Èɖo Ŋku Wo Dzia?

Ðe Gbetakpɔxɔ ƒe tata siwo do nyitsɔ laa xexlẽ do dzidzɔ na wòa? Ke kpɔe ɖa be yeate ŋu aɖo biabia siwo gbɔna ŋu hã:

• Nukae na be Koreatɔwo va te Kristmas ɖuɖu?

Dzixɔse xoxo aɖe nɔ Koreatɔwo kple dukɔ bubu aɖewo me tɔwo si tso mawu aɖe si kpɔa dzodoƒenyawo dzi ŋu si wosusu be etoa dzodoƒea ƒe dzudzɔtoƒea me tsɔa nunanawo vanɛ le December me. Azɔ hã le Xexemeʋa II ƒe nuwuwu la, U.S. srafowo ma nunanawo kple kpekpeɖeŋunanuwo le sɔlemeha siwo le dua me la me.—12/15, axa 4, 5.

• Le Yesaya 21:8 ƒe emevava nu la, “dzɔla” kae le Mawu si le míaƒe ŋkekea me?

Kristotɔ siwo wotsɔ gbɔgbɔ si ami na, siwo le dɔ wɔm abe dzɔla habɔbɔ ene la, xlɔ̃ nu amewo tso xexeame ƒe nudzɔdzɔ siwo nye Biblia ƒe nyagblɔɖi ƒe emevava ŋu. Wokpe ɖe Biblia nusrɔ̃viwo ŋu hã be wode dzesi nufiafia kple nuwɔna siwo menɔ te ɖe Ŋɔŋlɔawo dzi o heƒo asa na wo.—1/1, axa 8, 9.

• Amekawoe nye “Poland Nɔvihabɔbɔ”?

Wonye subɔsubɔha sue aɖe si nɔ anyi le ƒe alafa 16 kple 17 lia me le Poland si de dzi ƒo na emenɔlawo be woalé ɖe Biblia ƒe nufiafiawo ŋu eye wogbe xɔseha si nɔ anyi ɣemaɣi ƒe nufiafiawo, siwo ƒe ɖee nye Mawuɖekaetɔ̃, tsidedeta na vidzĩwo, kple dzomavɔ nufiafia. Esia na wova ti wo yome vevie hede zi wo dome hena wokaka ɖe dukɔ bubuwo me.—1/1, axa 21-3.

• Nukatae wòle be woaka ɖe Biblia ƒe nyagblɔɖiwo dzi ke menye etsɔmenyalawo alo ɣletivimefakalawo ƒe nyagblɔɖiwo o?

Edze le amegbetɔwo ƒe yeaɖi nyagblɔɖilawo ŋu be womate ŋu aka ɖe wo dzi o elabena wogbe Yehowa kple Biblia. Biblia ƒe nyagblɔɖiwo koe ate ŋu akpe ɖe ŋuwò nànya alesi nudzɔdzɔwo do ƒome kple Mawu ƒe tameɖoɖoe, eye akpe ɖe mia kple wò ƒomea ŋu tegbee.—1/15, axa 3.

• Kpeɖodzi kawoe li siwo fia be míele ŋkeke mamlɛawo me?

Míele nusiwo Satana nyanya tso dziƒo he vɛ la teƒe kpɔm. (Nyaɖeɖefia 12:9) Míele “fia” mamlɛtɔ si ŋu woƒo nu tsoe le Nyaɖeɖefia 17:9-11 la ƒe ɣeyiɣi me. Kristotɔ amesiamina akuakuawo ƒe xexlẽme dzi le ɖeɖem kpɔtɔ, togbɔ be edze abe wo dometɔ aɖewo aganɔ anyigba dzi esime xaxa gã la adze egɔme ene hã.—1/15, axa 12, 13.

• Ɣekaɣie woŋlɔ Xabakuk ƒe agbalẽa, eye nukatae wòle be míatsɔ ɖe le eme?

Woŋlɔ Biblia ƒe agbalẽ sia le ƒe 628 D.M.Ŋ. me lɔƒo. Yehowa ƒe ʋɔnudrɔ̃nya si wògblɔ ɖe blema Yuda kple Babilon ŋue le eme. Eƒo nu tso Mawu ƒe ʋɔnu si wòadrɔ̃ nuɖoanyi vɔ̃ɖi si li fifia la kpuie hã ŋu.—2/1, axa 9.

• Biblia ƒe akpa kae míakpɔ vidada aɖe ƒe aɖaŋuɖoɖo si me nunya le na srɔ̃nyɔnu zazɛ̃wo?

Lododowo ƒe agbalẽa ƒe ta mamlɛa, si nye ta 31 lia, nye teƒe nyui aɖe si míate ŋu akpɔ aɖaŋuɖoɖo sia tsoe.—2/1, axa 30, 31.

• Nukatae míada akpe be Yehowa ɖe “Kristo ƒe tamesusu” fia mí? (Korintotɔwo I, 2:16)

Yehowa to nuŋlɔɖi si nye Nyanyuigbalẽwo dzi kpe ɖe mía ŋu míesrɔ̃ nu tso Yesu ƒe tamesusuwo, seselelãmewo, dɔwɔnawo kple nusiwo nɔ vevie nɛ ŋu. Esia ate ŋu akpe ɖe mía ŋu míanɔ abe Yesu ene, vevietɔ le alesi míebua agbeɖeɖedɔ si nye gbeƒãɖeɖedɔ lae gome.—2/15, axa 25.

• Ðe Mawu ɖoa gbedodoɖawo ŋu egbea?

Ẽ. Togbɔ be Biblia ɖee fia be Mawu meɖoa gbedodoɖawo katã ŋu o hã la, egbeŋkekea me nuteƒekpɔkpɔwo ɖee fia be eɖo amesiwo do gbe ɖa hena akɔfafa kple kpekpeɖeŋu le nyawo abe srɔ̃ɖeɖe me kuxiwo ene gbɔ kpɔkpɔ me ƒe gbedodoɖawo ŋu.—3/1, axa 3-7.

• Nukae míawɔ axɔ ŋusẽdodo tso Mawu gbɔ?

Míate ŋu ado gbe ɖa abiae, míate ɖe Biblia ŋu hena gbɔgbɔmeŋusẽdodo, eye míate ŋu axɔ ŋusẽdodo to Kristotɔwo ƒe hadede me.—3/1, axa 15, 16.

• Aleke dzilawo ate ŋu akpe ɖe wo viwo ŋu be Kristotɔwo ƒe kpekpewo naɖe vi na wo geɖe?

Ðewohĩ woate ŋu akpe ɖe wo viwo ŋu ne wona wodɔ alɔ̃ ɖi ɖe eme do ŋgɔ ale be woate ŋu anɔ ŋu. Woate ŋu ade dzi ƒo na ɖeviwo be woawɔ “nuŋlɔɖiwo,” abe flitete ɖe pepa dzi zi alesi woyɔ nya alo ŋkɔ nyanyɛ si wose la ene.—3/15, axa 17, 18.

• Nusiwo míate ŋu asrɔ̃ tso Hiob ƒe kpɔɖeŋu me dometɔ aɖewoe nye kawo?

Hiob tsɔ ƒomedodo si nɔ woa kple Mawu dome ɖo nɔƒe gbãtɔ, mekpɔ ame ŋkume le nuwɔwɔ kple ehavi amegbetɔwo me o, edze agbagba ɖi anukware na srɔ̃a, etsɔ ɖe le eƒe ƒomea ƒe gbɔgbɔmenuhiahiãwo me, eye edo dzi nuteƒewɔwɔtɔe le dodokpɔ me.—3/15, axa 25-7.

• Ðe Ŋɔŋlɔdzesi ɣaɣlawo le Biblia me si nana be wosea gbedasi ɣaɣlawo gɔmea?

Ao. Woate ŋu agblɔ nya siwo wogblɔna be enye ŋɔŋlɔdzesi ɣaɣla la ke tso xexemegbalẽ aɖewo hã ŋu nenema ke. Ŋɔŋlɔdzesi mawo siwo wosusu be wole Biblia me magaɖi naneke o ne wotsɔ Hebrigbe me Biblia siwo woŋlɔ kple asi me ŋɔŋlɔdzesiwo sɔ kple bubuawo.—4/1, axa 30, 31.