Eke Ðe Nusi Dim Wòle Ɣeyiɣi Didi la Ŋu

“YEHOWA? Amekae nye Yehowa?” Nyɔnuvi ƒe enyi vi aɖe si ŋkɔe nye Silvia kpɔ ŋkɔa le Armeniagbe me Biblia si ƒome aɖe dzra ɖo vevie si nyɔnuvi sue bubu tsɔ fiae la me. Ebia amewo be woafia ye amesi wònye, gake ame aɖeke menɔ Yerevan, Armenia, afisi wònɔ, si te ŋu gblɔe nɛ o—edzilawo, eƒe nufialawo, kple xɔseha si le wo gbɔ ƒe osɔfowo gɔ̃ hã mete ŋu gblɔe nɛ o.

Silvia va tsi, do le suku, hekpɔ dɔ nɔ wɔwɔm gake menya amesi Yehowa nye kpɔ haɖe o. Esi wònye ɖetugbi ta la, esi le Armenia, eye le ɣeyiɣi aɖe megbe la, eva do ɖe Poland, afisi woa kple sitsoƒedila bubuwo nɔ xɔ sue aɖe me le. Ame aɖewo va srãa amesiwo wònɔ xɔme kplii dometɔ ɖeka kpɔ edziedzi. Silvia bia be: “Amekawoe wò amedzroawo nye?” Eɖo eŋu be: “Yehowa Ðasefowo wonye va be yewoafia Bibliam.”

Esi Silvia se ŋkɔ Yehowa la, eƒe dzi yɔ fũ kple dzidzɔ. Mlɔeba eva te nusɔsrɔ̃ tso amesi Yehowa nye kple alesi wònye lɔlɔ̃ ƒe Mawui la ŋu. Gake eteƒe medidi o ele nɛ be wòadzo le Poland. Etso Baltik Ƒua ɖadi sitsoƒe le Denmark. Nunɔamesi ʋɛ aɖewo koe wòtsɔ ɖe asi, gake etsɔ Biblia-srɔ̃gbalẽ si Yehowa Ðasefowo ta kpe ɖe eƒe agbawo ŋu. Silvia kpɔ Gbetakpɔxɔ Habɔbɔa ƒe alɔdzedɔwɔƒe aɖewo ƒe adrɛs le agbalẽawo dometɔ ɖeka megbe. Ema nye eƒe nunɔamesi vevitɔwo dometɔ ɖeka—si nye nusi ko dzi wòato anya Yehowa!

Le Denmark la, wokplɔ Silvia yi sitsoƒedilawo ƒe asaɖa aɖe me, eye wòte Yehowa Ðasefowo didi enumake. Esi wòlé ŋku ɖe adrɛsawo me la, ekpɔe be du si nye Holbæk mee Gbetakpɔxɔ Habɔbɔa ƒe alɔdzedɔwɔƒe si le Denmark la le. Gake afikae du sia le? Wode Silvia keteke yina ɖe asaɖa bubu me, eye esi wole mɔa dzi yina la, ketekea to Holbæk dua me! Eƒe dzi gayɔ ake kple dzidzɔ.

Ema megbe teti le ŋkeke aɖe si yame kɔ nyuie dzi la, Silvia gaɖo keteke gbugbɔ va Holbæk, eye wòzɔ afɔ tso ketekedzeƒea yi alɔdzedɔwɔƒea. Egblɔ be: “esi mege ɖe abɔa me la, mebɔbɔ nɔ zikpui aɖe dzi, eye megblɔ na ɖokuinye be, ‘Paradisoe nye esia!’” Woxɔe vividoɖeameŋutɔe le alɔdzedɔwɔƒea, eye mlɔeba la, ekpɔ ame wòasrɔ̃ Biblia kplii.

Gake wova ɖee le afima yi teƒe geɖewo. Sitsoƒesaɖa ɖesiaɖe si me Silvia ayi la, edia Yehowa Ðasefowo eye wogadzea Biblia-nusɔsrɔ̃ gɔme kplii ake. Gake le ƒe eve megbe la, esrɔ̃ nu geɖe ate ŋu atsɔ eƒe agbe aɖe adzɔgbee na Yehowa. Exɔ nyɔnyrɔ eye le emegbe kpuie la, ege ɖe ɣeyiɣiawo katã ƒe subɔsubɔdɔa me. Le ƒe 1998 me la, Denmark dziɖuɖua ɖe mɔ nɛ le se nu be wòanɔ dua me.

Silvia xɔ ƒe 26 fifia, eye wòle subɔsubɔm le teƒe si na paradiso va eƒe susu me, si nye Yehowa Ðasefowo ƒe alɔdzedɔwɔƒe si le Denmark. Egblɔ azɔ be: “Nya kae mate ŋu agblɔ. Tso esime menye nyɔnuvi dzaa kee mete Yehowa didi. Fifia la, meke ɖe eŋu. Nye taɖodzinue nye be matsɔ nye agbe aɖo anyi awɔ eƒe subɔsubɔdɔ, eye nyee nye sia le Betel. Mele gbe dom ɖa be afisia nanye nye aƒeme ƒe geɖe!”