Mawu Ƒe Nyagblɔɖinya La Naa Etsɔme  Mɔkpɔkpɔ Ame

LE Mawu ƒe Nya, Biblia Kɔkɔea, ta la, xɔse kple mɔkpɔkpɔ le Kristotɔwo si na etsɔme eye wokpɔe be eme anyo. Esi wo kple Yehowa Mawu dome le nyuie ta la, wokpɔa mɔ na etsɔme. Abe alesi woɖe eme le “Mawu ƒe Nyagblɔɖinya” Nutome Gã Takpekpeawo ƒe nuƒo gbãtɔ mee ene la, ƒe geɖe enye sia si Yehowa Ðasefowo nye Biblia ƒe nyagblɔɖiwo srɔ̃la kutrikulawo. Eyata nukae Yehowa dzra ɖo na eƒe amewo le takpekpe siawo me? Nyaselaawo katã tsɔ woƒe Bibliawo henɔ dzadzraɖoɖi kple didi vevie be yewoanya. Míetsɔ takpekpe ŋkekeawo dometɔ ɖesiaɖe ƒe tanya wɔ tanya sue le eɖokui si.

ŊKEKE GBÃTƆ: Zɔzɔ le Mawu ƒe Nya ƒe Kekelia Me

Woɖe eme le nuƒo si ƒe tanyae nye “Mawu ƒe Nya la Fia Mɔ Mí” me be Yehowa ƒe amewo le abe ŋutsu aɖe si dze mɔzɔzɔ gɔme le viviti me le zã me ene. Ne agu te dzedze la, vɔvɔliwo ko wòkpɔna, gake ne ɣea ɖo etame la, ekpɔa nusianu nyuie. Abe alesi wogblɔe ɖi le Lododowo 4:18 ene la, mɔ dzi va kɔ na Yehowa ƒe amewo le Mawu ƒe nyagblɔɖinya la ƒe keklẽ nyuie ta. Womegblẽ wo ɖe gbɔgbɔmeviviti me wole nu klim o.

Woɖo ŋku edzi na nyaselawo le nuƒo tɔxɛ si nye “Ðo To Mawu ƒe Nyagblɔɖinya La” me be amesiwo kpɔa Yehowa sinu la ƒoa asa na mɔkpɔkpɔbuɖeame kple beble si me amesiwo dzea aʋatsomesiawo kple aʋatsonyagblɔɖilawo yome le la. To vovo kura na woawo la, ɖaseɖiɖi siwo le Mesia vavã la, Yesu Kristo, ŋu la wu gbɔgblɔ! Le kpɔɖeŋu me, Yesu ƒe nɔnɔmetɔtrɔ nukutɔe nye ekpɔkpɔ do ŋgɔ be eyae nye Mawu Fiaɖuƒea ƒe Fia si woɖo. Tso esime Yesu va xɔ Fiaɖuƒeŋusẽ le ƒe 1914 me la, eyae nye “ŋukeɣletivi” si woyɔ le Petro II, 1:19. Nuƒola la gblɔ be: “Esi wònye Mesia Ŋukeɣletivi ta la, eɖea gbeƒãe be ŋkeke, alo azã, yeye aɖe ɖo vɔ na ameƒomea me tɔ toɖolawo katã.”

Nuƒo si ƒe tanyae nye “Alesi Míaklẽ abe Akaɖiwo Ene” ye wotsɔ dze ŋdɔ ƒe wɔnawo gɔme heɖe Efesotɔwo 5:9 me, afisi apostolo Paulo ɖo aɖaŋu na mí le be ‘míayi edzi azɔ abe kekeliviwo ene.’ Menye Mawu ƒe Nya la gbɔgblɔ na amewo dzi koe Kristotɔwo tona nyea akaɖiwo o, ke wotoa Yesu sɔsrɔ̃ dzi henɔa agbe ɖe Biblia nu hã.

Be míanye akaɖi sia tɔgbewo la, ele be ‘Míakpɔ Dzidzɔ Ðe Mawu ƒe Nya la Xexlẽ Ŋu.’ Tanya sia ŋue woƒo nu tsoe le nuƒo kpui etɔ̃ me. Esi nuƒola gbãtɔ yɔ Abraham Lincoln ƒe nyawo, amesi yɔ Biblia be enye “nunana nyuitɔ kekeake si Mawu tsɔ na amegbetɔ” vɔ la, ebia nyaselawo be le alesi woxlẽa nui nu la, nukae wòɖe fia le woƒe ŋudzedzekpɔkpɔ ɖe Yehowa ƒe Nya la ŋu ƒe todede ŋu hã. Wode dzi ƒo na nyaselawo be woaxlẽ Biblia nyuie, agbɔ dzi ɖi akpɔ Ŋɔŋlɔawo me nudzɔdzɔwo le susu me eye woatsɔ nya yeye siwo ŋu woke ɖo la asɔ kple nusiwo wonya xoxo.

Nuƒo kpuiawo dometɔ si gakplɔe ɖo la te gbe ɖe alesi gbegbe nusɔsrɔ̃ hiã dzie be, ne “nuɖuɖu sesẽ” aɖo lãme na mí la, ke manye be míaxlẽ nu ɖewoɖewoe ko o. (Hebritɔwo 5:13, 14) Nuƒola la gblɔ be ne ‘míedzra ɖo le dzi me’ do ŋgɔ abe alesi Israel-nunɔla Ezra wɔe ene la, nusɔsrɔ̃ atu mí ɖo ŋutɔ. (Ezra 7:10) Gake nukatae nusɔsrɔ̃ le vevie nenema gbegbe? Elabena edo ƒome tẽ kple mía kple Yehowa dome ƒomedodo. Eyata ele be Biblia sɔsrɔ̃ nanye nu xɔasi si vivia ame nu hetua ame ɖo, togbɔ be ebia susu mamlã kple agbagbadzedze hã. Aleke míawɔ akpɔ ɣeyiɣi na nusɔsrɔ̃ si me tsɔɖui le? Nuƒo kpuiawo ƒe nuƒola mamlɛa gblɔ be, ne ‘míeƒle ɣeyiɣi’ le nusiwo mele vevie o si ko. (Efesotɔwo 5:16) Ẽ, nusi ana míakpɔ ɣeyiɣi enye be míazã míaƒe ɣeyiɣi nyuie.

Wogblɔe le nuƒo si ƒe tanyae nye “Mawu Doa Ŋusẽ Amesi Ŋu Ðeɖi Te” me be ɖeɖi tea ame geɖe ŋu le egbeŋkekeawo me. Eyata be ‘ŋusẽ si gbɔ dzɔdzɔmetɔ ŋu’ nanɔ mía ŋu na Kristotɔwo ƒe subɔsubɔdɔa wɔwɔ la, ehiã be míaɖo ŋu ɖe Yehowa, amesi ‘doa ŋusẽ amesiwo ŋu ɖeɖi te’ la ŋu. (Korintotɔwo II, 4:7; Yesaya 40:29) Nusiwo doa ŋusẽ ame dometɔ aɖewoe nye Mawu ƒe Nya la, gbedodoɖa, Kristo-hamea, gomekpɔkpɔ le gbeadzisubɔsubɔdɔ me edziedzi, Kristotɔ dzikpɔlawo, kple ame bubuwo ƒe nuteƒewɔwɔ ƒe kpɔɖeŋu. Wote gbe ɖe alesi wòhiã be Kristotɔwo nanye nufialawo kple gbeƒãɖelawo ahadze agbagba vevie be ‘nufiafiaɖaŋu’ nasu wo si la dzi le nuƒo si ƒe tanyae nye “Mizu Nufialawo le Ɣeyiɣi la ƒe Didi Nu” me.—Timoteo II, 4:2.

Le ŋkekea ƒe nuƒo mamlɛa si ƒe tanyae nye “Amesiwo Tsia Tre Ðe Mawu Ŋu Makpɔ Dzidzedze O” me la, woƒo nu tso agbagba dzodzro siwo amewo dze nyitsɔ laa le dukɔ aɖewo me be yewoana woabu Yehowa Ðasefowo be wonye vivimeha vɔ̃ɖi la ŋuti. Gake mele be míavɔ̃ o elabena Yesaya 54:17 gblɔ be: “Lãnu sia lãnu, si wotu ɖe ŋuwò la, madze edzi o, eye àbu fɔ aɖe, siwo katã tso ɖe ŋuwò le ʋɔnu. Esia nye Yehowa ƒe dɔlawo ƒe domenyinu, eye woƒe dzɔdzɔenyenye tso gbɔnye, Yehowa ye gblɔe!”

ŊKEKE EVELIA: Nusiwo Woɖe Ðe Go To Ŋɔŋlɔ Siwo Nye Nyagblɔɖi Me

Esi wodzro ŋkekea ƒe mawunyakpukpuia me vɔ la, amesiwo va kpe ta la se takpekpea ƒe nuƒo kpui evelia si ƒe tanyae nye “Kekeliviwo Kafua Yehowa.” Edze le nuƒo kpuiawo dometɔ gbãtɔ me be Yehowa ŋu kɔkɔ to gbeƒãɖeɖe le afisiafi mee  nye Kristotɔ ƒe taɖodzinu. Nuƒo si kplɔe ɖo gblɔ alesi wòhiã be woafia mɔ ɖetsɔlemetɔwo bene woava Mawu ƒe habɔbɔa gbɔ. To mɔ ka nu? Ne míezã aɖabaƒoƒo atɔ̃ alo ewo do ŋgɔ na aƒeme Biblia nusɔsrɔ̃ ɖesiaɖe wɔwɔ alo le emegbe tsɔ fia alesi Mawu ƒe habɔbɔa wɔa dɔe la wo. Wote gbe ɖe alesi wòhiã be woakɔ Mawu ŋu to dɔ nyuiwo wɔwɔ mee dzi le nuƒo kpuiawo ƒe akpa etɔ̃lia me.

Woƒo nu tso Psalmo 119 lia ƒe kpukpui tiatia aɖewo ŋu le nuƒo si nye “Lɔ̃ Yehowa ƒe Ŋkuɖodzinyawo Vevie” me. Le nyateƒe me la, ŋkuɖodzinyawo hiã mí, elabena mí katã míeŋlɔa nu be. Ekema aleke gbegbe wòle vevie enye si be míatu lɔlɔ̃ ɖo na Yehowa ƒe ŋkuɖodzinyawo, abe alesi tututu hakpala la wɔe ene!

Emegbe nuƒo vevi aɖe kplɔe ɖo—eyae nye nyɔnyrɔxɔxɔ nuƒo si ƒe tanyae nye “Nyagblɔɖinya la Dzi Wɔwɔ Kplɔa Ame Yia Nyɔnyrɔxɔxɔ Gbɔ.” Woɖo ŋku edzi na nyɔnyrɔxɔlaawo be menye nyɔnyrɔxɔxɔ dzi koe wotona srɔ̃a Kristo o, ke to eƒe afɔtoƒewo toto hã dzie. (Petro I, 2:21) Mɔnukpɔkpɔ ka gbegbee nye si wònye na ame yeye siawo be wole gome kpɔm le Yohanes 10:16 me vava me, afisi Yesu gblɔe ɖi le be yeaƒo “alẽ bubuwo” nu ƒu be woawo kple yeƒe nusrɔ̃la siwo wotsɔ gbɔgbɔ si ami na la nasubɔ ɖekae!

Le ŋdɔ ƒe wɔnawo gɔmedzedze me la, woɖe eme le nuƒo si nye “Se Nusi Gblɔm Gbɔgbɔ la Le” me be Yehowa ƒoa nu na mí to Biblia, “dɔla nuteƒewɔla kple aɖaŋudzela la,” kple míaƒe dzitsinya si wotsɔ Biblia na hehee dzi. (Mateo 24:45) Eyata mehiã be Kristotɔwo nase gbeɖiɖi ŋutɔŋutɔ aɖeke tso dziƒo hafi anya alesi woawɔ adze Mawu ŋu o. Woxlɔ̃ nu Kristotɔwo le nuƒo si kplɔe ɖo, si ƒe tanyae nye “Li Ke ɖe Nufiafia si Sɔ Ðe Mawusosroɖa Nu Me” la me be woagake ŋku ɖe nukpɔsusu siwo gblẽa agbenyuinɔnɔ dome si kakam xexeame le la me o. Le nyateƒe me la, didi vivivo be woake ŋku ɖe nusianu ko me ate ŋu ana míake ɖe nya gbegblẽ siwo xɔsegbelawo kple Satana ƒe dɔla bubuwo ƒã la ŋu. Aleke gbegbe wòanyo wu enye si be míaxlẽ Biblia kple Gbetakpɔxɔ kpakple Nyɔ! me nyatiwo katã edziedzi.

Le nuƒo si kplɔe ɖo, si ƒe tanyae nye “Lé Nya Siwo le Blibo ƒe Kpɔɖeŋu Me Ðe Asi” me la, wote gbe ɖe alesi wòle vevie be míanya Ŋɔŋlɔawo me nyateƒea ƒe ‘kpɔɖeŋuwo,’ alo eƒe alɔdzewo tsitotsito dzi. (Timoteo II, 1:13) Menye ɖe kpɔɖeŋu siawo nyanya nye nusi ana míanye amesiwo sroa Mawu ɖa ko o ke ana míakpɔ esi mewɔ ɖeka kple nyateƒea o hã adze sii.

Tsɔe be Yehowa bua ye ame vevii. Bubu gã kae nye si! Nuƒo si ƒe tanyae nye “ ‘Nu Nyoameŋuwo’ Le Yehowa ƒe Aƒea me Yɔm” si wotu ɖe Xagai ƒe nyagblɔɖi dzi la de dzi ƒo ŋutɔ elabena ena kakaɖedzi nyaselawo be “ameha gã” la me tɔ ɖesiaɖe ƒe nu nyo Yehowa ŋu vavã. (Nyaɖeɖefia 7:9) Eyata Yehowa ana woatsi agbe le zi mamlɛtɔ si ‘wòaʋuʋu’ dukɔwo le “xaxa gã” si gbɔna la me. (Xagai 2:7, 21, 22; Mateo 24:21) Gake hafi ɣemaɣi naɖo la, ele na Yehowa ƒe amewo be woanɔ ŋudzɔ le gbɔgbɔ me, abe alesi woɖe emee le nuƒo si nye “Ŋɔŋlɔ Siwo Nye Nyagblɔɖiwo Ʋãa Mí Míenɔa Ŋudzɔ” me ene. Nuƒola la yɔ Yesu ƒe nya siwo gblɔ be: “Eyaŋuti minɔ ŋudzɔ, elabena mienya ŋkeke ka dzi mia Aƒetɔ la ava o.” (Mateo 24:42) Aleke míawɔ anɔ ŋudzɔ le gbɔgbɔ mee? Ne míebiã ŋku ɖe Yehowa ƒe subɔsubɔdɔa wɔwɔ ŋu, ne míedoa gbe ɖa enuenu, kple ne míeyia edzi kpɔa mɔ na Yehowa ƒe ŋkeke gã la.

Ŋkekea ƒe nuƒo mamlɛa ƒe tanyae nye “Nyagblɔɖinya la le Nuwuɣia Me.” Woaganɔ ŋku ɖom edzi le ƒe siwo gbɔna me. Nukata? Elabena nuƒola la ɖe gbeƒãe be woɖe agbalẽ yeye aɖe ɖe go—si nye Ðo To Daniel ƒe Nyagblɔɖi La! Nuƒola la gblɔ be: “Axa 320-gbalẽ sia si me nɔnɔmetata dzeaniwo le la ƒo nu tso Daniel ƒe agbalẽa ƒe akpa ɖesiaɖe ŋu.” Kpeɖodzi si doa ŋusẽ xɔse ka gbegbee nye si be Yehowa na eƒe Nyagblɔɖinya la me le kɔkɔm!

ŊKEKE ETƆ̃LIA: Mawu ƒe Nyagblɔɖinya Medoa Kpo Nu Gbeɖe O

Takpekpea ƒe ŋkeke mamlɛa dze egɔme kple nuƒo kpui siwo ƒe tanyae nye “Nyagblɔɖinyawo ɖe Ɣeyiɣi Ðoɖia Ŋu.” Nuƒo kpui etɔ̃awo dzro Yehowa ƒe fɔbuʋɔnudɔdrɔ̃wo ŋuti gbeƒãɖenya etɔ̃  siwo nyagblɔɖila Xabakuk gblɔ la me. Gbãtɔa ku ɖe Yuda si dze aglã ŋu eye evelia ku ɖe Babilon ameteɖeanyilawo ŋu. Mamlɛtɔ si gbɔna eme va ge la ku ɖe alesi wogbɔna amegbetɔ vɔ̃ɖiwo katã tsrɔ̃ ge kpuie ŋu. Esi nɔviŋutsu si ƒo nuƒo kpuiawo ƒe mamlɛa nɔ nu ƒom tso Harmagedon ŋu la, enyɔ mawuvɔvɔ̃ si sɔ ɖe eƒe nyaselawo me esi wògblɔ be: “Le nyateƒe me la, vɔvɔ̃ aɖo amewo ale gbegbe ne Yehowa ɖe eƒe ŋusẽ gã la katã ɖe go.”

“Asixɔxɔ Dede Míaƒe Gbɔgbɔmedomenyinu la Ŋu” ye nye takpekpea ƒe drama ʋãme si wotu ɖe Biblia dzi ƒe tanya. Drama sia si na wodzroa ame ɖokui me la na vovototo si le nɔnɔme si Yakob kple Esau ɖe fia ɖe gbɔgbɔmenuwo ŋu la dze. Esau do vlo eƒe gbɔgbɔmedomenyinua, ale be wotsɔe na Yakob si de asixɔxɔ eŋu. Wobia takpekpea valawo be: “[Gbɔgbɔmedomenyinu] kae Yehowa na mí?” Nuƒola la ɖo eŋu be: “Nyateƒe si le eƒe Nya, Biblia, me; agbe mavɔ mɔkpɔkpɔa; kple bubu si wòde mía ŋu be míanye nyanyuigbeƒãɖelawo le yeƒe ŋkɔ me.”

Nuƒo si kplɔe ɖo ƒe tanyae nye “Aleke Nèbua Míaƒe Domenyinu Xɔasi Lae?” Ne míetsɔa Yehowa ƒe subɔsubɔdɔ kple gbɔgbɔ me mɔnukpɔkpɔwo ɖo ŋgɔ na mía ŋutɔwo míaƒe nudidiwo alo ŋutilãmenudidiwo la, ke míele nɔnɔme nyuitɔ ɖem fia ɖe míaƒe gbɔgbɔmedomenyinua ŋu. Míetoa esia wɔwɔ me nana be míaƒe agbenɔnɔ nɔa te ɖe ƒomedodo si le mía kple Yehowa dome la dzi, wòtoa vovo kura na Adam, Esau, kple Israel-vi mawɔnuteƒeawo tɔ.

Woƒo nu tso nyagblɔɖi vevi ene siwo ku ɖe “dziƒo yeye” kple “anyigba yeye” la ŋu le dutoƒonuƒo si ƒe tanyae nye “Nuwo Katã Wɔwɔ Yeyee—Abe Alesi Wogblɔe Ði Ene” me. (Yesaya 65:17-25; 66:22-24; Petro II, 3:13; Nyaɖeɖefia 21:1, 3-5) Edze ƒã be nyagblɔɖi sia ƒe emevava gãtɔ nɔ susu me na Yehowa tsɔ wu esi va eme ɖe eƒe dukɔ si wogbugbɔ ɖo te dzi le ƒe 537 D.M.Ŋ. me. Ẽ, eƒe Fiaɖuƒe dziɖuɖua (“dziƒo yeye” la) kple etevi siwo anɔ anyigba dzi (“anyigba yeye” la), siwo anɔ xexeame godoo ƒe paradiso nyui la me ye nɔ susu me nɛ.

Nuƒo si wotsɔ wu takpekpea nu le dzidzɔ me si de dzo ame mee nye esi ƒe tanyae nye “Nusiwo Míakpɔ Mɔ Na Esi Mawu ƒe Nya Le Mɔ Fiam Mí.” Woɖo ŋku edzi na amesiame be ‘ɣeyiɣi si susɔ’ na Fiaɖuƒe gbeƒãɖeɖedɔa nu wuwu ‘la le kpuie.’ (Korintotɔwo I, 7:29) Ẽ, míeɖo ʋɔnudrɔ̃nya siwo Yehowa gblɔ ɖe Satana kple eƒe nuɖoanyi vɔ̃ɖia ŋu me vava ƒe yɔyrɔea nu tututu. Mina míaƒe seselelãme nanɔ abe hakpala la tɔ ene, amesi dzi ha be: “Míaƒe luʋɔ le mɔ kpɔm na Yehowa, míaƒe xɔname kple akpoxɔnu wònye.” (Psalmo 33:20) Etsɔme nyui ka gbegbee nye si le amesiwo ƒe mɔkpɔkpɔ nɔ te ɖe Mawu ƒe nyagblɔɖinya dzi la ŋgɔ!

[Nɔnɔmetata siwo le axa 7]

Drama ʋãme aɖe na ŋudzedzekpɔkpɔ ɖe Yehowa subɔlawo ƒe gbɔgbɔmedomenyinu ŋu gade to ɖe edzi

[Nɔnɔmetata si le axa 7]

Wona nyɔnyrɔ ame geɖe siwo wɔ ɖe Mawu ƒe nyagblɔɖinya la dzi