Subɔsubɔ Kple Dzɔla La

‘Yehowa, metsi tre ɖe nye dzɔƒe la ɖaa le ŋkeke me, eye metsi dzɔƒe la le zã blibo la me.’—YESAYA 21:8.

1. Ŋugbedodo nyui kawoe Yehowa ŋutɔ nye ɖasefo na?

YEHOWAE nye Tameɖola Gã la. Mawudɔla dzeaglã si va zu Satana Abosam mate ŋu awɔ naneke atsɔ axe mɔ nɛ be tameɖoɖo nyui si le Esi be yeakɔ Yeƒe ŋkɔ ŋu ahaɖo ŋutikɔkɔe Fiaɖuƒe si aɖu paradisonyigba dzi la nagbe emevava o. (Mateo 6:9, 10) Woayra ameƒomea le dziɖuɖu ma te vavã. Mawu “ami ku saɖagatsi tegbee, eye Aƒetɔ Yehowa atutu aɖatsi ɖa le ŋkuwo katã me.” Amegbetɔ kpɔdzidzɔ siwo wɔ ɖeka anɔ ŋutifafa me eye nu adze edzi na wo tegbee. (Yesaya 25:8; 65:17-25) Yehowa ŋutɔe nye ɖasefo na ŋugbedodo nyui siawo!

2. Amegbetɔ siwo nye ɖasefo kawoe Yehowa tia?

² Gake amegbetɔ siwo nye ɖasefowo hã le Wɔla la si. Do ŋgɔ na Kristotɔwo ƒe ɣeyiɣi la, “ɖaseɖilawo ƒe alilikpo” si dze egɔme tso Habel dzi la do dzi to nɔnɔme madeamedziwo me zi geɖe. Woƒe kpɔɖeŋu nyuiawo dea dzi ƒo na Kristotɔ wɔnuteƒewo egbea. Kristo Yesue nye ɖasefo si ɖe dzinɔameƒo fia wu amesiame. (Hebritɔwo 11:1–12:2) Le kpɔɖeŋu me, ɖo ŋku ɖase mamlɛtɔ si wòɖi le Pontio Pilato ŋkume la dzi. Yesu gblɔ be: “Nye la, esia ta wodzim ɖo, eye esia ta meva xexeame ɖo, bena maɖi ɖase na nyateƒe la.” (Yohanes 18:37) Tso ƒe 33 M.Ŋ. vaseɖe ƒe 2000 M.Ŋ. sia me la, Kristotɔ dovevienuwo dze Yesu ƒe kpɔɖeŋua yome eye woyi edzi tsɔ dzinɔameƒo le ɖase ɖim le “Mawu ƒe nu dzɔtsuwo” ŋu.—Dɔwɔwɔwo 2:11.

Babilon ƒe Kɔmamawo

3. Aleke Satana tsi tre ɖe ɖase si ɖim wole le Yehowa kple eƒe lɔlɔ̃nu ŋu la ŋui?

³ Tso ƒe akpe nane siwo va yi me la, Satana Abosam, Futɔ gãtɔ, dzea agbagba tamesesẽtɔe be yeado vlo Mawu ƒe ɖasefowo ƒe ɖaseɖinyawo. Esi “ʋɔ driba gã” sia “si nye da xoxo la” nye “aʋatsokafofo” ta la, ele ‘xexeame katã beble dzi.’ Egbe tanana le aʋa si wòho ɖe amesiwo “léa Mawu ƒe seawo me ɖe asi” ŋu la me, vevietɔ le ŋkeke mamlɛ siawo me.—Yohanes 8:44; Nyaɖeɖefia 12:9, 17.

4. Aleke Babilon Gã la wɔ va dzɔ?

⁴ Anɔ ƒe 4,000 enye si va yi le Noa ŋɔli ƒe Tsiɖɔɖɔa megbe la, Satana tia Nimrod, si nye ‘adela kalẽtɔ si tsi tre ɖe Yehowa ŋu.’ (Mose I, 10:9, 10) Babilon (Babel) si nye Nimrod ƒe du gãtɔ kekeake la va zu gbɔgbɔ vɔ̃wo subɔƒe. Esi Yehowa tɔtɔ Babel mɔtulawo ƒe gbe la, ameawo kaka ɖe xexeame katã eye wotsɔ woƒe alakpasubɔsubɔa yii. Aleae Babilon wɔ va zu afisi alakpasubɔsubɔhawo ƒe xexemefiaɖuƒe si woyɔ le Nyaɖeɖefia ƒe agbalẽa me be Babilon Gã la dzɔ tso. Agbalẽ ma gblɔ blema mawusubɔsubɔ nuɖoanyi sia ƒe tsɔtsrɔ̃ ɖi.—Nyaɖeɖefia 17:5; 18:21.

Dukɔ si me Nɔlawo Nye Ðasefowo

5. Dukɔ kae Yehowa ɖo be wòanye yeƒe ɖasefo, gake nukatae wòɖe mɔ wokplɔ emetɔwo yi aboyo mee?

⁵ Anɔ ƒe 500 le Nimrod ƒe ɣeyiɣia megbe la, Yehowa ƒo nuteƒewɔla Abraham ƒe dzidzimeviwo nu ƒu wozu Israel-dukɔ be woanye Yeƒe ɖasefowo  le anyigba dzi. (Yesaya 43:10, 12) Dukɔ ma me tɔ geɖe subɔ Yehowa nuteƒewɔwɔtɔe. Gake esi ƒe alafawo va nɔ yiyim la, dukɔ siwo ƒo xlã Israel ƒe aʋatsodzixɔsewo va gblẽe, eye Yehowa ƒe dukɔ si wòbla nu kplii la trɔ megbe dee va de ta agu na alakpamawuwo. Eyata le ƒe 607 D.M.Ŋ. me la, Fia Nebukadnezar nɔ ŋgɔ na Babilon-ʋakɔwo wova tsrɔ̃ Yerusalem kple eƒe gbedoxɔa eye wokplɔ Yudatɔ akpa gãtɔ yi aboyo mee le Babilon.

6. Nyanyui kae Yehowa ƒe gbetakpɔla nyagblɔɖila la gblɔ, eye ɣekaɣie wòva eme?

⁶ Aʋadziɖuɖu ka gbegbee nye si wònye na alakpasubɔsubɔ! Gake Babilon ƒe ŋusẽkpɔɖeamedzia menɔ anyi eteƒe didi o. Anye ƒe 200 hafi nya ma nava dzɔ la, Yehowa de se be: “Yi naɖo gbetakpɔla, ne wòato nusi wòkpɔ.” Nya kae le gbetakpɔla sia si wòagblɔ? “Babel mũ, emũ, eye wogbã eƒe legbawo katã ƒu anyi.” (Yesaya 21:6, 9) Nenema tututue wòdzɔ hã be le ƒe 539 D.M.Ŋ. me la, nyagblɔɖinya sia va eme. Babilon sesẽ la mũ, eye eteƒe medidi o Mawu ƒe ame siwo wòbla nu kplii la te ŋu trɔ yi wo denyigba dzi.

7. (a) Nukae Yudatɔwo srɔ̃ tso Yehowa ƒe tohehea me? (b) Mɔ̃ kawo mee Yudatɔ siwo gbɔ tso aboyome ge ɖo, eye nukae do tso eme?

⁷ Yudatɔ siwo trɔ gbɔ la srɔ̃ nunya geɖe siwo ta wòle be woaɖe asi le trɔ̃subɔsubɔ kple gbɔgbɔ vɔ̃wo subɔsubɔ ŋu. Gake esi ƒeawo va nɔ yiyim la, wogage ɖe mɔ̃ bubuwo me. Hela xexemenunya zu mɔ̃ ɖe wo dometɔ aɖewo. Wo dometɔ bubuwo va nɔ tɔ tem ɖe amegbetɔ ƒe kɔnyinyiwo dzi wu Mawu ƒe Nya la. Dulɔlɔ̃ flu bubuwo. (Marko 7:13; Dɔwɔwɔwo 5:37) Kaka woava dzi Yesu la, dukɔa gatrɔ megbe de tadedeagu dzadzɛtɔ ake. Togbɔ be Yudatɔ ɖekaɖeka aɖewo xɔ nyanyui si Yesu va gblɔ hã la, dukɔ bliboa gbee ale be Mawu hã gbe wo. (Yohanes 1:9-12; Dɔwɔwɔwo 2:36) Israel megava nye Mawu ƒe ɖasefo o, eye le ƒe 70 M.Ŋ. me la, Roma-ʋakɔwo va tsrɔ̃ Yerusalem kple eƒe gbedoxɔa azɔ.—Mateo 21:43.

8. Amekawoe va zu Yehowa ƒe ɖasefowo, eye nukatae nuxlɔ̃ame si Paulo na ɖasefo siawo sɔ ɖe ɣeyiɣia nu?

⁸ Le ɣeyiɣi ma me la, wodzi “Mawu ƒe Israel” si me tɔwo nye Kristotɔwo, eye dukɔ siae va nye Mawu ƒe ɖasefo azɔ na dukɔwo. (Galatiatɔwo 6:16) Satana dze agbagba alɔtsɔtsɔe be yeagblẽ gbɔgbɔmedukɔ yeye sia dome. Kaka ƒe alafa gbãtɔ ƒe nuwuwu naɖo la, kɔmamawo va nɔ mo dom ɖa le hameawo me. (Nyaɖeɖefia 2:6, 14, 20) Paulo ƒe nuxlɔ̃ame sɔ ɖe ɣeyiɣia nu be: “Mikpɔ nyuie, bena ame aɖeke nagakplɔ mi ayi aboyo to xexemenunya kple beble dzodzro me o, le amewo ƒe nuɖoanyi kple xexeme ƒe gɔmedzenuwo la nu, eye menye le Kristo nu o.”—Kolosetɔwo 2:8.

9. Abe alesi Paulo xlɔ̃ nui ene la, nukawo ƒe dzɔdzɔe na be Kristodukɔa va do?

⁹ Mlɔeba la, Hela xexemenunya, Babilon ƒe subɔsubɔ nukpɔsusuwo, kple emegbe amegbetɔ ƒe “nunya” abe nɔnɔmetɔtrɔ nufiafia kple ɖeklemiɖeɖe deŋgɔ ene va gblẽ amesiwo be Kristotɔwoe yewonye dometɔ geɖe ƒe subɔsubɔ me. Ðeko wòsɔ ɖe alesi Paulo gblɔe ɖii nu be: “Menya bena, le nye dzodzo megbe la amegãxi nyanyrawo laɖo mia dome, amesiwo makpɔ alẽha la ta o; eye le mia ŋutɔwo dome la  ŋutsu, siwo gblɔa nya dadawo la, latsi tre, be woahe nusrɔ̃lawo ɖe wo ɖokui yome.” (Dɔwɔwɔwo 20:29, 30) Megbedede sia wɔe be Kristodukɔa va do.

10. Nudzɔdzɔ kawoe fia be menye amesiame dzie subɔsubɔnuwɔna gbegblẽ siwo yia edzi le Kristodukɔa me la kpɔ ŋusẽ ɖo o?

¹⁰ Ele na amesiwo ku ɖe tadedeagu dzadzɛtɔa ŋu le nyateƒe me be “[woaʋli] xɔse, si wode asi na ame kɔkɔewo zi ɖeka ɖe ɣeyiɣiawo katã nu la ta [sesĩe].” (Yuda 3) Ðe woadzudzɔ ɖaseɖiɖi le tadedeagu dzadzɛa kple Yehowa ŋu le anyigba la dzia? Ao. Esi Satana, aglãdzela la, kple eƒe dɔwɔwɔwo ƒe tsɔtsrɔ̃ɣi nɔ aƒe tum la, eva dze ƒã be menye amesiame dzie xɔsegbelawo ƒe subɔsubɔ si ƒomevi yia edzi le Kristodukɔa me la kpɔ ŋusẽ ɖo o. Le ƒe alafa 19 lia ƒe nuwuwu lɔƒo le Pittsburgh, Pennsylvania, U.S.A. la, woɖo Biblia-nusrɔ̃vi ɖianukwarewo ƒe ƒuƒoƒo aɖe anyi eye wova nye Mawu ƒe egbegbe ɖasefoha la ƒe gɔmedzeƒe. Kristotɔ siawo he susu yi Ŋɔŋlɔawo me kpeɖodzi siwo fia be fifi xexemenuɖoanyia ƒe nuwuwu gogo la dzi. Le Biblia ƒe nyagblɔɖi me vava nu la, xexe sia ƒe “nuwuwu” dze egɔme le ƒe 1914 me eye xexemeʋa gbãtɔ ƒe dzɔdzɔe ɖee fia nenema. (Mateo 24:3, 7) Tso ƒe ma dzi la, kpeɖodzi sẽŋuwo li siwo fia be wonya Satana kple eƒe gbɔgbɔ vɔ̃awo tso dziƒo. Ƒe alafa 20 lia sia si me xaxawo yɔ fũ la ɖo kpe Satana ƒe nuwɔnawo kple Yesu ƒe dziƒo Fiaɖuƒe ŋusẽ me nɔnɔ ƒe dzesia ƒe emevava ɖedzesi la dzi kɔte.—Mateo, ta 24 kple 25; Marko, ta 13; Luka, ta 21; Nyaɖeɖefia 12:10, 12.

11. Nukae Satana te kpɔ be yeawɔ, gake aleke eƒe agbagbadzedzea do kpo nui?

¹¹ Le June 1918 me la, Satana dze agbagba ɖesiaɖe be yeabu mo na Biblia nusrɔ̃vi mawo, siwo nɔ gbeƒã ɖem le dukɔ geɖe me ɣemaɣi. Edze agbagba hã be yeagblẽ woƒe dɔwɔƒe si woɖo le se nu si nye Gbetakpɔxɔ Biblia Kple Trakt Habɔbɔa dome. Wotso Habɔbɔa ƒe dɔnunɔlawo nu be wonye dugbãlawo, abe alesi wotso Yesu nu le ƒe alafa gbãtɔa me ene, eye wode wo gaxɔ me. (Luka 23:2) Gake woɖe asi le dɔnunɔla siawo ŋu le ƒe 1919 me, ale be wogate ŋu yi woƒe subɔsubɔdɔa dzi. Wova kɔ wo ŋu keŋkeŋ emegbe.

“Gbetakpɔla” si Le Ŋudzɔ

12. Amekawoe nye Yehowa ƒe dzɔla hatsotsoa, alo “gbetakpɔla” egbea, eye nɔnɔme kae le wo si ɖe dɔ ŋu?

¹² Eyata esi ‘nuwuɣia’ dze egɔme la, dzɔla ganɔ Yehowa si si naa amewo nyaa nu tso nudzɔdzɔ siwo do ƒome kple Eƒe tameɖoɖowo me vava ŋu. (Daniel 12:4; Timoteo II, 3:1) Vaseɖe egbe la, dzɔla hatsotso ma—si nye Kristotɔ amesiaminawo, Mawu ƒe Israel la—le nu wɔm wòle sɔsɔm ɖe alesi Yesaya ɖɔ dzɔla la le nyagblɔɖi mee nu be: “[Eƒu] to anyi vevie, [heɖe] gbe abe dzata ene be: Aƒetɔ, metsi tre ɖe nye dzɔƒe la ɖaa le ŋkeke me, eye metsi dzɔƒe la le zã blibo la me.” (Yesaya 21:7, 8) Dzɔla sia nye amesi léa fɔ ɖe eƒe dɔ ŋu vevie!

13. (a) Nya kae Yehowa ƒe dzɔla la ɖe gbeƒãe? (b) Nukatae míagblɔ be Babilon Gã la mu?

¹³ Nukae dzɔla sia kpɔ? Yehowa ƒe dzɔla si nye eƒe ɖasefo hatsotsoa gaɖe gbeƒã be: “Babel mũ, emũ, eye [Yehowa gbã] eƒe legbawo katã ƒu anyi.” (Yesaya 21:9) Fifia le Xexemeʋa I megbe la, Babilon Gã, si nye alakpasubɔsubɔhawo ƒe xexemefiaɖuƒeae ge tso eƒe ŋusẽnɔƒe kɔkɔ la. (Yeremya 50:1-3; Nyaɖeɖefia 14:8) Mewɔ nuku o! Kristodukɔa mee Aʋawɔwɔ Gã la, si nye ŋkɔ si woyɔna nɛ tsã, dze egɔme tsoe, afisi subɔsubɔhakplɔla siwo nɔ akpa evea siaa dzi dea dzo aʋawɔwɔa me gblɔna na woƒe sɔhɛ sesẽwo be woayi aʋa. Ŋukpenya ka gbegbee nye si! Le ƒe 1919 me la, Babilon Gã la mete ŋu xe mɔ na Biblia Nusrɔ̃viawo, si nye alesi woyɔa Yehowa Ðasefowo ɣemaɣi, be woagado le dɔmawɔmawɔ ƒe nɔnɔmea me ahatso ɖe xexeame godoo ƒe ɖaseɖiɖidɔ si gale edzi yim kokoko la wɔwɔ ŋu o. (Mateo 24:14) Emae nye Babilon Gã la ƒe anyidzedze ƒe dzesi, abe alesi asiɖeɖe le Israel-viwo ŋu le ƒe alafa adelia D.M.Ŋ. me nye blema Babilon ƒe anyidzedze ƒe dzesi ene.

14. Magazine kae Yehowa ƒe dzɔla hatsotsoa zã wu, eye aleke Yehowa yra ɖe ezazã dzi?

¹⁴ Dzɔla hatsotsoa wɔa eƒe dɔ kple dzonɔameme  kpakple didi vevie be yeawɔ nusi le eteƒe ɣesiaɣi. Le July 1879 me la, Biblia Nusrɔ̃viawo dze magazine sia tata gɔme, eye woyɔnɛ ɣemaɣi be Zion’s Watch Tower and Herald of Christ’s Presence (Zion ƒe Gbetakpɔxɔ Kple Kristo ƒe Anyinɔnɔ Gbeƒãɖela). Nya siwo dzena le tata ɖesiaɖe ƒe akpa dzi tso ƒe 1879 tɔ dzi vaseɖe December 15, 1938 tɔ dzie nye “ ‘Dzɔla, Zã Gbɔ Tsɔa?’—Yesaya 21:11.” * Gbetakpɔxɔa tsɔ nuteƒewɔwɔ le ŋudzɔ ɖe xexemenyadzɔdzɔwo kple nusi wofia le nyagblɔɖi me ŋu ƒe120 sɔŋ. (Timoteo II, 3:1-5, 13) Mawu ƒe dzɔla hatsotsoa kple woƒe zɔhɛ siwo nye ‘alẽ bubuawo’ zãa magazine sia tsɔ ɖea gbeƒã na ameƒomea dzonɔamemetɔe be Yehowa ƒe dziɖulanyenye taʋiʋli to Kristo ƒe Fiaɖuƒea dzi tu aƒe. (Yohanes 10:16) Ðe Yehowa yra ɖe ɖaseɖigbalẽ sia dzia? Tso esime wota Gbetakpɔxɔ magazinea zi gbãtɔ le ƒe 1879 me, si nye ɖekaɖeka 6,000 dzi la, edzi ɖe edzi ɖo 22,000,000 kple edzivɔ le gbegbɔgblɔ 132 me le xexeame godoo—eye wotaa wo ɖe gbegbɔgblɔ siawo dometɔ 121 me le ɣeyiɣi ɖeka me. Aleke gbegbe wòsɔe nye si be subɔsubɔ magazine si womana wòdea teƒe geɖe wu le anyigba dzi la nye esi kafua Mawu vavã, Yehowa, ƒe ŋkɔ!

Nuwo Ŋu Kɔkɔ Vivivi

15. Nuwo ŋu kɔkɔ kae dze egɔme vivivi do ŋgɔ na ƒe 1914 gɔ̃ hã?

¹⁵ Le ƒe 40 aɖewo me vaseɖe esime Kristo ƒe dziƒodziɖuɖua dze egɔme le ƒe 1914 me la, wona Biblia Nusrɔ̃viawo vo tso Kristodukɔa ƒe nufiafia siwo menɔ te ɖe Biblia dzi o dometɔ geɖe, abe tsidedeta na vidzĩwo, amegbetɔ ƒe luʋɔ ƒe numakumakunyenye, ŋutiklɔdzo, fufiafia ame le dzomavɔ me, kple Mawuɖekaetɔ̃ ene me. Gake egaxɔ ɣeyiɣi bubu hafi woɖe nukpɔsusu gbegblẽwo katã ɖa. Le kpɔɖeŋu me le ƒe 1920 ƒeawo me la, Biblia Nusrɔ̃vi geɖe dea dzesi aɖe woƒe awu ŋu, si nye atitsoga si ŋu fiakuku le, eye woɖua Kristmas kple trɔ̃subɔlawo ƒe ŋkekenyui aɖewo. Gake hafi tadedeagu nanɔ dzadzɛ la, ele be woaɖe asi le trɔ̃subɔsubɔ nuwɔna ɖesiaɖe ŋu. Ele be Mawu ƒe Nya, Biblia Kɔkɔe la, ɖeɖeko nanye nusi dzi Kristotɔ natu eƒe dzixɔse kple agbenɔnɔ ɖo. (Yesaya 8:19, 20; Romatɔwo 15:4) Menyo be woatsɔ nane akpe Mawu ƒe Nya la alo aɖe nane le eme o.—Mose V, 4:2; Nyaɖeɖefia 22:18, 19.

16, 17. (a) Nukpɔsusu manyomanyo kae nɔ dzɔla hatsotsoa si ƒe gbogbo aɖewo? (b) Nukae nye “vɔsamlekpui” kple “dzesikpe” si le “Egipte” la ƒe gɔmeɖeɖe nyuitɔ?

¹⁶ Kpɔɖeŋu ɖeka aɖo kpe gɔmeɖose sia ƒe vevienyenye dzi. Le ƒe 1886 me la, C. T. Russell ta agbalẽ aɖe si wova yɔ emegbe be The Divine Plan of the Ages, eye nutata aɖe nɔ agbalẽ sia me si me wogblɔ le be ameƒomea ƒe agbenɔƒewo ku ɖe Kpexɔ Gã aɖe si le Egipte ŋu. Wobui be Farao Khufu ƒe ŋkuɖodzixɔ siae nye dzesikpe si ŋu woƒo nu tsoe le Yesaya 19:19, 20 be: “Ɣemaɣi la vɔsamlekpui anɔ Egipte-nyigba titina na Yehowa, eye dzesikpe anɔ eƒe liƒo dzi na Yehowa, si anye dzesi kple ɖaseɖiɖi na Yehowa Zebaot le Egipte-nyigba dzi.” Kadodo kae ate ŋu anɔ kpexɔa kple Biblia dome? Le kpɔɖeŋu me, wosusui be Kpexɔ Gã la me mɔ aɖewo ƒe didime fia ɣeyiɣi si “xaxa gã” si woyɔ le Mateo 24:21 la adze egɔme, le alesi wose egɔme ɣemaɣi nu. Biblia Nusrɔ̃vi aɖewo va vu ɖe kpexɔa ƒe akpa vovovo dzidzedzidze ŋu be yewoanya nanewo, si ƒe ɖee nye ŋkeke si yewoayi dziƒo!

¹⁷ Wode bubu Kpexɔ sia si zu abe Biblia ene ŋu ƒe gbogbo aɖewo vaseɖe esime Gbetakpɔxɔ  ƒe tata siwo nye November 15 kple December 1, 1928, ƒe tatawo va na eme kɔ be Yehowa mehiã ŋkuɖodzi kpexɔ aɖeke si faraowo, siwo nye trɔ̃subɔlawo tu, siwo me ɣletivimefakaka dzesi siwo do ƒome kple gbɔgbɔ vɔ̃wo le la be wòatsɔ aɖo kpe nya si wogblɔ le Biblia me dzi o. Ke wova kpɔe be gbɔgbɔmegɔmesesee le Yesaya ƒe nyagblɔɖia ŋu. Le Nyaɖeɖefia 11:8 la, “Egipte” tsi tre ɖi na Satana ƒe xexeame. “Vɔsamlekpui . . . na Yehowa” na míeɖo ŋku vɔ nyui siwo Kristotɔ amesiaminawo sa esime wonye amedzrowo le xexe sia me dzi. (Romatɔwo 12:1; Hebritɔwo 13:15, 16) Dzesikpe si anɔ “[Egipte ƒe] liƒo dzi” fia Kristotɔ amesiaminawo ƒe hame si nye “nyateƒe ƒe sɔti” si nye ɖaseɖila le “Egipte,” xexe si me wogbɔna dzodzo ge le.—Timoteo I, 3:15.

18. (a) Aleke Yehowa yi edzi le nyawo me kɔm na Biblia nusrɔ̃vi ɖianukwarewo? (b) Ne Ŋɔŋlɔ aɖe me ɖeɖe gɔmesese sesẽ na Kristotɔ aɖe la, nɔnɔme kae anyo be wòanɔ esi?

¹⁸ Esi ƒeawo va le yiyim la, Yehowa yi edzi le nyateƒea me kɔm na mí ɖe edzi, eye egana míesea eƒe nyagblɔɖinya la gɔme ɖe edzi. (Lododowo 4:18) Le ƒe siawo me la, wode dzi ƒo na mí be míagbugbɔ alé ŋku ɖe dzidzime si nu mayi hafi nuwuwua nava o, alẽwo kple gbɔ̃wo ŋuti lododoa, ŋunyɔnua kple ɣeyiɣi si wòava tsi tre ɖe kɔkɔeƒea, nubabla yeyea, Yesu ƒe nɔnɔmetɔtrɔa, kple gbedoxɔ ŋuti ŋutega si le Xezekiel ƒe agbalẽa me—kple nya bubu geɖe—ŋu kple susu be míase nuwo gɔme wòade to ɖe edzi. Ɣeaɖewoɣi esesẽna be míase numeɖeɖe siwo ŋu wogatrɔ asi le alea gɔme, gake susu siwo ta wowɔe la me va kɔna ne ɣeyiɣiawo va le yiyim. Ne Kristotɔ aɖe mese ŋɔŋlɔ aɖe me ɖeɖe yeyee gɔme nyuie o la, anyo be wòatsɔ ɖokuibɔbɔ agblɔ nya si nyagblɔɖila Mixa gblɔ be: “Makpɔ Mawu, nye xɔnametɔ sinu.”—Mixa 7:7.

19. Aleke amesiamina susɔeawo kple woƒe zɔhɛ alẽ bubuawo wɔ kalẽ abe dzata ene le ŋkeke mamlɛ siawo me?

 ¹⁹ Ðo ŋku edzi be dzɔla la “[ɖe] gbe abe dzata ene be: Aƒetɔ, metsi tre ɖe nye dzɔƒe la ɖaa le ŋkeke me, eye metsi dzɔƒe la le zã blibo la me.” (Yesaya 21:8) Amesiamina susɔeawo wɔ kalẽ abe dzata ene heklo nu le alakpasubɔsubɔhawo ŋu eye wole ablɔɖemɔa fiam amewo. (Nyaɖeɖefia 18:2-5) Esi wonye “dɔla nuteƒewɔla kple aɖaŋudzela” ta la, wota Bibliawo, magazinewo, kple agbalẽ bubuwo ɖe gbegbɔgblɔ gbogbo aɖewo me—wonye ‘nuɖuɖu le ɣeyiɣi nyui dzi.’ (Mateo 24:45) Woxɔ ŋgɔ le “ameha gã, si . . . tso dukɔ sia dukɔ kple to sia to kple du sia du kple gbegbɔgblɔ sia gbegbɔgblɔ me” la nu ƒoƒo ƒu me. Yesu ƒe ʋu si xea fe ɖe ame ta la kɔ woawo hã ŋu eye woɖee fia be dzatadzi le yewo hã si le ‘subɔsubɔdɔ kɔkɔe wɔwɔ na Mawu zã kple keli’ me. (Nyaɖeɖefia 7:9, 14, 15) Ku kawoe Yehowa ƒe Ðasefo amesiaminawo ƒe ƒuƒoƒo sue si susɔ kpakple woƒe zɔhɛ, ameha gã la, tse le ƒe si va yi me? Míaƒe nyati si kplɔe ɖo ana míanya.

[Etenuŋɔŋlɔwo]

Èɖo Ŋku Wo Dzia?

• Ðasefo kawoe Yehowa tia le ƒeawo me?

• Afikae Babilon Gã la dzɔ tso?

• Nukatae Yehowa ɖe mɔ wotsrɔ̃ Yerusalem si nye eƒe ɖasefodukɔ ƒe fiadu le ƒe 607 D.M.Ŋ. kple ƒe 70 M.Ŋ. me?

• Nɔnɔme kae Yehowa ƒe dzɔla hatsotsoa kple woƒe zɔhɛwo ɖe fia?

[Biabiawo]

[Nɔnɔmetata si le axa 7]

‘Yehowa, metsi tre ɖe nye dzɔƒe la ɖaa’

[Nɔnɔmetata si le axa 10]

Yehowa ƒe dzɔla hatsotsoa me tɔwo ɖoa movevi ɖe woƒe dɔ ŋu