NUWO TƆ ZI LE XEXEA ME
1 | Kpɔ Wò Lãmesẽ Ta
NU SI TA WÒLE VEVIE
Ne nya vɔ̃wo alo afɔku dzɔa, ate ŋu agblẽ nu le amewo ƒe lãmesẽ ŋu le mɔ vovovowo nu.
-
Nu tena ɖe amewo dzi vevie ne afɔku dzɔ, eye ame siwo dzi nu te ɖo eteƒe didia tea ŋu dzea dɔ bɔbɔe wu.
-
Ne nya vɔ̃wo dzɔa, ate ŋu asesẽ na kɔdziwo be woakpɔ amewo gbɔ nyuie le esi dɔnɔwo sɔa gbɔ ŋutɔ ta.
-
Ne afɔku dzɔa, ganyawo tɔtɔna eye esesẽna na amewo be woakpɔ ga aƒle nuhiahiã veviwo abe nuɖuɖu alo atike ene.
Nu Si Wòle Be Nànya
-
Ne èdze dɔ vevie eye wò susu medze akɔ anyi oa, ate ŋu ana be màtso nya me le nuwo ŋu nyuie o. Eye esia awɔe be mànɔ nu siwo ana nànɔ lãmesẽ mea wɔm o. Le ema taa, àgate ŋu adze dɔ ɖe edzi.
-
Ne lãmesẽnyawo le fu ɖem na wò eye mèkpɔ egbɔ oa, ate ŋu ado gã ɖe edzi eye wò agbe ate ŋu aɖo afɔku me gɔ̃ hã.
-
Ne èle lãmesẽ mea, esia awɔe be nànɔ ŋute atso nya me nyuie ne afɔku dzɔ.
-
Ne ganyawo mede dziwò o hãa, àte ŋu awɔ nu siwo ana nànɔ lãmesẽ me.
Nu Si Nàte Ŋu Awɔ Fifia
Ɣesiaɣi si wòanya wɔa, ame si bua nuwo ŋu nyuie la nɔa ŋudzɔ ɖe nu siwo ate ŋu ahe afɔku vɛa ŋu eye wòɖea afɔ siwo hiã tsɔ ƒoa asa na wo. Ewɔa esia le lãmesẽnyawo hã gome. Ne èléa fɔ ɖe dzadzɛnyenye ŋua, esia ate ŋu awɔe be mànɔ dɔ dzem kabakaba alo adze dɔ vevie o. Ne èwɔa nu siwo ana be màdze dɔ oa, enyo wu be nàdze dɔ hafi ava nɔ edam.
“Esi nye kple srɔ̃nye míeléa be na mía ɖokui eye míenana afi si míelea nɔa dzadzɛ taa, míegblẽa ga geɖe ɖe kɔdziyiyi kple atikewo ƒeƒle ŋu o.”—Andreas. *
^ Míetrɔ ŋkɔ aɖewo le magazine sia me.
Ɖewohĩ Esia Hã Adzɔ Dzi Na Wò
NYƆ!
Ale Si Nàwɔ Anɔ Te Ðe Nuteɖeamedzi Nu
Àkpɔ mɔfiame ŋutɔŋutɔ siwo ate ŋu akpe ɖe ŋuwò be nànɔ te ɖe nuteɖeamedzi nu nyuie wu eye be nàɖe edzi akpɔtɔ gɔ̃ hã.
NYA SIWO HAWÒTIWO GBLƆ
Sɔhɛwo Le Nu Ƒom Tso Lãmesẽmenɔnɔ Ŋu
Ðe wòsesẽna na wò be nàɖu nu ɖe ɖoɖo nu ahade kamea? Le video kpui sia me la, sɔhɛwo gblɔ nu siwo wowɔna hafi nɔa lãmesẽ me.
