“Miyi edzi . . . miatsɔ anɔ mia nɔewo kem faa ne nya aɖe le ame aɖe si ɖe nɔvia ŋu.”—KOLOSETƆWO 3:13.

Mí katã míedaa vo. Ate ŋu adzɔ be míadze agɔ le amewo dzi, alo be woadze agɔ le mía dzi. Aleke kee wòɖale o, ehiã be míatsɔe ake alo be woatsɔ ake mí. Ne míetsɔ ke vavã, ke mímalé ame si dze agɔ le mía dzia ɖe dɔ me o. Mímaɖo “vɔ̃ vɔ̃ teƒe” na amea o, eye mímanɔ ŋku ɖom nu si wòwɔ ɖe mía ŋua dzi nɛ edziedzi o. (Romatɔwo 12:17) Gake ne nu si amea wɔ ve mí ale gbegbe be mímate ŋu adzudzɔ eŋu bubu oa, nu kae míate ŋu awɔ? Anyo be míayi amea gbɔ aƒo nu tso nyaa ŋu le bubumɔ nu le mía kplii ɖeɖe ko dome. Ŋutifafae míedi be míavae wɔ, ke menye be míavae ɖee fia be mía tɔ dzɔ o.—Romatɔwo 12:18.

“Mitsɔ ɖokuibɔbɔ bu ame bubuwo be wonye gã wu mi.”—FILIPITƆWO 2:3.

Ne míebɔbɔa mía ɖokui eye míedea bubu amewo ŋua, mía gbɔ nɔnɔ adzɔ dzi na wo. Wonya be míawɔ nu ɖe yewo ŋu nyuie eye mímaɖoe koŋ awɔ nu wòave yewo o. Gake ne míebunɛ  be míenyo wu ame bubuwo alo tea tɔ ɖe míaƒe susuwo dzia, esia ahe masɔmasɔ kple mama vɛ. Amewo malɔ̃ ate ɖe mía ŋu o, eye xɔlɔ̃ ʋɛ aɖewo koe anɔ mía si, ne ɖe anɔ anyi gɔ̃ hãe ma.

“Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ eye wòwɔa nu dzɔdzɔe la, eya ƒe nue dzea eŋu.”—DƆWƆWƆWO 10:34, 35.

Mía Wɔlaa mebua ame aɖewo be wonyo wu ame bubuwo le dukɔ si me wotso, gbe si wodona, ɖoƒe si wole alo ŋutigbalẽ ƒe amadede si le wo ŋu ta o. Ena “dukɔ sia dukɔ dzɔ tso ame ɖeka me.” (Dɔwɔwɔwo 17:26) Esia fia be nɔviwoe amegbetɔwo katã nye. Ne míedea bubu ame sia ame ŋu eye míewɔa nu ɖe wo ŋu nyuiea, dzi adzɔ wo, gake dzi adzɔ mía ŋutɔwo geɖe wu, eye esia dzea mía Wɔlaa ŋu.

“Mido. . . tufafa.”—KOLOSETƆWO 3:12.

Ne míefa tua, míenana amewo ƒe dzi dzea eme. Anɔ bɔbɔe na wo be woaɖo dze kpli mí alo be woaɖɔ mí ɖo gɔ̃ hã, elabe wonya be míefa. Ne ame aɖe do dziku ɖe mía ŋua, ale si míaɖo nya ŋu nɛ tufafatɔea ana eƒe dzi nafa. Lododowo 15:1 gblɔ be: “Nyaŋuɖoɖo fafɛ tsia dziku nu, ke gbedaɖeamegbɔ nana dɔmedzoe flana.”

“Dzidzɔ geɖe le nunana me wu nuxɔxɔ.”—DƆWƆWƆWO 20:35.

Egbea, ame geɖe klẽa ŋu eye wo ɖokui tɔ ko wodina. Gake ame siwo nyoa dɔmea kpɔa dzidzɔ vavãtɔ. (Luka 6:38) Wokpɔa dzidzɔ elabe wolɔ̃a amewo wu nunɔamesiwo. Lɔlɔ̃ ma kee ʋãa wo wokpɔa ŋudzedze ɖe nu ŋu eye wodaa akpe ne amewo nyo dɔme na wo. (Kolosetɔwo 3:15) Bia ɖokuiwò be, ‘Ame kae malɔ̃ ade ha kple—ame si kua ŋɔ eye medaa akpe o, alo ame si nyoa dɔme eye wòkpɔa ŋudzedze ɖe nu ŋu?’ Nu kae esia fia mí? Nye ame si nèdi be amewo nanye.—Mateo 7:12.