“Newɔ dɔ sesẽ, netsɔ eƒe asi wɔ dɔ nyui, ale be wòakpɔ nane ana ame si hiã tu.”—EFESOTƆWO 4:28.

Mía Wɔlaa di be susu nyui nanɔ mía si ɖe dɔ ŋu. Nu ka tae? Ame si doa vevie dɔa, kpɔa dzidzɔ, elabe esia wɔwɔ nana wòte ŋu kpɔa eya ŋutɔ kple eƒe ƒomea ƒe nuhiahiãwo gbɔ. Ate ŋu akpe ɖe ame aɖe si hiã tu ŋu gɔ̃ hã. Eƒe dɔtɔ hã ade asixɔxɔ eŋu. Eya ta ne ame aɖe doa vevie dɔa, asesẽ ŋutɔ hafi dɔ nage le esi. Ŋɔŋlɔawo gblɔe wòsɔ nyuie be “Mawu ƒe nunanae” viɖe si dona tso dɔ sesẽ wɔwɔ mea nye.—Nyagblɔla 3:13.

“Míeka ɖe edzi be dzitsinya nyui le mía si, elabena míedina be míaɖi anukware le nuwo katã me.”—HEBRITƆWO 13:18.

Ne míetoa nyateƒea, enana bubu nɔa mía ŋu, míeɖea dzi ɖi, eye míedɔa alɔ̃ nyuie le zã me. Tsɔ kpe ɖe eŋua, amewo aka ɖe mía dzi eye woade bubu mía ŋu. Menɔa alea na ame siwo daa alakpa o. Azɔ hã, woƒe dzitsinya ate ŋu aɖe fu na wo eye woanɔ vɔvɔ̃m be amewo ava nya nu tso yewoƒe alakpanuwɔwɔwo ŋu gbe ɖeka.

“Mina miaƒe agbenɔnɔ navo tso galɔlɔ̃ me, eye nu siwo le mia si fifia la nadze mia ŋu.”—HEBRITƆWO 13:5.

Míehiã ga be míatsɔ aƒle nuɖuɖu kple nuhiahiã vevi bubuwo. Ke hã, “galɔlɔ̃” nye afɔku gã aɖe. Ame si lɔ̃ gaa ate ŋu azã eƒe ɣeyiɣi kple ŋusẽ gbogbo atsɔ avu ɖe gadidi ŋu. Esia ate ŋu ahe kuxiwo va eƒe srɔ̃ɖeɖe me, ate ŋu awɔe be makpɔ vovo ɖe viawo ŋu o, eye ate ŋu agblẽ nu le eƒe lãmesẽ ŋu gɔ̃ hã. (1 Timoteo 6:9, 10) Gawua, ate ŋu anɔ bɔbɔe na ame si lɔ̃ gaa be wòada alakpa. Nunyala aɖe gblɔ be: “Woayra nuteƒewɔla geɖe, ke ame si tsi klokloklo ɖe hokpɔkpɔ ŋu la, fɔɖiɖi magbe eŋu nɔnɔ o.”—Lododowo 28:20.

“Lé nunya vavãtɔ me ɖe asi eye nàdzɔ tamebubuŋutete ŋu.”—LODODOWO 3:21.

Sukudede kpena ɖe mía ŋu míetsina nyea ame ɖɔʋuwo kple dzila nyuiwo. Gake sukudede ɖeɖe mate ŋu ana míakpɔ dzidzɔ kple dzidzeme vavã o. Ne míedi be nu sia nu si míewɔna le agbe me nadze edzi na mí la, ke ele be Mawu nafia nu mí. Ŋɔŋlɔawo gblɔ tso ame si ɖoa to Mawu ŋu be: “Nu sia nu si wòwɔna la adze edzi.”—Psalmo 1:1-3.