Ŋutifafa Anɔ Ƒe Akpe Yeye sia Mea?

WOWƆ wɔna aɖewo tsɔ ʋu Dukɔwo Dome Ŋutifafa Sɔsrɔ̃ ƒe Ƒe nui le Paris kple New York City le September 14, 1999 dzi. Ƒe 2000 lia ŋue wogblɔe ɖo le Dukɔ Ƒoƒuawo ƒe Takpekpe Gã me. Amesi nye Dukɔ Ƒoƒuawo ƒe Agbalẽsɔsrɔ̃, Dzɔdzɔmeŋutinunya, Kple Dekɔnuwo ƒe Nyawo Gbɔkpɔha (UNESCO) ƒe dɔdzikpɔlagã tsã, Federico Mayor, doe ɖa moveviɖoɖotɔe be “woawɔ ŋutifafa kple ŋutasesẽ manɔanyi ŋuti nusɔsrɔ̃ ƒe ɖoɖo le xexeame katã.”

Gɔmeɖose nyanyɛ aɖe le UNESCO si be “esi wònye amewo ƒe susu mee aʋawɔwɔ dzea egɔme tsonɛ ta la, amewo ƒe susu mee wòle be woatu ŋutifafa takpɔnuwo ɖo le.” Le ɖekawɔwɔ me kple esia la, habɔbɔa ɖoe be yeato “nusɔsrɔ̃, nyamedzodzro, kple ɖekawɔwɔ” me atu amewo dome ŋutifafa sɔsrɔ̃ ɖo. Aƒetɔ Mayor gblɔ be “ŋutifafame nyenye ɖeɖe mesɔ gbɔ o, tsitretsitsi ɖe aʋawɔwɔ ŋu gɔ̃ hã ɖeɖe mesɔ gbɔ o, ke ele be míanye ŋutifafawɔlawo.”

Nublanuitɔe la, ƒe 2000 lia megogo ŋutifafa kura o. Egbegbe ŋutinya—hekpe ɖe ƒe 2000 lia me nudzɔdzɔwo ŋu—ɖe ŋutete si mele amegbetɔ ŋu be wòaxe mɔ na aʋawɔwɔ kple ŋutasesẽ o fia, togbɔ be ele agbagba dzem kpem hã.

Gake enyo be míade dzesii be woyɔ ŋutifafa be enɔ te ɖe nusɔsrɔ̃ dzi. Ƒe 2,700 aɖewoe nye si va yi la, nyagblɔɖila Yesaya gblɔe ɖi be: ‘Viwòwo katã anye Yehowa ƒe nusrɔ̃viwo, eye viwòwo ƒe ŋutifafa asɔ gbɔ.’ (Yesaya 54:13) Nyagblɔɖila ma ke kpɔe do ŋgɔ be ɣeyiɣi aɖe ava esime dukɔwo katã me tɔwo ayi Yehowa Mawu ƒe tadedeagu dzadzɛa gbɔ asrɔ̃ Eƒe mɔwo. Nukae ado tso eme? ‘Woatsɔ woƒe yiwo atu kodziwoe, eye woatsɔ woƒe akplɔwo atu hɛ gobɛwoe; dukɔ magatsɔ yi ɖe dukɔ ŋu azɔ o, eye womagasrɔ̃ aʋawɔwɔ hã azɔ o.’ (Yesaya 2:2-4) Le ɖekawɔwɔ me kple nyagblɔɖi ma la, Yehowa Ðasefowo le nufiafiadɔ aɖe wɔm le xexeame katã si kpe ɖe ame miliɔn geɖe ŋu xoxo be woɖu dulɔlɔ̃ kple fuléle ameƒomevi bubuwo, siwo gbɔ aʋawɔwɔ akpa gãtɔ tso la dzi.

Mlɔeba aʋawɔwɔ maganɔ anyi o le Mawu ƒe Fiaɖuƒe, si ahe ŋutifafa mavɔ kple dedienɔnɔ va anyigba dzii la te. (Psalmo 72:7; Daniel 2:44) Ekema hakpala la ƒe nyawo ava eme be: “Kpɔ Yehowa ƒe nuwɔwɔwo, amesi doa aƒedo anyigba, amesi tsia aʋawɔwɔwo nu vaseɖe anyigba ƒe mlɔenu ke.”—Psalmo 46:9, 10.