Esusɔ Vie​—Xexe si me Mɔkpɔkpɔ Magabu Ðe Ame O Ava

AGBENƆNƆ va le sesẽm ɖe edzi ɖaa, eye nusiwo ta dzi ɖena le amewo ƒo la sɔ gbɔ. Ne dzi ɖe le mía ƒo la, esesẽna be míaɖu míaƒe seselelãmewo dzi. Nya lae nye be, dzidzɔkpɔkpɔ buna ɖe amesiwo lɔ̃ agbe gɔ̃ hã vevie! Se kpɔɖeŋu aɖewo ɖa.

Le blema ɣeyiɣiwo me la, dzi ɖe le nyagblɔɖila Mose ƒo ale gbegbe be wògblɔ na Mawu be: “Wum zi ɖeka boŋ, nenye be, ève nunye; bena magakpɔ nye dzɔgbevɔ̃e teƒe o.” (Mose IV, 11:15) Esi nyagblɔɖila Eliya nɔ sisim le eƒe futɔwo nu la, edo ɣli gblɔ be: “Esɔ gbɔ! Azɔ, Yehowa, xɔ nye luʋɔ [agbe].” (Fiawo I, 19:4) Eye nyagblɔɖila Yona gblɔ be: “Yehowa, xɔ nye agbe le asinye! Elabena enyo nam be, maku wu esi manɔ agbe.” (Yona 4:3) Gake Mose, Eliya, alo Yona mewu wo ɖokui o. Wo katã wonya se si Mawu de be: “Megawu ame o.” (Mose II, 20:13) Esi Mawu dzixɔse sesẽ nɔ wo si ta la, wonya be nɔnɔme aɖeke mevlo nenema gbegbe o eye be agbe nye nunana tso Mawu gbɔ.

Ke kuxi siwo míedoa goe egbea ya ɖe? Tsɔ kpe ɖe nuteɖeamedziwo alo ŋutilãmekuxiwo ŋu  la, ahiã ɣeaɖewoɣi be míakpe akɔ kple ƒometɔwo, aƒelikawo, alo dɔwɔhatiwo ƒe ŋlɔmiwɔwɔ le ame ŋu. Biblia ƒo nu tso amesiwo yɔ fũ “kple madzɔmadzɔnyenye katã: Ahasiwɔwɔ, vɔ̃ɖiwɔwɔ, nu tovo wɔwɔ, ŋubiabiã; eye woyɔ fũ kpakple ŋuʋaʋã, amewuwu, dzrewɔwɔ, beble, apasa; sakplisalawo, ameŋuzɔlawo, amesiwo léa Mawu ɖe fu me, vlodolawo, dadalawo, adegbe ƒuƒlu ƒolawo, amesiwo toa nu vɔ̃ɖi vɛ, amesiwo meɖoa to woƒe dzilawo o, ame masenugɔmewo, nubabladzidalawo, amesiwo melɔ̃a ame ƒe nya o, amesiwo gbea avuléle kple ame makpɔnublanuiwo” ŋu. (Romatɔwo 1:28-31) Amesiawo ƒomevi dome nɔnɔ gbesiagbe ate ŋu ana agbe nazu abe agba ene. Aleke míakpe ɖe amesiwo hiã akɔfafa kple gbɔdzɔe ŋui?

Lɔlɔ̃ Faa Aɖo To

Xaxawo kple fukpekpe ate ŋu awɔe be ame ƒe susu natɔtɔ. Nunyala la gblɔ be: “Teteɖeanyi ɖeɖe dzaa ate ŋu ana nunyala nawɔ nu aɖaʋatɔe.” (Nyagblɔla 7:7, NW) Eyata ele be woalé fɔ ɖe amesi ƒoa nu tsoa eɖokui wuwu ŋu la ŋuti. Kuxi kawo kee le fu ɖem nɛ o, eɖanye seselelãme tɔ, ŋutilã me tɔ, susu me tɔ, alo gbɔgbɔ me tɔ o, ahiã be woatso ɖe eŋu kaba. Gake ame bibiwo ƒe atikewɔwɔ kple dɔyɔɖaŋuwo le vovovo, eye ele be ame ŋutɔ natso nya me le dɔyɔɖaŋuwo ŋu.—Galatiatɔwo 6:5.

Nuka kee ɖaʋã ame wòdi be yeawu ye ɖokui o, nugɔmesela, veveseɖeamenula, kple dzigbɔɖitɔ si woakpɔ agblɔ ame ƒe dzimenya na ate ŋu atrɔ nɔnɔmea geɖe ŋutɔ. Ƒometɔwo kple xɔlɔ̃ siwo lɔ̃ faa be yewoaɖo to la ate ŋu ana kpekpeɖeŋu. Tsɔ kpe ɖe veveseɖeamenu kple dɔmenyonyo ŋu la, nya tuameɖo siwo tso Mawu ƒe Nya me ate ŋu akpe ɖe amesiwo mɔkpɔkpɔ bu ɖo la ŋu ale gbegbe.

Gbɔgbɔ me Kpekpeɖeŋu na Amesiwo Dzi Nu Te Ðo

Awɔ nuku na wò ne ènya alesi gbegbe Biblia xexlẽ te ŋu dea dzi ƒo na amee. Togbɔ be Biblia menye tagbɔdɔ ŋuti mɔfiamegbalẽ o hã la, ate ŋu akpe ɖe mía ŋu míade asixɔxɔ agbe ŋu. Fia Salomo gblɔ be: “Medze sii bena, nu nyui aɖeke meli na wo wu be, woakpɔ dzidzɔ, eye woaɖu agbe le woƒe agbenɔɣi o. Ke be ame aɖe naɖu nu ano nu, eye wòanyo nɛ le eƒe agbagbadzedzewo katã me la, Mawu ƒe nunanae.” (Nyagblɔla 3:12, 13) Le dɔwɔna dzeameŋu si nana gɔmesese nɔa agbe ŋu megbe la, nu tsɛ aɖewo—abe ya fafɛ, ŋdɔʋuʋu, seƒoƒowo, atiwo, kple xewo ene—nye nusiwo Mawu na mí be woado dzidzɔ na mí.

Nusi gadea dzi ƒo kura gɔ̃ hãe nye kakaɖedzi si Biblia na be Yehowa Mawu kple Via, Yesu Kristo, tsɔa ɖe le eme na mí. (Yohanes 3:16; Petro I, 5:6, 7) Esɔ be hakpala la gblɔ be: ‘Woakafu Yehowa, amesi tsɔa míaƒe agbawo na mí gbeawotsyogbe, eyae nye míaƒe xɔname ƒe Mawu vavã la.’ (Psalmo 68:20) Togbɔ be míase le mía ɖokui me be míeɖi naneke o kple be míedze o hã la, Mawu le mía yɔm be míado gbe ɖa na ye. Kakaɖedzi nenɔ asiwò be mado ŋukpe ame aɖeke si bia kpekpeɖeŋui ɖokuibɔbɔtɔe le anukwareɖiɖi me o.

Masɔ be ame aɖeke nakpɔ mɔ be yeanɔ agbe kuxi manɔmee egbea o. (Hiob 14:1) Ke hã nyateƒe si le Mawu ƒe Nyaa me fia ame geɖe be ameɖokuiwuwu menye mɔ nyuitɔ si dzi woato akpɔ woƒe kuxiwo gbɔ o. Wò ya bu alesi apostolo Paulo kpe ɖe gaxɔdzikpɔla si tɔtɔ kura ŋu kpɔ, amesi “ɖi vo tso alɔ̃ me; eye esi wòkpɔ bena, gaxɔ la ƒe ʋɔtruawo le nuvo la, edi yi, be yeawu ye ɖokui.” Kasia ko la, gaxɔdzikpɔla la ƒo nya ta be ye ɖokui wuwu anyo wu be yeaku ŋukpedoametɔe le yeƒe kpododonu ta eye be ɖewohĩ womana yeaku kaba hã o. Apostoloa do ɣli gblɔ be: “Megawɔ vɔ̃ aɖeke ɖokuiwò o, elabena mí katã míele afii.” Paulo megblɔ nya ma ko heɖe asi o. Le nyateƒe me la, wo kple Sila fa akɔ na gaxɔdzikpɔla la eye woɖo nya ŋu nɛ esi wòbia be: “Aƒetɔwo, nukae le nam be mawɔ, bena makpɔ ɖeɖe mahã?” Woɖo ŋu nɛ be: “Xɔ Aƒetɔ Yesu Kristo dzi se, eye mia kple aƒewò me miakpɔ ɖeɖe.” Emegbe wogblɔ Yehowa ƒe nya na eya kple eƒemetɔwo, eye ewɔe be “[wonyrɔ eya] kple etɔwo katã enumake.” Dzi dzɔ gaxɔdzikpɔla sia kple eƒemetɔwo ale gbegbe eye gɔmesese yeye va ɖo woƒe agbe ŋu.—Dɔwɔwɔwo 16:27-35.

Egbea la, gbɔdzɔe ka gbegbee nye si wònye be míanya be menye Mawue na nuvɔ̃ɖiwɔwɔ li o! Eƒe Nya yɔ gbɔgbɔ vɔ̃ aɖe, “esi woyɔna be: Abosam kple Satana,” be eyae nye “amesi nye xexeame  katã blela.” Gake eƒe ɣeyiɣi le vɔvɔm. (Nyaɖeɖefia 12:9, 12) Esusɔ vie la, Mawu ade nu nyaawo me ale be xaxa siwo katã Satana kple eƒe gbɔgbɔ vɔ̃wo he ƒu anyigbadzinɔlawo la awu enu. Emegbe xexe yeye si me dzɔdzɔenyenye anɔ si ŋugbe Mawu do la atsi nusiwo hea mɔkpɔkpɔbuɖeame kple ameɖokuiwuwu vɛ nu tegbee.—Petro II, 3:13.

Akɔfafa na Amesiwo Le Kpekpeɖeŋu Dim

Fifia kura gɔ̃ hã la, amesiwo mɔkpɔkpɔ bu ɖo ate ŋu akpɔ akɔfafa tso Ŋɔŋlɔawo me. (Romatɔwo 15:4) Hakpala Dawid dzi ha be: “Mawu, màdo vlo dzi gbagbã, si tugu la o.” (Psalmo 51:19) Nyateƒe wònye be míedoa go dodokpɔ aɖewo eye míekpɔa blibomademade me tsonuwo teƒe kokoko. Gake sidzedze vavãtɔ si ku ɖe mía Fofo dɔmenyotɔ, lɔ̃ame, kple nugɔmesela si le dziƒo ŋu nyanya ana míaka ɖe edzi be míexɔ asi le eŋkume. Mawu ate ŋu anye mía Xɔlɔ̃ kple Nufiala vevitɔ. Ne míena ƒomedodo kplikplikpli va le mía kple Yehowa Mawu dome la, matrɔ mí ato eme gbeɖe o. Mía Wɔla gblɔ be: “Nye Yehowa, wò Mawu, enye amesi fia nusi nyo na wò la wò, nyee akplɔ wò to mɔ, si dzi nato.”—Yesaya 48:17.

Ame geɖe ɖo ŋu ɖe Mawu ŋu wòɖe vi na wo. Le kpɔɖeŋu me: Blanuiléle ɣeyiɣi didi gbã lãme na Mara xoxo esi viaŋutsuvi ɖeka kolia ku le ʋufɔku aɖe me. * Dzidzi ƒoe eye wòte kpɔ be yeawu ye ɖokui. Gake fifia la, efɔna kaba gbesiagbe kpɔa eƒe aƒemedɔwo gbɔ. Hasese kple kpekpeɖeŋu nana ame bubuwo vivia enu. Mɔkpɔkpɔ si li be “tsitretsitsi li na ame dzɔdzɔewo kple ame madzɔmadzɔwo siaa” na veve si wòsena le viaŋutsu lɔlɔ̃a ƒe kuku kpata ta la nu fa vie eye wògado ŋusẽ eƒe Mawu dzixɔse. (Dɔwɔwɔwo 24:15) Esi medzro Mara kpɔ gbeɖe be yeava zu mawudɔla anɔ dziƒo o ta la, nya siwo le Psalmo 37:11 de eƒe dzi gbɔ ŋutɔ, si nye: “Ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.”

Brazil nyɔnu bubu si nye Sandra, dze agbagba vevie be yeanye vinɔ adodoea na vi etɔ̃ siwo le esi. Egblɔ be: “Menɔ dɔ dzi ale gbegbe be esi fofonye ku kpata eye meva dze sii le ɣeyiɣi ma ke me be srɔ̃nyeŋutsu nɔ nyɔnu bubu gbɔ dem la, nyemebui gɔ̃ hã be mado gbe ɖa na Mawu abia kpekpeɖeŋui o.” Dzi ɖe le Sandra ƒo wòte kpɔ  be yeawu ye ɖokui. Nukae kpe ɖe eŋu be wòkpɔ gbɔdzɔe? Alesi wòkpɔ ŋudzedze ɖe gbɔgbɔmenuwo ŋu ye. “Zã ɖesiaɖe me hafi mamlɔ anyi la, mexlẽa Biblia, eye medzea agbagba be matsɔ ɖokuinye aɖo amesiwo ŋu nya mexlẽna teƒe. Mexlẽa Gbetakpɔxɔ kple Nyɔ! magazineawo hã, eye agbemeŋutinyaawo ŋue medoa vivi ɖo vevie elabena wokpena ɖe ŋunye be tɔnye gome le agbe me dzea ŋunye.” Esi wònya be Yehowae nye ye xɔlɔ̃ vevitɔ ta la, esrɔ̃ alesi wòagblɔ nusi tututu le dzime nɛ le eƒe gbedodoɖawo me.

Etsɔme si me Mɔkpɔkpɔbuɖeame Manɔ Anyi O

Akɔfanya ka gbegbee nye si wònye be míanya be fukpekpe manɔ anyi ɖaa o! Le Mawu Fiaɖuƒea ƒe dziɖuɣi la, dzi adzɔ ɖevi kple ame tsitsi siwo ŋu wowɔ hlɔ̃nu alo numadzɔmadzɔ ɖo, alo esiwo ŋu wobu nazã ɖo. Abe alesi wogblɔe ɖi le psalmo aɖe si nye nyagblɔɖi me ene la, Fia si Yehowa tia, si nye Yesu Kristo, “aɖe ame dahe, si le ɣli dom, kple hiãtɔ, si xɔnametɔ aɖeke meli na o la.” Gakpe ɖe eŋu la, “ave hiãtɔwo kple ame dahewo nu, eye wòaɖe ame dahewo ƒe luʋɔ.” Le nyateƒe me la, “aɖe woƒe luʋɔ tso teteɖeanyi kple ŋutasesẽ me, eye woƒe ʋu axɔ asi le eŋku me.”—Psalmo 72:12-14.

Nyagblɔɖinya mawo ƒe emevaɣi tu aƒe. Ðe agbe mavɔ nɔnɔ le anyigba dzi le nɔnɔme siawo me dze ŋuwòa? Ne nenemae la, ke susu aɖee nye ema si ta wòle be nàkpɔ dzidzɔ ɖo ahade bubu agbe ŋu be enye nunana tso Mawu gbɔ. Eye ne ègblɔ Ŋɔŋlɔawo me ŋugbedodo fakɔname siawo na ame bubuwo la, àte ŋu ahe dzidzɔ gã aɖe va agbe me na amesiwo le kpekpeɖeŋu dim le xexe maseveveɖeamenu si me lɔlɔ̃ mele o la me.

[Etenuŋɔŋlɔwo]

[Nɔnɔmetata si le axa 6]

Dzidzɔkpɔɣi geɖe li egbea

[Nɔnɔmetata si le axa 7]

Èkpɔa mɔ na xexe si me mɔkpɔkpɔ mabu ɖe ame oa?