Nukatae Nèsubɔa Mawu?

Fia mawuvɔ̃la aɖe ɖo aɖaŋu sia na via kpɔ be: “Dze si fofowò ƒe Mawu la, eye nasubɔe kple dzi blibo kpakple luʋɔ blibo.” (Kronika I, 28:9) Edze ƒã be Yehowa di be amesiwo subɔa ye la nasubɔ ye kple dzi si me dzidzɔkpɔkpɔ kple ŋudzedzekpɔkpɔ yɔ fũ.

MÍ Yehowa Ðasefowo míalɔ̃ ɖe edzi enumake be esime woɖe Biblia ƒe ŋugbedodowo me na mí zi gbãtɔ la, edzɔ dzi na mí ŋutɔ. Gbesiagbe míesrɔ̃a nu yeye aɖe tsoa Mawu ƒe tameɖoɖowo ŋu. Zi alesi míeyi edzi le nu bubuwo srɔ̃m tso Yehowa ŋu la, zi nenemae wòdzro mí vevie be míasubɔe “kple dzi blibo kpakple luʋɔ blibo.”

Ame geɖe siwo va zu Yehowa Ðasefowo la yi edzi le Yehowa subɔm kple dzidzɔ manyagblɔ le woƒe agbemeŋkekewo katã me. Ke hã Kristotɔ aɖewo dzea egɔme nyuie, gake le ɣeyiɣi aɖe megbe la, wova ŋlɔa nu vevi siwo ʋã mí be míasubɔ Mawu la be. Ðe nusia dzɔ ɖe dziwòa? Ne edzɔ ɖe dziwò la, dzi megaɖe le ƒowò o. Míagate ŋu akpɔ dzidzɔ si bu la. To mɔ ka nu?

Xlẽ Wò Yayrawo Kpɔ

Gbã la, de ŋugble le yayra siwo nèxɔna tsoa Mawu gbɔ gbesiagbe la ŋu. Bu tame le Yehowa ƒe nunana nyuiwo ŋu: nu gbogbo siwo wòwɔ—siwo mí katã míete ŋu zãna metsɔ le amesi ƒomevi ame aɖe nye me o—dzɔdzɔmenu siwo nye nuɖuɖu kple nunono, lãmesẽ si wònaa wò, Biblia ƒe nyateƒea ƒe sidzedze si su asiwò, kple vevietɔ, Via si wòtsɔ na. Eƒe ku la ʋu mɔ na wò be nàsubɔ Mawu kple dzitsinya dzadzɛ. (Yohanes 3:16; Yakobo 1:17) Zi alesi nèdea ŋugble le Mawu ƒe nyonyo ŋui la, zi nenemae wò ŋudzedzekpɔkpɔ ɖe eyama ŋu atsi ɖe edzii. Ekema wò dzi aʋã wò be nàsubɔe le ŋudzedzekpɔkpɔ ɖe nusiwo katã wòwɔ ŋu la ta. Ðikeke mele eme o be àdze esese le ɖokuiwò me abe alesi hakpala la hã see ene, eya amesi ŋlɔ bena: “Yehowa, nye Mawu, wò nukunu kple wò tamesusu, siwo nèɖe fia ɖe mía ŋu la, sɔ gbɔ. Naneke mede nuwò o! . . . Womele xexlẽ me o.”—Psalmo 40:6.

Dawid, amesi kuxiwo nɔ fu ɖem na le agbe me ye ŋlɔ nya siawo. Esime Dawid nye ɖekakpui la, ezã eƒe ɣeyiɣiawo ƒe akpa gãtɔ nɔ sisim le Fia vɔ̃ɖi Saul kple eŋudzɔla siwo nɔ Dawid dim be yewoawu la nu. (Samuel I, 23:7, 8, 19-23) Gbɔdzɔgbɔdzɔwo hã nɔ Dawid ŋutɔ ŋu siwo wòhiã be wòawɔ avu kplii. Elɔ̃ ɖe esia dzi le Psalmo 40 lia me be: “Fukpekpewo ɖe to ɖem taŋtaŋ, nye vodadawo lém, womele kpɔkpɔ me nam o; wosɔ gbɔ wu nye taɖa.” (Psalmo 40:13) Ẽ, kuxiwo nɔ Dawid ŋu, gake mena wokpe eyama dzi keŋkeŋ o. Togbɔ be kuxiwo nɔ eŋu hã la, eƒe susu nɔ mɔ siwo nu Yehowa yra eyama le dzi eye wòkpɔe be yayra mawo sɔ gbɔ sasasã wu yeƒe fukpekpewo.

Ne èse le ɖokuiwò me be yeƒe kuxiwo wu tsɔtsɔ na ye alo be yemesu te atsɔ wo o la, anyo be nàtɔ vie axlẽ wò yayrawo kpɔ abe alesi Dawid xlẽ etɔwoe ene. Ðikeke mele eme o be ŋudzedzekpɔkpɔ ɖe yayra mawo ŋue ʋã wò be nèɖe adzɔgbe na Yehowa; ŋugbledede le nusiawo ŋu ate ŋu akpe ɖe ŋuwò be nàgakpɔ dzidzɔ si  bu la eye wòakpe ɖe ŋuwò hã be nàsubɔ Mawu tso dzi kpɔdzidzɔ me.

Hame ƒe Kpekpewo Ate Ŋu Akpe Ðe Ŋuwò

Tsɔ kpe ɖe ŋugbledede le mía ɖokui si tso Yehowa ƒe dɔmenyonyo ŋu la, ehiã hã be míade ha kple hati Kristotɔwo. Edea dzi ƒo be míakpe edziedzi kple ŋutsuwo, nyɔnuwo, kple sɔhɛ siwo lɔ̃ Mawu eye woɖoe kplikpaa be yewoasubɔe. Woƒe kpɔɖeŋu ate ŋu ade dzo mía me be míawɔ Yehowa ƒe dɔa kple luʋɔ blibo. Míaƒe Fiaɖuƒe Akpata me yiyi ate ŋu ade dzi ƒo na woawo hã.

Enye nyateƒe be gbesigbe míegbɔ tso dɔ aɖe wɔƒe alo kuxi aɖe alo gbɔdzɔgbɔdzɔ aɖe na dzi ɖe le mía ƒo la, kpekpe yiyi le Fiaɖuƒe Akpata me madzro mí o. Le ɣeyiɣi mawo me la, ahiã be míazi mía ɖokui dzi, ‘aƒo míaƒe ŋutilã’ le kpɔɖeŋumɔ nu, be míawɔ ɖe sedede si nye be míaƒo ƒu kple mía hati Kristotɔwo dzi.—Korintotɔwo I, 9:26, 27; Hebritɔwo 10:23-25.

Ne eva hiã nenema la, ɖe wòle be míagblɔ be míegalɔ̃ Yehowa vavã oa? Kura o. Ehiã be Kristotɔ tsitsi siwo lɔ̃ Mawu ɖikekemanɔmee le blema la nadze agbagba vevie hafi awɔ Mawu ƒe lɔlɔ̃nu. (Luka 13:24) Apostolo Paulo nye Kristotɔ siawo dometɔ ɖeka. Ale wòɖe eƒe seselelãme gblɔ nanekemaɣlamaɣlae nye si: “Menyae bena, le menye—egɔmee nye: Le nye ŋutilã me la—nu nyui aɖeke menɔa anyi o; elabena nu nyui lɔlɔ̃ la le asinye, ke nu nyui wɔwɔ la nyemekpɔ wɔe kura o. Elabena menye nu nyui, si melɔ̃na la, mewɔna o, ke nuvɔ̃, si nyemelɔ̃na o la, eya ke mewɔna boŋ.” (Romatɔwo 7:18, 19) Eye egblɔ na Korintotɔwo be: “Ne megblɔ nyanyui fia la, menye kafukafu nam o, elabena ele nam kokoko be, mawɔe. . . . Elabena ne mewɔ esia kple lɔlɔ̃nu la, fetu le eme nam; ke ne nyemewɔe kple lɔlɔ̃nu o la, wotsɔ xɔnuvidɔ de asi nam.”—Korintotɔwo I, 9:16, 17.

Abe mía dometɔ geɖe ene la, nuvɔ̃ ƒe nɔnɔmewo nɔ Paulo ŋu siwo do kplamatse eƒe didi be yeawɔ nu nyui. Ke hã ewɔ aʋa sesĩe kple nɔnɔme mawo, eye zi geɖe la, ekpɔ dzidzedze. Le nyateƒe me la, menye Paulo ŋutɔ ƒe ŋusẽ mee wòwɔ nusia le o. Eŋlɔ bena: “Metea ŋu wɔa nuwo katã le Kristo, amesi doa ŋusẽm la me.” (Filipitɔwo 4:13) Yehowa, amesi do ŋusẽ Paulo la, ado ŋusẽ wò hã be nàwɔ nusi nyo ne èbiae be nekpe ɖe ye ŋu. (Filipitɔwo 4:6, 7) Eyata ‘ʋli xɔse la ta sesĩe,’ eye Yehowa ayra wò.—Yuda 3.

Mehiã be wò ɖeɖe nàkpe akɔ kple aʋa sia awɔ o. Le Yehowa Ðasefowo ƒe hamewo me la, Kristotɔ tsitsiwo, siwo woa ŋutɔwo le kutri kum le ‘xɔsea taʋiʋli’ me la le klalo be yewoakpe ɖe ŋuwò. Ne èbia kpekpeɖeŋu hamemegã aɖe la, adze agbagba be ‘yeafa akɔ’ na wò. (Tesalonikatɔwo I, 5:14) Eƒe taɖodzinu anye be yeanye “sitsoƒe tso ya nu, bebeƒe tso tsidzadza nu” na wò.—Yesaya 32:2.

“Mawu enye lɔlɔ̃,” eye edi be ye subɔlawo nasubɔ ye le esi wolɔ̃ ye ta. (Yohanes I, 4:8) Ne ehiã be nàgbugbɔ wò lɔlɔ̃ na Mawu atu ɖo la, ke wɔ afɔɖeɖe siwo sɔ hena esia wɔwɔ, abe alesi míegblɔe va yii ene. Dzi adzɔ wò be yewɔe.