Eteƒe madidi o Mawu Fiaɖuƒe si nye dziɖuɖu si Mawu ɖo anyi, si lalam míele ɣeyiɣi didi aɖee nye esia la, ana amewo nanɔ ŋutifafa me eye woawɔ ɖeka le anyigba katã dzi. “Ŋutifafa axɔ aƒe” ɖi abe ale si Psalmo 72:7 do ŋugbee ene. Gake ɣekaɣie Fiaɖuƒe sia adze dziɖuɖu gɔme? Aleke wòawɔe? Eye nu kae nàwɔ be Fiaɖuƒe sia ƒe dziɖuɖu naɖe vi na wò?

Biblia la gblɔ nudzɔdzɔ ɖedzesi aɖewo ɖi, siwo ana míakpɔe be Mawu Fiaɖuƒea gogo. Nudzɔdzɔ mawoe ƒo ƒu wɔ “dzesi” siwo ƒe ɖewoe nye dukɔwo dome aʋawɔwɔwo, dɔwuame, dɔléle, anyigbaʋuʋuwo kple sedzimawɔmawɔ si le dzidzim ɖe edzi.—Mateo 24:3, 7, 12; Luka 21:11; Nyaɖeɖefia 6:2-8.

Nyagblɔɖi bubu gblɔ be: “Le ŋkeke mamlɛawo me la, ɣeyiɣi sesẽ siwo me nɔnɔ asesẽ la ava. Elabena amewo anye ɖokuilɔ̃lawo, galɔ̃lawo, . . . ame maɖoto dzilawo, ame madakpewo, ame mawɔnuteƒewo, ame siwo melɔ̃a ame ƒe nya o, ame siwo melɔ̃na ɖe ɖoɖo aɖeke dzi o, ameŋugblẽlawo, ame siwo meɖua wo ɖokuiwo dzi o, ame wɔadãwo, ame siwo melɔ̃a nu nyui o, . . . ame siwo doa wo ɖokuiwo ɖe dzi glodzoo, ame siwo lɔ̃a dzidzɔkpɔkpɔ wu esi woalɔ̃ Mawu.” (2 Timoteo 3:1-4) Nɔnɔme siawo le amewo si tso gbe aɖe gbe ke. Gake fifia ya wobɔ ɖe afi sia afi.

Nyagblɔɖi mawo te emevava tso ƒe 1914 me ke. Le nyateƒe me la, blemaŋutinyaŋlɔlawo, dziɖuɖumegãwo kple agbalẽŋlɔlawo ƒo nu tso ale si nuwo trɔe tso ƒe ma me la ŋu. Le kpɔɖeŋu me, aƒetɔ Peter Munch si nye Denmarktɔwo ƒe blemaŋutinyaŋlɔla ŋlɔ bena: “Aʋa si dzɔ le ƒe 1914 me lae na nuwo trɔ le amegbetɔwo ƒe ŋutinya me kura. Do ŋgɔ na ƒe ma la, amewo susu be nuwo le nyonyom ɖe edzi le xexea me, . . . gake nuwo va trɔ kpata ale be afɔku, ŋɔdzi kple fuléle wɔe be amewo megale dedie le afi aɖeke o.”

Nu siawo siwo na xexea me tɔ zi la, na míekpɔe be eteƒe madidi o, nu nyuiwo akplɔe ɖo. Wona míekpɔe be Fiaɖuƒea ava ɖu anyigba bliboa dzi kpuie. Le nyateƒe me la, esi Yesu nɔ nu ƒom tso nuwuwua ƒe dzesia ŋu la, egblɔ kpee be: “Woaɖe gbeƒã Fiaɖuƒe ŋuti nya nyui sia le anyigba blibo la katã dzi be wòanye ɖaseɖiɖi na dukɔwo katã, eye ekema nuwuwu la ava.”—Mateo 24:14.

Nya nyui mae nye gbedeasi vevi si Yehowa Ðasefowo ɖea gbeƒãe. Le nyateƒe me la, agbalẽ si koŋ wozãna ƒe tanyae nye Gbetakpɔxɔ Le Gbeƒã Ðem Yehowa Ƒe Fiaɖuƒe. Eƒoa nu tso nu wɔnuku siwo Mawu Fiaɖuƒea ava wɔ na amegbetɔwo kple tɔtrɔ siwo wòahe va anyigba dzi la ŋu.

Nya vevi ene siawo ana míakpɔ ŋuɖoɖoa:

1. Fiaɖuƒe sia mazã xexea me dziɖula aɖeke o.

2. Xexe sia me dziɖulawo adi vevie be yewoayi edzi anɔ zia dzi eya ta woatsi tre ɖe Mawu Fiaɖuƒea ŋu bometsitsitɔe.—Psalmo 2:2-9.

3. Ahiã be Mawu Fiaɖuƒea natsrɔ̃ dziɖuɖu siwo li siwo di be yewoayi edzi aɖu amegbetɔwo dzi. (Daniel 2:44; Nyaɖeɖefia 19:17-21) Woyɔ xexea katã ƒe aʋa mamlɛ sia be Armagedon.—Nyaɖeɖefia 16:14, 16.

4. Woakpɔ ame siwo katã lɔ̃ be yewoanɔ Mawu Fiaɖuƒea te la ta le Armagedon-ʋaa me eye woanɔ xexe yeye si me ŋutifafa le la me. Woawoe Biblia yɔ be “ameha gã” la, ɖewohi̇̃ woanye ame miliɔn geɖe.—Nyaɖeɖefia 7:9, 10, 13, 14.

Nu gbãtɔ si wòle be nàwɔ hafi anye Mawu Fiaɖuƒea tevi ye nye be nàsrɔ̃ nu tso eŋu. Le nyateƒe me la, Yesu do gbe ɖa na Mawu be: “Esiae nye agbe mavɔ la bena woanya wò, Mawu vavã ɖeka la, kple Yesu Kristo si nèdɔ ɖa la.”—Yohanes 17:3.

Ne amewo va nya Ame si tututu Yehowa Mawu nye la, eɖea vi geɖe na wo. Bu mɔ siawo dometɔ eve ko ŋu kpɔ: Gbãtɔ, ale si woxɔ Mawu dzi se la me sẽna ɖe edzi. Xɔse ma si ŋu kpeɖodzi le la, nana wokana ɖe edzi be Mawu Fiaɖuƒea nye nu ŋutɔŋutɔ eye adze dziɖuɖu gɔme kpuie. (Hebritɔwo 11:1) Evelia, wova lɔ̃a Mawu kple wo haviwo ɖe edzi. Lɔlɔ̃ si le wo si na Mawu ʋãa wo woɖoa toe tso dzi me. Ale si wolɔ̃ wo haviwo hã ʋãa wo be woawɔ ɖe Yesu ƒe nya si wolɔ̃a yɔyɔ be Sikasedede la dzi. Sedede ma gblɔ be: “Ale si ko miedina be amewo nawɔ na mi la, miwɔ nenema ke na wo.”—Luka 6:31.

Esi mía Wɔlaa nye vifofo lɔ̃ame ta la, edia nyui na mí ɣesiaɣi. Edi be míase vivi na nu si Biblia yɔ be “agbe vavã” la. (1 Timoteo 6:19) Menye “agbe vavã” lae míele egbea o. Agbea le sesẽm na ame miliɔn geɖe eye wokpea fu hafi kpɔa woƒe nuhiahiãwo. Be nàkpɔ ale si “agbe vavã” ma anɔ la, bu nu wɔnuku siwo Mawu Fiaɖuƒea awɔ na eteviwo dometɔ aɖewo ŋu kpɔ.