Fiaɖuƒe Gbeƒãɖelawo Ka Nya Ta

Lɔlɔ̃ Mawu la Nyanya

ESI Braziltɔ aɖe si ŋkɔe nye Antônio xɔ ƒe 16 ko la, agbemenyawo na wòtɔtɔ. Esese le eɖokui me be viɖe aɖeke mele ye ŋu o kplɔe de atikevɔ̃ɖizazã kple ahatsunono me. Eɖokui wuwu vaa susu me nɛ edziedzi. Ɣeyiɣi siawo mee wòɖo ŋku nusi dadaa gblɔ nɛ kpɔ la dzi be: “Mawu enye lɔlɔ̃.” (Yohanes I, 4:8) Gake afikae lɔlɔ̃ Mawu sia le?

Esi Antônio nɔ agbagba dzem be yeadzudzɔ atikevɔ̃ɖiawo zazã la, eyi nunɔla aɖe gbɔ le woƒe nutoa me be wòakpe ɖe ye ŋu. Togbɔ be Antônio va nɔ vevie dom nu ale gbegbe le Katoliko-ha la me hã la, biabia geɖe kpɔtɔ nɔ esi. Le kpɔɖeŋu me, nya si Yesu gblɔ be “miadze si nyateƒe la, eye nyateƒe la lawɔ mi ablɔɖeviwoe” gɔmesese ɖe fu nɛ. (Yohanes 8:32) Ablɔɖe ka ƒomevi ŋugbee Yesu do? Ha la mete ŋu ɖo eƒe biabiawo ŋu nɛ wòdze eŋu o. Mlɔeba la, Antônio do le haa me eye wògadze eƒe agbe xoxoa nɔnɔ gɔme. Le nyateƒe me la, eƒe numãmea gavloe ɖe edzi kura.

Ɣemaɣi lɔƒo la, Antônio srɔ̃, Maria, te Biblia sɔsrɔ̃ kple Yehowa Ðasefowo. Togbɔ be Antônio metsi tre ɖe srɔ̃a ƒe nua sɔsrɔ̃ ŋu o hã la, ɖeko wòbua Ðasefoawo be wonye “Amerikatɔwo ƒe subɔsubɔha si le dɔ wɔm na Amerika dziɖuɖu.”

Dzi meɖe le Maria ƒo o, etsɔa Gbetakpɔxɔ kple Nyɔ! magazineawo ƒe tata siwo ƒo nu tso nusiwo wòkpɔ be ado dzidzɔ na Antônio la dana ɖe teƒeteƒewo le aƒea me katã. Esi nuxexlẽ dzɔa dzi na Antônio ta la, eléa ŋku ɖe magazineawo me ɣeaɖewoɣi ne srɔ̃a mele afima o. Zi gbãtɔ le eƒe agbe me la, ekpɔ ŋuɖoɖo na eƒe Biblia me biabiawo. Egblɔ be: “Mete lɔlɔ̃ si srɔ̃nye kple Ðasefoawo nɔ ɖeɖem fiam kple dɔmenyo siwo wowɔna nam la hã kpɔkpɔ dze sii.”

Kaka ƒe 1992 ƒe domedome la, Antônio tso nya me be Yehowa Ðasefowo nasrɔ̃ Biblia kpli ye hã. Gake medzudzɔ atikevɔ̃ɖizazã kple ahatsunono o. Gbeɖeka fiẽ esi woa kple exɔlɔ̃ wotrɔ tso kɔƒe aɖe me gbɔna aƒeme la, kpovitɔwo tɔ wo. Esi kpovitɔawo kpɔ cocaine le Antônio ŋu la, wote eƒoƒo. Kpovitɔawo dometɔ ɖeka tutui ƒu ba me hedzidze tua ɖe eƒe ŋkume tututu. Kpovitɔ bubu do ɣli be, “Wui!”

Esi Antônio mlɔ baa me la, eɖo ŋku alesi wònɔ agbee dzi ɖekaɖeka. Nu nyui siwo dzi wòɖo ŋkui koe nye eƒe ƒomea kple Yehowa. Edo gbe ɖa kpuie nɔ kuku ɖem na Yehowa be wòakpe ɖe ye ŋu. Ame aɖeke menya susu si ta kpovitɔawo ɖe asi le eŋu o. Eyi aƒe kple kakaɖedzi be Yehowa kpɔ ye ta.

Antônio gadze Biblia sɔsrɔ̃ gɔme kple dzo yeye. Ʋɛʋɛʋɛ la, ewɔ tɔtrɔwo kple susu be yeadze Yehowa ŋu. (Efesotɔwo 4:22-24) Ete eƒe atikevɔ̃ɖizazã kuxia ɖɔɖɔɖo to ɖokuidziɖuɖu tutuɖo me. Ke hã ehiã be wòayi kɔdzi. Eva nɔ dɔnɔkɔdzi ɣleti eve eye ena mɔnukpɔkpɔ su esi wòxlẽ Biblia-srɔ̃gbalẽ geɖe hekpe ɖe agbalẽ si nye Sidzedze si Kplɔa Ame Yia Agbe Mavɔ Me ŋu. Azɔ Antônio gblɔ nusiwo wòsrɔ̃ le agbalẽ siawo me na dɔnɔ bubuwo.

Antônio yi eƒe Biblia sɔsrɔ̃a dzi kple Yehowa Ðasefowo le dzodzo le kɔa dzi megbe. Egbea la, Antônio, Maria, wo vi nyɔnuvi eve, kple Antônio dada nye ƒome kpɔdzidzɔ wɔɖeka si le Yehowa subɔm ɖekae. Antônio gblɔ be: “Fifia mese nusi tututu wòfia be ‘Mawu enye lɔlɔ̃’ la gɔme.”

[Nɔnɔmetata si le axa 8]

Gbeƒãɖeɖe le Rio de Janeiro