2 Míawo Ŋutɔwo Gbɔe Míaƒe Fukpekpewo Tsoa?
Nu Si Ta Nya Sia Le Vevie
Ne nya ma ƒe ŋuɖoɖoe nye ɛ̃ la, ke ɖewohĩ míate ŋu awɔ nane atsɔ aɖe fukpekpe dzi akpɔtɔ.
Bu Nya Sia Ŋu Kpɔ
Fukpekpe kawoe amegbetɔwo he va wo ɖokuiwo dzi?
Ŋlɔmiwɔwɔ.
Xexea Me Lãmesẽ Habɔbɔ ka nya ta be wowɔ ŋlɔmi le ame tsitsi ɖeka le ene ɖe sia ɖe me ŋu kpɔ le eƒe ɖevi me, eye egblɔ be wowɔ ŋutasẽnu ɖe nyɔnu ɖeka le etɔ̃ ɖe sia ɖe me ŋu alo dɔ egbɔ sesẽe (alo wɔ evea siaa ɖe eŋu) kpɔ.
Ku.
Xexea Me Lãmesẽ Habɔbɔ ka nya ta le ƒe 2018 me be, “ame 477,000 ye wowu le ƒe 2016 me le xexea me godoo.” Wosusu be ame 180,000 siwo wowu le aʋa kple ʋunyaʋunya me le ƒe ma me ya mele xexlẽme ma me o.
Lãmesẽnyawo.
Agbalẽ aɖe si Fran Smith ŋlɔ gblɔ be: “Ame siwo wu biliɔn ɖeka ye noa atama, eye atama le nu vovovo atɔ̃ siwo wua ame wu la dome. Ehea: dzidɔ, tutudɔ, akɔtadɔ, dzitodzito me dɔ kple dzitodzito me kansa vɛ.”
Amewo Bubu Be Womele Ðeke Me O.
Jay Watts si nye susuŋutinunyala gblɔ be, “Ahedada, amewo bubu be womele ɖeke me o, ŋutigbalẽ ƒe vovototo, gbɔɖiɖi nyɔnuwo, sitsoƒedidi le afɔku ta kple ame ƒe dekɔnu bubu be eyae nyo wu nye nu siwo dzia nuteɖeamedzi ɖe edzi.
SRƆ̃ NU GEÐE KPEE
Kpɔ video si nye Nu Ka Tae Mawu Wɔ Anyigba La? si le jw.org/ee.
Nya Si Biblia Gblɔ
Amegbetɔwo gbɔe míaƒe kuxi geɖewo tso.
Fukpekpe siawo ƒe akpa gãtɔ tsoa dziɖuɖu siwo tea wo teviwo ɖe anyi la gbɔ. Wogblɔna be yewole kpekpem ɖe wo ŋu gake ɖeko wonana nuwo ganyrana ɖe edzi na wo wu.
“Amegbetɔ ɖua fia ɖe amegbetɔ dzi hena eƒe gbegblẽ.”—NYAGBLƆLA 8:9.
Míate ŋu aɖe fukpekpe dzi akpɔtɔ.
Biblia ƒe mɔfiamewo ate ŋu akpe ɖe mía ŋu míanɔ lãmesẽ me eye wòana mí kple amewo dome nanyo.
“Dzi fatu naa agbe ametia, ke ŋuʋaʋã nye ŋuɖui le ƒuwo me.”—LODODOWO 14:30.
“Miɖe ameléleɖedɔme kaɖikaɖi, dɔmedzoe, dziku, ɣlidodo, kple nya veame ɖe sia ɖe ƒomevi ɖa le mia dome hekpe ɖe nu sia nu si gblẽa nu le ame ŋu la ŋuti.”—EFESOTƆWO 4:31.
