Na Wò “Xɔxɔ Ƒe Mɔkpɔkpɔ” La Me Nasẽ ŋu!
Na Wò “Xɔxɔ Ƒe Mɔkpɔkpɔ” La Me Nasẽ ŋu!
‘Miɖɔ xɔxɔ mɔkpɔkpɔ ƒe gakuku la.’—TESALONIKATƆWO I, 5:8.
1. Aleke “xɔxɔ ƒe mɔkpɔkpɔ” la kpena ɖe mía ŋu míedoa dzii?
MƆKPƆKPƆ be woava xɔ na ye ate ŋu ana ame nado dzi le nɔnɔme sesẽtɔwo kekeake gɔ̃ hã me. Amesi nɔ tɔdziʋu me wògbã eye wòva kpɔ atikpo aɖe dzi nɔ le tsia dzi be yeatsi agbe la ate ŋu ado dzi ɣeyiɣi didi ne enya be woava xɔ na ye. Nenema ke ƒe akpe geɖe enye sia la, mɔkpɔkpɔ na ‘Yehowa ƒe xɔname’ lé ŋutsu kple nyɔnu nuteƒewɔlawo ɖe te le xaxawo me, eye mɔkpɔkpɔ sia medo ŋukpe wo kpɔ gbeɖe o. (Mose II, 14:13; Psalmo 3:9; Romatɔwo 5:5; 9:33) Apostolo Paulo tsɔ “xɔxɔ ƒe mɔkpɔkpɔ” la sɔ kple “gakuku” si Kristotɔ aɖɔ ɖe eƒe gbɔgbɔmeʋawɔwu dzi. (Tesalonikatɔwo I, 5:8; Efesotɔwo 6:17) Ẽ, ne kakaɖedzi le mía si be Mawu axɔ na mí la, ekpɔa míaƒe tamebubu ŋutetewo hã ta hekpena ɖe mía ŋu be míaƒe susu nadze akɔ anyi ne míele fukpekpewo, tsitretsiɖeŋu, kple tetekpɔ me tom.
2. Mɔ kawo nue “xɔxɔ ƒe mɔkpɔkpɔ” nye tadedeagu ƒe akpa vevi aɖe le?
2 The International Standard Bible Encyclopedia gblɔ be “etsɔme ƒe mɔkpɔkpɔ aɖeke menɔ xexemetɔ [siwo dome ƒe alafa gbãtɔ me Kristotɔwo nɔ] si o.” (Efesotɔwo 2:12; Tesalonikatɔwo I, 4:13) Ke hã “xɔxɔ ƒe mɔkpɔkpɔ” wɔa akpa vevi aɖe le tadedeagu vavãtɔ me. Le mɔ ka nu? Gbã la, Yehowa subɔlawo ƒe ɖeɖekpɔkpɔ do ƒome kple eya ŋutɔ ƒe ŋkɔ. Hakpala Asaf do gbe ɖa be: “Mía xɔname ƒe Mawu, xɔ na mí le wò ŋkɔ ƒe bubu la ta; ɖe mí.” (Psalmo 79:9; Xezekiel 20:9) Gakpe ɖe eŋu la, ele vevie ŋutɔ be woaka ɖe yayra siwo ŋugbe Yehowa do dzi hafi ƒomedodo nyui nanɔ ame kplii dome. Alesi Paulo gblɔe enye si: “Ne xɔse mele mía si o la, míate ŋu adze Mawu ŋu o; elabena ele be, amesi ke tena va Mawu gbɔ la, naxɔ ase be, Mawu li, eye wònye teƒeɖola na amesiwo dinɛ vevie.” (Hebritɔwo 11:6) Azɔ hã Paulo ɖe nu me be dzimetrɔlawo ƒe ɖeɖekpɔkpɔ nye susu vevi aɖe si ta Yesu va anyigba dzi ɖo. Egblɔ be: “Nyateƒenya wònye, eye wòdze be, woaxɔe keŋ bena, Kristo Yesu va xexeame, nuvɔ̃wɔlawo ɖe ge.” (Timoteo I, 1:15) Eye apostolo Petro yɔ ɖeɖekpɔkpɔ be enye ‘míaƒe xɔse ƒe nuwuwu [alo, emetsonu].’ (Petro I, 1:9) Eme kɔ be esɔ be míakpɔ mɔ na ɖeɖe. Gake nuka koŋue nye ɖeɖekpɔkpɔ? Eye nukae wòbia hafi woakpɔ ɖeɖe?
Nukae Nye Ðeɖekpɔkpɔ?
3. Aleke woɖe Yehowa subɔla blematɔwoe?
3 Zi geɖe le Hebri Ŋɔŋlɔawo me la, “ɖeɖekpɔkpɔ” fia xɔxɔ na ame alo ameɖeɖe tso teteɖeanyi alo ŋutasẽlawo si me be woagawui madzemadzee o. Le kpɔɖeŋu me, esi Dawid yɔ Yehowa be ‘Ðela’ vɔ la, egblɔ be: “Mawu enye nye ɣaɣlaƒe . . . nye sitsoƒe kpakple nye xɔla, amesi ɖem tso ŋutasẽlawo si me. Meyɔ Yehowa, amesi dze bubu, eye medo tso nye futɔwo si me.” (Samuel II, 22:2-4) Dawid nya be Yehowa sea Esubɔla wɔnuteƒewo ƒe yɔyɔ hena kpekpeɖeŋu.—Psalmo 31:23, 24; 145:19.
4. Etsɔmegbenɔnɔ ƒe mɔkpɔkpɔ kae nɔ Yehowa subɔla siwo nɔ anyi do ŋgɔ na Kristotɔwo si?
4 Yehowa subɔla siwo nɔ anyi do ŋgɔ na Kristotɔwo hã kpɔ mɔ na etsɔmegbenɔnɔ. (Hiob 14:13-15; Yesaya 25:8; Daniel 12:13) Le nyateƒe me la, xɔname ŋugbedodo siwo le Hebri Ŋɔŋlɔawo me nye xɔname si lolo wu gbɔgblɔ ɖi—enye esi akplɔ amewo ayi ɖe agbe mavɔ mee. (Yesaya 49:6, 8; Dɔwɔwɔwo 13:47; Korintotɔwo II, 6:2) Le Yesu ŋɔli la, Yudatɔ geɖe kpɔ mɔ na agbe mavɔ, gake wogbe be yewomalɔ̃ ɖe edzi be Yesue nye amesi tututu dzi yewoato be yewoƒe mɔkpɔkpɔa nava eme o. Yesu gblɔ na subɔsubɔhakplɔla siwo nɔ anyi le eŋɔli be: “Miele ŋɔŋlɔawo me dzrom tsitotsito; elabena miesusu bena, miekpɔa agbe mavɔ le wo me, eye woamawo nye nusiwo le ɖase ɖim le ŋutinye.”—Yohanes 5:39.
5. Nukae ɖeɖekpɔkpɔ afia mlɔeba?
5 Mawu to Yesu dzi ɖe nusiwo katã ɖeɖekpɔkpɔ lɔ ɖe eme fia. Nusiwo wòlɔ ɖe eme ƒe ɖewoe nye ɖeɖe tso nuvɔ̃ te nɔnɔ me, tso alakpasubɔsubɔ ƒe kluvinyenye me, tso xexe si le Satana ƒe ŋusẽ te me, tso amegbetɔvɔvɔ̃ me, kple tso vɔvɔ̃ na ku gɔ̃ hã me. (Yohanes 17:16; Romatɔwo 8:2; Kolosetɔwo 1:13; Nyaɖeɖefia 18:2, 4) Mlɔeba le Mawu subɔla wɔnuteƒewo gome la, Mawu ƒe xɔname mefia be woaɖe wo tso teteɖeanyi kple xaxawo me ko o ke eganye mɔnukpɔkpɔ hã be woanɔ agbe tegbee. (Yohanes 6:40; 17:3) Yesu fia nu be le “ha sue” aɖe gome la, ɖeɖekpɔkpɔ fia be woafɔ wo ɖe tsitre woava nɔ agbe le dziƒo aɖu fia kple Kristo le Fiaɖuƒedziɖuɖu me. (Luka 12:32) Le ameƒomea me tɔ mamlɛawo gome la, ɖeɖekpɔkpɔ fia be woana woaganɔ agbe deblibo ake eye ƒomedodo si nɔ Mawu kple Adam kpakple Xawa dome le Eden-bɔa me hafi wowɔ nuvɔ̃ la naganɔ wo dome. (Dɔwɔwɔwo 3:21; Efesotɔwo 1:10) Agbe mavɔ nɔnɔ le paradiso ƒe nɔnɔme mawo me nye tameɖoɖo si nɔ Mawu si na ameƒomea tso gɔmedzedzea me. (Mose I, 1:28; Marko 10:30) Gake aleke woawɔ hafi nɔnɔme mawo nagbugbɔ ava nɔ anyi?
Nusi Dzi Ðeɖekpɔkpɔ Nɔ Te Ðo—Tafe La
6, 7. Akpa kae Yesu wɔna le míaƒe ɖeɖekpɔkpɔ me?
6 Kristo ƒe tafevɔsa la dzi koe xɔxɔ mavɔ ato. Nukata? Biblia ɖe eme be esi Adam wɔ nuvɔ̃ la, ‘edzra’ eya ŋutɔ kple vi siwo wòava dzi katã, siwo dome míawo hã míele, de nuvɔ̃ me—eyata ne mɔkpɔkpɔ vavã aɖe anɔ ameƒomea si la, ke tafea hiã. (Romatɔwo 5:14, 15; 7:14) Alesi wotsɔa lãwo saa vɔe le Mose ƒe Sea te nye kpɔɖeŋu si fia be Mawu ava xe tafe ɖe ameƒomea katã ta. (Hebritɔwo 10:1-10; Yohanes I, 2:2) Yesu ƒe vɔsae na nyagblɔɖi me kpɔɖeŋu mawo va eme. Yehowa ƒe dɔla ɖe gbeƒãe hafi wova dzi Yesu be: “[Aɖe] eƒe dukɔ la tso woƒe nuvɔ̃wo me.”—Mateo 1:21; Hebritɔwo 2:10.
7 Wona Maria si nye ɖetugbi nɔaƒe la dzi Yesu nukutɔe, eye esi wònye Mawu Vi ta la, menyi ku dome tso Adam gbɔ o. Nɔnɔme sia kple eƒe nuteƒewɔwɔ bliboe na asixɔxɔ si hiã be woatsɔ agbugbɔ aƒle ameƒomea tso nuvɔ̃ kple ku me la nɔ eƒe agbe ŋu. (Yohanes 8:36; Korintotɔwo I, 15:22) Womebu fɔ Yesu be wòaku le nuvɔ̃ ta abe ame bubuwo katã ene o. Ðe wòva anyigba dzi koŋ be ‘yeatsɔ yeƒe agbe ana ɖe ame geɖe ƒe xɔxɔ ta.’ (Mateo 20:28) Esi Yesu wɔ nusia vɔ eye fifia wofɔe ɖe tsitre heɖoe zi dzi la, esu te axɔ na amesiwo katã wɔna ɖe Mawu ƒe nudidiwo dzi.—Nyaɖeɖefia 12:10.
Nukae Hiã Hafi Woakpɔ Ðeɖe?
8, 9. (a) Aleke Yesu ɖo ɖekakpui kesinɔtɔ si nye dziɖula ƒe nya si wòbia tso ɖeɖekpɔkpɔ ŋui? (b) Aleke Yesu zã mɔnukpɔkpɔ sia tsɔ fia nu eƒe nusrɔ̃lawoe?
8 Gbeɖeka la, Israel-vi ɖekakpui aɖe si nye dziɖula kesinɔtɔ bia Yesu be: “Nuka mawɔ, bena manyi agbe mavɔ la dome mahã?” (Marko 10:17) Anye nukpɔsusu si nɔ Yudatɔwo si ɣemaɣi dzie wònɔ te ɖo bia nya ma—si nye be Mawu bia dɔ nyui wɔwɔ aɖewo tso amewo si eye be dɔ siawo dometɔ geɖe wɔwɔ ate ŋu ana Mawu nana woakpɔ ɖeɖe. Gake woate ŋu atsɔ ɖokuitɔdidi ƒe susu awɔ subɔsubɔ ma tɔgbe si nye kɔnu. Dɔ mawo wɔwɔ mete ŋu na xɔxɔ ƒe mɔkpɔkpɔ like aɖeke amewo o, elabena amegbetɔ madeblibo aɖeke mate ŋu aɖo Mawu ƒe dzidzenuwo gbɔ tututu o.
9 Le ŋutsua ƒe nyaa ŋu ɖoɖo nɛ me la, ɖeko Yesu ɖo ŋku edzi nɛ be wòawɔ ɖe Mawu ƒe sededewo dzi. Enumake ɖekakpui si nye dziɖula la gblɔ na Yesu kakaɖedzitɔe be yewɔa wo dzi tso ɖevime ke. Eƒe nyaŋuɖoɖo na Yesu lɔ̃ eƒe nya. Yesu gblɔ nɛ be: “Nu ɖeka susɔ na wò; heyi ɖadzra nusiwo le asiwò, eye natsɔ wo ana ame dahewo; ekema kesinɔnu anɔ dziƒo na wò, eye nava anɔ yonyeme.” Gake ɖekakpuia dzo kple nuxaxa, “elabena nu geɖewo le esi.” Emegbe Yesu te gbe ɖe edzi na eƒe nusrɔ̃lawo be ɖeko kuku ɖe xexe sia ƒe nunɔamesiwo ŋu vivivo axe mɔ na ɖeɖekpɔkpɔ. Egblɔ kpee be ame aɖeke mate ŋu ato eya ŋutɔ ƒe agbagbadzedze me akpɔ ɖeɖe o. Gake Yesu yi edzi ka ɖe edzi na wo be: “Amegbetɔwo gbɔ la womate ŋu awɔ esia o; gake Mawu gbɔ la woate ŋui; elabena woate ŋu awɔ nusianu le Mawu gbɔ.” (Marko 10:18-27; Luka 18:18-23) Aleke woawɔ akpɔ ɖeɖe?
10. Nudidi kawo gbɔe wòle be míaɖo hafi akpɔ ɖeɖe?
10 Ðeɖekpɔkpɔ nye nunana tso Mawu gbɔ, gake womekpɔnɛ ko naneke mawɔmawɔe o. (Romatɔwo 6:23) Nudidi vevi aɖewo li siwo gbɔ wòle be amesiame naɖo hafi adze axɔ nunana sia. Yesu gblɔ be: “Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena amesiame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.” Eye apostolo Yohanes gblɔ kpee be: “Amesi xɔa Via dzi sena la, agbe mavɔ le esi; amesi meɖoa to Via o la, makpɔ agbe o.” (Yohanes 3:16, 36) Edze ƒã be Mawu bia xɔse kple toɖoɖo tso amesiame si le mɔ kpɔm be yeakpɔ xɔxɔ mavɔ la si. Ele be amesiame natso nya me be yeaxɔ tafea ahato Yesu ƒe afɔtoƒewo.
11. Aleke ame madeblibo awɔ be Yehowa nakpɔ ŋudzedze ɖe eŋu?
11 Esi míede blibo o ta la, toɖoɖo menye míaƒe dzɔdzɔmedidi o eye manya wɔ be míaɖo to le nusianu me bliboe o. Ema tae Yehowa xe tafea be wòatsyɔ míaƒe nuvɔ̃wo dzi. Ke hã ele be míanɔ agbagba dzem edziedzi be míanɔ agbe wòasɔ ɖe Mawu ƒe dzidzenuwo nu. Abe alesi Yesu gblɔe na ɖekakpui kesinɔtɔ si nye dziɖula la ene la, ele be míawɔ ɖe Mawu ƒe sededewo dzi. Menye ɖe seawo dzi wɔwɔ ana Mawu nakpɔ ŋudzedze ɖe mía ŋu ko o ke ana míakpɔ dzidzɔ gã hã, elabena “eƒe seawo mesesẽ o”; wonaa ‘dzidzeme’ hã. (Yohanes I, 5:3; Lododowo 3:1, 8) Gake mele bɔbɔe be woalé xɔxɔ mɔkpɔkpɔa me ɖe asi ɖaa o.
‘Miʋli Xɔse la Ta Sesĩe’
12. Aleke xɔxɔ ƒe mɔkpɔkpɔ la doa ŋusẽ Kristotɔ be wòatsi tre ɖe agbevlonɔnɔ ƒe tetekpɔwo ŋu?
12 Ðe nusrɔ̃la Yuda di be yeaŋlɔ agbalẽ ɖo ɖe Kristotɔ gbãtɔwo tso ‘xɔxɔ si wo katã wonɔ mɔ kpɔm na’ ŋu hafi. Gake agbevlonɔnɔ si nɔ edzi yim ɣemaɣi zi edzi be wòɖo aɖaŋu na nɔviawo be ‘woaʋli xɔse la ta sesĩe’ boŋ. Ẽ, be woakpɔ ɖeɖe la, mesɔ gbɔ be xɔse nanɔ ame si, woaku ɖe Kristotɔwo ƒe xɔse vavã la ŋu, eye woawɔ se dzi ne nusianu le edzi yim nyuie na ame ko o. Ele be alesi gbegbe míetsɔ mía ɖokui na Yehowae la nu nasẽ ale gbegbe be wòakpe ɖe mía ŋu míanɔ te ɖe tetekpɔwo kple agbevlonɔnɔ ƒe ŋusẽkpɔɖeamedziwo nu. Ke hã la, gbɔdɔdɔnuwɔna tramawo kple nutovowɔwɔ, bubumademade tatɔwo ŋu, mamãwo, kple ɖikekewo nɔ nu gblẽm le ƒe alafa gbãtɔ me hamea ƒe nɔnɔme ŋu. Be wòakpe ɖe wo ŋu woaɖu nuwɔna mawo dzi la, Yuda de dzi ƒo na ehati Kristotɔwo be woƒe taɖodzinua nanɔ susu me na wo nyuie: “Mi lɔlɔ̃tɔwo la, mitu mia ɖokui ɖe miaƒe xɔse kɔkɔe, si ƒo wo katã ta la dzi, eye mido gbe ɖa le gbɔgbɔ kɔkɔe la me, eye midzra mia ɖokui ɖo le Mawu ƒe lɔlɔ̃ la me, anɔ lalam na mía Aƒetɔ Yesu Kristo ƒe nublanuikpɔkpɔ la hena agbe mavɔ.” (Yuda 3, 4, 8, 19-21) Ðeɖekpɔkpɔ ƒe mɔkpɔkpɔ ate ŋu ado ŋusẽ wo be woaʋli be yewoayi edzi anɔ agbe dzadzɛ.
13. Aleke míaɖee afia be míexɔ Mawu ƒe amenuveve la dzodzro o?
13 Yehowa Mawu kpɔa mɔ be amesiwo yeaxɔ na la naɖo kpɔɖeŋu nyui le agbenyuinɔnɔ me. (Korintotɔwo I, 6:9, 10) Gake agbe nɔnɔ ɖe Mawu ƒe agbenyuinɔnɔ dzidzenuwo nu mefia be míanɔ ʋɔnu drɔ̃m ame bubuwo o. Menye míawoe atso nya me agblɔ nusi anye mía havi amegbetɔ tɔ gome tegbetegbe o. Ke boŋ Mawue atso nya me, abe alesi Paulo gblɔe na Helatɔwo le Atene ene be: “Eɖo ŋkeke, si dzi wòle ʋɔnu drɔ̃ ge xexeame godoo le dzɔdzɔenyenye nu to ŋutsu aɖe, si woɖo la dzi”—ame mae nye Yesu Kristo. (Dɔwɔwɔwo 17:31; Yohanes 5:22) Ne míenɔa agbe ɖe Yesu ƒe tafea dzixɔxɔse nu la, mehiã be míavɔ̃ na ʋɔnudrɔ̃ŋkeke si gbɔna o. (Hebritɔwo 10:38, 39) Nusi le vevie enye be míagaɖe mɔ gbeɖe wòadzro mí míava nɔ susu vɔ̃ bum anɔ agbe vlo nɔm wòazu be ‘míexɔ Mawu ƒe amenuveve [si nye mía kplii dome dzadzraɖo to tafea dzi] dzodzro’ o. (Korintotɔwo II, 6:1) Gakpe ɖe eŋu la, ne míekpena ɖe ame bubuwo ŋu be woakpɔ ɖeɖe la, ke míele eɖem fia be míexɔ Mawu ƒe nublanuikpɔkpɔ la dzodzro o. Aleke míakpe ɖe wo ŋui?
Xɔxɔ Mɔkpɔkpɔa Gbɔgblɔ na Amewo
14, 15. Amekawoe Yesu de dɔ asi na be woaɖe gbeƒã xɔxɔ ƒe nyanyui la?
14 Paulo yɔ nyagblɔɖila Yoel ƒe nya heŋlɔ be: “Amesiame, si ayɔ Aƒetɔ la ƒe ŋkɔa dzi la, woaɖee.” Egagblɔ emegbe be: “Azɔ aleke woayɔ amesi dzi womexɔ se o la mahã? Ke aleke woaxɔ amesi ŋutinya womese kpɔ o la dzi ase mahã? Ke aleke woase nya, ne nyanyui gbeƒãɖela aɖeke mele wo si o mahã?” Paulo ɖee fia le kpukpui ʋɛ siwo kplɔe ɖo me be xɔse mevana le eɖokui si o; ke boŋ ‘etsoa nusi wose la me,’ si nye ‘nya, si wogblɔ tso Kristo ŋuti.’—Romatɔwo 10:13, 14, 17; Yoel 3:5.
15 Amekae atsɔ ‘Kristo ŋuti nya la’ ayi na dukɔwo? Yesu de dɔ ma asi na eƒe nusrɔ̃lawo—amesiwo wofia “nya” lae xoxo. (Mateo 24:14; 28:19, 20; Yohanes 17:20) Ne míele Fiaɖuƒegbeƒãɖeɖe kple nusrɔ̃lawɔwɔ dɔa wɔm la, ke nusi ŋu apostolo Paulo ŋlɔ nu tsoe koe nye ma wɔm míele, si nye Yesaya ƒe nya si wòyɔ azɔ be: “Nyagblɔla, siwo gblɔa ŋutifafanya kple [nyanyui] la ƒe afɔwo nyo loo!” Ne amesiwo míetsɔa nyanyuia yina na dometɔ geɖe mexɔa nyaa o hã la, míaƒe afɔwo “nyo” le Yehowa ya gbɔ kokoko.—Romatɔwo 10:15; Yesaya 52:7.
16, 17. Taɖodzinu eve ƒokpli ka gbɔe gbeƒãɖeɖedɔa kpɔna?
16 Dɔ sia wɔwɔ kpɔa taɖodzinu eve gbɔ. Gbã la, ele be woaɖe gbeƒã nyanyuia atsɔ ado Mawu ƒe ŋkɔ ɖe dzi be amesiwo di ɖeɖekpɔkpɔ nanya afisi woatrɔ ɖo. Paulo se dɔa ƒe akpa sia gɔme. Egblɔ be: “Elabena nenema Aƒetɔ la de se na mí bena: ‘Meɖo wò nanye trɔ̃subɔlawo ƒe kekeli, bena nanye xɔxɔ hena anyigba ƒe seƒe ke.’” Eyata esi míenye Kristo ƒe nusrɔ̃lawo ta la, ele be mía dometɔ ɖesiaɖe nakpɔ gome le xɔxɔ gbedasia tsɔtsɔ yi na amewo me.—Dɔwɔwɔwo 13:47; Yesaya 49:6.
17 Evelia, gbeƒãɖeɖe nyanyuia nye nusi dzi woanɔ te ɖo adrɔ̃ Mawu ƒe ʋɔnu dzɔdzɔea. Yesu gblɔ le ʋɔnudɔdrɔ̃ ma ŋu be: “Ne Amegbetɔvi la ava le eƒe ŋutikɔkɔe me, eye dɔlawo katã akpe ɖe eŋuti la, ekema abɔbɔ nɔ eƒe ŋutikɔkɔezikpui la dzi; eye woaƒo dukɔwo katã nu ƒu ɖe eƒe ŋku me, eye wòama wo me atso wo nɔewo gbɔ, abe alesi alẽkplɔla maa alẽwo kple gbɔ̃wo mee ene.” Togbɔ be ‘ɣeyiɣi si me Amegbetɔvi la ava le eƒe ŋutikɔkɔe mee’ ʋɔnudɔdrɔ̃a kple amewo me mamaa ayi edzi hã la, gbeƒãɖeɖedɔa le mɔnukpɔkpɔ nam amewo egbea be woadze si Kristo ƒe gbɔgbɔmenɔviwo ale be woawɔ dɔ atsɔ ado alɔ wo hena woa ŋutɔwo ƒe xɔxɔ mavɔ.—Mateo 25:31-46.
‘Mɔkpɔkpɔa ƒe Kakaɖedzi Blibo’ Nenɔ Asiwò Ðaa
18. Aleke míawɔ be míaƒe ‘xɔxɔ mɔkpɔkpɔa’ me nasẽ ŋu?
18 Míaƒe gomekpɔkpɔ le gbeƒãɖeɖedɔa me ŋkubiãtɔe hã nye nusi dzi míato ana míaƒe mɔkpɔkpɔa nakpɔtɔ asẽ ŋu. Paulo ŋlɔ be: “Míele didim vevie bena, mia dome amesiame naɖe veviedodo ma ke afia le mɔkpɔkpɔ ƒe kakaɖedzi blibo vaseɖe nuwuwu la ŋuti.” (Hebritɔwo 6:11) Ekema mina mía dometɔ ɖesiaɖe naɖɔ ‘xɔxɔ mɔkpɔkpɔ ƒe gakuku la,’ ale be míaɖo ŋku edzi be “Mawu meɖo mí na dziku o, ke boŋ, bena xɔxɔ nasu mía si to mía Aƒetɔ Yesu Kristo dzi.” (Tesalonikatɔwo I, 5:8, 9) Mina míawɔ ɖe Petro ƒe aɖaŋuɖoɖo sia hã dzi: “Mibla miaƒe tamesusuwo ƒe aliwo dzi, minɔ mo xexi, eye mitsɔ miaƒe mɔkpɔkpɔ ɖo amenuveve, si wotsɔna vaa mia gbɔ . . . la dzi blibo.” (Petro I, 1:13) Amesiwo katã awɔe alea ƒe ‘xɔxɔ mɔkpɔkpɔa’ ava eme na wo bliboe!
19. Nukawo mee míadzro le nyati si kplɔe ɖo me?
19 Hafi ɣeyiɣi ma naɖo la, aleke wòle be míabu ɣeyiɣi si susɔ na nuɖoanyi siae? Aleke míazã ɣeyiɣia atsɔ adi xɔxɔ na mía ŋutɔwo kple ame bubuwoe? Míadzro biabia siawo me le nyati si kplɔe ɖo me.
Àte Ŋu Aɖe Wo Mea?
• Nukatae wòle be míana míaƒe ‘xɔxɔ mɔkpɔkpɔa’ me nasẽ ŋu?
• Nukawoe ɖeɖekpɔkpɔ lɔ ɖe eme?
• Nukae wòle be míawɔ axɔ xɔxɔ ƒe nunana la?
• Taɖodzinu kawo gbɔe gbeƒãɖeɖedɔa kpɔna le Mawu ƒe tameɖoɖo nu?
[Biabiawo]
[Nɔnɔmetata siwo le axa 10]
Ðeɖekpɔkpɔ fia nu geɖe wu ameɖeɖe tso tsɔtsrɔ̃ me ko