Le numekuku aɖe si wowɔ le Vancouver, Canada ƒe nya nu la, ne amewo kpɔa woƒe e-mail me zi etɔ̃ le ŋkekea me la, ate ŋu ana woaɖe dzimaɖitsitsi dzi akpɔtɔ wu be woanɔ e-mail me kpɔm kabakaba. Aƒetɔ Kostadin Kushlev si nɔ ŋgɔ na numekukua gblɔ be nu si ŋu woke ɖo la fia be: “Esesẽna na amewo be woaganɔ woƒe e-mail me kpɔm kabakaba o, evɔ ne womekpɔnɛ kabakaba o la, ana woaɖe dzimaɖitsitsi dzi akpɔtɔ hafi.”

BU NYA SIAWO ŊU: Míele “ɣeyiɣi sesẽ siwo me nɔnɔ asesẽ” la me, eya ta ɖe manyo be míadi mɔ siwo dzi míato aɖe dzimaɖitsitsi dzi akpɔtɔ oa?—2 Timoteo 3:1.

Nyatakaka aɖe si woɖo ɖe Lãwo Takpɔkpɔ Habɔbɔa gblɔ be: “Bɔlu ƒomevi aɖewo kple tɔmelã aɖewo siwo tsrɔ̃ kloe la va te dzidzi ɖe edzi le teƒe siwo wode se be woagaɖe lã le o” la le Belize kple Karib-ƒukpoa ƒe teƒe aɖewo. Nyatakakaa gblɔ kpee be: “Axɔ ƒe 1 va ɖo 6 hafi lã siwo tsrɔ̃ vɔ kloe nagate ŋu adzi ɖe edzi le teƒe siwo wode se be woagaɖe lã le o la, gake be woagasɔ gbɔ . . . abe tsã ene la ate ŋu axɔ ƒe geɖe.” Aƒenɔ Janet Gibson si nye habɔbɔa ƒe ŋgɔnɔla gblɔ tso Belize ŋu be: “Se si wode be woagaɖe lã le teƒe aɖewo o la ate ŋu awɔe be dukɔa ƒe tɔmelã ƒomevi vovovoawo nagadzi le agbɔsɔsɔme ne woaɖe.”

BU NYA SIAWO ŊU: Ðe kpeɖodzi siwo li be dzɔdzɔmenuwo tea ŋu ɖɔa wo ɖokuiwo ɖo la meɖee fia be Wɔla nyanu aɖee wɔ wo oa?—Psalmo 104:24, 25.

Nyadzɔdzɔdɔwɔƒe si nye Agência Brasil ka nya ta be ŋutasẽnuwɔwɔ le dzidzim ɖe edzi le Brazil. Le ƒe 2012 me la, dɔwɔƒe si kpɔa lãmesẽnyawo gbɔ gblɔ be ame siwo wowu la wu 56,000 kple edzivɔ eye esiae nye agbɔsɔsɔ gbogbotɔ si wokpɔ kpɔ le ƒe ɖeka me. Aƒetɔ Luís Sapori si nye Dukɔa ƒe dedienɔnɔ ŋu nyawo ƒe amegã gblɔ be agbe nyui nɔnɔ ƒe toyiyi gbɔe dzidziɖedzi sia tso. Egblɔ be ne dukɔ siwo ƒe ŋku ʋu me tɔwo mele woƒe sewo bum ɖe ɖeke me o la, “wowɔa ŋutasẽnuwo tsɔ doa woawo ŋutɔwo ƒe nudidiwo ɖe ŋgɔ.”

ÈNYAA? Biblia gblɔ be ɣeyiɣi aɖe ava si me amewo ƒe “lɔlɔ̃ ayi to,” eye sedzimawɔmawɔ adzi ɖe edzi.—Mateo 24:3, 12.