Yosiya Ðokuibɔbɔla La Ƒe Nu Dze Yehowa Ŋu

VƆVƆ̃ anya ɖo Yuda Fiavi Yosiya si xɔ ƒe atɔ̃. Dadaa Yedida nɔ konyi fam. Yedida tɔ dzɔ be wòle avi fam elabena Yosiya tɔgbui, Fia Manase, ku.—Fiawo II, 21:18.

Yosiya fofo, Amon, ye azu Yuda fia azɔ. (Kronika II, 33:20) Le ƒe eve megbe (659 D.M.Ŋ.) la, Amon ƒe subɔviwo wui. Dukɔa me tɔwo wu nugbeɖolaawo eye wotsɔ Yosiya ɖekakpuivi la ɖo fiae. (Fiawo II, 21:24; Kronika II, 33:25) Le Amon ƒe dziɖuɣi la, dzudzɔ ʋeʋĩ si xɔa Yerusalem ƒe yame ƒe ʋeʋẽ mã Yosiya, le vɔsamlekpui geɖe siwo amewo ɖi ɖe woƒe xɔwo ta hedzea klo na alakpamawuwo ta. Ekpɔa trɔ̃nuawo wonɔa yiyim nɔa gbɔgbɔm, eye trɔ̃subɔlawo—wo dometɔ aɖewo gɔ̃ hã nye amesiwo be Yehowae yewosubɔna—nɔa mawu si nye Milkom ƒe ŋkɔ yɔm nɔa nu tam.—Zefanya 1:1, 5.

Yosiya nya be nu vɔ̃ɖi wònye Amon wɔ be wòsubɔ alakpamawuwo. Azɔ hã Yuda fia ɖekakpuia va se Mawu ƒe nyagblɔɖila Zefanya ƒe gbeƒãɖeɖewo gɔme nyuie wu tsã. Kaka Yosiya naxɔ ƒe 15 (ƒe 652 D.M.Ŋ.) la, enɔ eƒe dziɖuɣi ƒe ƒe enyilia me eye wòɖoe kplikpaa be yeawɔ Zefanya ƒe nyawo dzi. Yosiya ƒe ɖevime kee wòdze Yehowa didi gɔme.—Kronika II, 33:21, 22; 34:3.

Yosiya Wɔ Afɔɖeɖe!

Ƒe ene va yi eye Yosiya te alakpasubɔsubɔ ɖeɖe ɖa le Yuda kple Yerusalem (ƒe 648 D.M.Ŋ.). Egblẽ legbaawo, aseratiwo, kple dzudzɔ ʋeʋĩ vɔsamlekpui siwo wozãna le Baal subɔsubɔ me la dome. Wogbã alakpamawuwo ƒe legbawo gudugudu wozu wɔ eye emegbe wokɔ wo ɖe amesiwo sa vɔ na wo ƒe yɔdowo dzi. Wodo gu vɔsamlekpui siwo wozãna le subɔsubɔ makɔmakɔ me hegbã wo.—Fiawo II, 23:8-14.

Yosiya ƒe dukɔa ŋu kɔkɔ wɔnawo nɔ edzi yim vevie esime Yeremya, si nye Lewi-nunɔla aɖe ƒe viŋutsu, va ɖo Yerusalem (ƒe 647 D.M.Ŋ.). Yehowa Mawu ɖo Yeremya si nye ɖekakpui wònye nyagblɔɖila, eye aleke gbegbe dzonɔameme si wòtsɔ nɔ Yehowa ƒe gbedasiwo gblɔm ɖe alakpasubɔsubɔ ŋu nu sẽe nye si! Yosiya kple Yeremya anɔ ƒe ɖeka me. Gake togbɔ be Yosiya kɔ dukɔa ŋu dzinɔameƒotɔe eye Yeremya ɖe gbeƒã vɔvɔ̃manɔmee hã la, eteƒe medidi hafi ameawo gaƒo wo ɖokui ɖe alakpasubɔsubɔ me o.—Yeremya 1:1-10.

Wofɔ Nu Xɔasi Aɖe!

Ƒe atɔ̃ lɔƒo va yi. Yosiya si xɔ ƒe 25 la le dzi ɖum anye ƒe 18 enye ma. Edɔ woɖayɔ Safan, agbalẽŋlɔla; Maaseya, dua dzikpɔla; kple tsiami Yoax vɛ. Fia la ɖe gbe na Safan be: ‘Gblɔ na nunɔlagã Xilkiya be wòatsɔ ga si gbedoxɔnudzɔlawo dzɔ le ameawo si ana dɔwɔlaawo bene woaɖɔ Yehowa ƒe aƒe la ɖo.’—Fiawo II, 22:3-6; Kronika II, 34:8.

Tso keke ŋdi ke la, gbedoxɔdzraɖolaawo wɔ dɔ kple ŋkubiã. Ðikeke mele eme o be Yosiya da akpe na Yehowa be dɔwɔlaawo le nusiwo tɔgbuia vɔ̃ɖiawo dometɔ aɖewo gblẽ le Mawu ƒe aƒea ŋu la dzram ɖo. Esi dɔa nɔ edzi yim la, Safan va ka nya aɖe ta nɛ. Gake nukae nye ma wòlé ɖe asi? Agbalẽxatsaxatsae! Eɖe eme be Nunɔlagã  Xilkiya fɔ “Yehowa ƒe se, si wòna to Mose dzi la ƒe agbalẽ.” (Kronika II, 34:12-18) Nuka gbegbee nye si wofɔ—ɖikeke mele eme o be Segbalẽ gbãtɔa ye!

Yosiya di vevie be yease nya sia nya si le agbalẽa me. Esi Safan nɔ exlẽm la, fia la dze agbagba be yeakpɔ alesi sededea ɖesiaɖe ka ye kple dukɔ lae. Nusi koŋ wɔ dɔ ɖe edzie nye alesi agbalẽa te gbe ɖe tadedeagu vavãtɔ dzi kple alesi wògblɔ fuwɔame kple aboyomenɔnɔ si aɖi kpe dukɔa ne woƒo wo ɖokui ɖe alakpasubɔsubɔ me. Azɔ esi Yosiya kpɔ be menye Mawu ƒe seawo katã dzie yewowɔ ɖo o la, edze eƒe awuwo eye wòɖe gbe na Xilkiya, Safan, kple ame bubuawo be: ‘Mibia nu Yehowa le agbalẽ sia me nyawo ŋu; elabena dɔmedzoe si Yehowa do ɖe mía ŋu la nu sẽ ale gbegbe, le esi mía fofowo meɖo to agbalẽ sia me nyawo o ta.’—Fiawo II, 22:11-13; Kronika II, 34:19-21.

Wogagblɔ Yehowa ƒe Nya La

Yosiya ƒe amedɔdɔwo yi nyɔnu nyagblɔɖila Xulda gbɔ le Yerusalem eye wotsɔ nyatakaka aɖe gbɔe. Xulda gagblɔ Yehowa ƒe nya ma ke, si fia be dzɔgbevɔ̃e siwo woŋlɔ ɖe agbalẽ si wofɔ yeyee me la adzɔ ɖe dukɔ demegbea dzi. Gake esi Yosiya bɔbɔ eɖokui le Yehowa Mawu ŋkume ta la, makpɔ dzɔgbevɔ̃ea teƒe o. Ayi fofoawo gbɔ eye woakɔe yi eƒe yɔdo me le ŋutifafa me.—Fiawo II, 22:14-20; Kronika II, 34:22-28.

Ðe Xulda ƒe nyagblɔɖia le eteƒea, esi wònye be aʋagbedzie Yosiya ku lea? (Fiawo II, 23:28-30) Ẽ, elabena “ŋutifafa” si me wokɔe le tsɔ yi eƒe yɔdo mee la to vovo na “dzɔgbevɔ̃e” si gbɔna Yuda dzi. (Fiawo II, 22:20; Kronika II, 34:28) Yosiya ku do ŋgɔ na ƒe 609-607 D.M.Ŋ. ƒe dzɔgbevɔ̃e si me Babilontɔwo va ɖe to ɖe Yerusalem hetsrɔ̃e. Eye ‘be woaku ayi ame fofowo gbɔ’ mefia kokoko be womaku anyraku o. Wozã nyagbɔgblɔ si sɔ kplii na anyraku kple ku si me anyra mele o siaa.—Mose V, 31:16; Fiawo I, 2:10; 22:34, 40.

Tadedeagu Vavãtɔ De Dzi

Yosiya ƒo Yerusalemtɔwo nu ƒu ɖe gbedoxɔa gbɔ eye wòxlẽ “nubabla ƒe agbalẽ” si wofɔ le Yehowa ƒe aƒe me la me nyawo katã na wo. Emegbe ebla nu “be yeadze Yehowa yome, eye yealé eƒe sewo, ɖaseɖiɖiwo kple ɖoɖowo me ɖe asi tso dzi blibo kpakple luʋɔ blibo me, eye yeawɔ nubabla sia ƒe nya, siwo katã woŋlɔ ɖe agbalẽ sia me la dzi.” Ameawo katã lɔ̃ ɖe nubablaa dzi.—Fiawo II, 23:1-3.

Azɔ Fia Yosiya gaho ake ɖe trɔ̃subɔsubɔ ŋu eye edze ƒã be esia keke ta wu. Woxɔ dɔ le dutamawuwo ƒe trɔ̃nua siwo le Yuda si. Woxɔ mɔnukpɔkpɔ le Lewi-nunɔla siwo ƒo wo ɖokui ɖe tadedeagu makɔmakɔ me la si be womagasubɔ le Yehowa ƒe vɔsamlekpui ŋu o, eye wona nuxeƒe siwo wotu le Fia Salomo ƒe dziɖuɣi meganyo na subɔsubɔ o. Nuwo ŋu kɔkɔa lɔ Israel to ewo fiaɖuƒe si nɔ anyi tsã, si Asiriatɔwo va tsrɔ̃ do ŋgɔ, ƒe anyigba ɖe eme (ƒe 740 D.M.Ŋ.).

Le nya siwo “Mawu ƒe ame aɖe” si ŋkɔ womeyɔ o gblɔ ƒe 300 do ŋgɔ me vava nu la, Yosiya tɔ dzo Baal-nunɔlawo ƒe ƒuwo le vɔsamlekpui si Fia Yerobeam I ɖi ɖe Betel dzi. Wogbã nuxeƒewo ɖa le afima kple le du bubuawo me, eye wotsɔ nunɔla trɔ̃subɔlaawo sa vɔe ɖe vɔsamlekpui siwo tututu dzi wome vɔsanuwo le la dzi.—Fiawo I, 13:1-4; Fiawo II, 23:4-20.

Woɖu Ŋutitotoŋkekenyui Kpeɖi Aɖe

Mawu da megbe na nusiwo Yosiya wɔ tsɔ do tadedeagu dzadzɛtɔ ɖe ŋgɔe. Zi alesi fia la gakpɔtɔ le agbe ko la, ada akpe na Mawu be ameawo ‘mete ɖa le Yehowa, wo fofowo ƒe Mawu ŋu o.’ (Kronika II, 34:33) Eye aleke wɔ hafi Yosiya aŋlɔ nudzɔdzɔ wɔnuku si dzɔ le eƒe dziɖuɣi ƒe ƒe 18 lia me be?

Fia la de se na dukɔa be: “Miɖu ŋutitotoŋkekenyui la na Yehowa, mia Mawu la, abe alesi woŋlɔ ɖe nubabla ƒe agbalẽ [si wofɔ yeyee] me ene.” (Fiawo II, 23:21) Dzi dzɔ Yosiya esi wòkpɔ alesi wowɔ nu ɖe nyaa ŋui. Eya ŋutɔ na lã 30,000 kple nyi ɖekaɖeka 3,000 be woatsɔ aɖu ŋkekenyui lae. Ŋutitotoŋkekenyui ka gbegbee nye si! Ne míabu vɔsaawo, alesi nuwo yi le ɖoɖo nyui me, kple tadeagulawo ƒe agbɔsɔsɔme ŋu la, eƒo Ŋutitotoŋkekenyui ɖesiaɖe si woɖu tso nyagblɔɖila  Samuel ŋɔli ta.—Fiawo II, 23:22, 23; Kronika II, 35:1-19.

Wofae Ŋutɔ Esi Wòku

Le Yosiya ƒe ƒe 31 dziɖuɣia (ƒe 659-629 D.M.Ŋ.) katã me la, enye fia nyui. Le eƒe dziɖuɣi ƒe nuwuwu lɔƒo la, ese be Farao Nexo ɖo be yeava to Yuda esi wòyina mɔ tso ge na Babilon-ʋakɔwo akpe ɖe Asiria-fia ŋu le Karkemis si le Frat Tɔsisi to. Le susu aɖe si womegblɔ o ta la, Yosiya yi be yeawɔ aʋa kple Egiptetɔ la. Nexo ɖo amedɔdɔwo ɖee gblɔ be: ‘Xa ɖe wò agbe ta nàɖe asi, le Mawu si li kplim ta, ne magagblẽ wò o.’ Gake Yosiya ɖɔli eɖokui eye wòdze agbagba be yeana Egiptetɔawo natrɔ le Megido.—Kronika II, 35:20-22.

Eme menyo na Yuda-fia la o! Futɔ aŋutrɔdalawo tee, eye wògblɔ na eƒe dɔlawo bena: “Mikplɔm dzoe, elabena mexɔ abi vevie.” Woɖe Yosiya le eƒe aʋatasiaɖam me tsɔe de bubu me ɖo ta Yerusalem. Dua me alo mɔa dzie Yosiya ku le. Nuŋlɔɖi si tso gbɔgbɔ me gblɔ be: “Eye wòku, eye woɖii ɖe fofoawo ɖiƒe, eye Yuda blibo la kple Yerusalem fa na Yosiya.” Yeremya kpa konyifahawo ɖe eŋu, eye le ema megbe le wɔna tɔxɛwo wɔɣi la, wodzia konyifahawo le fia la ŋu.—Kronika II, 35:23-25.

Ẽ, Fia Yosiya wɔ vodada gblẽnu aɖe esi wòho aʋa ɖe Egiptetɔwo ŋu. (Psalmo 130:3) Ke hã eƒe ɖokuibɔbɔ kple alesi wòtɔ afɔ to ɖe tadedeagu vavãtɔ ŋui na Mawu kpɔ ŋudzedze ɖe eŋu. Aleke gbegbe Yosiya ƒe agbenɔnɔ ɖee fia be Yehowa vea esubɔla ɖokuibɔbɔla siwo tsɔ wo ɖokui kee la nui enye si!—Lododowo 3:34; Yakobo 4:6.

[Nɔnɔmetata si le axa 29]

Fia Yosiya ɖekakpui la di Yehowa vevie

[Nɔnɔmetata si le axa 31]

Yosiya tsrɔ̃ nuxeƒewo eye wòdo tadedeagu vavãtɔ ɖe ŋgɔ