyo ŋutɔ be Yehowa wɔ mí alea oa?—Ps. 139:14.

3. Nu ka tae Biblia gblɔ be Yehowa nye “Mawu dzidzɔtɔ”?

³ Ŋɔŋlɔawo ka ɖe edzi na mí be dzidzɔ le nunana me. Eya ta mewɔ nuku o be woyɔ Yehowa be “Mawu dzidzɔtɔ.” (1 Tim. 1:11) Eyae nye Nunala gãtɔ eye ame aɖeke mena nu de enu o. Apostolo Paulo gblɔ be “eyae na míele agbe, eye míeʋãna, eye míeli.” (Dɔw. 17:28) Nyateƒee, “nunana nyuiwo katã kple nunana blibowo katã” tso Yehowa gbɔ.—Yak. 1:17.

4. Nu kae akpe ɖe mía ŋu míakpɔ dzidzɔ geɖe wu?

⁴ Ðikeke mele eme o be mí katã míadi be míakpɔ dzidzɔ si dona tsoa nunana me la geɖe wu. Míate ŋu awɔ esia ne míesrɔ̃ Yehowa ƒe dɔmenyonyo. (Ef. 5:1) Esi míele esia me dzrom la, mina míakpɔ nu siwo míate ŋu awɔ ne míese le mía ɖokui me be amewo mekpɔa ŋudzedze ɖe nu siwo míenana wo la ŋu o. Ŋkuɖodzinya siawo akpe ɖe mía  ŋu míayi edzi ana nu amewo eye míakpɔ dzidzɔ geɖe wu.

SRƆ̃ YEHOWA ƑE DƆMENYONYO

5. Nu siwo Yehowa nana mí dometɔ aɖewoe nye ekawo?

⁵ Mɔ kawo nue Yehowa nyoa dɔme na mí le? Bu kpɔɖeŋu ʋɛ aɖewo ŋu kpɔ. Yehowa naa nu siwo míehiã la mí. Togbɔ be nuwo made mía dzi le agbe me ɣesiaɣi o hã la, Yehowa kpɔa egbɔ be nu siwo míehiã la sua mía si. Le kpɔɖeŋu me, ekpena ɖe mía ŋu míekpɔa nuɖuɖu, nudodo kple mlɔƒe. (Ps. 4:8; Mat. 6:​31-33; 1 Tim. 6:​6-8) Ðe Yehowa kpɔa míaƒe ŋutilãmenuhiahiãwo gbɔ na mí le esi wòle be wòawɔe ta koa? Ao! Ke nu ka tae?

6. Nufiame kae le Mateo 6:​25, 26 me na mí?

⁶ Kpuie ko la, esi Yehowa lɔ̃ mí tae wòkpɔa míaƒe ŋutilãmenuhiahiãwo gbɔ na mí. Bu Yesu ƒe nya siwo dze le Mateo 6:​25, 26 ŋu kpɔ. (Xlẽe.) Yesu zã nuwɔwɔwo tsɔ wɔ kpɔɖeŋu na eƒe nusrɔ̃lawo. Esi wònɔ nu ƒom tso dziƒoxewo ŋu la, egblɔ be: “Womeƒãa nu o, womeŋea nu o, eye womeƒoa nuwo nu ƒu ɖe avawo me hã o.” Gake de dzesi nya si wògblɔ kplɔe ɖo, egblɔ be: “Mia Fofo si le dziƒo la nyia wo.” Eyome ebia be: “Ðe miexɔ asi sãsãsã wu wo oa?” Nufiameae nye eka? Eyae nye be Yehowa dea asixɔxɔ esubɔlawo ŋu sãsãsã wu lãwo. Eya ta ne eléa be na lãwo la, ke kakaɖedzi li be alé be na míawo hã godoo! Abe vifofo lɔ̃ame ene la, Yehowa léa be na mí eƒe ƒomea me tɔwo, le esi wòlɔ̃ mí ta.—Ps. 145:16; Mat. 6:32.

7. Mɔ ka nue míate ŋu asrɔ̃ Yehowa ƒe dɔmenyonyo le? (Kpɔ fotoawo hã.)

⁷ Míawo hã míate ŋu asrɔ̃ Yehowa ana nu amewo le esi míelɔ̃ wo ta. Le kpɔɖeŋu me, ɖe nènya nɔvi aɖe si hiã nuɖuɖu alo nudodoa? Yehowa ate ŋu ato dziwò akpe ɖe eŋu. Wonya Yehowa ƒe amewo be wonyoa dɔme, vevietɔ ne afɔkuwo dzɔ. Le kpɔɖeŋu me, esi corona dɔvɔ̃a do la, nɔviwo lɔ̃ faa ma nuɖuɖu, nudodo kple nuhiahiã bubuwo na ame siwo hiã tu. Nɔvi geɖe hã dzɔ nu dɔmenyotɔe tsɔ do alɔ xexea me katã ƒe dɔa. Esia na míete ŋu kpe ɖe mía nɔviwo ŋu le xexea me godoo. Nɔvi siawo wɔ ɖe Hebritɔwo 13:16 me nyawo dzi. Afi ma gblɔ be: “Migaŋlɔ nyuiwɔwɔ kple nunana amewo hã be o, elabena nenem vɔsa siawo dzea Mawu ŋu ŋutɔ.”

8. Mɔ kawo nue Yehowa doa ŋusẽ mí le? (Filipitɔwo 2:13)

 ⁸ Yehowa doa ŋusẽ mí. Edzɔa dzi na Yehowa be yeana yeƒe ŋusẽ si seɖoƒe meli na o la ƒe ɖe ye subɔla wɔnuteƒewo. (Xlẽ Filipitɔwo 2:13.) Ðe nèdo gbe ɖa na Yehowa be wòado ŋusẽ wò nàɖu tetekpɔ dzi alo ado dzi le nɔnɔme sesẽ aɖe me kpɔa? Ànya do gbe ɖa hã be Yehowa nado ŋusẽ wò nàwɔ dɔ siwo le dziwò le ŋkekea me. Esi wòɖo wò gbedodoɖaa ŋu la, anɔ eme be èse le ɖokuiwò me abe apostolo Paulo ene esi wògblɔ be: “Metea ŋu wɔa nuwo katã to ame si doa ŋusẽm la dzi.”—Flp. 4:13.

9. Aleke míate ŋu asrɔ̃ ale si Yehowa lɔ̃na faa zãa eƒe ŋusẽ tsɔ kpena ɖe amewo ŋui? (Kpɔ fotoa hã.)

⁹ Togbɔ be míede blibo o hã la, míate ŋu asrɔ̃ ale si Yehowa lɔ̃na faa zãa eƒe ŋusẽa tsɔ kpena ɖe amewo ŋu. Míate ŋu ado ŋusẽ amewo nukutɔe abe ale si Yehowa wɔnɛ ene o. Gake míate ŋu asrɔ̃ Yehowa ne míezãa míaƒe ŋusẽ tsɔ kpena ɖe amewo ŋu. Le kpɔɖeŋu me, míate ŋu awɔ aƒemedɔwo na nɔvi tsitsiwo alo atsɔ dɔ na nɔvi aɖe si dze dɔ. Ne míaƒe nɔnɔmea ɖe mɔ la, míate ŋu atsɔ mía ɖokuiwo ana akpe asi ɖe Fiaɖuƒe Akpata me dzadzraɖo kple beléle nɛ ŋu. Ne míezãa míaƒe ŋusẽ le mɔ siawo nu la, eɖea vi na Yehowa subɔla bubuwo hã.

10. Aleke míate ŋu azã míaƒe nyawo atsɔ ado ŋusẽ amewoe?

¹⁰ Ðo ŋku edzi be wò nyawo ate ŋu ado ŋusẽ amewo. Ðe ame aɖe wɔ nane si dze na kafukafua? Kafui! Ade dzi ƒo nɛ ŋutɔ. Ðe nènya nɔvi aɖe si hiã na akɔfafa? Anyo ŋutɔ be nàte ɖe eŋu aɖo dze kplii afa akɔ nɛ. Àte ŋu asrã ame siawo kpɔ, ayɔ wo le telefon dzi, aŋlɔ lɛta, email alo text message na wo. Mègatsi dzi fũu akpa ɖe nya si nàgblɔ ŋu o. Ðewohĩ nya ʋɛ siwo nàgblɔ la tututue nɔvia hiã be wòate ŋu ayi edzi awɔ nuteƒe alo anɔ te ɖe nɔnɔme si me tom wòle la nu.—Lod. 12:25; Ef. 4:29.

11. Aleke Yehowa zãa eƒe nunya tsɔ kpena ɖe amewo ŋu?

¹¹ Yehowa naa nunya mí. Nusrɔ̃la Yakobo gblɔ be: “Ne mia dometɔ aɖe hiã nunya la, nenɔ Mawu biam, elabena enaa nu amewo katã faa, media vodada le ame ŋu o.” (Yak. 1:5; etenuŋɔŋlɔ) Nya siawo fia be Yehowa metea eƒe nunya mí o. Enyoa dɔme na amewo katã faa. Yakobo gblɔ hã be “medoa ŋukpe ame” alo ‘dia vodada le ame ŋu o.’ Yehowa medi be wòakpe ŋu na mí be míabia yeƒe kpekpeɖeŋu  o. Le nyateƒe me la, edzɔa dzi nɛ boŋ.—Lod. 2:​1-6.

12. Mɔnukpɔkpɔ kawoe le ʋuʋu ɖi na mí be míana nu siwo míenya naɖe vi na ame bubuwo?

¹² Ke míawo ya ɖe? Ðe míate ŋu asrɔ̃ Yehowa ana be míaƒe nunya naɖe vi na ame bubuwoa? (Ps. 32:8) Mɔnukpɔkpɔ geɖe sua Yehowa ƒe amewo si be woafia nu si wosrɔ̃ la amewo. Le kpɔɖeŋu me, míenaa hehe gbeƒãɖela yeyewo le gbeadzi. Hamemetsitsiwo gbɔa dzi ɖi kpena ɖe subɔsubɔdɔwɔlawo kple nɔviŋutsu siwo xɔ nyɔnyrɔ ŋu be woawɔ dɔ siwo wode wo si le hamea me la nyuie. Eye ame siwo si nuteƒekpɔkpɔ geɖe su le xɔtutu kple beléle na wo me la naa hehe ame bubuwo be woawo hã woate ŋu alé be na teokrasixɔwo.

13. Aleke míate ŋu asrɔ̃ Yehowa ne míele hehe nam amewo?

¹³ Ne mɔnukpɔkpɔ su asiwò be nàna hehe amewo la, dze agbagba nàsrɔ̃ Yehowa. Ðo ŋku edzi be Yehowa nyoa dɔme naa nunya mí faa. Nenema kee míawo hã míelɔ̃na faa fiaa nu siwo míenya la amewo eye míenana míaƒe nuteƒekpɔkpɔwo ɖea vi na wo. Mele be míate míaƒe nunya amewo le esi míele vɔvɔ̃m be woava xɔ ɖe mía teƒe ta o. Ɣeaɖewoɣi la, ame aɖewo hã susunɛ be esi wònye be ame aɖeke mena hehe yewo o ta la, yewo hã yewomana hehe ame aɖeke o. Mele be Yehowa subɔla nabu nuwo ŋu alea o. Ele be wòanye dzidzɔ na mí boŋ be míafia nu siwo katã míenya amewo faa eye míawɔ míaƒe ŋutete katã ana hehe wo. (1 Tes. 2:8) Míedi be “woawo hã woadze nyuie afia nu ame bubuwo.” (2 Tim. 2:​1, 2) Ne mía dometɔ ɖe sia ɖe nyoa dɔme fiaa nu siwo míenya mía nɔewo la, mí katã míaƒe nunya adzi ɖe edzi eye míakpɔ dzidzɔ geɖe.

NE EWƆ NA MÍ BE AMEWO MEKPƆ ŊUDZEDZE ÐE MÍAƑE NUNANAWO ŊU O

14. Aleke ame geɖe wɔa nu ne míenyo dɔme na wo?

¹⁴ Ne míenyoa dɔme na amewo, vevietɔ mía nɔviwo la, zi geɖea wodaa akpe. Woŋlɔa agbalẽ na mí alo ɖea ŋudzedzekpɔkpɔ fiana le mɔ bubuwo nu. (Kol. 3:15) Ne amewo da akpe na mí la, edzɔa dzi na mí.

15. Nu ka dzie wòle be míaɖo ŋkui ne amewo meɖe ŋudzedzekpɔkpɔ fia o?

¹⁵ Le nyateƒe me la, menye ame sia amee aɖe ŋudzedzekpɔkpɔ afia ne míewɔ nyui na wo o. Ðewohĩ èdze agbagba zã wò ɣeyiɣi, ŋusẽ kple nunɔamesiwo tsɔ kpe ɖe ame aɖe ŋu, gake ewɔ na wò be amea mekpɔ ŋudzedze ɖe eŋu o. Ne edzɔ alea la, nu kae nàwɔ be esia nagate ɖe dziwò alo dzi nagaɖe le ƒowò o? Ðo ŋku mawunyakpukpui si dzi wotu nyati sia ɖo, si nye Dɔwɔwɔwo 20:35 me nyawo dzi. Dzidzɔ si dona tsoa nunana me menɔ te ɖe ale si amewo awɔ nu ne míenyo dɔme na wo dzi o. Míate ŋu ayi edzi anɔ nu nam kple dzidzɔ ne ewɔ na mí be medze ame aɖewo ŋu o gɔ̃ hã. Na míakpɔ nu si akpe ɖe mía ŋu dometɔ aɖewo ɖa.

16. Nu kae akpe ɖe mía ŋu míana nu amewo kple dzidzɔ?

¹⁶ Ðoe kplikpaa nàsrɔ̃ Yehowa. Yehowa naa nu nyuiwo amewo, woɖakpɔ ŋudzedze ɖe eŋu loo alo womeɖakpɔ ŋudzedze ɖe eŋu o. (Mat. 5:​43-48) Edo ŋugbe be ne míenaa nu amewo eye míenɔa ‘mɔ kpɔm be woaɖo eteƒe na mí o’ la, “ekema [míaƒe] fetu alolo.” (Luka 6:35) Eya ta dzi megaɖe le ƒowò ne amewo mekpɔ ŋudzedze ɖe nu siwo nèwɔ na wo ŋu o.  Eye megave wò ne amewo meda akpe na wò o. Ðo ŋku edzi be Yehowa aɖo nyui siwo katã nèwɔ na amewo la teƒe na wò godoo, elabe èwɔe “kple dzidzɔ.”—Lod. 19:17; 2 Kor. 9:7.

17. Susu vevi ka tae wòle be míanɔ nu nam amewo? (Luka 14:​12-14)

¹⁷ Mɔ bubu si nu míate ŋu asrɔ̃ Yehowa le ne míele nu nam amewoe nye be míawɔ ɖe nya siwo Yesu gblɔ le Luka 14:​12-14 la dzi. (Xlẽe.) Menye nu gbegblẽe wònye be míanyo dɔme na ame siwo ate ŋu awɔ nu mawo tɔgbi na mí o. Gake ne ède dzesii be yelɔ̃a nunana ame aɖewo koŋ kple susu be woava ɖo eteƒe na ye ya ɖe? Ke dze agbagba nàwɔ abe ale si Yesu gblɔe ene. Nyo dɔme na ame siwo si ŋutete mele be woaɖo eteƒe na wò o. Ne èwɔe alea la, àkpɔ dzidzɔ elabe èle Yehowa srɔ̃m. Eye esi mímekpɔa mɔ bɔ amewo naɖo eteƒe na mí o ta la, dzi adzɔ mí ɣesiaɣi si míena nu amewo, ne womeda akpe ɖe eta o gɔ̃ hã.

18. Nu kae akpe ɖe mía ŋu be míase nu gɔme na amewo?

¹⁸ Mègabu amewo be wonye akpemadalawo o. (1 Kor. 13:7) Ne amewo meɖe ŋudzedzekpɔkpɔ fia o la, bia ɖokuiwò be: ‘Ðe wòfia be womekpɔa ŋudzedze ɖe nu ŋu oa, alo ɖeko woŋlɔ be be yewoada akpea?’ Ðewohĩ susu bubuwo tae womeɖe ŋudzedzekpɔkpɔ fia abe ale si nèkpɔ mɔe ene o. Ame aɖewo kpɔa ŋudzedze ɖe nu ŋu ŋutɔ, gake wometea ŋu ɖenɛ fiana o. Ekpea ŋu na ame aɖewo hã be woakpe ɖe yewo ŋu, vevietɔ ne woawoe kpena ɖe amewo ŋu tsã. Aleke kee wòɖale o, Kristotɔwo ƒe lɔlɔ̃ aʋã mí míase nu gɔme na mía nɔviwo eye míayi edzi akpɔ dzidzɔ si le nunana me.—Ef. 4:2.

19-20. Ne míewɔ nyui na amewo la, nu ka tae wòhiã be míagbɔ dzi ɖi? (Kpɔ fotoa hã.)

¹⁹ Gbɔ dzi ɖi na amewo. Fia nyanu Salomo ŋlɔ tso dɔmenyonyo ŋu be: “Da wò abolo ɖo ɖe tɔwo dzi, elabena àgakpɔe le ŋkeke geɖe megbe.” (Nyagb. 11:1)  Kpukpui sia me nyawo ɖee fia be ame aɖewo ava ɖe ŋudzedzekpɔkpɔ afia “le ŋkeke geɖe megbe.” Bu nuteƒekpɔkpɔ aɖe si ɖo kpe nyateƒenya sia dzi ŋu kpɔ.

²⁰ Ƒe aɖewo va yi la, nutome sue dzikpɔla aɖe srɔ̃ ŋlɔ lɛta tsɔ de dzi ƒo na nɔvinyɔnu aɖe si xɔ nyɔnyrɔ eteƒe medidi o be wòayi edzi awɔ nuteƒe. Ƒe enyi megbe hafi nɔvinyɔnua va ɖo lɛtaa ŋu be: “Ðeko medi be mana nànya ale si gbegbe wò nyawo de dzi ƒo nam le ƒe siwo va yi me.” Eyi edzi be: “[Wò nyawo] tu ame ɖo, gake mawunyakpukpuia koŋue de dzi gbɔ nam, eye nyemaŋlɔe be akpɔ o.” a Esi wògblɔ kuxi siwo me wòto vɔ la, egblɔ be: “Ɣeaɖewoɣia, ewɔna nam be mana ta, madzudzɔ Yehowa subɔsubɔ. Gake meɖoa ŋku mawunyakpukpui ma dzi . . . eye wòléam ɖe te be nyemagana ta o.” Egblɔ yi edzi be: “Le ƒe enyi mawo katã me la, naneke mede dzi ƒo nam de wò lɛtaa nu o.” Kpɔ ale si dzi anya dzɔ nutome sue dzikpɔlaa srɔ̃ esi wòxɔ lɛta ma ƒe geɖe megbee ɖa! Nenema kee wòate ŋu adzɔ be ɣeyiɣi didi aɖe megbe hafi amewo nada akpe ɖe nu nyui aɖe si míewɔ na wo ta.

21. Nu ka tae nèɖoe kplikpaa be yeayi edzi asrɔ̃ Yehowa ƒe dɔmenyonyo?

²¹ Abe ale si míegblɔe va yi ene la, Yehowa wɔ mí be míakpɔ dzidzɔ geɖe le nunana me wu nuxɔxɔ. Míaƒe dzi dzea eme ŋutɔ ne míete ŋu kpe ɖe mía nɔviwo ŋu. Eye dzi dzɔa mí ne woɖee fia be yewokpɔ ŋudzedze ɖe nu si míewɔ na yewo ŋu. Ke hã, ne ame si míenyo dɔme na da akpe alo meda akpe o, ele be dzi nadzɔ mí be míewɔ nu si le eteƒe. Ðo ŋku edzi be nu ka kee nèna amewo o, “Yehowa ate ŋu ana nu geɖe wò wu ema.” (2 Kron. 25:9) Le nyateƒe mea, mímate ŋu ana nu amewo wu esi Yehowa ate ŋu ana mí o. Teƒeɖoɖo si tso Yehowa gbɔ ye nye nyuitɔ kekeake! Eya ta mina míaɖoe kplikpaa be míayi edzi anyo dɔme na amewo abe mía Fofo si le dziƒo la ene.