Ame Suewo, Dɔmenyolawo

ALEKE wò amesi ƒe kɔkɔme katã nye sentimeta 76 ko ƒe nuƒoƒo tso Mawufiaɖuƒea ŋu na amedzrowo anɔ? Laura ate ŋu agblɔe na wò. Esi wòxɔ ƒe 33 la, eƒe kɔkɔme katãe nye sentimeta 76 pɛ ko. Wo kpakple nɔvianyɔnu María, si xɔ ƒe 24 eye eƒe kɔkɔme nye sentimeta 86 la le Quito, Ecuador. Mina woagblɔ kplamatsedonu siwo wodoa goe le woƒe Kristotɔwo ƒe subɔsubɔdɔa wɔwɔ me na mí.

“Hafi míaɖo anyigbamama si me míeɖea gbeƒã le, eye míayi Kristotɔwo ƒe kpekpewo la, míezɔa afɔ wòdea kilometa afã hafi tsoa bɔs ɖona. Míegazɔa kilometa afã bubu tso afisi woɖia mí ɖo gava tsoa bɔs bubu ɖona. Nublanuitɔe la, avu wɔadã atɔ̃ le mɔ sia dzi. Míevɔ̃a avuwo ale gbegbe elabena le míaƒe nukpɔsusu nu la, wote ŋu lolona dea sɔwo nu. Ne wòahiã be míanyã wo la, míetsɔa ati dzrana ɖo ɖe teƒe aɖe le mɔa dzi hafi va ɖoa bɔs la, ale be ne míezɔ gbɔna va aƒe me la, míalé atia ɖe asi.

“Ðe míekɔa afɔ ɖe dzi bobobo hafi te ŋu gena ɖe bɔsua me. Anyikɔ aɖe si le bɔs dzeƒea dzie míedena hafi te ŋu gena ɖe ʋua me bɔbɔe. Ʋukula aɖewo metɔna ɖe anyikɔa ŋu tututu o, gake bubuwo ya tɔna ɖe eŋu. Ne metɔ ɖe eŋu o la, ke mía dome amesi kɔ vie kpena ɖe kpuitɔa ŋu wòɖoa ʋua. Hafi míatso bɔs evelia aɖo la, ele be míatso lɔrimɔ aɖe si dzi ʋuwo sɔa gbɔ ɖo vevie me—agbagba bliboe wònye míedzena hafi tsonɛ kple míaƒe afɔ kpuiawo. Esi míenye ame suewo ta la, ne míetsɔ agbalẽkplo si le kpekpem la, nyaa gagblẽna ɖe edzi. Be míana akploa nanɔ hodzoe vie la, Biblia si melolo fũ o ye míezãna, eye míetsɔa agbalẽ geɖe ɖe asi o.

“Tso ɖevime ke la, mí ame evea siaa míekpea ŋu vevie. Míaƒe aƒelikawo nya be vɔvɔ̃ ɖoa mí ɣesiaɣi si wòahiã be míaƒo nu kple amedzrowo. Eyata ewɔ nuku na wo eye wòwɔ dɔ ɖe wo dzi esi wokpɔ mí míele woƒe ʋɔwo ƒom, eye zi geɖe la, woɖoa to mí. Gake le teƒe siwo womenya mí le nyuie o la, nusi ko amewo kpɔna zi geɖe koe nye ame suewo; eyata wometsɔa míaƒe gbedasia nya vevii ɣesiaɣi alesi wòdze be woawɔe o. Ke hã esi míesenɛ le mía ɖokui me be Yehowa lɔ̃ mí ta la, dzi ɖoa mía ƒo míeyia nyanyuigbɔgblɔdɔa dzi. Ŋugbledede le Lododowo 3:5, 6 ŋu hã dea dzi ƒo na mí.”

Abe alesi Laura kple María ɖee fia ene la, kutrikuku togbɔ be ŋutilã me kplamatsedonuwo anɔ anyi hã dea bubu Mawu ŋu. Apostolo Paulo do gbe ɖa be woaɖe ‘ŋù si le yeƒe ŋutilã me,’ si anye ŋutilã me dɔléle aɖe ɖa na ye. Gake Mawu gblɔ nɛ be: “Nye amenuveve sɔ gbɔ na wò; elabena nye ŋusẽ zu blibo le gbɔdzɔgbɔdzɔ me.” Ẽ, mehiã be woaɖe ŋutilãmedɔléle aɖe ɖa na mí hafi  míate ŋu asubɔ Mawu o. Ŋuɖoɖo ɖe Mawu ŋu bliboe ate ŋu akpe ɖe mía ŋu míawɔ míaƒe ŋutete ɖesiaɖe le nɔnɔme siwo me míele la me. Esi nukpɔsusu siae nɔ Paulo si ku ɖe ‘ŋù si le eƒe ŋutilã me’ ŋu ta la, ete ŋu gblɔ be: “Nye ŋusẽ zu blibo le gbɔdzɔgbɔdzɔ me.” (Korintotɔwo II, 12:9, 10) Ƒe aɖewo megbe la, Paulo ŋlɔ bena: “Metea ŋu wɔa nuwo katã le Kristo, amesi doa ŋusẽm la me.”—Filipitɔwo 4:13.

Le egbeŋkekewo me la, Mawu le dɔ gãwo wɔm to ŋutsuwo, nyɔnuwo, kple ɖevi siwo tsɔ wo ɖokui nae blibo la dzi. Wo dometɔ geɖe nye nuwɔametɔwo le mɔ aɖe nu. Togbɔ be wo katã le mɔ kpɔm be Mawu ava da gbe le yewo ŋu le eƒe Fiaɖuƒea me hã la, womele lalam be Mawu naɖe yewo tso yewoƒe kuxiwo me hafi yewoawɔ nane le eƒe subɔsubɔdɔa me o.

Ðe ŋutilã me gbɔdzɔgbɔdzɔ aɖe ɖea fu na wòa? Lé dzi ɖe ƒo! To wò xɔse me la, àte ŋu anɔ amesiwo le abe Paulo, Laura, kple María ene la dome. Woate ŋu agblɔ le wo ŋu abe alesi wònɔ le ŋutsu kple nyɔnu xɔsetɔ siwo nɔ anyi le blema la gome ene be: “Wogazu sesĩe tso gbɔdzɔgbɔdzɔ me.”—Hebritɔwo 11:34.

[Nɔnɔmetata si le axa 8]

María

Laura

[Nɔnɔmetata si le axa 9]

María kpena ɖe Laura ŋu wòɖoa bɔs la

[Nɔnɔmetata si le axa 9]

“Míevɔ̃a avuwo ale gbegbe elabena le míaƒe nukpɔsusu nu la, wote ŋu lolona dea sɔwo nu”

Ete: Laura kple María kple amesiwo wole Biblia srɔ̃m kplii