Ŋutifafa Nyanyuia Ðo Chiapas Tonyigba Dzi

“Le ametsɔtsrɔ̃ vɔ̃ɖitɔ kekeake si dzi amesiame ate ŋu aɖo ŋkui le Chiapas nutoa me me la, ameha aɖewo siwo me tɔwo . . . tsɔ aʋawɔnuwo ɖe asi wu agbledela 45 siwo si ameɖokuitaʋlinu aɖeke menɔ o, tsɔ kpe ɖe vidzĩ 13 ŋu.” Aleae nyadzɔdzɔgbalẽ si nye “El Universal” ka nusi dzɔ le Acteal, Chiapas Nutome tae le December 22, 1997, dzii.

CHIAPAS nye nuto si le Mexico ƒe anyiehe gome ʋĩ eye wòɖe liƒo kple Guatemala. Le ahedada kple alesi wogblẽ nutoa me ɖi le nu vovovo me tso gbaɖegbe ke ta la, Maya India-vidzidziwo ƒe ƒuƒoƒo aɖe si woyɔna be Ejército Zapatista de Liberación Nacional (EZLN, Zapatista Dukɔa Ðesrafoha) tsɔ aʋawɔnuwo tsi tre ɖe dziɖuɖua ŋu le January 1994 me. Numedzodzro siwo dzi woato akpɔ nyaa gbɔ le ŋutifafa me xɔ ɣeyiɣi didi. Aglãdzelaawo kple dziɖuɖua ƒe asrafowo siaa ƒe amedzidzedze le vome na wokɔ ʋu gbogbo aɖe ɖi eye ame gbogbo aɖe ku. Zitɔtɔa na agbledela siwo le nutoa me dometɔ geɖe si yi nuto siwo me woanɔ dedie le.

Le nɔnɔme siawo siwo ŋu kakaɖedzi mele o me la, ŋutifafalɔ̃lawo ƒe ƒuƒoƒo ɖeka aɖe ya nɔ anyi si mede akpa aɖeke dzi le dunyahehe ƒe ʋunyaʋunyawɔwɔa me o. Wotsɔ dzonɔameme he amewo ƒe susu yi Mawu ƒe Fiaɖuƒea dzi be eya koe nye mɔkpɔkpɔ ɖeka kolia si dzi woato akpɔ kuxi siwo dze ŋgɔ amewo, le yewoƒe nutoa me kple xexeame katã la gbɔ. (Daniel 2:44) Amekawoe? Yehowa Ðasefowoe. Le wɔwɔ ɖe Yesu ƒe se dzi me la, wole agbagba dzem be yewoatsɔ Mawu ƒe Fiaɖuƒe ŋuti nyanyuia ayi Chiapas tonyigba la ƒe akpa siwo sa ɖe aga wu. (Mateo 24:14) Aleke gbeƒãɖeɖe le nɔnɔme mawo me nɔ, eye nukawoe do tso eme?

“Yehowa Ðasefoe Menye”

Adolfo si nye ɖekakpui aɖe si zu Fiaɖuƒegbeƒãɖela eteƒe medidi boo o nɔ dɔ wɔm le radiodɔwɔƒe aɖe le Ocosingo. Enumake ʋɔƒoƒo koe ɖi sesĩe. Ameha aɖe siwo tsɔ nu tsyɔ mo ge ɖe xɔa me bibibi hetsɔ woƒe tuwo ɖo eƒe ta dzi. Woɖe abla ge ɖe nyadzɔdzɔgblɔƒea, xɔ dɔwɔƒea sesẽe, heɖe gbeƒã le mɔ̃a dzi be yewoho aʋa ɖe dziɖuɖua ŋu.

Amesiawo siwo lé amewunuwo ɖe asi la trɔ ɖe Adolfo ŋu heɖe gbe nɛ be wòawɔ ɖeka kple yewo. Togbɔ be Adolfo mexɔ nyɔnyrɔ haɖe o hã la, eɖo eŋu be “Yehowa Ðasefoe menye.” Eɖe eme be Mawu ƒe Fiaɖuƒea koe míate ŋu akpɔ mɔ na be ahe ŋutifafa vɛ, eye wògbe awu kple tu si wotsɔ nɛ la xɔxɔ kura. Esi wokpɔe be egbe be yemana ta o la, woɖe asi le eŋu. Esi Adolfo ɖo ŋku nudzɔdzɔ sia dzi la, egblɔ be: “Nudzɔdzɔ ma do ŋusẽ nye xɔse vavã.”

Nɔnɔmea va dze akɔ anyi mlɔeba, gake nutoa gakpɔtɔ  nɔ asrafowo ƒe dzikpɔkpɔ te. Togbɔ be nɔnɔmea le alea hã la, Adolfo tsɔ dzidzɔ wɔ ɖe woƒe hamemegãwo ƒe amekpekpe be wòawɔ dɔ kple Kristotɔwo ƒe saɖagaƒuƒoƒo aɖe si le nutoa me la dzi. Le agbamekaƒe siwo wòle be wòato la, asrafoawo de bubu eŋu esi wòɖe eɖokui nu be Yehowa Ðasefoe yenye. Exɔ nyɔnyrɔ emegbe eye ekpɔ dzidzeme le kpekpeɖeŋunana saɖagaƒuƒoƒo ma be wòva zu Yehowa Ðasefowo ƒe hame. Adolfo gblɔ be: “Fifia si mexɔ nyɔnyrɔ la, mate ŋu agblɔ kple kakaɖedzi blibo be Yehowa Ðasefoe menye!”

“Yehowa Do Ŋusẽ Mí”

Dua me tɔwo si esi Dukɔa Ðesrafoha la ho aʋa ɖe dziɖuɖua ŋu le radioa dzi megbe teti. Francisco si nye ɣeyiɣiawo katã ƒe subɔla alo mɔɖela gblɔ alesi Yehowa do ŋusẽ eya kple srɔ̃a le nusiwo me wòhiã be woato la me.

“Míetso nya me be míaɖadi sitsoƒe le nuto aɖe si ƒe didime tso mía gbɔ nye gaƒoƒo etɔ̃ ƒe afɔzɔzɔ me. Hame aɖe nɔ afima, eyata míava nɔ mía nɔviwo gbɔ. Eteƒe medidi o míaƒe nutome sue takpekpe si míawɔ le Palenque la ɖo. Mía kple srɔ̃nye míedi be kpekpe tɔxɛ si woawɔ kple mɔɖelawo nato mía ŋu o, gake míese be Dukɔa Ðesrafoawo xe mɔ si míato  ayi takpekpea. Míeɖoe be míato gbememɔ, si xɔ gaƒoƒo asieke. Míeɖo ɖe game dzi hede mɔɖelawo ƒe kpekpea, si do dzidzɔ na mí ŋutɔ, kpakple takpekpe bliboa.

“Esi míetrɔ gbɔ la, míekpɔe be wotɔ dzo míaƒe aƒea eye wofi míaƒe lãwo. Nusi ko kpɔtɔe nye akplo sue aɖe si me awuwo nɔ. Nusiwo bu na mí la medzɔ dzi na mí kura o, gake Ocosingo nɔviwo nyo dɔme xɔ mí ɖe woƒe aƒewo me. Wofia dɔ siwo mí agbledelawo míewɔ kpɔ o hã mí. Nɔvi ɖeka fia fotoɖeɖem, eye bubu fia afɔkpawɔwɔm. Dɔ siawo ŋue mía kple srɔ̃nye míele agbe ɖo va ɖo fifia, eye mehiã be míaɖe asi le mɔɖeɖedɔa ŋu o. Ne míede ŋugble le nusi dzɔ ŋu la, míekpɔe be togbɔ be dzidodo menɔ bɔbɔe na mí o hã la, Yehowa do ŋusẽ mí.”

Gbeƒãɖeɖedɔa ƒe Kutsetsewo

Ðasefo siwo nɔ Chiapas Nutoa me meɖe mɔ nɔnɔme sesẽ si me wonɔ kple afɔku si wòanye na wo ɖe dzi le wo ƒo be woadzudzɔ gomekpɔkpɔ le agbagba tɔxɛ si dzem wonɔ be woatsɔ nyanyuia ayi na amewo le nutoa me me o. Le kpɔɖeŋu me, le keke April kple May 1995 me ke la, wowɔ ɖeka kple hati Kristotɔwo le xexeame godoo kpɔ gome le Fiaɖuƒe Ŋuti Nya 34 lia si ƒe tanya sɔ ŋutɔ be, Nukata Fukpekpe Le Agbe me Alea Gbegbe Ðo? la mama me.

Le dɔa wɔwɔ me la, Ciro, si nye gbesiagbe mɔɖela, ke ɖe ƒome aɖe si ɖe ɖetsɔleme fia ŋu—le du aɖe si ŋkɔe nye Pueblo Nuevo me. Esi wòtrɔ yi le ŋkeke etɔ̃ megbe la, ete ŋu dze Biblia-nusɔsrɔ̃ gɔme kpli wo. Gake esi Ciro kple eƒe zɔhɛ aɖe trɔ yi ne woayi nusɔsrɔ̃a dzi kple ƒomea la, aƒea tɔ menɔ anyi o. Ke boŋ ameha aɖe si me tɔwo tsyɔ nu mo ye nɔ ŋutsua lalam be yewoawɔ nuvevii. Wobia nusi dim Ciro kple eƒe zɔhɛa nɔ hedo ŋɔdzi na wo be yewoawu wo. Kristotɔ eveawo do gbe ɖa na Yehowa le ɖoɖoezizi me eye wotsɔ dzideƒo gblɔ na wo be ɖe yewova Biblia fia ge ƒomea. Esia wɔe be amesiawo siwo tsyɔ nu mo la ɖe asi le wo ŋu wodzo. Le susu aɖe ta, aƒea tɔ megbɔ va aƒeme gbemagbe o.

Gbeɖeka, anɔ ƒe etɔ̃ megbe la, ewɔ nuku na Ciro be ŋutsua va ye ƒeme. Aleke dzi dzɔ Ciro enye si esi wòse be ƒome bliboa katã xɔ nyɔnyrɔ eye wole hame aɖe me le Guatemala fifia! Vianyɔnu ɖeka gɔ̃ hã nɔ gbesiagbe mɔɖeɖedɔa wɔm.

Ŋudzedzekpɔkpɔ Ðe Gbɔgbɔmenuɖuɖu Ŋu

Togbɔ be nɔnɔmea gakpɔtɔ nɔ sesẽm ɖe edzi le Chiapas hã la, nutome gã dzikpɔla aɖe ka nya ta be Ðasefo siwo le nutoa  me la kpɔ vevienyenye si le ƒuƒoƒo ɖekae ŋu dze sii. (Hebritɔwo 10:24, 25) Egblɔ nusi dzɔ le ŋkeke ɖeka takpekpe tɔxɛ si wowɔ eteƒe medidi boo o me, si ŋuti wowɔ ɖoɖo ɖo be woadze egɔme ŋdikanya ale be vavalawo nate ŋu atrɔ ayi aƒeme le ŋkeke me esime nuwo anɔ dedie vie. Togbɔ be ele be vavala akpa gãtɔ nazɔ afɔ gaƒoƒo etɔ̃ to gbeme hafi ava takpekpea hã la, kaka ŋdi ga 7:00 naƒo la, amesiame va nɔ anyi. Ame ade tso Dukɔa Ðesrafoawo me nɔ nyaselawo dome, nɔ to ɖom henɔ akpe sim, si fia be woanya nɔ vivi sem na wɔnaa. Woawo hã zɔ gaƒoƒo etɔ̃ va takpekpea. Wo dometɔ 20 hã de Kristo ƒe kua ƒe Ŋkuɖodzi si wowɔ le nutoa me ƒe Fiaɖuƒe Akpata aɖe me.

Aglãdzelawo ƒe haa dzi kpɔlawo de dɔ asi na ɖekakpui bubu aɖe be wòava tsa le nuto aɖe me. Esi wòɖo nutoa me la, ekpɔ be nutoa me tɔ siwo dometɔ akpa gãtɔ nye Yehowa Ðasefowo la si dzo. Eyata eyi ɖadze aƒe siwo me wosi dzo le dometɔ ɖeka me. Esi dɔ boo aɖeke menɔ eŋu si wòawɔ o ta la, edze agbalẽ aɖewo siwo ŋu wòke ɖo le aƒea me xexlẽ gɔme. Agbalẽ siawo nye Gbetakpɔxɔ Habɔbɔa ƒe agbalẽ siwo Ðasefoawo gblẽ ɖi. Esi ɖekakpuia ƒe mo dzaka ta la, ɣeyiɣi nɔ esi be wòade ŋugble le nusi xlẽm wònɔ ŋu. Etso nya me be ele be yeatrɔ yeƒe agbenɔnɔ ahaɖe asi le asrafodɔa ŋu. Esi wònya ke ɖe Ðasefoawo ŋu ko la, edze Biblia sɔsrɔ̃ gɔme. Le ɣleti ade me la, enɔ nyanyuia gblɔm na amewo. Eya kple eƒe ƒomea me tɔ bubu etɔ̃ siwo nye aglãdzelawo ƒe ha la dzidelawo tsã la va zu Kristotɔ xɔnyɔnyrɔwo fifia.

Akpa Nyuitɔ Kpɔkpɔ

Togbɔ be aʋaa na nuwo me sẽ ŋutɔ hã la, enye nyateƒe be ewɔ dɔ nyui aɖe ɖe alesi amewo bua gbeƒãɖeɖedɔae dzi. Hamemegã aɖe si nɔ du si tututu me aʋaa dze egɔme le me la gblɔ be: “Esi aʋaa dzɔ anye ŋkeke atɔ̃ megbe la, míewɔ ɖoɖo le gbeƒãɖeɖedɔa ŋu le dua me kple egodo siaa. Amewo di vevie be yewoaɖo to mí. Míena Biblia-srɔ̃gbalẽ geɖe hedze Biblia-nusɔsrɔ̃ geɖe wɔwɔ gɔme. Le nuto aɖe me la, ame aɖewo tsia tre ɖe nyateƒea ŋu tsã, gake le aʋaa ta la, woɖoa to, srɔ̃a Biblia, eye wodea kpekpewo kple takpekpewo azɔ.”

Edzɔ dzi na nɔviawo be yewote ŋu yi teokrasidɔwo dzi togbɔ be nɔnɔmeawo mede ame dzi kura o hã. Ele nyanya na dziɖuɖua ƒe asrafowo kple Dukɔa Ðesrafoha la siaa be woyi edzi wɔa woƒe takpekpewo, eye esia doa ŋusẽ wo le gbɔgbɔ me. Dzikpɔla mɔzɔlawo ƒe sasrãkpɔwo hã nyea ŋusẽdodo gã aɖe na wo be woayi gbeƒãɖeɖedɔa dzi. Enye dzidzɔnya be dzideƒonyawo tsoa amesiwo le aʋaa wɔm la gɔ̃ hã gbɔ; woxlɔ̃a nu Ðasefoawo be woayi woƒe gbeƒãɖeɖedɔa dzi.

Togbɔ be dodokpɔ kple nɔnɔme sesẽ siwo ƒe dzi wòle be Chiapastɔwo nado la dzi va ɖe kpɔtɔ hã la, wo nu meyi o. Ke hã kakaɖedzi le nu ɖeka sia ya ŋu—be Yehowa Ðasefowo ɖoe kplikpaa be yewoayi yewoƒe agbagbadzedzewo dzi madzudzɔmadzudzɔe atsɔ ŋutifafa nyanyui si le Mawu ƒe Nya, Biblia, me la ayi na amewo. (Dɔwɔwɔwo 10:34-36; Efesotɔwo 6:15) Wonyae be abe alesi nyagblɔɖila Yeremya gblɔe ene la, “amegbetɔ ƒe mɔ kple ŋutsu ƒe zɔzɔme la menye eya ŋutɔ si me wòle, ne eƒe azɔlime nato mɔ ɖeka o.” (Yeremya 10:23) Mawu ƒe Fiaɖuƒe si le Via Yesu Kristo si me koe ate ŋu ahe madzɔmadzɔnyenye kple hiãkame si le xexeame la gbɔ kpɔnu vɛ.—Mateo 6:10.

[Anyigbatata si le axa 9]

(Edze nyuie le agbalẽa ŋutɔ me)

CHIAPAS

GUATEMALA

Mexico Ƒukɔme

Pacific-ƒu

[Afi Si Míexɔ Mɔɖeɖe Tso]

Mountain High Maps® Copyright © 1997 Digital Wisdom, Inc.

[Nɔnɔmetata si le axa 9]

Ðasefowo yina ɖe gbeadzi le Chiapas tonyigbawo dzi